སྒྱུ་རྩལ་པ་ཀྲའོ་པིན་ཧྲན་ཞི་ཅིན་ཕིན་གྱི་རྙི་སྒོར་བསླེབས།

ཟླ་འདིའི་ཚེས་ ༡༦ ཉིན་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ལའོ་ནེན་ཞིང་ཆེན་སྲིད་གཞུང་གི་དྲུང་ཡིག་གཞོན་པ་ཝེའུ་ཅོན་ཞིན་(Wei Junxing)ལ་ཁྲིམས་འགལ་དོགས་གཞིའི་འོག་ཞིབ་བཤེར་བྱེད་བཞིན་ཡོད་པ་གསལ་བསྒྲགས་བྱས་པ་དང་མཉམ་དུ། རྒྱ་ནག་གི་གཏམ་བརྗོད་འཁྲབ་སྟོན་པ་གྲགས་ཆེན་ཀྲའོ་པིན་ཧྲན་ (Zhao Benshan)དང་ཝེའུ་ཅོན་ཞིན་གཉིས་འབྲེལ་བ་ཡོད་སྐོར་སྤྱི་ཚོགས་དྲ་ལམ་ཁག་ཏུ་རྗོད་བཞིན་འདུག

སྒྱུ་རྩལ་པ་ཀྲའོ་པིན་ཧྲན་ནི་རྒྱ་ནག་ནང་སྐད་གྲགས་ཆེ་བའི་གློག་བརྙན་དང་གཏམ་བརྗོད་འཁྲབ་སྟོན་པ་དང་། རོལ་དབྱངས་སྒྱུ་རྩལ་པ། མིང་གྲགས་ཆེ་བའི་པིན་ཧྲན་བརྒྱུད་ལམ་ (本山传媒)གྱི་འགན་འཛིན་བཅས་ཡིན། ༢༠༡༢ ལོར་རྒྱ་ནག་ཁྲོན་ཆེན་གྲོང་ཁྱེར་སྤྱི་ཁྱབ་པའོ་ཞི་ལེ་དང་ཉེན་རྟོག་འགན་འཛིན་ཝང་ལིའི་ཅུན་གཉིས་ཀྱི་གྱོན་དོན་ཕྱི་ཕྱོགས་སུ་ཁྱབ་པ་དང་འབྲེལ་ཏེ། ཀྲའོ་པིན་ཧྲན་ཡང་སྤྱི་ཚོགས་ནང་གླེང་སློང་བྱུང་མགོ་ཚུགས་ཡོད་ཅིང་། རིམ་གྱིས་སྒྱུ་རྩལ་གར་སྟེགས་དང་བརྙན་འཕྲིན་བརྒྱུད་ལམ། སྤྲོ་ཚོགས་མཛད་སྒོ་སོགས་སུའང་ཀྲའོ་པིན་ཧྲན་གྱི་སྣང་བརྙན་ཇེ་ཉུང་དུ་ཕྱིན་ཡོད།

རྒྱ་ནག་གཞུང་ཕྱོགས་ནས་ད་སྔ་ཀྲའོ་པིན་ཧྲན་གྱི་ནག་ཉེས་དང་ཞིབ་བཤེར་བྱས་ཡོད་མེད་ཀྱི་གནས་ཚུལ་གང་ཡང་བསྒྲགས་མེད་ཀྱང་། སྤྱི་ཚོགས་བརྒྱུད་ལམ་ཁག་ཏུ་ཚོད་དཔག་སྣ་ཚོགས་བྱས་ཏེ། ཁག་ཅིག་གིས་ཀྲའོ་པིན་ཧྲན་རྒྱ་གཞུང་གིས་བཀག་ཉར་འདྲི་རྩད་བྱས་ཡོད་སྐོར་དང་། ཁག་ཅིག་གིས་ཁོ་ད་དུང་བཀག་ཉར་བྱས་མི་འདུག ཉེ་ལམ་ཡེ་ཤུའི་ལོ་གསར་སྐབས་གར་སྟེགས་ཤིག་ཏུ་མངོན་ཡོད་སྐོར་སོགས་བརྗོད་འདུག

ཡང་ཁག་ཅིག་གིས་ཀྲའོ་པིན་ཧྲན་ད་སྔ་ཞིབ་བཤེར་འོག་ཚུད་མེད་ཀྱང་། གང་མགྱོགས་ཁོ་ཞི་ཅིན་ཕིན་གྱི་རྙི་ནང་དུ་ཚུད་རྒྱུ་ཡིན་པ་མ་ཟད། ཁོ་ལ་ནག་ཉེས་ཆེན་པོ་གསུམ་ཡོད་པ་ནི། ཁྲིམས་མཐུན་མིན་པའི་དངུལ་སྒོར་ཧ་ཅང་ཕོན་ཆེན་པོ་ཡོད་པ་དང་། ཀྲའོ་པིན་ཧྲན་ནི་རྒྱ་ནག་གི་ཐལ་སྤྱོད་ཕྱོགས་ཁག་གི་ཁོངས་མི་ཡིན་པ་མ་ཟད། ཁོས་ཅང་ཙེ་མིན་དང་ཚིན་ཆེན་ཧོན། པའོ་ཞི་ལེ་དང་ཝང་ལི་ཅོན། ཀྲུའུ་ཡོང་ཁང་སོགས་དང་འབྲེལ་བ་བྱས་ཏེ་བྱ་བ་མང་པོ་བསྒྲུབས་ཡོད་པ་དང་། ནག་ཚོང་དང་ནག་ཚོགས་ལ་ལྐོག་འབྲེལ་ཡོད་པ་དང་། སྒེར་གྱི་ཁེ་ཕན་ཆེད་དུ་ཆོས་འཁོར་རྩ་རླུང་སྒོམ་སྒྲུབ་པར་གནོད་སྐྱོན་བཟོས་པ་སོགས་བགྲང་འདུག

