རྒྱ་ནག་དབུས་དམག་དོན་ཨུ་ཡོན་འགན་འཛིན་གཞོན་པ་ཟུར་པ་ལིའུ་ཧོན་ཇེད་འཛིན་བཟུང་བཀག་ཉར་བྱས་པའི་གནས་ཚུལ་དང་བསྟུན་ཏེ་མིག་འབེན་གཉིས་པ་སྟག་རྒན་ཀོ་པའོ་ཞོན་ཡང་ཞི་ཅིན་ཕིན་གྱི་རྙི་རྩར་བསླེབས་ཚར་ཡོད་པའི་གླེང་སློང་ཡོང་བཞིན་འདུག
ཟླ་འདི་ཚེས་ ༡༣ ཉིན་པེ་ཅིན་གྲོང་ཁྱེར་གྱི་སྐབས་ ༡༤ བའི་མི་དམངས་འཐུས་མིའི་རྒྱུན་ལས་ཚོགས་ཆེན་ཐེངས་ ༡༧ པའི་སྟེང་། རྒྱ་ནག་བཅིངས་འགྲོལ་དམག་མིའི་དབུས་ཐད་གཏོགས་དམག་དོན་ཞིབ་བཤེར་ཁང་གིས་སྙན་ཞུ་ཞིག་ཕུལ་ཡོད་པའི་ནང་། པེ་ཅིན་གྲོང་ཁྱེར་གྱི་སྐབས་བཅུ་བཞི་པའི་མི་དམངས་འཐུས་མི་དང་དབུས་དོ་དམ་འགན་སྲུང་ལྷན་ཁང་གི་མགོ་གཙོ་གཞོན་པ་ལིའུ་ཧོན་ཇེད་(Liu Hongjie)ཀྱིས་ ༢༠༡༣ ལོར་དབང་ཆ་སྒེར་སྤྱོད་བྱས་པ་དང་། གཞན་ལ་རོགས་རིམ་གྱི་མིང་ཐོག་ནས་ལྐོག་རྔན་འབོར་ཆེན་བླངས་པ་བཅས་ཀྱི་ནག་ཉེས་ཡོད་སྟབས། ཁོ་ལ་ཁྲིམས་ལྟར་ནག་ཉེས་ཞིབ་བཤེར་བཀག་ཉར་ཆོག་མཆན་སྤྲོད་རོགས་ཞེས་འཁོད་ཡོད་པ་ལྟར་ཚོགས་ཐོག་ནས་ཆོག་མཆན་སྤྲད་ཡོད་སྟབས། གཞུང་འབྲེལ་ཐོག་བཀག་ཉར་བྱས་ཟིན་པ་ཁྱབ་བསྒྲགས་བྱས་ཡོད་འདུག
ཟླ་འདིའི་ཚེས་ ༡༢ ཉིན་ཧོང་ཀོང་ཀུ་ཤུ་ཉིན་རེ་དྲ་བའི་སྟེང་གནས་ཚུལ་ཐོན་པ་ལྟར་ན། ཕྱི་ཚེས་ ༡༠ ཉིན་རྒྱ་ནག་དབུས་དམག་དོན་ཨུ་ཡོན་འགན་འཛིན་གཞོན་པ་ཟུར་བ་ཀོ་པའོ་ཞོན་དང་། ཀོ་པ
འོ་ཞོན་གྱི་བུ་ཀྲའུ་ཅང་ཞིང་ཆེན་གྱི་དམག་དཔོན་གཞོན་པ་ཀོ་ཀྲིན་ཀོང་(Guo Zhenggang)གཉིས་གཞུང་གི་ཞིབ་བཤེར་འོག་ཚུད་ཡོད་སྐོར་གྱི་གནས་ཚུལ་ཞིག་ཐོན་ཡོད་ཀྱང་། དེའི་སྐོར་རྒྱ་ནག་གཞུང་ཕྱོགས་ནས་གསལ་བསྒྲགས་གང་ཡང་སྤེལ་མི་འདུག ཀོ་ཀྲིན་ཀོང་ནི་ཁོ་རང་གི་ཨ་ཕ་ཀོ་པའོ་ཞོན་གྱི་དྲུང་ཡིག་ཀྱང་ཡིན་འདུག
