རྒྱ་ནག་དབུས་དམག་དོན་བཀོད་འདོམ་ཁང་གི་འགན་འཛིན་ཟུར་བ་གུ་ཅུན་ཧྲན་ལ་ཞིབ་བཤེར་བྱས་པ་བརྒྱུད་ཁོ་ལ་པེ་ཅིན་དུ་ཁང་པ་ ༣༠༠ ལྷག་ཡོད་པ་དང་ཁོས་ནག་ཚོགས་ལ་རྒྱ་སྒོར་དུང་ཕྱུར་ ༦ ལྷག་གི་ལྐོག་རྔན་སྤྲད་དེ་ཁོ་ལ་ངོ་ཡ་བྱེད་མཁན་ལྐོག་གསོད་བྱེད་རྩིས་བྱས་ཡོད་འདུག
ཉེ་ལམ་ཞིན་ཐཱང་རིན་(xin tangren)ཞེས་པའི་རྒྱ་ཡིག་དྲ་བར་གནས་ཚུལ་སྤེལ་བ་ལྟར་ན། ད་ལྟ་གྱོད་དོན་ལ་ཞིབ་བཤེར་བྱེད་བཞིན་པའི་རྒྱ་ནག་དབུས་དམག་དོན་བཀོད་འདོམ་ཁང་གི་འགན་འཛིན་གཞོན་པ་ཟུར་བ་གུ་ཅུན་ཧྲན་(Gu junshan)ལ་རྒྱ་སྒོར་དུང་ཕྱུར་ ༣༠༠ ལྷག་གི་གྱོད་དོན་དང་འབྲེལ་བ་ཡོད་ཅིང་། ཁོས་རྒྱ་སྒོར་དུང་ཕྱུར་ ༦ ལྷག་ནག་ཚོགས་ལ་ལྐོག་རྔན་སྤྲད་དེ་མི་གསོད་རྩིས་བྱས་ཡོད་པའི་གནས་ཚུལ་ཤེས་རྟོགས་བྱུང་ཡོད་འདུག
སྤྱིར་བཏང་གུ་ཅུན་ཧྲན་གྱི་གནས་ཚུལ་དེ་ཐོག་མ་རྒྱ་ནག་གི་སྲིད་འཛིན་ཧུའུ་ཅིན་ཐོ་ཡི་སྔོག་བཤེར་བྱས་ཏེ་ ༢༠༡༢ ལོའི་ལོ་མགོ་ནས་བྱུང་བ་ཞིག་ཡིན་པ་མ་ཟད། སྐབས་དེར་ཁོ་ལ་ལྐོག་ཟ་རུལ་སུངས་གཙོས་པའི་པེ་ཅིན་དུ་ཁྲིམས་མཐུན་མིན་པའི་སྡོད་ཁང་མང་པོ་ཞིག་ཡོད་པའི་གནས་ཚུལ་ཡང་ཁྱབ་ཡོད་ཅིང་། ཉེ་ལམ་ཁོ་ལ་པེ་ཅིན་དུ་གསང་བའི་སྡོད་ཁང་ཞིག་ཡོད་པ་ཧོང་ཀོང་གི་རྨ་བྱ་ (Fenhuang Zhoukan) གསར་འགོད་པ་ཞིག་གིས་མཐོང་ཡོད་འདུག གསང་བའི་སྤྲོ་ཚོམས་ཁང་དེ་ནི་གུ་ཅུན་ཧྲན་གྱིས་གཞུང་དོན་སྒྲུབ་སའི་དམག་དོན་བཀོད་འདོམ་ཁང་གི་ར་སྐོར་གྱི་ཟུར་ཞིག་ཏུ་ཡོད་ཅིང་། དམག་དོན་ཁང་དེའི་ལས་བྱེད་ཅིག་གིས་བརྗོད་པ་ལྟར་ན། གུ་ཅུན་ཧྲན་ཐོག་མ་པེ་ཅིན་དུ་ཡོང་བ་ནས་བཟུང་དམག་དོན་བཀོད་ཁང་གི་ར་བ་འདིར་བསྡད་ཡོད། ཁོས་གོ་སྐབས་དེ་བརྒྱུད་ནས་པེ་ཅིན་དུ་སྡོད་ཁང་མང་པོ་ཞིག་གསར་རྒྱག་བྱས་ཡོད་པ་དང་། ཡིན་ནའང་ཁོ་རང་ནམ་རྒྱུན་སྡོད་ས་ར་སྐོར་འདིའི་ནང་ཡིན་འདུག
