ཐུབ་བསྟན་དབྱིག་གཉེན།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་གང་ཉིད་ལ་སྐུའི་འཁྲུངས་སྐར་གྱི་ཕྱག་བཏགས་ལེགས་ཤོས་དེ་གཞན་ལ་ཕན་པའི་བྱ་བ་བརྩམ་རྒྱུ་དེ་ཡིན་ཞེས་གསུངས་པ་དང་། ཉེ་དུས་བརྟན་བཞུགས་ཀྱི་མཇུག་ཏུ་བཀའ་སློབ་བསྩལ་པའི་ནང་བོད་མི་ཚོས་ཡ་རབས་བཟང་སྤྱོད་བྱེད་ཐུབ་པ་ཡིན་ན་དེ་ནི་བརྟན་བཞུགས་ངོ་མ་དེ་ཡིན་ཞེས་གསུངས་ཡོད། ད་ལྟ་འགྲོ་བཞིན་པའི་བོད་མི་མང་སྤྱི་འཐུས་སྐབས་བཅོ་ལྔ་པའི་གྲོས་ཚོགས་ཀྱི་ཚོགས་དུས་དགུ་པའི་ནང་སྤྱི་འཐུས་རྒྱུན་ལས་ཀྱིས་གཞུང་འབྲེལ་གྲོས་ཆོད་གྲོས་འཆར་ཞིག་བསྣམས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་བའི་གྲོས་འཆར་ལ་སྤྱི་འཐུས་རྣམས་ཀྱིས་༧གོང་ས་མཆོག་གིས་བཀའ་བཞིན་བསྒྲུབ་དགོས་པ་གལ་ཆེ་བའི་སྐོར་གཏམ་བཤད་གནང་སོང་། དེ་བཞིན་བོད་ནང་ཛ་དྲག་གི་གནས་སྟངས་ལ་གདུང་སེམས་མཉམ་སྐྱེད་དང་མྱ་ངན་རྗེས་དྲན་གྱི་གཞུང་འབྲེལ་གྲོས་འཆར་ལ་བགྲོ་གླེང་ངམ་གཏམ་བཤད་གནང་བ་མ་ཟད། སྐབས་དེར་ནེའུ་ཡོག་ཏུ་བྱུང་བའི་གནས་ཚུལ་དེས་དགྲ་དགའ་གཉེན་སྡུག་གི་གནས་ཚུལ་ཐབས་སྐྱོ་ཡིན་ལུགས་གསུངས་པ་མ་ཟད། ཞིབ་འཇུག་དང་བརྩད་གཅོད་གཏན་ནས་མེད་པར་སྤྱི་ཚོགས་དྲ་རྒྱའི་གདོང་དེབ་ཅེས་པའི་ནང་ཐོན་པའི་གནས་ཚུལ་རྣམས་ལ་གཞི་བཅོལ་ནས་སྐྱོན་བརྗོད་ཀྱི་ཁ་རྡུང་བཏང་བ་སོགས་སྣ་ཚོགས་གནང་ཡོད།
སྤྱིར་བཏང་བོད་མི་མང་སྤྱི་འཐུས་གྲོས་ཚོགས་ནང་སྤྱི་འཐུས་རྣམས་ཀྱིས་གཏམ་བཤད་མང་བ་ཁ་ཐུག་དེར་གང་དྲན་པ་ཙམ་གཞིར་བཞག་གིས་འགྲེལ་བཤད་གནང་སྲོལ་ཡོད་པ་ལས། ཡིག་ཆ་འགྲེམས་སྤེལ་ཟིན་ཡོད་ནའང་དེ་ལ་སློབ་སྦྱོང་དང་ཐུགས་ཞིབ་གནང་ནས་འགྲེལ་བརྗོད་གནང་མཁན་ཉུང་ཤས་ཤིག་རེད། གོང་དུ་ཞུས་པའི་གྲོས་ཆོད་རྫིག་པོ་པོ་དེ་འཇོག་པའི་