ལིན་ཅི་ཧྭ་ཡི་དགའ་རོགས་མཛེས་མ་ཧྥིན་ཀྲའོ་གང་དུ་ཕྱིན་པ་རེད།

རྒྱ་དཔོན་ལིན་ཅི་ཧྭ་ལ་ཞིབ་བཤེར་བྱས་པ་བརྒྱུད་དེ་ཁོའི་སྐྱེས་དམན་གྱི་ནུ་བོ་ཀོ་ཡོན་ཞོའང་ལིན་ཅི་ཧྭ་ཡའི་བུའི་རླངས་འཁོར་དོན་རྐྱེན་དང་འབྲེལ་བ་ཡོད་པའི་གླེང་གཞི་གསར་པ་ཞིག་བྱུང་ཡོད་མ་ཟད། ལིན་ཅི་ཧྭ་ཡི་དགའ་རོགས་རྒྱ་ནག་དབུས་བརྙན་འཕྲིན་ཁང་ཆབ་སྲིད་སྡེ་ཁག་གི་འགན་འཛིན་གཞོན་པ་མཛེས་མ་ཧྥིན་ཀྲའོ་ཡང་ཉེ་ལམ་ཞིག་ནས་བོར་བརླག་ཏུ་ཕྱིན་ཡོད་པའི་གནས་ཚུལ་འཐོན་འདུག

གཟའ་མིག་དམར་ཉིན། རྒྱ་ནག་ལ་ལྟ་བ་ཞེས་པའི་དྲ་ཚིགས་སྟེང་གནས་ཚུལ་སྤེལ་བ་ལྟར་ན། རྒྱ་ནག་མི་དམངས་ཆབ་སྲིད་གྲོས་ཚོགས་ཀྱི་ཚོགས་གཙོ་གཞོན་པ་དེ་སྔའི་སྲིད་འཛིན་ཧུའུ་ཅིན་ཐོ་ཡི་དྲུང་ཡིག་ཟུར་བ། རྒྱ་ནག་དབུས་འཐབ་ཕྱོགས་གཅིག་གྱུར་གྱི་འགན་འཛིན་གཞོན་པ་ལིན་ཅི་ཧྭ་ཡི་སྐྱེས་དམན་གྱི་ནུ་བོ་རྒྱ་ནག་ཧེ་ལོན་ཅང་ཞིང་ཆེན་སྤྱི་བདེ་ལས་ཁུངས་ཀྱི་འགན་འཛིན་གཞོན་པ་ཀོ་ཡོན་ཞོ་ (Gu Yuanxu)ལའང་རྒྱ་ནག་གཞུང་གིས་ཞིབ་བཤེར་བྱས་ཡོད་ཀྱང་དེའི་སྐོར་གཞུང་འབྲེལ་ཐོག་ཕྱིར་བསྒྲགས་བྱས་མི་འདུག

ཕྱི་ལོགས་ཀྱི་གསར་ལམ་ཁག་ཅིག་ནང་གནས་ཚུལ་ཐོན་པར། ཀོ་ཡོན་ཞོ་ལ་ཞིབ་བཤེར་བྱེད་དོན་ལིན་ཅིན་ཧྭ་ཡི་བུ་ལིན་ཀོ་(Ling Gu)ཡི་རླངས་འཁོར་བརྡབ་སྐྱོན་དང་འབྲེལ་བ་ཡོད་པ་མ་ཟད། ལིན་ཀོའི་རླངས་འཁོར་བརྡབ་སྐྱོན་བྱུང་མ་ཐག ཀོ་ཡོན་ཞོ་ཡིས་ཁོ་རང་གི་དབང་ཚད་བེད་སྤྱོད་བཏང་ནས་འགྲིམ་འགྲུལ་དོན་རྐྱེན་དེར་ཐེ་གཏོགས་བྱས་ཡོད་པ་བརྗོད་འདུག