ཁང་པ་དེ་ནི་གུ་ཅུན་ཧྲན་གྱི་གསང་བའི་སྡོད་ཁང་ཞིག་ཡིན་པ་དང་། གུ་ཅུན་ཧྲན་གྱི་ངོ་ཤེས་ཤིག་གིས་བརྗོད་པ་ལྟར་ན། ཁང་པ་དེ་ནི་ཐོག་མ་མེ་ཏོག་ལྡུམ་རྭའི་ནང་སྤང་འབུར་ཆུང་ཆུང་ཞིག་ཡོད་པ་དེའི་ཤུལ་ཡིན་པ་དང་། མི་མང་གིས་དོ་སྣང་དོགས་པ་མི་འབྱུང་ཆེད་ཁང་པ་དེའི་མཐའ་རུ་སྨྱུག་མ་སྦོམ་པོ་ཕོར་བའི་ཁ་ལྟ་བུའི་སྐོར་ཡོད་འདུག སྤྱིར་བཏང་རྒྱ་ནག་བྱང་རྒྱུད་ཀྱི་དྲོད་གྲང་ལྟར་ན། ཁང་པ་དེའི་མཐའ་རུ་སྨྱུག་མ་དེ་དག་སྐྱེས་ཐབས་མེད་ནའང་ཐོག་མ་ཁང་པ་བཟོ་འགོད་སྐབས། སྨྱུག་མ་དེ་དག་འདེབས་འཛུགས་བྱེད་ཡུལ་གྱི་ས་འོག་ཏུ་དྲོད་གྲང་སྙོམ་སྒྲིག་བྱེད་པའི་ལྕགས་སྦུག་བཙུགས་ཏེ་སྨྱུག་མ་དེ་དག་སྐྱེ་ཐབས་བྱས་ཡོད་འདུག མཐོ་ཞིང་སྟུག་པོའི་སྨྱུག་མ་དེ་དག་གིས་གུ་ཅུན་ཧྲན་གྱི་ཁང་པ་འགེབས་སྲུང་ལྟ་བུ་བྱས་ཡོད་ཅིང་། གལ་སྲིད་རྒྱུས་མངའ་མེད་མཁན་ཞིག་ཡིན་ན་ས་ཆ་དེར་ཁང་པ་ཞིག་ཡོད་པ་ཤེས་ཐུབ་མེད་མོད། གུ་ཅུན་ཧྲན་འཛིན་ཟུང་གིས་གྱོད་དོན་ཞིབ་བཤེར་བྱས་པ་བརྒྱུད་དེ་ཁང་པ་དེ་དང་། དེའི་འགྲམ་དུ་ཕྱི་བཀོད་ཚོགས་ཁང་གི་དབྱིབས་ཡིན་པའི་སྤྲོ་སྐྱིད་གཏོང་སའི་ཚོགས་ཁང་ཞིག་བཅས་རྙེད་སོན་བྱུང་འདུག
གུ་ཅུན་ཧྲན་གྱིས་དམག་དོན་བཀོད་འདོམ་སྡེ་ཚན་ར་བ་དེའི་ཟུར་གཞན་ཞིག་ཏུའང་ཐོག་རྩེག་ཅན་གྱི་ཁང་པ་ཞིག་རྒྱག་འཕྲོས་སུ་བཞག་ཡོད་ཅིང་། ཁང་རྩེག་དེར་གསོལ་མགྲོན་ཁང་ཞིག་གི་འཆར་འགོད་བྱས་ཡོད་ཀྱང་ད་བར་གཞུང་གིས་ཆོག་མཆན་ཐོབ་མེད་སྟབས། གུ་ཅུན་ཧྲན་གྱི་གྱོད་དོན་སྔོག་བཤེར་བྱས་ནས་བཟུང་ཁང་པ་དེའང་རྒྱག་འཕྲོས་སུ་ལྷག་ཡོད་འདུག
