ཀྲུའུ་ཡོན་ཁཱང་གི་གྱོད་དོན་ཐན་ཅིན་གྲོང་ཁྱེར་ཞིབ་བཤེར་ལྷན་ཁང་ཡན་ལག་དང་པོས་ཐན་ཅིན་གྲོང་ཁྱེར་འབྲང་རིམ་ཁྲིམས་ཁང་དང་པོར་ཞུ་གཏུག་བྱས་པ་ཡོངས་བསྒྲགས་བྱས་འདུག
དེ་རིང་ཞོགས་པའི་རྒྱ་ནག་གི་ཆུ་ཚོད་ ༩ བའི་སྟེང་། རྒྱ་ནག་དབུས་ཆེས་མཐོའི་ཞིབ་བཤེར་ལྷན་ཁང་གི་དྲ་ཚིགས་གཙོས་པའི་བརྒྱུད་ལམ་ཆེ་ཁག་གསུམ་གྱིས་དུས་གཅིག་ཏུ་ “ཐན་ཅིན་ཞིབ་བཤེར་ལྷན་ཁང་གིས་ཀྲུའུ་ཡོན་ཁཱང་གི་གྱོད་དོན་ཞུ་གཏུག”ཅེས་པའི་གནས་ཚུལ་ཞིག་ཁྱབ་བསྒྲགས་བྱས་རྗེས། ཕྱི་ནང་གི་གསར་ལམ་ཁག་མང་པོ་ཞིག་ཏུ་སླར་ཡང་ཀྲུའུ་ཡོན་ཁཱང་གི་སྐོར་གླེང་མགོ་བརྩམས་ཡོད།
དེ་རིང་རྒྱ་ནག་ཆེས་མཐོའི་ཞིབ་བཤེར་ལྷན་ཁང་གི་དྲ་བས་གནས་ཚུལ་སྤེལ་དོན་ལྟར་ན། རྒྱ་ནག་དབུས་སྲིད་གྲོས་ལྷན་ཁང་གི་རྒྱུན་ལས་ཟུར་བ་དང་། དབུས་སྲིད་ཁྲིམས་ལྷན་ཁང་མགོ་གཙོ་གཞོན་པ་ཟུར་བ་ཀྲུའུ་ཡོན་ཁཱང་གིས་ལྐོག་ངན་འབོར་ཆེན་བླངས་པ་དང་དབང་ཆ་སྒེར་སྤྱོད་བྱས་པ། རྒྱལ་ཁབ་ཀྱི་གསང་བ་ཕྱི་གྱར་བྱས་པ་བཅས་ཀྱི་གྱོད་དོན་དེ་ཆེས་མཐོའི་ཞིབ་བཤེར་ལྷན་ཁང་གིས་རྩད་ཞིབ་བྱས་པའི་མཇུག་འབྲས་ཐོན་པ་ལྟར། ཐན་ཅིན་གྲོང་ཁྱེར་ཞིབ་བཤེར་ལྷན་ཁང་ཡན་ལག་དང་པོར་ཞིབ་བཤེར་རྩིས་སྤྲོད་བྱས་ཡོད་པ་དང་། ཟླ་འདིའི་ཚེས་ ༣ ཉིན་ཐན་ཅིན་གྲོང་ཁྱེར་ཞིབ་བཤེར་ལྷན་ཁང་ཡན་ལག་དང་པོས་ཐན་ཅིན་གྲོང་ཁྱེར་འབྲང་རིམ་ཁྲིམས་ཁང་དང་པོར་ཞུ་གཏུག་བྱས་པ་ཡོངས་བསྒྲགས་བྱས་ཡོད་འདུག
དེ་རིང་ཏཱ་ཅི་ཡོན་དྲ་བའི་སྟེང་། རྒྱ་ནག་ཞིབ་བཤེར་ལྷན་ཁང་གི་གནས་ཚུལ་ལྟར་ན། ཀྲུའུ་ཡོན་ཁཱང་གི་ནག་ཉེས་རྡོ་སྣུམ་ཕྱོགས་དང་སི་ཁྲོན་ཕྱོགས། ཆབ་སྲིད་ཕྱོགས་ཀྱི་ཁྱབ་ཁོངས་གླེང་ཡོད་ཀྱང་། སྔོན་ཆད་རྒྱ་གཞུང་གིས་གནས་ཚུལ་བརྡ་ཁྱབ་སྤེལ་སྐབས་ཀྲུའུ་ཡོན་ཁཱང་ལ་ནག་ཉེས་དྲུག་ཡོད་པ་དང་། དེའི་སྟེང་ཕྱི་ཕྱོགས་བརྒྱུད་ལམ་ཁག་ཏུ་གླེང་སློང་བྱེད་བཞིན་པའི་ནག་