བགྲོ་གླེང་དང་། སྔོན་རྩིས་ཀྱི་བགྲོ་གླེང་སྐབས་བཀའ་བརྒྱུད་སྤྱི་འཐུས་བསྟན་པ་ཡར་འཕེལ་གྱིས་བློ་ཚབས་བྱེད་དགོས་པའི་འགྲེལ་བརྗོད་གཅིག་གནང་ནས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལས་གནས་ནས་དགོངས་ཞུ་གནང་རྒྱུ་ཡིན་ཞེས་གསུངས་ནས་ཕྱིར་ཕེབས་དགོས་པའི་གནས་ཚུལ་དེ་བྱུང་བ་རེད།
བཀའ་བརྒྱུད་སྤྱི་འཐུས་བསྟན་པ་ཡར་འཕེལ་ལགས་ཀྱིས་བསྙོན་འཛུགས་གསུམ་གནང་བ་དེ་གྲོས་ཚོགས་ནང་ཡོད་པའི་འཐུས་མིའི་ཁོངས་སུ་ཡོད་པར་བསྙོན་འཛུགས་དང་བཙན་བྱོལ་བོད་མའི་སྤྱི་ཚོགས་ནང་དེ་ལྟར་ཡོད་པའི་བསྙོན་འཛུགས་བཅས་གྲོས་ཚོགས་ཀྱི་ཕྱི་ནང་གཉིས་ཀར་བསྙོན་འཛུགས་གནང་ཡོད། ལྷག་པར་གྲོས་ཚོགས་ནང་གནས་རིམ་མཐོ་ཤོས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ལ་བསྙོན་འཛུགས་བྱས་པ་རེད། ཚོགས་གཙོ་སྤེན་པ་ཚེ་རིང་ལགས་ཀྱིས་བརྒྱུད་ལམ་སོགས་ཀྱིས་གནས་ཚུལ་གླེང་སློང་མི་བྱེད་པའི་རེ་བསྐུལ་གནང་ཡོད་ནའང་།གནད་དོན་དེ་གྲོས་ཚོགས་ཙམ་མིན་པར་གྲོས་ཚོགས་ཀྱི་ཕྱི་ལའང་ཡོད་པའི་བསྙོན་འཛུགས་བྱས་པར་བརྟེན་ཁོང་གིས་བསྙོན་འཛུགས་གནང་བ་དེ་དག་ལ་ཁུངས་བསྐྱེལ་ར་སྤྲོད་གནང་དགོས་པའི་ཆེད་འདིར་སླར་ཡང་གླེང་ཙམ་ཞུས་པ་ཡིན།
ལྐོག་ཟ་རུལ་སུངས་དང་སྤྱི་རྒྱུ་སྒེར་སྤྱོད། མི་གསོད་ཁྲག་སྦྱོར་བྱེད་མཁན་བཙན་བྱོལ་བོད་མིའི་སྤྱི་ཚོགས་ནང་ཡོད་པ་མ་ཟད། གྲོས་ཚོགས་རྭ་བ་འདིའི་ནང་ཡོད་ཅེས་གསུངས་པ་དེ་ནི་ནག་ཉེས་ཤིན་ཏུ་ཆེན་པོ་བྱས་པའི་ཉེས་འཛུགས་ཡིན་པ་དང་། སྤྱི་འཐུས་གྲོས་ཚོགས་ནང་གཏམ་བཤད་གནང་བའི་ཚིག་དོན་ལ་ཁྲིམས་ཁང་ལ་གཏུགས་བཤེར་བྱེད་མི་ཆོག་པའི་ཁྲིམས་སྒྲིག་ཤིག་ཡོད་ནའང་། སྒྲིག་གཞིའི་ཚིག་དོན་དེ་ལག་ཆར་བཟུང་ནས་གྲོས་ཚོགས་ནང་གཞི་མེད་ཀྱི་གཏམ་བཤད་གནང་