གཞན། པེ་ཅིན་ཙི་ཀྲོའི་ཡན་(Zi Zhuyuan)གླིང་ཀའི་ཉེ་འགྲམ་དུའང་གུ་ཅུན་ཧྲན་ལ་གནའ་དེང་ཟུང་འབྲེལ་གྱི་བཟོ་བཀོད་མཛེས་སྡུག་ལྡན་པའི་ལྡུམ་རྭའི་སྐོར་བའི་སྤྲོ་ཚོམས་ཁང་ཞིག་ཀྱང་ཡོད་འདུག ད་དུང་ཁོར་པེ་ཅིན་དུ་ཁང་པ་ཧ་ཅང་མང་པོ་ཞིག་ཡོད་འདུག་ལ། དམག་དོན་བཀོད་འདོམ་སྡེ་ཚན་གྱི་གནས་ཚུལ་ཕྱི་གྱར་བྱུང་བ་ལྟར་ན། གུ་ཅུན་ཧྲན་ལ་ཁྱོན་བསྡོམས་སྡོད་ཁང་ ༣༠༠ ལྷག་ཡོད་པ་དང་། རྩད་ཞིབ་བྱས་པ་བརྒྱུད་དེ་སྡོད་ཁང་ ༦༠ ཙམ་དངོས་སུ་ཤེས་རྟོགས་བྱུང་ཡོད་འདུག
༢༠༡༢ ལོ་ཟླ་ ༢ བའི་ནང་རྒྱ་ནག་གཞུང་གིས་གུ་ཅུན་ཧྲན་གྱི་གོ་གནས་བླངས་ཡོད་པ་དང་། ༢༠༡༤ ཟླ་ ༡ བའི་ནང་གུ་ཅུན་ཧྲན་གྱི་གྱོད་དོན་ཕྱི་བསྒྲགས། ༢༠༡༤ ཟླ་ ༣ ཚེས་ ༣༡ ཉིན་རྒྱ་ནག་དམག་དོན་ཞིབ་བཤེར་ཁང་གིས་གུ་ཅུན་ཧྲན་ལ་ལྐོག་ཟ་རུལ་སུངས་དང་། དབང་ཆ་སྒེར་སྤྱོད་ཀྱི་ཉེས་མིང་བཏགས་ཏེ་རྒྱ་ནག་དམག་དོན་ཁྲིམས་ཞིབ་ཁང་དུ་ཞུ་གཏུག་བྱས་ཡོད། ཁྲིམས་འཛིན་ཁང་དུ་འདྲི་གཅོད་བྱེད་པའི་ཉིན་ཤས་རིང་ཁོ་ཉིན་ལྟར་ཆུ་ཚོད་ཁ་ཤས་རིང་ངུ་བཞིན་ཡོད་པའི་སྲོལ་ཡང་བྱུང་ཡོད།
ག
ཞན། ཟླ་འདིའི་ཚེས་ ༡༠ ཉིན་ཧོང་ཀོང་གི་གསར་ལམ་ཐོག་གནས་ཚུལ་ཐོན་པར། གུ་ཅུན་ཧྲན་ལ་རྒྱ་སྒོར་དུང་ཕྱུར་ ༣༠༠ ལྷག་གི་གྱོད་དོན་དང་འབྲེལ་བ་ཡོད་པ་དང་། རྒྱ་སྒོར་དུང་ཕྱུར་ ༦ ལྷག་གཞན་ལ་ལྐོག་རྔན་སྤྲད་ཡོད་པ་མ་ཟད། ཉེ་ཆར་རྩད་ཞིབ་བྱུང་པ་ལྟར་ན། ཁོ་ལ་གསེར་སྤྱི་རྒྱ་ ༤༠༠ དང་། ལོ་ཆང་མོ་ཐེད་ (Maotai) ཤོག་སྒམ་ ༡༨༠༠ལྷག (མོ་ཐེད་ཆང་ལ་རིན་གོང་འདྲ་མིན་ཡོད་ཅིང་། སྙལ་བའི་ལོ་གྲངས་ལྟར་ཤེལ་དམ་གཅིག་ལ་རྒྱ་སྒོར་ ༦༠༠ ནས་ ༤༢༩༩༨ བར་ཡིན་འདུག) ད་དུང་བྱང་ཤར་སྟག་པགས་ ༡༡ དང་ཨ་ཧྥི་རི་ཀའི་གླང་ཆེན་ཆེ་བ་ ༡༠། གསེར་གྱི་སྐུ་འདྲ་སྤྱི་རྒྱ་གཉིས་ཅན་ཁ་ཤས། དེ་མིན་གྱི་རྩ་ཆེའི་དངོས་པོ་སྣ་ཚོགས་བཅས་ཡོད་འདུག