ཀྲའོ་པིན་ཧྲན་ལ་སྤུས་ཚད་མཐོ་བའི་སྤྲོ་སྐྱིད་ཁང་དང་སྒེར་སྤྱོད་གཏམ་གྲུ་སོགས་ཡོད་སྟབས། སྲིད་འཛིན་ཞི་ཅིན་ཕིན་གྱིས་སྒྱུ་རྩལ་པ་ཀྲའོ་པིན་ཧྲན་གྱི་གཏམ་བརྗོད་དང་གློག་བརྙན་ཁག་ཅིག་རྒྱ་ནག་གི་བརྙན་འཕྲིན་ཁང་ཁག་གི་ལས་རིམ་ལས་ཕྱིར་འཐེན་བྱས་ཡོད་པ་མ་ཟད། རིག་རྩལ་སྤྲོ་ཚོགས་དང་མཛད་སྒོ་ཁག་ཏུའང་ཞུགས་འཇུག་གི་མེད་པ་དང་། ཉེ་ལམ་ཞིག་ནས་ཁོའི་འགུལ་སྐྱོད་ལའང་ཚོད་འཛིན་བྱེད་ཀྱིན་ཡོད་སྐོར་གླེང་བཞིན་འདུག

ཟླ་འདིའི་ཚེས་ ༢༦ ཉིན་ཐེ་ཝན་གྱི་ཀུ་ཤུ་ཉིན་རེ་ཚགས་ཤོག་སྟེང་། ཝེའུ་ཅོན་ཞིན་ ༢༠༠༥ ལོར་ལའོ་ནེན་ཞིང་ཆེན་ཁེ་ཡོན་གྲོང་ཁྱེར་ཨུ་ཡོན་ཡིན་སྐབས། ས་ཁུལ་དེའི་སོ་མ་ར་ཙ་ (亚麻)ནག་ཚོང་བྱེད་མཁན་ཚོ་དང་འབྲེལ་བ་ཡོད་པ་རྒྱ་གཞུང་གིས་ཤེས་རྟོགས་བྱུང་རྗེས། རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ཝེའུ་ཅོན་ཞིན་འཛིན་བཟུང་བྱ་འཆར་ཡོད་ཀྱང་། སྐབས་དེར་ཀྲའོ་པིན་ཧྲན་བརྒྱུད་ནས་ལའོ་ནེན་ཞིང་ཆེན་སྒྲིག་ཁྲིམས་ཞིབ་བཤེར་ལྷན་ཁང་གི་འགན་འཛིན་ཝང་ཝའུ་ཀྲོན་ (Wang Weizhong)ལ་རྒྱ་སྒོར་ས་ཡ་ ༡༠ སྤྲད་དེ་ཝེའུ་ཅོན་ཞིན་ལ་ཉེན་ཁ་དེ་ལས་ཐར་ཐུབ་བྱས་ཡོད་འདུག

ཝེའུ་ཅོན་ཞིན་ལའོ་ནེན་ཁེ་ཡོན་གྲོང་ཁྱེར་གྱི་མགོ་གཙོ་ཡིན་སྐབས། ཀྲའོ་པིན་ཧྲན་གྱིས་ཁེ་ཡོན་ས་ཁུལ་ནས་གློག་བརྙན་འཁྲབ་པ་དང་། ལས་ཀ་གཞན་ག་རེ་བྱས་ཀྱང་ཁེ་ཡོན་གྲོང་ཁྱེར་སྲང་ལམ་གྱི་གློག་ལྗང་ཁུ་དུས་ནམ་ཡང་སྒྱུ་རྩལ་པ་ཀྲའོ་པིན་ཧྲན་ལ་སྤར་ཡོད་པ་མ་ཟད། ཀྲའོ་པིན་ཧྲན་གྱིས་གློག་བརྙན་མཱ་ཏཱ་ཧྲད་ 《马大帅2》བ་དང་། མཱ་ཏཱ་ཧྲད་《马大帅3》། གྲོང་གསེབ་བརྩེ་དུང་། 《乡村爱情3》སོགས་འཁྲབ་སྐབས། ཀྲའོ་པིན་ཧྲན་ཁེ་ཡོན་འགྲོན་ཁང་དུ་བསྡད་ཡོད་ཅིང་། སྐབས་དེར་ཝེའུ་ཅོན་ཞིན་གྱིས་ཁོ་ལ་ཁང་གླ་དང་ཟས་གླ་རིན་མེད་བྱས་ཡོད་འདུག

ཉེ་ལམ་རྒྱ་ནག་གཞུང་གིས་ལའོ་ནེན་ཞིང་ཆེན་སྲིད་གཞུང་གི་དྲུང་ཡིག་གཞོན་པ་ཝེའུ་ཅོན་ཞིན་ལ་གཞུང་གིས་ཞིབ་བཤེར་བྱེད་བཞིན་ཡོད་པ་གསལ་བསྒྲགས་བྱས་པ་ལས། ཁོའི་ནག་ཉེས་གང་ཡིན་གསལ་བཤད་བྱས་མེད་ཀྱང་། སྤྱི་ཚོགས་བརྒྱུད་ལམ་ཁག་ཏུ། ཝེའུ་ཅོན་ཞིན་ནི་ལྐོག་ཏུ་ཡིབ་པའི་ལའོ་ནེན་ཞིང་ཆེན་གྱི་ནག་ཚོགས་མགོ་བ་གཏེ་བོ་དེ་ཡིན་པ་མ་ཟད། ས་ཁུལ་དེའི་ཁྲིམས་མཐུན་མིན་པའི་ནག་ཚོང་མང་པོ་ཞིག་དང་འབྲེལ་བ་ཡོད་ཅིང་། ཁོས་དེ་སྔོན་ཡུ་ནན་གྱི་ནག་ཚོགས་དང་འབྲེལ་བ་བྱས་ཏེ་བུ་མོ་ལོ་ཆུང་མེ་ཏོག་མ་མང་པོ་བསླུ་འགུག་བྱས་ཏེ། ཀྲུའུ་ཡོང་ཁང་སོགས་རྒྱ་ནག་གི་མཐོ་རིམ་དཔོན་རིགས་ཚོར་ལེགས་སྐྱེས་སུ་སྤྲད་ཡོད་འདུག