རྒྱ་ནག་གཞུང་འབྲེལ་གསར་ལམ་ཐོག་ཀོ་ཡོན་ཞོ་ཡི་གནས་ཚུལ་བཀོད་པ་མཐའ་མ་དེ་ནི་ ༢༠༡༤ལོ་ཟླ་ ༡༢ ཚེས་ ༥ ཉིན་ཡིན་པ་དང་། དེ་ནི་རྒྱ་ནག་ཧྲིན་ཡོང་གྲོང་ཁྱེར་ནས་ཤར་བྱང་ས་ཁུལ་གྱི་དམག་དོན་མཉམ་འབྲེལ་ཚོགས་འདུ་ཞིག་གི་སྟེང་ཀོ་ཡོན་ཞོ་ཞུགས་པའི་སྐོར་ཡིན་འདུག་ཀྱང་། ད་ལྟ་ཧེ་ལོན་ཅང་ཞིང་ཆེན་སྤྱི་བདེ་ལས་ཁུངས་ཀྱི་དྲ་ཚིགས་སྟེང་ཀོ་ཡོན་ཞོ་ཡི་མིང་དང་གནས་ཚུལ་ཡོངས་རྫོགས་ནག་གསུབ་བཏང་ཡོད་འདུག

ཕྱི་ལོ་ ༢༠༡༢ ལོའི་ཟླ་ ༣ ཚེས་ ༡༨ ཉིན་ལིན་ཀོ་ཡི་རླངས་འཁོར་བརྡབ་སྐྱོན་བྱུང་སྟེ་སྐར་མ་ ༡༥ ཕྱིན་རྗེས་སུ་པེ་ཅིན་འགྲིམ་འགྲུལ་བདེ་སྲུང་མི་སྣ་བསླེབས་སྐབས། ལིན་ཅི་ཧྭ་ཡིས་ཀྱང་གནས་ཚུལ་དེ་གསར་ལམ་ཁག་ཏུའགེབས་སྲུང་ཆེད། ཁོས་རྒྱ་ནག་འཐབ་ཕྱོགས་གཅིག་གྱུར་འགན་འཛིན་གྱི་དབང་ཆ་བེད་སྤྱད་དེ་དབུས་བདེ་སྲུང་དམག་མི་བཏང་སྟེ། ས་གནས་དེ་བཀག་སྡོམ་བྱས་ཡོད་འདུག

ཉིན་དེར་གླ་གཏོང་རླངས་འཁོར་ཁ་ལོ་བ་ཞིག་གིས་དངོས་མཐོང་གནས་ཚུལ་བརྗོད་པ་ལྟར་ན། རླངས་འཁོར་བརྡབ་སྐྱོན་བྱུང་བའི་རྗེས་སུ་པེ་ཅིན་སྲང་ལམ་དུ་མེ་སྒྱོགས་དང་དམག་མི་འབོར་ཆེན་བསླེབས་པ་དང་། དབུས་བདེ་སྲུང་ལས་ཁུངས་ཀྱི་དཔོན་རིགས་མཐོ་གྲས་གསུམ་དང་དབུས་གཞུང་དོན་ཁང་གི་འགན་འཛིན་གཞོན་པ་ཞིག་བཅས་ཀྱང་དོན་རྐྱེན་བྱུང་ནས་དུས་ཚོད་གཅིག་གི་རྗེས་སུ་ཡུལ་ངོས་ལ་འབྱོར་ཡོད་པའི་གནས་ཚུལ་བརྗོད་འདུག

གནས་ཚུལ་དབྱེ་ཞིབ་པ་ཚོས་བརྗོད་པ་ལྟར་ན། རླངས་འཁོར་དོན་རྐྱེན་དེ་ཀྲུའུ་ཡོན་ཁང་གིས་གསལ་བོར་ཐོས་མ་ཐག ཁོ་པེ་ཅིན་སྤྱི་བདེ་ལས་ཁུངས་སུ་བསྐྱོད་ཡོད་པ་དང་། ཀྲུའུ་ཡོན་ཁང་དང་ལིན་ཅི་ཧྭ་གཉིས་ཀྱིས་གྲོས་མོལ་བྱས་མཐར། ཀྲུའུ་ཡོན་ཁང་གི་རོགས་སྐྱོར་འོག་ལིན་ཅི་ཧྭ་དབུས་རྒྱུན་ལས་ཨུ་ཡོན་ལྷན་ཁང་དུ་འགྲོ་ཐུབ་བྱ་རྒྱ་དང་། ལིན་ཅི་ཧྭ་ཡིས་ཧུའུ་ཅིན་ཐོ་ལ་ཀྲུའུ་ཡོན་ཁང་གི་གྱོད་དོན་ལ་ཁ་ཡ་མི་བྱེད་པ་དང་དབུས་སྒྲིག་ཁྲིམས་ཞིབ་བཤེར་ཁང་གིས་ཀྲུའུ་ཡོན་ཁང་གི་གྱོད་དོན་རྩད་ཞིབ་མཚམས་འཇོག་བྱེད་འཇུག་རྒྱུ་སོགས་གྲོས་མོལ་བྱས་ཏེ། ལིན་ཅི་ཧྭ་དང་ཀྲུའུ་ཡོན་ཁང་གཉིས་མཉམ་འབྲེལ་གྱི་ཚོགས་ཁག་ཅིག་གསར་འཛུགས་བྱས་ཡོད་འདུག

གནས་ཚུལ་དེའི་ནང་བཀོད་པར། རླངས་འཁོར་བརྡབ་སྐྱོན་ཁྲོད་བུ་མོ་གཉིས་ཀྱི་ནང་མི་ལ་གུན་གསབ་ཆེད་རྒྱ་སྒོར་ཁྲི་༣༠༠༠ སྤྲོད་རྒྱུ་བྱས་ཡོད་པ་དེར། ཀྲུའུ་ཡོན་ཁང་གིས་རོགས་སྐྱོར་བྱ་རྒྱུ་ཁས་ལེན་བྱས་ཏེ་དངུལ་དེའི་ཕྱེད་ཀ་ཀྲུའུ་ཡོན་ཁང་གི་བུ་ཀྲུའུ་བེན་ཁྲོ་ (Zhou Binchu)ཡིས་སྤྲོད་རྒྱུ་དང་ཕྱེད་ཀ་ཀོ་ཡོན་ཞོ་ཡིས་སྤྲོད་རྒྱུ་བྱས་ཡོད་འདུག ནན་ཧྭ་གསར་ཤོག་སྟེང་གནས་ཚུལ་སྤེལ་བ་ལྟར་ན། རླངས་འཁོར་དོན་རྐྱེན་དེའི་རྗེས། རྒྱ་ནག་རྡོ་སྣུམ་ལས་ཁོངས་ཀྱི་མགོ་གཙོ་ཅཱིང་ཇེ་མིན་(Jian Jiemin)གྱིས་རྒྱ་སྒོར་འབོར་ཆེན་ཞིག་རྡོ་སྣུམ་དངུལ་བྱང་བརྒྱུད་བུ་མོ་རྨས་མ་དེ་གཉིས་ཀྱི་ཁྱིམ་བདག་གི་དངུལ་བྱང་སྟེང་བསྐུར་ཡོད་ཚུལ་བསྒྲགས་འདུག