སྐབས་འདི་དང་བསྟུན་ནས་རྒྱ་ནག་གི་ཆབ་སྲིད་དཔྱད་ཞིབ་པ་ཚོས་ལིའུ་ཧོན་ཇེད་ནི་ཀོ་པའོ་ཞོན་དང་ཞི་ཚད་ཧོ་གཉིས་ཀྱི་བློ་འཁེལ་པའི་མི་སྣ་ཡིན་སྟབས། ད་རེབ་ལིའུ་ཧོན་ཇེད་གོ་གནས་ནས་ཕབ་པ་སྟེ་ཀོ་པའོ་ཞོན་གཞུང་ནས་ཕྱིར་འཕུད་བྱ་རྒྱུའི་སྔ་ལྟས་ཞིག་ཡིན་པའི་ཚོད་དཔག་བྱེད་བཞིན་ཡོད་འདུག
ཁ་སང་ཀྲུང་གོར་ལྟ་བ་ཞེས་པའི་དྲ་ཚིགས་ཀྱིས་ཧོང་ཀོང་གི་གསར་ལམ་ཞིག་གི་གནས་ཚུལ་ལུང་འདྲེན་བྱས་པའི་ནང་། རྒྱ་གཞུང་གི་བརྒྱུད་ལམ་ཁག་ཏུ་ལིའུ་ཧོན་ཇེད་སྐོར་གྱི་གནས་ཚུལ་ཁྱད་མཚར་ཞིག་བསྒྲགས་ཡོད་ཅིང་། དེ་ནི་ ༢༠༡༣ ལོ་ནས་ལིའུ་ཧོན་ཇེད་འཛིན་བཟུང་བྱས་ཡོད་ཀྱང་ད་ལྟ་གཞི་ནས་ཁྱབ་བསྒྲགས་བྱས་པ་དང་། སྔོན་ཆད་ལིའུ་ཧོན་ཇེད་ཀྱི་གནས་ཚུལ་དྲ་ལམ་དུ་མཐོང་རྒྱུ་མེད་པ་ལྟར་ད་ལྟའང་ཞིབ་ཕྲའི་གནས་ཚུལ་གང་ཡང་རག་ཐབས་མེད་སྐོར་འཁོད་འདུག
ཉེ་ཆར་ཀོ་པའོ་ཞོན་ཕ་བུ་གཉིས་འཛིན་བཟུང་གི་གནས་ཚུལ་ཞིག་ཕྱི་གྱར་བྱུང་རྗེས། ཝེ་པའོ་དྲ་ཚིགས་སྟེང་ཀོ་པའོ་ཞོན་ཕ་བུ་གཉིས་འཚོལ་ཞིབ་མི་ཐུབ་པ་ཆགས་ཡོད་པ་དང་། དཔྱད་ཞིབ་པ་ཁག་ཅིག་གིས་གནས་ཚུལ་ཡ་མཚན་འདི་དག་གི་མཇུག་འབྲས་ནི་གང་མགྱོགས་སྟག་རྒན་ཞིག་ཕྱིར་འདོན་རྒྱུ་ཡིན་པའི་ཚོད་དཔག་བྱས་འདུག
ཧོང་ཀོང་གི་ནན་ཧྭ་ཙའོ་པའོ་ (nanzao)དྲ་བའི་སྟེང་། ལོ་ན་ ༥༥ གསོན་པའི་རྒྱ་ནག་དབུས་དམག་དོན་ཨུ་ཡོན་འགན་འཛིན་གཞོན་པ་ཟུར་པ་ལིའུ་ཧོན་ཇེད་རུལ་སུངས་རྒོལ་རྡུང་གི་རྙི་ནང་དུ་ཚུད་དོན་སྐོར་ལ། རྒན་ཡོལ་ཞུས་ཟིན་པའི་དམག་དཔོན་ཞིག་གིས་བརྗོད་དོན། “སྔོན་ཆད་ལིའུ་ཧོན་ཇེད་ནི་ཆབ་སྲིད་པའི་ཁྲོད་དུ་འོད་མདངས་བཀྲ་བའི་སྐར་ཆེམ་དེ་ཡིན་པ་དང་། ཞི་ཚད་ཧོ་ཡིས་རོགས་སྐྱོར་འོག་ཁོ་རང་ ༢༠༡༡ ལོར་རྒྱ་ནག་དབུས་དམག་དོན་ཨུ་ཡོན་ཆབ་སྲིད་གཞུང་སྒྲུབ་ཁང་གི་གཙོ་གཉེར་པ་བྱས་ཡོད་པ་མ་ཟད། ཀོ་པའོ་ཞོན་དང་ཞི་ཚད་ཧོ་གཉིས་ཀྱི་ལས་དོན་མང་པོ་ཞིག་ཁོས་ཐད་གར་བསྒྲུབས་ཡོད། ལྷག་པར་དུ་ཀོ་པའོ་ཞོན་དང་ཞི་ཚད་ཧོ་གཉིས་ཀྱི་གསང་བ་མང་པོ་ཞིག་ཀྱང་ཁོས་ཤེས་ཀྱི་ཡོད་སྟབས་ད་རེབ་ཁོ་འཛིན་བཟུང་ཐེབས་པ་རེད།” ཅེས་བརྗོད་འདུག
སྔོན་ཆད་རྒྱ་ནག་གཞུང་འབྲེལ་གསར་ལམ་ (renmingribao) ཞེས་པའི་སྟེང་། ལིའུ་ཧོན་ཇེད་རྒྱ་ནག་དམག་དོན་ཆབ་སྲིད་གཞུང་སྒྲུབ་ཁང་གི་མགོ་གཙོ་ཡིན་སྐབས་ཤིག་ལ། ལིའུ་ཧོན་ཇེད་ཞི་ཚད་ཧོ་ཡི་སྐུ་ཚབ་བྱས་ཏེ་ལའོ་ཉེན་ཞིང་ཆེན་ཏཱ་ལན་མ་ཡུམ་སློབ་གྲྭར་ལྟ་སྐོར་དུ་བསྐྱོད་ཡོད་པའི་གནས་ཚུལ་འཁོད་འདུག
ཞི་ཚད་ཧོ་ནི་ ༢༠༡༤ ལོའི་ཟླ་ ༣ པའི་ནང་རྒྱ་ནག་གཞུང་གིས་ཞིབ་བཤེར་བྱས་ཡོད་པ་དང་། ལོ་དེའི་ཟླ་ ༦ ཚེས ༣༠ ཉིན་ཞི་ཚད་ཧོ་གོ་གནས་ནས་ཕབ་པའི་གནས་ཚུལ་ཁྱབ་བསྒྲགས་བྱས་ཡོད། སྐབས་དེར་དཔྱད་ཞིབ་པ་ཚོས་སྲིད་གཞུང་གི་མིག་འབེན་རྗེས་མ་དེ་ཀོ་པའོ་ཞོན་ཡིན་སྐོར་གླེང་སློང་བྱས་ཡོད།
ཉེ་ལམ་ཀོ་པའོ་ཞོན་དང་འབྲེལ་བ་ཡོད་པའི་དཔོན་རིགས་ཁག་ཅིག་སྔ་རྗེས་སུ་གོ་གནས་ནས་ཕབ་པ་དང་། ཞིབ་བཤེར་བྱས་པ་སོགས་ཀྱི་གནས་ཚུལ་བྱུང་ཡོད་ཅིང་། དེ་དག་ཁྲོད་ཀོ་པའོ་ཞོན་གྱི་དྲུང་ཡིག་དང་པེ་ཅིན་དམག་ཁུལ་གྱི་དམག་དཔོན་གཞོན་པ་ཟུར་པ་ལིའུ་ཀྲི་ཀོང་ (Liu Zhigang) དང་། ལན་ཀྲུག་དམག་ཁུལ་དང་པེ་ཅིན་དམག་ཁུལ་ཁང་གི་ཆབ་སྲིད་ཨུ་ཡོན་གཞོན་པ་ཧོང་ཅེན་ཀའོ་ (Huang Jianguo)། ཞིན་ཅང་ཐོན་སྐྱེད་འཛུགས་སྐྲུན་སྡེ་ཁག་གི་དམག་དཔོན་ལེད་ཚུ་ཡཱེ་ (Lai Ceyi)། ལན་ཀྲུག་དམག་ཁུལ་ཆབ་སྲིད་ཨུ་ཡོད་གཞོན་པ་ཧྥན་ཀྲོང་མའི་ (Fan Zhangmi)། ད་རེབ་ཚེས་ ༡༣ ཉིན་ཞིབ་བཤེར་ཁྱབ་བསྒྲགས་བྱས་པའི་ལིའུ་ཧོན་ཇེད་སོགས་ཚུད་ཡོད།