༢༠༡༤ ལོར་རྒྱ་ནག་གི་སྲིད་འཛིན་ཟུར་བ་ཅང་ཕྱོགས་ཁག་གི་སྟག་རྒན་ཚོ་ཞི་ཅིན་ཕིན་གྱི་དྲ་ནང་དུ་ཚུད་པ་ནས་བཟུང་། སྒྱུ་རྩལ་པ་ཀྲའོ་པིན་ཧྲན་གྱི་གླེང་གཞི་ཡང་ཤུགས་ཆེ་རུ་ཕྱིན་ཡོད་ཅིང་། ཞི་ཅིན་ཕིན་གྱི་སྣེ་འཁྲིད་འོག་རྒྱ་ནག་དབུས་རིག་རྩལ་ལས་འགུལ་གྱི་ཚོགས་འདུ་དེ་སྔར་ལོའི་ཕྱི་ཟླ་ ༡༠ བའི་ཚེས་ ༡༥ ཉིན་པེ་ཅིན་ནས་བསྐོངས་སྐབས། འདས་པའི་ལོ་ ༡༥ རིང་དབུས་བརྙན་འཕྲིན་ལས་ཁང་ནས་བྱ་དགའ་ཨང་དང་པོ་ཐོབ་མཁན་དང་། གཏམ་བརྗོད་སྒྱུ་རྩལ་གྱི་རྒྱལ་བོ་རུ་འབོད་པའི་ཀྲའོ་པིན་ཧྲན་ཚོགས་འདུ་དེར་ཞུགས་མེད་པའི་ཐད། དཔྱད་ཞིབ་པ་ཚོས་གླེང་སློང་མང་པོ་བྱས་ཡོད་ཅིང་། ཁ་ཤས་ཀྱིས་ཚོགས་འདུ་དེར་ཅང་ཕྱོགས་ཁག་གི་སྒྱུ་རྩལ་པ་ཀྲའོ་པིན་ཧྲན་དང་ཀྲིང་ཡེ་མའོ་ (Zhang Yimou)། ལི་ཧྲོང་ཅོང་ (Lishuang Jiang)། ཁྲིན་ལོན་ (Cheng Long)སོགས་ཀྱང་མགྲོན་འབོད་བྱས་མེད་སྐོར་བརྗོད།

༢༠༡༤ ལོའི་ཟླ་ ༡༡ ཚེས་ ༧ ཉིན་ཝང་ཡེ་ (网易)དྲ་ཚིགས་སྟེང་། སྒྱུ་རྩལ་པ་ཀྲའོ་པིན་ཧྲན་རྒྱ་ནག་དབུས་རིག་རྩལ་ཚོགས་འདུར་ཞུགས་མེད་པ་མ་ཟད་དེའི་རྗེས་སྲིད་འཛིན་ཞི་ཅིན་ཕིན་གྱིས་ལའོ་ནེན་ཞིང་ཆེན་དུ་རིག་རྩལ་ཚོགས་འདུ་ཞིག་བསྐོངས་བའི་ཐོག་ཏུའང་འཛུལ་བཞུགས་བྱས་མེད། ཧྲང་ཧེ་ཡི་གསར་འགོད་པ་ཞིག་གིས་གནད་དོན་དེའི་སྐོར་ལ་བཅར་འདྲི་ཞུས་པའི་ལན་དུ་ཀྲའོ་པིན་ཧྲན་གྱིས་ “རྒྱ་ནག་དབུས་རིག་རྩལ་ཚོགས་འདུ་བསྐོངས་སྐབས་འཛམ་གླིང་ཡོངས་ཀྱི་སྐུ་མགྲོན་མང་པོ་ཞིག་གདན་འདྲེན་ཞུས་ཡོད་ཀྱང་མང་བོ་ཞིག་ཐེབས་ཐུབ་ཡོད་པ་མ་རེད། ལའོ་ནེན་ནས་ཚོགས་འདུ་བསྐོངས་སྐབས་ང་པེ་ཅིན་དུ་ཡོད།” ཅེས་བརྗོད་འདུག གསར་འགོད་པས་མུ་མཐུད་དུ་ “ཁྱོད་ཆབ་སྲིད་ཀྱི་ཉེ་སར་གཅར་རྒྱུ་མང་དྲགས་མེད་དམ།” ཞེས་དྲིས་པའི་ལན་དུ་ཀྲའོ་པིན་ཧྲན་གྱིས་ “ཁྱོད་ཆབ་སྲིད་ཀྱི་ཉེ་སར་མ་གཅར་ན། ཁྱོད་ཀྱི་ཏང་ལ་སུས་ཡིད་ཆེས་བྱེད་ཐུབ། ཡིད་ཆེས་བྱེད་མཁན་མེད་ན་སྒྱུ་རྩལ་ཡོང་། ཁྱོད་ཀྱིས་ཏང་གི་སྐད་ཆར་མ་ཉན་པར་སྒྱུ་རྩལ་ག་རེ་བཟོ་རྒྱུ་ཡིན།” ཞེས་བརྗོད་ཡོད་འདུག

གཞན། འབྲེལ་ཡོད་མི་སྣ་ཞིག་གིས་བརྗོད་པ་ལྟར་ན། ཉེ་ལམ་ཀྲུང་དབྱང་བརྙན་འཕྲིན་རིག་རྩལ་ལས་ཚན་དུ་སྲིད་གཞུང་གིས་བརྡ་ཁྱབ་ཅིག་འབྱོར་བའི་ནང་། ཀྲའོ་པིན་ཧྲན་གྱི་འཁྲབ་གཞུང་གློག་བརྙན་ལས་རིམ་ཁག་མེད་པ་བཟོ་རྒྱུ་ཡིན་པ་དང་། དེའི་རྒྱུ་མཚན་གཙོ་བོ་ཀྲའོ་པིན་ཧྲན་གྱི་འཁྲབ་གཞུང་ཁག་གི་རྒྱུ་སྤུས་ཞན་དྲགས་པས་རེད་ཟེར།