རླངས་འཁོར་དོན་རྐྱེན་བྱུང་བའི་ཉིན་དེར། ཀོ་ཡོན་ཞོ་དང་རྒྱ་ནག་སྤྱི་ཚོགས་དོ་དམ་བདག་སྐྱོང་ཁང་གི་མགོ་གཙོ་ཀྲུའུ་པིན་ཧྲོན་ (Zhou Benshun)གཉིས་ཀྱིས་དུས་ཚོད་ ༢༤ ནང་པེ་ཅིན་གྱི་འགྲིམ་འགྲུལ་བདེ་སྲུང་མི་སྣ་ཚོ་ལ། ལིན་ཀོ་དང་འབྲེལ་བ་ཡོད་པའི་ཡིག་ཆ་ཁག་གི་རུས་མིང་ཐེངས་གསུམ་ལ་བརྗེ་བསྒྱུར་བྱེད་བཅུག་མཐར། ཤི་བོའི་རུས་མིང་ཅཱ་ (Jia)ལ་བསྒྱུར་ཅིང་། པེ་ཅིན་གྱི་སྡོད་གནས་ཁ་བྱང་ཡང་བརྗེ་ཡོད་འདུག ད་དུང་། རྨས་མ་བུ་མོ་གཉིས་ཉེན་སྐྱོབ་བྱེད་བཞིན་པའི་སྐབས་སུ། ཀོ་ཡོན་ཞོ་ཡིས་ཨུ་ཚུགས་ཀྱིས་ཤི་བོའི་རུས་ལ་ཅཱ་ཡིན་པའི་མིང་རྟོགས་བཀོད་དུ་བཅུག་ཡོད་པ་དང་། རླངས་འཁོར་དོན་རྐྱེན་དེའི་སྐོར་ཕྱི་ལ་བསྒྲགས་མི་ཆོག་ཅིང་། གལ་སྲིད་ཕྱི་གྱར་བྱུང་ན་རྨས་མའི་ཁྱིམ་ཚང་གཉིས་ཀ་རྩ་མེད་བཟོ་རྒྱུའི་འཇིགས་སྐུལ་ཡང་བྱས་ཡོད་འདུག

ཀོ་ཡོན་ཞོ་ཡིས་ཉིན་དེའི་རླངས་འཁོར་དོན་རྐྱེན་ཐོ་འགོད་ཡིག་ཆ་ཚང་མ་མེད་པར་བཟོས་ཡོད་པ་མ་ཟད། སྐབས་དེའི་གནས་ཚུལ་བེའུ་པོ་(weibo)དྲ་ཚིགས་སྟེང་བཀོད་ཡོད་པའང་ནག་གསུབ་གཏོང་དུ་བཅུག་ཡོད་འདུག དེ་བཞིན། གསར་ཁང་གཞན་གཉིས་ཀྱིས་གནས་ཚུལ་དེ་ཚགས་པར་སྟེང་འགོད་འཆར་ཡོད་ཀྱང་རྗེས་སུ་དེའང་ཕྱིར་འཐེན་བྱེད་དགོས་བྱུང་ཡོད་པ་མ་ཟད། སྐབས་དེར་རྒྱ་ནག་གི་དྲ་ཚིགས་ ༡༦ ཙམ་ལ་ཛ་དྲག་གི་སྔོག་བཤེར་དང་། དྲ་ཚིགས་ ༣༡༠༠ ལྷག་ལ་ཁྲིམས་འགལ་ཉེས་ཆད་ཕོག་ཡོད་པ་སོགས་ཀྱང་ཀོ་ཡོན་ཞོ་ཡི་ལྐོག་ཇུས་ཡིན་ཚུལ་བརྗོད་འདུག

ཀོ་ཡོན་ཞོ་ནི་ཕྱི་ལོ་ ༡༩༦༣ ལོ་པེ་ཅིན་དུ་སྐྱེས་ཤིང་། པེ་ཅིན་དགེ་མཐོ་སློབ་ཆེན་མཐར་ཕྱིན་རྗེས། ཀྲུང་དབྱང་བརྙན་འཕྲིན་ཁང་གི་བདེ་སྲུང་ཚན་པར་བདེ་སྲུང་དམག་མི་དཀྱུས་མ་ཞིག་གི་ལས་ཀ་བྱས་ཡོད་ཅིང་། ལོ་ཤས་རྗེས་ཉེན་རྟོག་པ་ངོ་མ་ཆགས་རྗེས་ལིན་ཅི་ཧྭ་ཡིས་རོགས་སྐྱོར་འོག་ ༢༠༠༩ ལོར་རྒྱལ་ཁབ་འཇིགས་སྐུལ་རྒོལ་རྡུང་ཚོགས་ཆུང་(国家反恐怖工作协调小组)གི་ཚོགས་གཙོར་བསྐོས་ཡོད་འདུག ༢༠༡༠ ལོའི་ལོ་མགོར་སྤྱི་བདེ་ལས་ཁུངས་ ༢༧ པའི་འཇིགས་སྐུལ་རྒོལ་རྡུང་འགན་འཛིན་གཞོན་པར་བསྐོས་ཡོད་འདུག ལོ་དེའི་ཟླ་ ༩ བའི་ནང་ཀྲུའུ་ཡོན་ཁང་དང་ལིན་ཅི་ཧྭ། ཧེ་ལོན་ཅང་ཞིང་ཆེན་ཨུ་ཡོན་མགོ་གཙོ་ཅི་པེན་ཞུན་ (Ji Bingxuan)བཅས་ཀྱི་རོགས་རམ་འོག་ཧེ་ལོན་ཅང་ཞིང་ཆེན་སྤྱི་བདེ་ལས་ཁང་གི་འགན་འཛོན་གཞོན་པར་ཚོད་ལྟ་ལོ་གཉིས་ལ་བྱས་རྗེས། ༢༠༡༢ ལོ་ཟླ་ ༩ བའི་ནང་ཧེ་ལོན་ཅང་ཞིང་ཆེན་སྤྱི་བདེ་ལས་ཁུངས་ཀྱི་འགན་འཛོན་གཞོན་པ་དངོས་ཆགས་ཡོད་འདུག