ཟླ་འདིའི་ཚེས་ ༡༤ ཉིན་ཀྲུང་གོར་ལྟ་བ་ཞེས་པའི་དྲ་ཚིགས་ཀྱིས་ཕྱིའི་གསར་ལམ་ཐོག་གི་གནས་ཚུལ་ལུང་འདྲེན་བྱས་པའི་ནང་། ལོ་སྔོན་མའི་ཟླ་ ༧ པའི་ནང་ཞི་ཚད་ཧོ་གོ་གནས་ནས་ཕབ་པ་དང་བསྟུན་ཏེ། ཀོ་པའོ་ཞོན་གྱི་མིང་རྒྱ་གཞུང་གི་དྲ་ཚིགས་ཁག་ཏུ་འཚོལ་ཞིབ་བཀག་འགོག་བྱས་ཡོད་པ། ཉེ་ལམ་ཀོ་པའོ་ཞོན་དང་ཁོའི་བུ་ཀོ་ཀྲིན་ཀོང་ཕ་བུ་གཉིས་ཀྱི་གནས་ཚུལ་ཝེ་པའོ་དྲ་ཚིགས་སྟེང་དུའང་འཚོལ་ཞིབ་བཀག་འགོག་བྱས་ཡོད། ཟླ་འདིའི་ཚེས་ ༩ ཉིན་རྒྱ་ནག་དབུས་དམག་དོན་ལྷན་ཁང་གིས་ལོ་གསར་དགོང་ཚོགས་སྐོར་གྱི་གནས་ཚུལ་གསར་ལམ་ཁག་ཏུ་ཁྱབ་བསྒྲགས་བྱས་སྐབས། དམག་དོན་འགན་འཛིན་གཞོན་པ་ཀོ་པའོ་ཞོན་གྱི་མིང་མཐོ་མཐོང་རྒྱུ་མེད་པ་ཆགས་ཡོད་ཚུལ་སོགས་འཁོད་འདུག
མདང་དགོང་རྒྱ་ནག་གི་ཆུ་ཚོད་ ༡༡ སྟེང་རྒྱ་ནག་གཞུང་འབྲེལ་གསར་ལམ་ཐོག་གནས་ཚུལ་ཐོན་པར། ལོ་གསར་ཚེས་མགོ་དང་བསྟུན་ཏེ་རྒྱ་ནག་གི་སྲིད་འཛིན་ཞི་ཅིན་ཕིན་དེ་སྔའི་རྒྱ་ནག་གཞུང་གི་མཐོ་རིམ་དཔོན་རིགས་དག་ལ་ལོ་གསར་འཚམས་འདྲི་ཞུས་ཡོད་པའི་མིང་ཐོའི་ཁྲོད་ཀོ་པའོ་ཞོན་གྱི་མིང་དེ་སླར་ཡང་མངོན་ཡོད་པ་མ་ཟད། དམག་དོན་ལྷན་ཁང་གི་ལོ་གསར་དགོང་ཚོགས་ཁྱབ་བསྒྲགས་ཀྱི་མིང་ཐོའི་ཁྲོད་དུའང་ཀོ་པའོ་ཞོན་གྱི་མིང་ཡར་འཇུག་བྱས་ཡོད་འདུག
ཕྱིའི་དཔྱད་ཞིབ་པ་ཚོས། ཉེ་ལམ་བའི་ལོ་འགའི་རིང་རྒྱ་ནག་གི་དམག་དོན་ལམ་ལོག་ཏུ་ཕྱིན་ཡོད་པ་ད་ཆར་ཇེ་གསལ་དུ་འགྲོ་བཞིན་ཡོད་པ་དང་། ༢༠༡༥ ལོའི་སྔ་རྗེས་གཉིས་ལ་དམག་དོན་ཕྱོགས་ཀྱི་དཔོན་རིགས་ཆེ་འབྲིང་ཆུང་གསུམ་ལ་ཞིབ་བཤེར་རྒྱ་ཆེ་རུ་འགྲོ་བཞིན་ཡོད། དམག་མི་ཡོངས་ཀྱི་ལོ་གཅིག་གི་དཔལ་འབྱོར་ལ་ཞིབ་འཇུག་བྱེད་མགོ་ཚུགས་པ། དེ་བཞིན། དམག་འཁྲུག་གི་གྲོས་འཆར་འདོན་ཏེ་དམག་མིའི་རྒྱས་ཤོམ་བགྲེམ་སྟོན་བྱས་པ་བཅས་ལ་བརྟེན་ཏེ། རྒྱ་ནག་མཁའ་དམག་གཞུང་བསྒྲུབས་ཁང་གི་འགན་འཛིན་གཞོན་པ་ལིའུ་ཙི་རོན་ (Liu Zirong) ཟླ་འདིའི་ཚེས་ ༡༠ ཉིན་ཁང་ཐོག་ནས་ལྕེབས་ཏེ་རང་ཤི་བརྒྱབ་ཡོད་པ་དང་། ༢༠༡༤ ལོའི་ཟླ་ ༧ པའི་ནང་རྒྱ་ནག་གཞུང་གིས་ལྐོག་ནས་གནམ་གྲུ་འཕུར་སྐྱོད་བཀག་སྡོམ་བྱས་པའི་གསང་བའི་གནས་ཚུལ་བཅས་ལ་ཞུགས་ན། ད་དུང་སྟག་རྒན་གཞན་ཞིག་ལ་དམིགས་ཡོད་པ་གསལ་པོ་ཡིན་པ་དང་། སྟག་རྒན་དེ་ནི་ཀོ་པའོ་ཞོན་ཡིན་པའང་གསལ་བོ་རེད། ཅེས་སོགས་བརྗོད་འདུག
ཕྱི་ཕྱོགས་སུ་ཀོ་པའོ་ཞོན་གྱི་གནས་ཚུལ་གླེང་སློང་བྱས་པའི་ཁྲོད། རྒྱ་ནག་གཞུང་གིས་ལོ་གསར་གྱི་སྔ་རྗེས་ཤིག་ལ་ཀོ་པའོ་ཞོན་གྱི་གནས་ཚུལ་ཁྱབ་བསྒྲགས་བྱ་རྒྱུ་ཡིན་པ་དང་། དེར་འབྲེལ་ཡོད་མི་སྣ་ཞིག་གིས། རྒྱ་གཞུང་ཕྱོགས་ཀྱི་གསར་འགྱུར་བརྒྱུད་ལམ་ཁག་གིས་ཀོ་པའོ་ཞོན་གྱི་གནས་ཚུལ་གསོག་འཇོག་བྱ་རྒྱུའི་འཆར་གཞི་ཡོད་ཀྱང་། ཁོ་ཚོས་རྒྱ་ནག་གི་ལོ་གསར་གུང་སེང་དང་བསྟུན་ཏེ་ཚོགས་འདུ་ཐེངས་གཉིས་པ་གང་མགྱོགས་བསྐོང་མིན་ལ་བསམ་བློ་གཏོང་དགོས། ཚོགས་འདུ་བསྐོང་རྒྱུ་མིན་ཚེ་ཀོ་པའོ་ཞོན་གྱི་གྱོད་དོན་གང་མགྱོགས་ཁྱབ་བསྒྲགས་བྱ་ངེས་རེད།
དཔྱད་ཞིབ་པ་ཁ་ཤས་ཀྱིས། ཞི་ཚད་ཧོ་ལོ་སྔོན་མའི་ཕྱི་ཟླ་ ༣ ཚེས་ ༡༥ ཉིན་ཞིབ་བཤེར་བྱས་སྐབས། གནས་ཚུལ་དེ་གཞུང་གིས་དུས་ཐོག་ལ་ཁྱབ་བསྒྲགས་བྱས་མེད། ཀོ་པའོ་ཞོན་ཕྱིར་འཕུད་བྱ་རྒྱུ་གཏན་ཁེལ་མ་བྱས་སྔོན་ལ་ནང་ཁུལ་ནས་བརྟག་དཔྱད་བྱ་དགོས་པ་དང་། ༢༠༡༥ ལོ་ཚོགས་འདུ་ཐེངས་གཉིས་པ་བསྐོང་རྗེས་གཞི་ནས་ཕྱིར་འཕུད་བྱ་རྒྱུ་རེད། ཅེས་སོགས་ཀྱི་ཚོད་དཔག་བྱས་འདུག