བ་དེ་ནི་སྤྱི་འཐུས་རྣམས་ཀྱིས་ལས་འཁུར་དམ་འབུལ་སྐབས་ལས་འབྲས་དཔང་འཕེར་དང་དྲང་བདེན་ཕྱོགས་ལྷུང་མེད་པའི་འགན་འཁུར་ལེན་རྒྱུ་ཡིན་ཞེས་དམ་བཅའི་རྩ་ཚིག་དེ་དང་རྒྱབ་འགལ་ཡིན་སྟབས། གལ་སྲིད་དེ་རིགས་གནང་མཁན་སུ་ཡིན་སྤྱི་ཚོགས་ལ་བརྡ་འདོན་དང་ཁུངས་སྐྱེལ་དཔང་རྟགས་ར་སྤྲོད་ཐུབ་ངེས་མེད་ན། དེ་ལྟར་བསྙོན་འཛུགས་གནང་མཁན་བཀའ་བརྒྱུད་སྤྱི་འཐུས་བསྟན་པ་ཡར་འཕེལ་ལགས་སྤྱི་འཐུས་ནང་མུ་མཐུད་བཞུགས་རྒྱུར་འོས་ཆོས་ལྡན་ཡོད་མེད་འོས་ཤོག་འཕེན་མཁན་བཀའ་བརྒྱུད་མི་མང་ཚོས་ཐག་གཅོད་གནང་དགོས་པ་ཡིན། ལྷག་པར་ཁོང་གིས་གྲོས་ཚོགས་ནང་རྙོག་གླེང་དེ་གཏམ་བཤད་གནང་སྐབས་ཁོང་ཁྲོ་དང་རྩུབ་སྤྱོད་ཀྱི་རྣམ་འགྱུར་དྲག་པོས་སྐད་ཤུགས་ཆེན་པོར་གནང་བ་དེ་ནི་བོད་མིའི་ཡ་རབས་བཟང་སྤྱོད་ལ་རྩིས་མེད་བཏང་བ་མ་ཟད། བཅོམ་ལྡན་འདས་ཀྱི་རྗེས་འཇུག་དགེ་སློང་གི་གཟུགས་སུ་ཆས་ཏེ་ཀུན་སྤྱོད་དེ་འདྲ་ཞིག་གནང་བ་དེ་ནི་ཆོས་དང་འཇིག་རྟེན་གང་གི་ཆ་ནས་ཀྱང་མི་ལེགས་པས་སྤྱི་ཚོགས་ནང་ཆོས་ལུགས་སྤྱི་འཐུས་ལ་མཐོང་ཆུང་བཟོ་གཞི་ཡང་བཟོས་ཡོད།
སྤྱི་འཐུས་གྲོས་ཚོགས་ནང་སྤྱི་རྫས་སྒེར་སྤྱོད་དང་ལྐོག་ཟ་རུལ་སུངས་བྱེད་མཁན། མི་གསོད་ཁྲག་སྦྱོར་བྱེད་མཁན་སུ་དང་སུ་ཡིན་དང་། དེ་བཞིན་བཙན་བྱོལ་བོད་མིའི་སྤྱི་ཚོགས་ནང་དེ་རིགས་བྱེད་མཁན་གང་ན་སུ་ཡོད་གསལ་དཀྲོལ། དེའི་དཔང་རྟགས་ཁུངས་སྐྱེལ་གནང་རྒྱུ་བཅས་བཀའ་བརྒྱུད་སྤྱི་འཐུས་བསྟན་པ་ཡར་འཕེལ་ལགས་སུ་འགན་འཁུར་ཡོད། སྤྱི་འཐུས་ལྷན་ཚོགས་ཀྱི་བཞུགས་མོལ་ཚོགས་འདུར་སྤྱི་འཐུས་རྣམས་ཀྱིས་ཐག་གཅོད་ཇི་ལྟར་གནང་ཡོད་མང་ཚོགས་ཀྱིས་ཤེས་རྟོགས་མེད་པ་དང་། གལ་སྲིད་བཀའ་བརྒྱུད་སྤྱི་འཐུས་བསྟན་པ་ཡར་འཕེལ་ལགས་ཀྱིས་གྲོས་ཚོགས་ནང་བསྙོན་འཛུགས་ཀྱི་གཏམ་བཤད་གནང་བ་དེ་ནོར་འཛོལ་ལ་ངོས་ལེན་དང་ཕྱིར་འཐེན་གནང་ཡོད་ཚེ། དེ་ནི་བཟང་སྤྱོད་ཀྱི་འགྲོ་ལུགས་ཤིག་ཡིན།