གཞན་ཡང་། ཕྱི་ཟླ་ ༡༢ པའི་ཚེས་ ༢༧ ཉིན་ཝུན་ཞའོ་ཁྲིན་ཞེས་པའི་རྒྱ་ཡིག་དྲ་བའི་སྟེང་གནས་ཚུལ་བཀོད་པ་ལྟར་ན། ལིན་ཅི་ཧྭ་ཡི་དགའ་མར་གྲགས་པའི་ཀྲུང་དབྱང་བརྙན་འཕྲིན་ཁང་གི་ཆབ་སྲིད་གསར་འགྱུར་སྡེ་ཁག་གི་རྩོམ་སྒྲིག་འགན་འཁུར་བ་མཛེས་མ་ཧྥིན་ཀྲའོ་(Feng Zhou)ཟེར་བ་དེ་ཡང་ཉེ་ལམ་ཞིག་ནས་བོར་བརླག་ཕྱིན་ཡོད་ཚུལ་དང་། ཁོ་མོ་ཐོག་མ་ ༢༠༠༥ ལོ་ཙམ་ནས་ལིན་ཅི་ཧྭ་ཡི་དགའ་རོགས་ཡིན་ཚུལ་སྤྱི་ཚོགས་ནང་ཁྱབ་ཡོད་པ་མ་ཟད། ཁོ་མོར་ཀྲུང་དབྱང་བརྙན་འཕྲིན་ཁང་གི་འགན་འཛིན་གཞོན་པའི་གོ་གནས་ཐོབ་པ་དེ་ཡང་ལིན་ཅི་ཧྭ་ཡི་རོགས་རམ་ལ་བརྟན་པ་ཞིག་ཡིན་ཚུལ་སོགས་འཁོད་འདུག

ད་ལོའི་ཕྱི་ཟླ་ ༩ བའི་ནང་རྒྱ་ནག་གི་གསར་ལམ་ཁག་དུ་མཛེས་མ་ཧྥིན་ཀྲའོ་ལ་ཀྲུང་དབྱང་བརྙན་འཕྲིན་ཁང་གི་ཕུལ་བྱུང་ལས་བྱེད་ཀྱི་གཟེངས་རྟགས་ཐོབ་ཡོད་པའི་གནས་ཚུལ་ཐོན་ཡོད། འོན་ཀྱང་ཟླ་དེའི་ཟླ་དཀྱིལ་ཙམ་ནས་མཛེས་མ་ཧྥིན་ཀྲའོ་ལ་འབྲེལ་བ་བྱེད་ཐུབ་ཀྱི་མེད་པ་ཆགས་ཡོད་སྟབས། དཔྱད་བརྗོད་པ་ཚོས་གཅིག་བྱས་ན་མཛེས་མ་ཧྥིན་ཀྲའོ་ལ་རྒྱ་ནག་གཞུང་གིས་ཞིབ་བཤེར་བྱེད་མགོ་བཙུགས་ཡོད་པ་དང་། ཡང་ན། མོས་གྱོད་དོན་ཁག་ཅིག་ཐད་རྒྱ་ནག་གཞུང་ཁྲིམས་འཛིན་ལས་ཁུངས་ལ་རམ་འདེགས་བྱེད་ཀྱིན་ཡོད་པའི་ཚོད་དཔག་བྱས་ཡོད།