ཉེས་གཞན་ལའང་དོགས་གཞི་ཡོད་སྐོར་བསྒྲགས་ཡོད་ཀྱང་། ད་རེབ་རྒྱ་གཞུང་གིས་དངོས་སུ་ཞུ་གཏུག་བྱས་སྐབས། ལྐོག་རྔན་འབོར་ཆེན་བླངས་པ་དང་དབང་ཆ་སྒེར་སྤྱོད། རྐང་བཙུགས་ནས་རྒྱལ་ཁབ་ཀྱི་གསང་བ་ཕྱི་གྱར་བྱས་པ་བཅས་ལས་ཁྱབ་བསྒྲགས་བྱས་མི་འདུག
གནས་ཚུལ་དེའི་ནང་མུ་མཐུད་དུ་བཀོད་དོན། སྔོན་ཆད་གཞུང་ཕྱོགས་ནས་ཁྱབ་བསྒྲགས་སྤེལ་པའི་ཁྲོད་ཀྲུའུ་ཡོན་ཁཱང་གི་ནག་ཉེས་ཀྱི་ནང་དོན་གཙོ་བོ་དག་ཁྱབ་བསྒྲགས་བྱས་མེད་ཀྱང་། ཕྱིའི་བརྒྱུད་ལམ་ཁག་ཏུ་ཀྲུའུ་ཡོན་ཁཱང་གི་ནག་ཉེས་ནོར་ནག་གི་སྤུ་ལས་མང་པ་ཡོད་སྟབས། རྒྱ་གཞུང་གིས་ཀྲུའུ་ཡོན་ཁཱང་གིས་ལྐོག་རྔན་བླངས་པ་དང་དབང་ཆ་སྒེར་སྤྱོད་སོགས་ཁྱབ་བསྒྲགས་བྱས་ཀྱང་གནས་ཚུལ་གསར་བ་ག་ཚོད་ཞིག་ཆགས་སྲིད་དམ། རྒྱལ་ཁབ་ཀྱི་གསང་བ་ག་རེ་ཕྱི་གྱར་བྱས་པ་རྒྱ་གཞུང་གིས་ཁྲིམས་ལུགས་ལྟར་ཁྱབ་བསྒྲགས་བྱ་མི་ཆོག་ཀྱང་། མི་སྒེར་གྱི་གནད་དོན་དང་ཚོང་འབྲེལ་གྱི་གསང་བ་སོགས་ཡོངས་གྲགས་སུ་འདྲི་གཅོད་མ་བྱས་ན་རྒྱ་ནག་ནང་གི་མང་ཚོགས་ག་ཚོད་ཀྱིས་གནས་ཚུལ་དེའི་སྐོར་ཤེས་རྟོགས་བྱུང་ངམ། ཅེས་སོགས་བརྗོད་འདུག
ཀྲུང་གོར་ལྟ་བ་ཞེས་པའི་དྲ་བས་གནས་ཚུལ་སྤེལ་པ་ལྟར་ན། དེ་རིང་རྒྱ་གཞུང་གིས་ཀྲུའུ་ཡོན་ཁཱང་གི་ནག་ཉེས་ཁ་ཤས་ཞུ་གཏུག་ཁྱབ་བསྒྲགས་བྱས་ཡོད་ཀྱང་། ནག་ཉེས་ཐག་གཅོད་བྱེད་པའི་ཉིན་མོ་ཁ་གསལ་མེད་ཀྱང་། ཟླ་སྔོན་མའི་རྒྱ་ནག་གི་ཚོགས་ཆེན་སྐབས་རྒྱ་ནག་ཆེས་མཐོའི་ཞིབ་དཔྱོད་ཁང་གི་འགན་འཛིན་ཚའོ་ཅན་མིན་ (Cao Jianming)གྱིས། འབྱུང་འགྱུར་ཀྲུའུ་ཡོན་ཁཱང་དང་ཞི་ཚད་ཧོ་སོགས་ཀྱི་མཐོ་རིམ་དཔོན་རིགས་ཚོའི་ནག་ཉེས་ཡོངས་གྲགས་ཐོག་ཐག་གཅོད་བྱ་རྒྱུ་ཡིན་ཡང་། ཡོངས་གྲགས་བྱེད་པའི་བརྒྱུད་རིམ་གང་ཞིག་ལ་སླེབ་ཡོད་མེད་གསལ་བོ་མི་འདུག་ཅེས་བརྗོད་ཡོད། ཅེས་འཁོད་འདུག
སྦྲུལ་ཡག་པོ་བཙིར་ན་ཡན་ལག་དང་ཉིང་ལག་རིགས་དོན་སྲིད།