བོད་མི་མང་སྤྱི་འཐུས་གྲོས་ཚོགས་ནང་སྤྱི་འཐུས་རྣམས་ཀྱིས་གཏམ་བཤད་གནང་སྟངས་དང་ལུས་ཀྱི་རྣམ་འགྱུར་བཅས་སྐབས་རེར་བཟང་སྤྱོད་དང་མ་མཐུན་པ་ཡང་ཡང་ཡོང་གི་ཡོད་པ་དང་། འདས་པའི་དུས་སུའང་དེ་ལྟར་བྱུང་ཡོད་པ་མ་ཟད། ད་ལྟའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ནང་དུའང་དེ་ལྟར་ཡོད་པ་མངོན་གསལ་རེད། མང་གཙོ་ཡང་དག་པའི་གྲོས་ཚོགས་ནང་བརྗོད་དུ་མི་རུང་བའི་ཚིག་ཅེས་པ་བེད་སྤྱོད་བྱེད་རྒྱུ་མེད་པར་དམ་འཛིན་གནང་གི་ཡོད། བོད་མིའི་ཡ་རབས་བཟང་སྤྱོད་ནང་དུའང་ངག་གི་མི་དགེ་བ་བཞི་ཡོད་པའི་ནང་ནས་ཚིག་རྩུབ་དང་ངག་འཁྱལ་ནི་གྲོས་ཚོགས་ནང་བརྗོད་དུ་མི་རུང་བའི་ཚིག་ཅེས་པ་དེ་དང་ཉེ་བོ་རེད། སྤྱི་འཐུས་རྣམས་ཀྱིས་ཚིག་རྩུབ་དང་ངག་འཁྱལ་གྱི་དམག་ཡང་ནས་ཡང་དུ་བརྒྱབས་པ་དང་། ཕྱོགས་རེས་དཔུང་གྲོགས་མངོན་གསལ་གྱིས་མིང་འདོན་མེད་ནའང་ཤུགས་ཀྱིས་ཡོད་པ་དེ་ནི་འོས་ཤོག་འཕེན་སྐབས་དང་། གཏམ་བཤད་གནང་ཕྱོགས་གང་ལ་བསྐྱོད་ཀྱི་ཡོད་པ་ནས་གསལ་པོ་ར་འཕྲོད་ཐུབ། སྲིད་དོན་གྱི་ཚོགས་པ་ཡོད་པའི་གྲོས་ཚོགས་ཡིན་ན་ཆབ་སྲིད་ཚོགས་པ་གང་གི་ཁོངས་གཏོགས་ཡིན་པ་དེ་བཞིན་ལངས་ཕྱོགས་སོགས་དབྱེ་གསེས་ཐུབ་ནའང་རང་རེའི་གྲོས་ཚོགས་ནི་སྲིད་དོན་ཚོགས་པ་མེད་ལ། བོད་མི་སྤྱིའི་ཚབ་མཚོན་ཐུབ་པའི་གྲོས་ཚོགས་འཐུས་མི་ཡིན་ཟེར་བའི་ཐ་སྙད་དེའི་འོག་ཕྱག་ལས་གནང་གི་ཡོད་ཚོད་རེད།