ཧྥིན་ཀྲའོ་ནི་ ༡༩༩༨ ལོར་ཀྲུང་དབྱང་བརྙན་འཕྲིན་ཁང་དུ་འཛུལ་བཞུགས་བྱས་པ་དང་། ལོ་གཉིས་ཀྱི་རྗེས་སུ་བརྙན་འཕྲིན་ཁང་དེའི་ཆབ་སྲིད་གསར་འགྱུར་སྡེ་ཚན་དུ་བསྐོ་བཞག་བྱས་ཡོད་ཀྱང་། བརྙན་འཕྲིན་ཁང་གི་ལས་བྱེད་ཚོས་བརྗོད་པ་ལྟར་ན། སྤྱིར་བཏང་གི་ལས་བྱེད་དཀྱུས་མ་ཞིག་ཡིན་ན་ཉུང་མཐར་ཀྲུང་དབྱང་བརྙན་འཕྲིན་ཁང་དུ་ལོ་ ༤ ནས་ ༥ ལ་བྱ་བ་བསྒྲུབས་པའི་རྗེས་ལ་གཞི་ནས་ལས་ཁུངས་ལྟེ་བའི་ལས་བྱེད་དུ་བསྐོ་བཞག་བྱེད་སྲོལ་ཡོད་ཀྱང་། ཧྥིན་ཀྲའོ་ལོ་གཉིས་ཟིན་མ་ཐག་ལས་ཁུངས་ལྟེ་བའི་ལས་བྱེད་ཆགས་ཡོད་པ་མ་ཟད། ༢༠༠༨ ལོར་འགན་འཛིན་གཞོན་པར་བསྐོ་བཞག་བྱས་ཡོད་པ་དེ་དག་གིས་ཁོ་མོ་རྒྱ་ནག་གི་དཔོན་རིགས་མཐོ་གྲས་ཤིག་ལ་འབྲེལ་བ་དམ་ཟབ་ཡོད་པ་རྟོགས་ཐུབ་ཚུལ་རྗོད་བཞིན་ཡོད།

ཕྱི་ཟླ་ ༩ ཚེས་ ༢༦ ཉིན་ནས་བཟུང་རྒྱ་ནག་གི་གསར་ལམ་ཁག་ཅིག་ཏུ། ཀྲུང་དབྱང་བརྙན་འཕྲིན་ཁང་གི་ལས་བྱེད་ཚོས་ཀྲུང་དབྱང་ཆབ་སྲིད་གསར་འགྱུར་སྡེ་ཚན་གྱི་འགན་འཛིན་གཞོན་པ་ཧྥིན་ཀྲའོ་ལ་བདུན་ཕྲག་གཅིག་གི་སྔོན་ཙམ་ནས་འབྲེལ་བ་བྱེད་མི་ཐུབ་པ་ཆགས་ཡོད་སྐོར་བསྒྲགས་ཡོད་པ་དང་། འོན་ཀྱང་ཁོ་མོར་གནས་ཚུལ་ཅི་བྱུང་ད་ཆར་ཁ་གསལ་གང་ཡང་མེད་པ་མ་ཟད། རྒྱ་ནག་གཞུང་ངོས་ནས་ཀྱང་ཁོ་མོར་ཞིབ་བཞེར་བྱེད་ཀྱི་ཡོད་མེད་ཀྱང་ཕྱིར་བསྒྲགས་བྱས་མེད།