༢༠༡༤ ལོའི་ཟླ་ ༡༢ ཚེས་ ༣༡ ཉིན་ཀྲུང་གོར་ལྟ་བ་ཞེས་པའི་དྲ་ཚིགས་སྟེང་། རྒྱ་ནག་གི་ལོ་གསར་སྐབས་དེ་སྔོན་ནས་ལེའུ་ངོ་བོར་སྟོན་བཞིན་པའི་ཀྲའོ་པིན་ཧྲན་མི་སྣ་གཙོ་བོ་ཡིན་པའི་གྲོང་གསེབ་བརྩེ་དུང་ (乡村爱情故事)ཞེས་པའི་གློག་བརྙན་དེའི་ཁག་བརྒྱད་པ་ད་ལོའི་ལོ་གསར་སྐབས་སྟོན་དགོས་ཀྱང་། ལོ་གསར་སྔོན་ལ་བརྙན་འཕྲིན་ཁང་ཁག་གིས་རྒྱ་ནག་གི་ལོ་གསར་སྐབས་ལས་རམ་གང་དག་སྟོན་རྒྱུའི་ཐད་ཚོགས་འདུ་ཞིག་ཚོགས་སྲོལ་ཡོད་པ་ལྟར། ཉེ་ལམ་ལའོ་ནེན་བརྙན་འཕྲིན་ཁང་དང་ཧེ་ལོན་ཅང་བརྙན་འཕྲིན་ཁང་། ཅང་སོའི་བརྙན་འཕྲིན་ཁང་། ཐན་ཅིན་བརྙན་འཕྲིན་ཁང་སོགས་ཀྱིས་ཚོགས་འདུ་བསྐོངས་སྐབས། སུ་གང་གིས་ཀྱང་ཀྲའོ་པིན་ཧྲན་གྱི་གློག་བརྙན་དེ་གླེང་མི་འདུག

ལོ་སྔོན་མའི་ཟླ་ ༡༢ ཚེས་ ༢༨ ཉིན་གྱི་ལའོ་ནེན་ཚགས་ཤོག་སྟེང་གི་ལའོ་ནེན་ཞིང་ཆེན་གྱི་རིག་རྩལ་བརྩམས་ཆོས་དང་སྒྱུ་རྩལ་པའི་མིང་ཐོའི་ཁྲོད། ལོ་མང་རིང་སྙན་གྲགས་རྒྱས་པའི་སྒྱུ་རྩལ་པ་ཀྲའོ་པིན་ཧྲན་གྱི་བརྩམས་ཆོས་གཅིག་ཀྱང་མཐོང་རྒྱུ་མི་འདུག་ཅེས་འཁོད་ཡོད་འདུག

ཟླ་འདིའི་ཚེས་ ༤ ཉིན་ཏཱ་ཅི་ཡོན་ (大纪元)ཞེས་པའི་དྲ་ཚིགས་སྟེང་། ཀྲའོ་པིན་ཧྲན་གྱི་པིན་ཧྲན་ཟློས་གར་ཚོགས་པས་འཁྲབ་པའི་གློག་བརྙན་ལེའུ་ཅན་ “ཕ་མའི་རྭ་སྐོར་གང་བ་”(爹妈满院) ཞེས་པ་དེ་ལོ་སྔོན་མའི་ཟླ་ ༩ བའི་ཚེས་ ༢༢ ཉིན་རྒྱ་ནག་བརྙན་འཕྲིན་གྱི་ལས་རིམ་ཁག་ཏུ་སྟོན་རྒྱུ་བྱས་ཡོད་ཀྱང་། ཚེས་ ༢༡ ཉིན་གྱི་དགོང་མོར་གློག་བརྙན་དེའི་རྒྱུ་སྤུས་ལ་སྐྱོན་ཡོད་ཚུལ་བརྗོད་དེ་ཕྱིར་འཐེན་བྱས་ཡོད་འདུག

ཀྲའོ་པིན་ཧྲན་སློབ་སྟོན་པ་ཡིན་པའི་རྒྱ་ནག་གི་ཕུལ་བྱུང་མི་སྣའི་ལས་ཚན་ “རྨི་ལམ་བཟོ་མཁན་” (造梦者)ཞེས་པ་དེ་ཟླ་ ༡༢ ཚེས་ ༡༩ ཉིན་བར་ཀྲུང་དབྱང་བརྙན་འཕྲིན་ཁང་ནས་སྟོན་རྒྱུའི་ཁྱབ་བསྒྲབས་བྱས་ཡོད་ཀྱང་། ཟླ་ ༡༢ ཚེས་ ༡༧ ཉིན་ཀྲའོ་པིན་ཧྲན་ལས་ཚན་དེའི་སློབ་སྟོན་པའི་གོ་གནས་ནས་ཕབ་སྟེ་ཧོན་ཧང་ (Hong Huang) སློབ་སྟོན་པར་བསྐོས་ཡོད་པ་དང་། ཆུ་ཚོད་ཀྱང་འཕར་འགྱངས་བྱས་ཏེ་ ༢༠༡༥ ལོའི་ཟླ་ ༡ ཚེས་ ༩ ཉིན་བསྟན་རྒྱུ་བྱས་ཡོད་འདུག

ལའོ་ནེན་བརྙན་འཕྲིན་ལས་ཁང་གི་ “ལོ་གསར་དགོང་ཚོགས་སྟེང་པིན་ཧྲན་གྱིས་སུ་ཞིག་འདེམས་པ་” (本山选谁上春晚)ཞེས་པའི་ལས་ཚན་གྱི་སྒྲ་འཇུག་དང་། སྔོན་ཆད་ལའོ་ནེན་བརྙན་འཕྲིན་ཁང་གིས་ཀྲའོ་པིན་ཧྲན་གྱི་གཏམ་བརྗོད་ཕྱོགས་བསྒྲིགས་སྟོན་བཞིན་ཡོད་པ་དེ་ད་ལོར་མཚམས་འཇོག་བྱས་ཡོད་འདུག

ཟླ་འདིའི་ཚེས་ ༡༣ ཉིན་ཀྲུང་གོར་ལྟ་བ་ཞེས་པའི་དྲ་ཚིགས་སྟེང་། སྒྱུ་རྩལ་པ་ཀྲའོ་པིན་ཧྲན་ཡང་ཅང་ཙེ་མིན་ཕྱོགས་ཁག་གི་གྲུ་ནང་དུ་ཚུད་ཡོད། དེ་ནི་ཕ་ཡུལ་གཅིག་པ་ཡིན་པའི་དེ་སྔའི་ཁྲོན་ཆིན་གྲོང་ཁྱེར་ཉེན་རྟོག་འགན་འཛིན་ཝང་ལིའི་ཅུན་ལ་འབྲེལ་བ་དམ་པོ་ཡོད་སྟབས། ཁོ་བརྒྱུད་ནས་པའོ་ཞི་ལེ་ལ་སྤུན་གྲོགས་བསྒྲིགས་པ་དང་། རིམ་བཞིན་ཅང་ཙེ་མིན་གྱི་དགའ་རོགས་སོན་ཙོ་ཡེན་ (Song zuying)ལ་མང་སྲིང་བསྒྲིགས་པ་སོགས་བརྒྱུད་དེ། ཀྲའོ་པིན་ཧྲན་གྱི་སྙན་གྲགས་སྔར་ལས་རྒྱས་ཡོད་ཅེས་བརྗོད། ཅང་ཙེ་མིན་གྱི་དགའ་མ་སོན་ཙོ་ཡེན་དང་ཀྲའོ་པིན་ཧྲན་གཉིས་མཉམ་དུ་འཁྲབ་གཏམ་བརྗོད་ཟློས་གར་སོགས་ཀྱང་ཡོད་འདུག་ལ། ཀྲའོ་པིན་ཧྲན་གྱིས་སོན་ཙོ་ཡེན་ངའི་སྲིང་མ་ཡིན་ཞེས་རྗོད་ཀྱིན་ཡོད་ཀྱང་། སྤྱི་ཚོགས་ཐོག་ཁོ་གཉིས་བར་གྱི་འབྲེལ་བ་དེ་མིང་སྲིང་གི་འབྲེལ་བ་ལས་བརྒལ་ཡོད་པའི་གླེང་སློང་བྱེད་བཞིན་ཡོད།

༢༠༡༤ ལོའི་ཟླ་ ༡ ཚེས་ ༣ ཉིན། ཏཱ་ཅེ་ཡོན་《大纪元》ཞེས་པའི་དྲ་བའི་སྟེང་། ཅང་ཙེ་མིན་གྱིས་ཀྲུང་དབྱང་བརྙན་འཕྲིན་ཁང་དུ་ ༢༠༠༠ ལོའི་ལོ་གསར་དགོང་ཚོགས་ཐོག ཀྲའོ་པིན་ཧྲན་གྱི་ཐ་ཤལ་རང་གཤིས་ཀྱི་ནུས་བ་ཧ་གོ་ཡོད་པ་དང་། རྒྱ་ནག་མི་མང་གི་ཀླད་པ་འཁྲུད་དགོས་ན་ཀྲའོ་པིན་ཧྲན་དང་མཉམ་འབྲེལ་བྱེད་དགོས་པའི་གནད་འགག་རྟོགས་ཏེ། ༢༠༠༠ ལོའི་སྟོན་ཁ་ཞིག་ལ་ཅང་ཙེ་མིན་གྱི་དམག་སྤྱིའམ་རྒྱ་ནག་དབུས་རྩ་འཛུགས་ཚོགས་ཆུང་གི་འགན་འཛིན་ཚིན་ཆེན་ཧོན་དངོས་སུ་ཀྲའོ་པིན་ཧྲན་ལ་ཐུག་འཕྲད་བྱེད་པར་མངགས་ཏེ། ༢༠༠༡ ལོའི་ལོ་གསར་དགོང་ཚོགས་སྟེང་། སྲིད་གཞུང་དང་ཆོས་འཁོར་རྩ་རླུང་བར་གྱི་གནད་དོན་དེ་གཏམ་བརྗོད་ཀྱི་ཐོག་ནས་གསལ་བོ་བཟོ་དགོས་ཞེས་མངགས་བཀོལ་བྱས་ཡོད་འདུག སྐབས་དེར་ཚིན་ཆེན་ཧོན་གྱིས་ “འདི་ནི་སྲིད་འཛིན་ཅང་ཙེ་མིན་གྱི་དགོངས་པ་ཡིན་པས། ངེས་པར་དུ་རྒྱལ་ཁ་ཐོབ་དགོས་པ་ལས་ཕམ་ཁ་རྩ་བ་ནས་རག་མི་ཆོག་” ཅེས་བཀའ་ཕབ་ཡོད་པ་ལྟར། ཧའུ་ཆིན་ཁོའི་ (Heqing Kui)ཡིས་རྩོམ་བསྒྲིགས་རོགས་སྐྱོར་འོག ༢༠༠༡ ལོའི་ལོ་གསར་དགོང་ཚོགས་སྟེང་། ཀྲའོ་པིན་ཧྲན་དང་ཧྥན་ཝེས་ (Fan Wei)། ཀའོ་ཞོ་མིན་ (GaoXiumin)བཅས་ཀྱིས་ཆོས་འཁོར་རྩ་རླུང་ལ་དམའ་འབེབས་བྱེད་པའི་གཏམ་བརྗོད་ ‘འཁར་བ་འཚོང་བ’ (卖拐)ཞེས་པ་ཞིག འཁྲབ་སྟོན་བྱས་པ་དེར་ཅང་ཙེ་མིན་ཡིད་ཧ་ཅང་ཚིམ་སྟེ། ༢༠༠༡ ལོའི་ལོ་གསར་དགོང་ཚོགས་ཀྱི་བྱ་དགའ་ཨང་དང་པོ་གཏམ་བརྗོད་དེར་སྤྲོད་དགོས་པའི་བཀའ་ཕབ་ཡོད་པ་དང་། ༢༠༠༢ ལོར་ཀྲའོ་པིན་ཧྲན་གྱིས་མུ་མཐུད་དུ་ ‘འཁར་བ་འཚོང་བ’ (卖拐)དང་། ‘རླངས་འཁོར་འཚོང་བ’ (卖车)། ༢༠༠༥ ལོར་ ‘འགྱོགས་བྱམས་འཚོང་བ’ (卖担架)སོགས་འཁྲབ་སྟོན་བྱས་ཏེ་ཆོས་འཁོར་རྩ་རླུང་ལ་དམའ་འབེབས་བྱས་ཡོད།