དེ་དང་འཕྲོས་ནས་རེས་གཟའ་པ་སངས་ཉིན་བཀའ་དྲུང་ཡིག་ཚང་གི་སྔོན་རྩིས་ནང་སྤྱི་འཐུས་ཚོད་དཔག་ཚོགས་ཆུང་གིས་བཅོག་ཆ་གནང་བའི་གནད་དོན་གཅིག་ལ་སྤྱི་འཐུས་རྣམས་ཀྱིས་འོས་ཤོག་འཕེན་པའི་གནད་དོན་དེ་རེད། འདི་ལོ་སྲིད་སྐྱོང་དང་སྤྱི་འཐུས་འོས་བསྡུའི་བརྒྱུད་རིམ་མགོ་འཛུགས་བྱ་རྒྱུ་ཡིན་པ་དང་། སྔོན་རྩིས་བཅོག་ཆ་དེ་ནི་སྲིད་སྐྱོང་དང་བོད་མིའི་སྒྲིག་འཛུགས་ཀྱིས་གྲུབ་འབྲས་ལྡན་པའི་ལས་དོན་གནང་བའི་སྐོར་བརྙན་དཔར་གྱི་དཔེ་དེབ་ཕྱོགས་བསྒྲིགས་དང་འགྲེམས་སྤེལ་གནང་རྒྱུའི་གནད་དོན་དེ་རེད། ཚོད་དཔག་ཚོགས་ཆུང་གིས་འོས་བསྡུའི་བརྒྱུད་རིམ་དང་འབྲེལ་ནས་བཅོག་ཆ་གནང་སྐོར་གསལ་བཤད་གནང་བ་དེར་སྤྱི་འཐུས་ཁག་ཅིག་གིས་རྒྱ་དྭོགས་པས་ཕུང་། བོད་རེ་བས་ཕུང་ཞེས་པའི་གཏམ་དཔེ་ལུང་འདྲེན་གནང་ནས་ཚོད་དཔག་ཚོགས་ཆུང་གི་ཀུན་སློང་ལ་དྭོགས་སློང་གནང་སོང་། འོས་བསྡུའི་ལས་རིམ་སྐབས་འོས་གཞིར་ཡོད་པ་དེའི་བྱས་རྗེས་དང་གྲུབ་འབྲས་སོགས་གཞུང་འབྲེལ་གྱི་དྲིལ་བསྒྲགས་བྱེད་པ་དེ་མང་གཙོའི་སྤྱི་ཚོགས་ནང་སྤྱི་བའི་ནུས་པ་འོས་མི་སྒེར་གྱི་བེད་སྤྱོད་བྱས་པར་ངོས་འཛིན་གནང་ནས་དེ་རིགས་སྲིད་དོན་ཚོགས་པ་དང་འོས་མི་སྒེར་གྱིས་གནང་སྲོལ་ཡོད་པས་ཚོད་དཔག་ཚོགས་ཆུང་གིས་བཅོག་ཆ་གནང་བ་དེ་སྤྱི་སྲོལ་དང་མཐུན་པ་ཞིག་ཡིན་ནའང་། དེ་ལ་འགག་བྱ་གནང་བ་རེད། སྟབས་ལེགས་པར་ཚོད་དཔག་ཚུང་གིས་བཅོག་ཆ་ལ་གྲངས་མང་གི་རྒྱབ་སྐྱོར་ཐོབ་ནས་བཅོག་ཆ་གནང་རྒྱུར་མང་མོས་ཐོབ་སོང་། བཀའ་ཤག་གིས་དེ་འདྲའི་ལས་འཆར་ཞིག་བསྣམས་པ་དང་དེ་ལ་དཔལ་འབྱོར་བཀའ་བློན་གྱིས་གསལ་བཤད་ཁྱད་ཚར་ཞིག་གནང་བ་བཅས་ནི་མང་གཙོ་སྲུང་སྐྱོབ་ལ་འགལ་རྐྱེན་བྱེད་སྲིད་པ་ཡིན། ལྷག་པར་མང་གཙོའི་འགྲོ་ལུགས་ལ་ཤིན་ཏུ་མཁས་ཤིང་ཕྱུག་པའི་སྲིད་སྐྱོང་གི་དབུ་ཁྲིད་པའི་བཀའ་ཤག་གིས་མ་འོངས་པའི་སྲིད་སྐྱོང་གི་འོས་མི་དང་འབྲེལ་བའི་དྲིལ་བསྒྲགས་ཡིག་ཆ་དཔར་བསྐྲུན་འགྲེམས་སྤེལ་གནང་རྒྱུའི་སྔོན་རྩིས་འཆར་འགོད་གནང་བ་དེ་ནི་མང་གཙོའི་སྤྱི་ཚོགས་ཀྱི་བཟང་སྤྱོད་དང་འགལ་བའི་ཤིན་ཏུ་བློ་ཚབས་ཆེན་པོ་བྱེད་དགོས་པའི་གནད་དོན་ཞིག་རེད། གོང་ཞུས་གནད་དོན་དེ་གཉིས་ལ་དཔྱད་ཚེ་བོད་མི་མང་སྤྱི་འཐུས་གྲོས་ཚོགས་ནང་སྲིད་སྐྱོང་དང་སྤྱི་འཐུས་འོས་བསྡུའི་དྲིལ་བསྒྲགས་ལས་འགུལ་མགོ་འཛུགས་ཟིན་མེད་དམ་སྙམ་པའི་འཇིགས་སྣང་ཞིག་བྱུང་།
དུས་ཡུན་རིང་པོའི་ནང་རྡ་རམ་ས་ལའི་ཁོར་ཡུག་ནི་སྐྱུག་དྲོ་དང་རུལ་དྲིའི་གང་ཡོད་འདུག སྟོན་པ་ལྟ་བུའི་བླ་མ་བཟང་པོའི་འཁོར་དུ་གཡོ་རྒྱུ་ཁྲམ་གསུམ་གྱི་ཐལ་རླུང་ངན་པ་རྒྱུན་མ་ཆད་པ་འཚུབ་སྟེ་བོད་ཀྱི་རྒྱལ་ས་གཉིས་པ་དེ་འབག་བཙོག་རྐུ་ཇག་ཁྲམ་གསུམ་རྟེན་གཞི་ལྟ་བུ་ཆགས་པར། བློ་གྲོས་ཀྱི་རྣམ་དཔྱོད་ཡངས་ཤིང་བོད་ཀྱི་ཁོར་ཡུག་ལ་དུས་རྟག་ཏུ་ཐུགས་འགན་ཁུར་བཞིན་པའི་སྐྱེས་མཆོག་ཆོས་བརྒྱུད་ཁག་གི་སྐུ་ཚབ་རྣམ་པས་དུས་ནས་དུས་སུ་འགྲོ་བ་མི་ཡི་མིག་ལམ་དུ་མི་འཛེས་པའི་ཇག་ཚོགས་དང་ཤན་པ། རྐུན་པོའི་ཁོར་ཡུག་གི་གད་སྙིགས་རྣམས་ཐབས་བྱུས་སྣ་ཚོགས་ཀྱིས་གཙང་ཕྱིས་ལ་མུ་འཐུད་དེ་འབད་པ་དང་། ཁྱད་པར་དུ་སྐྱབས་མགོན་རྒྱལ་བའི་དབང་པོ་དགུང་ལོ ༨༠ ཕེབས་པ་དང་བསྟུན་ཁོང་ལ་བཀའ་དྲིན་རྗེས་སུ་དྲན་པའི་མཆོད་པ་བླ་ན་མེད་པ་ཞིག་ཕུལ་བ་སྟེ། རྡ་སའི་རྐུ་ཇག་ཤན་པའི་མགོ་བོར་ལྷག་བསམ་ལྷད་མེད་ཀྱི་སྤྱི་འཐུས་བསྟན་པའི་མཚན་ཅན་གྱིས་བདེན་པའི་ཐོ་བ་གླད་ལ་བསྐོར་ཏེ་ཐེངས་གཅིག་བཞུས་པ་དེས། རྡ་སའི་གད་སྙིགས་ནག་ཕྱོགས་པའི་རིགས་ཐམས་ཅད་བླ་ཉམ་ཚེ་ཉམ་དུ་བཟོས་པ་དང་། ཇག་ཤན་གྱི་འབག་བཙོག་རྣམས་ཁོར་ཡུག་དེའི་དཀྱིལ་དུ་གནས་པའི་བཟོད་གླག་བྲལ་ཏེ་རྐུབ་རྡུལ་ཛོར་པོ་དེ་གྲོས་ཚོགས་ར་བའི་ནང་དུ་སྤྲུག་ཏེ་ཕྱི་བལྟས་མེད་པར་ recycling བསྐྱར་བཟོའི་བཙོག་སྒྲོམ་ནང་དུ་ཐེངས་གཅིག་གཡུག