ཧྥིན་ཀྲའོ་ནི་ཕྱི་ལོ་ ༡༩༩༨ ཟླ་ ༨ པའི་ནང་དངོས་གཞི་སློབ་མཐར་ཕྱིན་རྗེས་ཀྲུང་དབྱང་བརྙན་འཕྲིན་གསར་འགྱུར་སྡེ་ཚན་ལྟེ་བའི་རྩོམ་སྒྲིག་པ་ལོ་གཉིས་བྱས་རྗེས་ཆབ་སྲིད་གསར་འགྱུར་སྡེ་ཁག་ཏུ་བསྐོས་ཡོད་པ་དང་། ༢༠༠༨ ལོར་ཆབ་སྲིད་གསར་འགྱུར་སྡེ་ཁག་གི་འགན་འཛིན་གཞོན་པར་བསྐོས་འདུག ཀྲུང་དབྱང་བརྙན་འཕྲིན་དྲ་བར་གནས་ཚུལ་བཀོད་པ་ལྟར་ན་། ཆབ་སྲིད་གསར་འགྱུར་སྡེ་ཁག་ནི་ ༢༠༠༨ ལོའི་ཟླ་ ༨ པའི་ནང་གཞི་ནས་དབུ་བརྙེས་ཡོད་པ་དང་། གསར་ཁང་དེའི་ནང་དོན་གཙོ་བོ། རྒྱ་ནག་གི་དཔོན་རིགས་མཐོ་གྲས་ཚོའི་ཕྱི་ནང་གི་ལས་འཆར་ཁག་དང་རྒྱལ་ཁབ་ཀྱི་ཆབ་སྲིད། ཕྱི་འབྲལ་གྱི་གལ་ཆེའི་ལས་དོན་སྐོར་གྱི་གསར་འགྱུར་ཁག་ཁྱབ་སྤེལ་བྱེད་ཀྱིན་ཡོད་འདུག

ཀྲུང་དབྱང་བརྙན་འཕྲིན་ལས་ཁང་གི་ལས་བྱེད་ཅིག་གིས་བརྗོད་པ་ལྟར་ན། མཛེས་མ་ཧྥིན་ཀྲའོ་ཡི་འོག་གི་སྡེ་ཁག་དེ་ནི་ཀྲུང་དབྱང་བརྙན་འཕྲིན་ཁང་གི་ཆབ་སྲིད་གསར་འགྱུར་གྱི་ལྟེ་བ་ཡིན་ཞིང་། སྡེ་ཁག་དེར་ཡང་ནང་གསེས་ཆབ་སྲིད་དང་དཔལ་འབྱོར། སྤྱི་ཚོགས་བཅས་སྡེ་ཚན་མ་འདྲ་བ་ཁ་ཤས་ཡོད་པ་དང་། ཆབ་སྲིད་སྡེ་ཚན་དུ་ལས་བྱེད་ ༤༠ ནས་ ༥༠ ཙམ་ཡོད་ཅིང་། དཔལ་འབྱོར་དང་སྤྱི་ཚོགས་སྡེ་ཚན་དུ་ལས་བྱེད་ ༣༠༠ ལྷག་ཡོད་ཅེས་བརྗོད་འདུག

ཀྲུང་དབྱང་བརྙན་འཕྲིན་དྲ་བས་ཀྱང་ཧྥིན་ཀྲའོ་ལ་བསྟོད་སྔགས་མང་པོ་བྱས་ཡོད་ཅིང་། ༢༠༠༥ ལོའི་ཟླ་ ༤ བའི་ནང་རྒྱ་ནག་མགོ་གཙོ་ཞིག་ཕྱིར་སྐྱོད་སྐབས། ཆབ་སྲིད་སྡེ་ཁག་གི་རྩོམ་སྒྲིག་པ་ཧྥིན་ཀྲའོ་དུས་ཚོད་ ༢༤ ལ་གཉིད་མེད་པར་ལས་ཀ་བྱས་ཡོད་པ་མ་ཟད། ཧྥིན་ཀྲའོ་ཡི་གསར་འགྱུར་མང་པོ་ཞིག་ལ་བྱ་དགའ་རག་ཡོད་ཅིང་། མོ་བརྒྱུད་ནས་ཀྲུང་དབྱང་བརྙན་འཕྲིན་ཁང་ལ་ “ལྔ་བཞི་གཞོན་ནུའི་བྱ་དགའ་”སོགས་བྱ་དགའ་མང་པོ་ཞིག་རག་མྱོང་ཡོད་འདུག