གུ་ཅུན་ཧྲན་གྱི་ངོ་ཤེས་ཚོས་བརྗོད་པ་ལྟར་ན། གུ་ཅུན་ཧྲན་འགན་འཛིན་གཞོན་པའི་ལས་འགན་འཁུར་བའི་སྐབས་སུ་ཁོ་ལ་རྒྱབ་རྟེན་བཙན་པོ་ཞིག་ཡོད་པའི་བདེན་དཔང་གཅིག་ནི། ཁོས་སྐབས་དེའི་ཁོ་རང་གི་མགོ་གཙོ་ལའོ་ཡེ་ལོན་ (Liao Yilong) ལ་འདི་ལྟར་བཤད་འདུག་ “ཁྱོད་ཀྱིས་རང་ཉིད་དམག་དོན་ཨུ་ཡོན་དང་བཀོད་འདོམ་འགན་འཛིན་ཡིན་མ་བསམ། ངས་ཁྱོད་རང་སོང་ཟེར་དུས་འགྲོ་དགོས། ” ཞེས་བརྗོད་ཡོད་པ་དང་། དེ་བཞིན་ཁོ་རང་ལས་གོ་གནས་མཐོ་བའི་ལའོ་ཡན་ ( Liu yuan )ལའང་། “ ངའི་གོ་གནས་རྗེས་མ་སྤྱིའི་དམག་དོན་འགན་འཛིན་གཞོན་པ་ཡིན་ལ། དབུས་ཨུ་ཡོན་བཞིའི་ཁྲོད་དུ་ང་ཡོད་པའི་དུས་ཚོད་ཅིག་ཆར་ངེས་ཡིན་སྟབས། ངས་ཁྱོད་ཀྱི་ལམ་མི་འགོག་ལ་ཁྱོད་ཀྱིས་ཀྱང་ང་ལ་བར་ཆད་མ་བྱེད།” ཅེས་བརྗོད་ཡོད་འདུག
༢༠༡༡ ལོའི་ཟླ་ ༡༢ ཚེས་ ༢༥ ནས་ཚེས་ ༢༨ ཉིན་བར་གྱི་རྒྱ་ནག་དམག་དོན་ཨུ་ཡོན་ཚོགས་ཆེན་སྟེང་། ལའོ་ཡོན་གྱིས་གུ་ཅུན་ཧྲན་གྱི་ལྐོག་ས་རུལ་སུངས་ཀྱི་གྱོད་དོན་གླེང་ཡོད་པ་དང་། དེའི་རྗེས་ཧུའུ་ཅིན་ཐོ་ ( Hu Jintao) དང་ཞི་ཅིན་ཕིན་ ( Xi Jinping)གཉིས་ཀྱིས་རིམ་པ་བཞིན་གྱོད་དོན་དེར་ཞིབ་བཤེར་བྱེད་སྐབས། གུ་ཅུན་ཧྲན་གྱིས་ནག་ཚོགས་ལ་ལྐོག་རྔན་འབོར་ཆེན་སྤྲད་དེ། ལའོ་ཡན་གྱི་སྡོད་གནས་ཁ་བྱང་དང་འཚོ་བའི་གོ་རིམ་སོགས་བཤད་དེ་ཁོ་ལྐོག་གསོད་བྱེད་རྩིས་བྱེད་རྒྱུར་འཆར་འགོད་བྱས་ཡོད་འདུག
རྒྱ་ནག་གི་སྲིད་དོན་དབྱེ་ཞིབ་པ་ཚོས། གུ་ཅུན་ཧྲན་ནི་ལའོ་ཡན་དང་ལེའོ་ཡེ་ལོན་གཉིས་དང་བསྡུར་ན་གོ་གནས་དམའ་བོ་ཡིན་ཡང་། ཁོ་ལ་དེ་འདྲའི་སྤོབས་པ་དང་ང་རྒྱལ་ཆེན་པོ་ཡོད་དོན་ནི། ཁོའི་རྒྱབ་རྩར་སྟོབས་ཤུགས་ཧ་ཅང་ཆེན་པོ་ཡོད་པའི་དཔུང་ཁག་ཅིག་ཡོད་པ་མཚོན་ཐུབ་ཅེས་རྗོད་བཞིན་ཡོད།
མའོ་རང་མདོག རྗེན་པ་སྟོན་པའིམ་དུས་བབ་པ་འདྲ། ཧཧ། ཧོ་ཧོ། དགའ་ཡང་དགའ་བ་ལ། སྐྱིད་ཡང་སྐྱིད་པ་ལ། གཞན་གཏོང་དགོས།