འོན་ཀྱང་རྡ་སའི་ཁོར་ཡུག་ཏུ་དོན་དངོས་ཀྱི་དྲང་བདེན་གྱི་ཁོར་ཡུག་གཙང་མ་ཞིག་ད་བར་ཆགས་མ་ཐུབ་པར་ལྟར་བཙོག་སྒམ་ནང་གི་ཅ་ལག་སླར་ཡང་ཡར་བླངས་ཏེ་བེད་སྤྱོད་གཏོང་བཞིན་འདུག དེར་མ་ཟད་ཕྱོགས་གཉིས་ཀའི་ཁོར་ཡུག་མཐོང་བའི་སྐལ་པ་དབེན་པའི་དམུ་ལོང་ཉུང་ཤས་ཤིག་དང་། བདེན་པའི་དྲི་བསུང་འཐུལ་ས་མེད་ཅིང་མི་བདེན་སྐྱག་དྲི་དྲོ་དུས་བདུད་བརྩིའི་བཅུད་དུ་མངར་བའི་ཁྱི་འཁྱམས་ཁག་ཅིག་ནི། ཇག་ཤན་རྐུན་པོའི་སྐྱག་རྒན་རྣམས་གད་སྙིགས་བླུགས་སྣོད་དུ་གཙང་བཟོ་གནང་སྐབས་དྲང་བདེན་ཟེར་བ་ཞིག་མི་ཚེ་འདིར་མཇལ་མ་མྱོང་བའི་རྐུ་ཇག་ཤན་པའི་ཕྱོགས་གཏོགས་ཁྱི་འཁྱམས་པོ་ཉུང་ཤས་ཤིག་གིས་དྲི་ངན་དང་འབག་བཙོག་གི་སྦག་པའི་སྐྱག་པ་དེ་ཚོ་ཁོ་ཚོའི་ཁ་ཟས་སུ་མཐོང་སྟེ་གད་ཕྱིས་བྱེད་པོ་སྤྱི་འཐུས་བསྟན་པ་ཡར་འཕེལ་ལ་ཁྱི་འཁྱམས་འདི་ཚོ་ངུ་ཟུག་རྒྱག་བཞིན་འདུག
འཁོར་རེ། ཁ་ཅིག་གིས་ཟེར་ན། ཁ་སང་གྲོས་ཚོགས་ར་བའི་ནང་གི་རྙོག་དྲ་དེ། འདས་པའི་ཆོས་རྒྱུད་ཀྱི་ནད་རྙིང་ཡོད་པའི་སྲིད་དབང་འཐབ་རྩོད་ཅིག་རེད་ཟེར་ག དེ་རྒྱབ་ལ་སུ་དང་སུ་ཡོད་མེད་ལ་རྩད་གཅོད་བྱ་དགོས། ཁ་ཅིག་གིས་ཞེ་འདོད་ལ་ནད་རྙིང་དེ་བཟུང་། ཁ་གཞན་ཞིག་གཡར་ནས་རང་ཕྱོགས་ལ་མི་མང་པོ་ཚུར་འགུག་བྱེད་ཀྱི་ཡོད་རེད་ཟེར་ག དེ་ནི་ཐབས་ཇུས་ཞིག་རེད། དེ་དངོས་ནས་ཡིན་ན། མ་ཤེས་པར་ཧོབ་རྒྱུགས་བྱེད་མཁན་ཚོར་སྙིང་རྗེ་ཨ།
རྡ་རམ་ས་ལའི་གསར་འབྱོར་སྤྱི་ཚོགས་ནང་ཆུ་ངོགས་གཏམ་རྒྱུད་ཀྱི་བོད་སྐད་བརྙན་འཕྲིན་ལྟ་རྒྱུར་དགའ་པོ་ཡོད་པར་བརྟེན་དེང་སང་མི་མང་པོ་ཞིག་གིས་སོ་སོ་ལེང་ཧྲན་གྱི་ཕོ་རྒོད་ཡིན་མདོག་སྟོན་ཡོང་གི་འདུག