པའོ་ཞི་ལེ་ཡིས་ཁྲོན་ཆིན་དུ་བྱ་བ་སྒྲུབ་སྐབས་ཀྲུའུ་ཡོང་ཁང་དང་པའོ་ཞི་ལེ་གཉིས་ཀྱིས་ཏང་གི་ཚོགས་ཆེན་བཅོ་བརྒྱད་པ་ཚོགས་རྗེས། ཞི་ཅིན་ཕིན་གྱི་ལག་ནས་རྒྱ་ནག་གི་སྲིད་དབང་འཕྲོག་རྒྱུ་དང་། སྲིད་ཇུས་བཅོས་བསྒྱུར་གྱི་ལས་འཆར་ཁྲོད་སྒྱུ་རྩལ་པ་ཀྲའོ་པིན་ཧྲན་དབུས་རིག་རྩལ་ལྷན་ཁང་གི་འགན་འཛིན་དུ་བསྐོ་བཞག་བྱ་འཆར་ཡོད་ཀྱང་། ༢༠༡༢ ལོའི་ཟླ་ ༢ ཚེས་ ༦ ཉིན་ཝང་ལི་ཅུན་ཨ་རིའི་གཞུང་ཚབ་ཁང་དུ་བྲོས་བྱོལ་བྱས་པ་དེས་ཁྲོན་ཆིན་གྱི་གནས་ཚུལ་ཡོངས་རྫོགས་ཕྱི་གྱར་ཕྱིན།

༢༠༠༧ ལོར་ལའོ་ནེན་ཞིང་ཆེན་གྱི་ཡཱི་ལིས་ཧྲིན་ (蚁力神)སྨན་རྫུན་གྱོན་དོན་གླེང་སློང་བྱུང་སྐབས། པའོ་ཞི་ལེ་ལའོ་ནེན་ཞིང་ཆེན་གྱི་མགོ་གཙོ་དང་ཚོང་འབྲེལ་མགོ་གཙོ་ཡིན་སྟབས། ཁོས་དབང་ཆ་སྒེར་སྤྱོད་ཀྱིས་ཡཱི་ལིས་ཧྲིན་སྨན་རྫུན་ལ་སྲུང་སྐྱོབ་བྱས་ཡོད་འདུག སྐབས་དེར་ཀྲའོ་པིན་ཧྲན་གྱིས་སྨན་རྫུན་དེ་བརྙན་འཕྲིན་ནང་ཁྱབ་བསྒྲགས་ཤུགས་ཆེན་བྱས་ཏེ་རྒྱ་སྒོར་ས་ཡ་ ༢ ལྷག་གི་ཁེ་བཟང་ཟོས་ཡོད་འདུག ༢༠༠༧ ལོའི་ཟླ་ ༡༡ ནང་ཡཱི་ལིས་ཧྲིན་སྨན་རྫུན་ཀྱི་གྱོན་དོན་ཕྱི་གྱར་བྱུང་བ་དང་བསྟུན་ཏེ། བཟོ་གྲྭ་དེས་མང་ཚོགས་ཀྱི་དངུལ་སྒོར་ཐེར་འབུམ་ ༡༠ ལྷག་གཡོ་ལེན་བྱས་ཡོད་པ་ཤེས་རྟོགས་བྱུང་ཡོད་པ་དང་། བཟོ་གྲྭ་དེར་མ་དངུལ་འཇོག་མཁན་ཁ་ཤས་ཀྱིས་རང་ཤི་བརྒྱབ་ཡོད་འདུག

ཟླ་སྔོན་མའི་ཚེས་ ༢༧ ཉིན་ལ་རྒྱ་ནག་ནང་ཁུལ་གྱི་སྤྱི་ཚོགས་དྲ་ཚིགས་ཝེ་པའོ་སྟེང་། དྲ་མིང་ལ་ (永康小裁缝)ཞེས་པ་ཞིག་གིས། སྒྱུ་རྩལ་པ་ཀྲའོ་པིན་ཧྲན་ནག་ཚོགས་དང་འབྲེལ་བ་ཡོད་པའི་དོགས་གཞིའི་འོག་འཛིན་བཟུང་བྱས་སྐབས་ཁོས་རང་ཤི་རྒྱག་གྲབས་བྱས་ཡོད་ཅིང་། ཁོའི་ཁང་པའི་ནང་དུ་གསེར་རྒྱ་མ་ ༤༠༠༠༠ ཙམ་ཐོན་ཡོད་པ་དང་། དེའི་མ་གནས་རྒྱ་སྒོར་དུང་ཕྱུར་ ༤ ལྷག་ཡིན་ཚུལ་བཀོད་ཡོད་ཀྱང་། གནས་ཚུལ་དེ་དྲ་ཐོག་ཏུ་སྤེལ་ཏེ་ཅུང་ཙམ་རྗེས་ནག་གསུབ་བཏང་ཡོད་འདུག