རླུང་འཁོར་ནག་པོས་སྤྱི་པའི་སྡིང་ཆའི་སྟེང་དུ་སྟ་རེ་འཁྱེར་ནས་ཤོར་ཡོང་བ་དེ་དཔའ་ཉམས་ཏོག་ཙམ་ཡོད་ནའང་ཁོ་རྒྱབ་བསྐུལ་བྱེད་མཁན་དེ་བྱུས་དཔོན་ཤེས་རབ་ཐོགས་མེད་ཡིན་པ་མང་པོ་ཞིག་གིས་ཤེས་ཀྱི་མེད། སྲིད་དོན་འོས་མི་གང་ཞིག་གི་འོས་བསྡུའི་ལས་རིམ་ནང་ཆབ་སྲིད་པ་ཕན་ཚུན་དབར་འགྲན་རྩོད་བྱེད་པ་དེ་དེང་རབས་ཆབ་སྲིད་ཀྱི་དབྱིངས་ཤིག་ཡིན་ན་ཡང་དེ་ལ་བཟང་སྤྱོད་ཅིག་ངེས་པར་དུ་ཡོད་དགོས་པ་ཡིན། རང་ཉིད་ལ་རྒྱལ་ཁབ་ཀྱི་སྐྱིད་སྐྱོང་ངམ་སྲིད་བློན་གྱི་འོས་ཤོག་ཐོབ་དགོས་ན་མི་མང་གི་མདུན་དུ་ལས་དོན་གྱི་གྲུབ་འབྲས་གཟེངས་སུ་ཐོན་པ་སྟོན་རྒྱུ་ཡོད་ན་དེ་ནི་ཨང་ཀི་དང་པོ་ཡིན། དེ་ལྟར་མེད་ན་མ་འོངས་པའི་ལས་དོན་བྱེད་ཕྱོགས་གསལ་སྟོན་གྱི་ཐོག་ནས་མི་མང་གི་ཡིད་སེམས་བཀུག་ཐུབ་པ་དགོས། འདིའི་ཐད་ནས་ཀྱང་རེ་བ་དེ་ཙམ་མེད་ན་ད་དུང་དེ་མིན་གྱི་ཆབ་སྲིད་ཀྱི་ལས་འགུལ་མང་ཙམ་སྤེལ་རྒྱུ་ཡོད། རང་རེའི་སྤྱི་ཚོགས་ལ་མཚོན་ན་གྲྭ་ཚོགས་ཆེ་བའི་གདན་ས་གསུམ་དང་དགོན་པ་གྲྭ་ཚང་གཞན་ལ་མང་ཇ་སྐུ་འགྱེད་ཕུལ་སྟེ་འོས་ཤོག་ཐད་ཐུགས་སྨོན་གནང་རོགས་ཞེས་གོ་རྒྱུ་སྟོན་པ་དང་། གཞིས་ཆགས་ཁག་ལ་རང་ངོས་ནས་རོགས་སྐྱོར་བཙལ་ཏེ་ཡིད་འགུལ་ཐེབས་ཐབས་བྱས་ཀྱིས་འོས་ཤོག་ལ་རེ་བ་བྱེད་པ། ད་དུང་དུས་འཁོར་དབང་ཆེན་སོགས་མི་མང་འདུ་ཚོགས་ཆེ་ས་བེད་སྤྱད་དེ་དྲིལ་བསྒྲགས་བྱེད་པ་སོགས་མང་པོ་ཡོད། འདི་དག་ནི་རང་ཉིད་ལ་འོས་ཤོག་ཐོབ་པའི་ཆེད་དུ་རང་ཉིད་ནས་འབད་བརྩོན་བྱས་པ་ཞིག་ཡིན་པས་བཟང་སྤྱོད་དང་མི་མཐུན་པ་མེད། རང་ཉིད་ལ་འོས་ཤོག་ཐོབ་ཕྱིར་རང་གིས་འགྲན་རྩོད་བྱ་ཡུལ་གྱི་ཁ་གཏད་དེར་ནག་ཉེས་གནམ་སར་མི་ཤོང་བ་བསྐྱལ་ཏེ་ནག་པོ་ནག་རྐྱང་བཟོ་རྩིས་བྱེད་པ་དང་། གཞུང་འཛིན་པ་གང་ཞིག་གི་རང་ཉིད་ལ་ཡང་བསྐྱར་འོས་ཤོག་ཐོབ་ཆེད་ཀྱི་དྲིལ་བསྒྲགས་ཆེད་གཞུང་དངུལ་བེད་སྤྱོད་བཏང་ན་མི་སྤྱོད་དང་མཐུན་ཐབས་མེད།