ཟླ་འདིའི་ཚེས་ ༡༣ ཉིན་ཀྲུང་གོར་ལྟ་བ་ཞེས་པའི་དྲ་ཚིགས་སྟེང་། སྒྱུ་རྩལ་པ་ཀྲའོ་པིན་ཧྲན་ལ་རླངས་འཁོར་མང་པོ་ཞིག་ཡོད་པ་མ་ཟད། སྒེར་ལ་པིན་ཧྲན་ཧའོ་ (本山号)ཞེས་པའི་གནམ་གྲུ་ཞིག་ཀྱང་ཡོད་འདུག གནམ་གྲུ་དེའི་མིང་དབྱིན་སྐད་དུ་ (Bombardier Challenger 850) ཟེར་ཞིང་། དེའི་རིན་གོང་ཨ་སྒོར་ཁྲི་ ༣༠༠༠ ལྷག་ཡིན་འདུག གནམ་གྲུ་དེའི་ནང་མི་ ༡༧ གྱི་སྡོད་གནས་ཡོད་ཅིང་། རང་འདོད་ལྟར་བཟོ་བཅོས་རྒྱག་ཆོག་པ་དང་། ཆང་ཁང་དང་གཞུང་སྒྲུབ་ཁང་། གཟུགས་པོ་སྦྱོང་བརྡར་བྱེད་ས་སོགས་བཟོ་ཐུབ་ཀྱི་ཡོད་འདུག གནམ་གྲུ་དེའི་ཉིན་རེའི་ཞིག་གསོ་དང་ཉེན་འགོག་འགྲོ་གྲོན། ཁ་ལོ་བ་སོགས་ཀྱི་ལོ་གཅིག་གི་འགྲོ་སོང་རྒྱ་སྒོར་ས་ཡ་ ༥ ཡས་མས་ཡིན་པ་དང་། གནམ་གྲུ་དེའི་སྣུམ་གྱི་འགྲོ་སོང་ཆུ་ཚོད་གཅིག་ལ་རྒྱ་སྒོར་ ༡༥༠༠༠ ལྷག་ཡིན་འདུག

སྒྱུ་རྩལ་པ་ཀྲའོ་པིན་ཧྲན་གྱིས་ ༢༠༡༡ ལོའི་ཟླ་ ༨ པའི་ནང་པེ་ཅིན་དུ། ལའུ་ལའོ་ཀུན་ཚོམས་ཁང་ (刘老根会馆) ཞེས་པ་ཞིག་སྒོ་འབྱེད་བྱས་ཡོད་པ་དང་། དེ་ནི་པེ་ཅིན་མདུན་སྒོའི་ཚོང་འབྲེལ་ལོ་རྒྱུས་རིག་གཞུང་སྲུང་སྐྱོབ་ས་ཁུལ་དུ་ཡོད་འདུག སྤྲོ་ཚོམས་ཁང་དེའི་སྤྱིའི་ས་ཁྱོན་སྤྱི་ལེ་གྲུ་བཞི་མ་ཁྲི་ ༡ ལྷག་ཡོད་ཅིང་། དེའི་ནང་དུ་ཁང་རྩེག་གཉིས་ཅན་གྱི་གསོལ་ཚིགས་ཁང་གཅིག་དང་རྭ་བ་གྲུ་བཞི་ཡིན་པའི་ཁང་པ་དྲུག་ཡོད་འདུག ཟ་མ་གཙོ་བོ་ ‘ལའུ་ལའོ་སྒེར་ཚད་’ཅེས་པ་ཞིག་ཡིན་པ་དང་། ཟས་རིགས་མང་ཆེ་བ་རྒྱ་མཚོའི་ནང་གི་སྲོག་ཆགས་དང་སྐྱེས་དངོས་ཡིན་འདུག གསོལ་ཚིགས་ཁང་དེའི་ཟ་མ་རིན་གོང་མཐོ་ཤོས་སྡེར་མ་གཅིག་ལ་རྒྱ་སྒོར་ ༢༠༠༠ ཙམ་ཡིན་པ་དང་། ཉིན་གཅིག་གི་ཡོང་འབབ་ཉུང་ཤོས་རྒྱ་སྒོར་ཁྲི་ ༡༨ ཡིན་འདུག སྤྲོ་ཚོམས་ཁང་དེར་རྒྱ་ནག་གི་འཁྲབ་སྟོན་པ་དང་ཚོང་པ། དཔོན་རིགས་མཐོ་གྲས་བཅས་ཀྱིས་སྤྲོ་སྐྱིད་གཏོང་ས་ཞིག་ཡིན་ཞིང་། ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྡུང་རྡེག་མགོ་འཛུགས་བྱས་པ་དང་བསྟུན་ཏེ་སྤྲོ་ཚོམས་ཁང་དེར་རྒྱས་སྤྲོས་བྱེད་མཁན་ཇེ་ཉུང་དུ་ཕྱིན་ཡོད་ཅིང་། ༢༠༡༤ ལོའི་ཟླ་ ༩ བའི་ནང་སྒོ་བརྒྱབ་ཡོད་འདུག

སྒྱུ་རྩལ་པ་ཀྲའོ་པིན་ཧྲན་རྒྱ་ནག་གི་བུད་མེད་འཁྲབ་སྟོན་མ་གཞས་མ་དག་ལ་འབྲེལ་བ་ཡོད་ཅིང་། དེ་དག་ནི་ཀྲོང་པཱད་ཀྲི་ (张柏芝) དང་ཀྲང་ཙི་ཡཱི་ (章子怡) ལིན་ཀྲི་ལེན་ (林志玲) ཙིན་པའོ་ཡཱི་ (曾宝仪) ཧོང་ཧྲིན་ཡཱི་ (黄圣依) སོན་ཙོ་ཡེན་ (宋祖英) ཀོན་ཐེན་ནཱ་ (关婷娜) ཡེན་ནཱེ་ (闫妮) ཡན་ཞའོ་ཅིན་ (阎学晶) ཡའོ་ཡའེ་ཞན་ (于月仙) སོགས་ཡིན་འདུག

ཟླ་སྔོན་མའི་ཚེས་ ༢༨ ཉིན་ཀྲུང་གོར་ལྟ་བ་ཞེས་པའི་དྲ་ཚིགས་ཀྱི་གསར་འགོད་པས། ཨ་རི་དང་རྒྱ་ནག་གི་གནད་དོན་དཔྱད་ཞིབ་པ་ཀྲོང་ཅན་ (Zhang Jian) ལ་བཅའ་འདྲི་བྱས་སྐབས་ཁོས། ཀྲའོ་པིན་ཧྲན་ནི་ཁེ་དབང་གཡོ་གཉེར་བྱེད་མཁན་གྱི་སྒྱུ་རྩལ་པ་ཞིག་རེད། ཀྲའོ་པིན་ཧྲན་ཕམ་ཉེས་བྱུང་བའི་རྒྱུ་རྐྱེན་དེའང་ཁོ་ཅང་ཙེ་མིན་ཕྱོགས་ཁག་དང་འབྲེལ་བ་ཆེ་དྲགས་པས་རེད། ཁོས་ཝང་ལིའི་ཅུན་དང་པའོ་ཞི་ལེ་གཉིས་ལ་སྤུན་གྲོགས་བསྒྲིགས་པ་དང་། ཅང་ཙེ་མིན་ལ་ཤ་འདྲེས་ཁྲག་འདྲེས་ལྟ་བའི་འབྲེལ་བ་ཡོད་སྟབས། ཁོའི་འཁྲབ་སྟོན་མང་པོའི་ནང་ཁོ་ཅང་ཕྱོགས་ཁག་གི་གར་སྟེགས་ལ་ལངས་ཅི་ཐུབ་བྱས་ཡོད། རྒྱ་ནག་ནས་ལས་ཀ་ག་རེ་བྱེད་དགོས་ཀྱང་ངེས་པར་དུ་ཆབ་སྲིད་ཀྱི་རྒྱབ་རྟེན་ཞིག་དགོས་པ་གསལ་བོ་རེད། ཁྱོད་ཚོང་པ་ཡིན་ན་འགྲིག སྒྱུ་རྩལ་པ་ཡིན་ནའང་རུང་། ཤེས་ཡོན་པའི་སྡེ་ལ་ཡོད་ནའང་ཆོག གང་ལྟར་ཁྱོད་ལ་ངེས་པར་དུ་ཆབ་སྲིད་ཀྱི་རྒྱབ་རྟེན་ཞིག་དགོས་ཀྱི་ཡོད།

སྒྱུ་རྩལ་པ་ཀྲའོ་པིན་ཧྲན་དེ་རིང་ཆབ་སྲིད་ཀྱི་གནས་སྟངས་འདི་འདྲ་ཞིག་ལ་ལྷུང་ཡོད་པ་དེའང་ཅང་ཕྱོགས་ཁག་ནི་ཁོའི་ཆབ་སྲིད་རྒྱབ་རྟེན་ཡིན་པས་རེད། སྲིད་འཛིན་ཞི་ཅིན་ཕིན་གྱི་དཔུང་ཁག་དང་ཅང་ཙེ་མིན་ཕྱོགས་ཁག་གཉིས་ནི་མེ་དང་ཆུ་ལྟར་ཕན་ཚུན་མི་མཐུན་སྟབས་རྒྱ་ནག་ནང་དུ་ལམ་ལུགས་གཉིས་ལྟ་བུ་ཆགས་ཡོད། ཀྲའོ་པིན་ཧྲན་འཛུལ་བཞུགས་བྱེད་ཡུལ་གྱི་ཕྱོགས་ཁག་ནོར་ཡོད་སྟབས། ཁོ་ལ་བདེ་སྐྱིད་ཀྱི་ཉི་མ་བསྐྱར་དུ་ཤར་རྒྱུར་ཧ་ལམ་རེ་བ་མེད་པ་མ་ཟད། ངས་རྒྱ་གཞུང་གིས་ད་ལྟ་ལྐོག་ནས་ཁོའི་གྱོད་དོན་ལ་ཞིབ་བཤེར་བྱེད་བཞིན་ཡོད་པའི་ཡིད་ཆེས་བྱེད་ཀྱིན་ཡོད། འོན་ཀྱང་ག་དུས་ཞིག་ལ་དངོས་སུ་ལག་བསྟར་བྱེད་མིན་ད་དུང་ཚོད་དཔག་བྱེད་ཐུབ་ཀྱི་མི་འདུག ཅེས་བརྗོད་འདུག

སྒྱུ་རྩལ་པ་ཀྲའོ་པིན་ཧྲན་ནི་ ༡༩༥༧ ལོའི་ཟླ་ ༡༠ ཚེས་ ༢ ཉིན་ལའོ་ནའེ་ཞིང་ཆེན་ཁེ་ཡོན་གྲོང་ཁྱེར་ནས་སྐྱེས། ཁོ་ནི་རྒྱ་ནག་གི་གཏམ་བརྗོད་འཁྲབ་སྟོན་སྒྱུ་རྩལ་པ་དང་རྒྱལ་ཡོངས་སྲིད་གྲོས་ཨུ་ཡོན། རྒྱ་ནག་རོལ་དབྱངས་མཐུན་ཚོགས་ཀྱི་ཚོགས་མི། ལའོ་ནའེ་སློབ་ཆེན་པིན་ཧྲན་སྒྱུ་རྩལ་སློབ་གླིང་གི་འགན་འཛིན་དང་། པིན་ཧྲན་བརྒྱུད་ལམ་གྱི་འགན་འཛིན་བཅས་ཡིན་འདུག