གནམ་བདེ་སྒོ་མོ་ཆེར་ལོག་འགྲོ

ཁ་སང་ཕྱི་ཟླ་ ༦ ཚེས་ ༤ ཉིན་འཛམ་གླིང་ས་ཕྱོགས་གང་སར་རྒྱ་རིགས་དམངས་གཙོ་དོན་གཉེར་བ་ཚོས་ ༡༩༨༩ ལོའི་གནམ་བདེ་སྒོ་མོ་ཆེའི་ཐང་ཆེན་གྱི་དྲུག་བཞིའི་དོན་རྐྱེན་ལ་དྲན་གསོ་བྱས་ཡོད།  

དུས་རབས་སྔ་མའི་མཇུག་ཙམ་ལ་རྒྱ་ནག་གི་གཞོན་སྐྱེས་ཚོས་རང་དབང་དང་དམངས་གཙོ་ནི་དཔལ་འབྱོར་འཛུགས་སྐྲུན་ལས་གལ་ཆེན་ཡིན་པའི་ངེས་ཤེས་རྙེད་དེ། ༡༩༨༩ ལོར་མཐོ་རིམ་སློབ་མ་ཚོས་སྣེ་ཁྲིད་དེ་པེ་ཅིན་དུ་དམངས་གཙོའི་ལས་འགུལ་སྤེལ་སྐབས། མང་ཚོགས་ཧ་ཅང་མང་པོ་མཉམ་ཞུགས་གནང་ཡོད་པ་མ་ཟད། མཐའ་ན་གཞུང་འབྲེལ་ལས་བྱེད་མི་སྣས་ཀྱང་ཆ་ཤས་བླངས་ཏེ་རྒྱ་ནག་གཞུང་ལ་ངོ་རྒོལ་བྱས་ཡོད། མཐར་ལོ་དེའི་ཟླ་ ༦ ཚེས་ ༤ ཉིན་ཏིན་ཞའོ་ཕིན་གྱི་བཀའ་འབྲེལ་འོག་དྲག་གནོན་བྱས་ཏེ། ལས་འགུལ་བ་མང་པོ་ཞིག་གི་ཚེ་སྲོག་ཤོར་ཡོད་པ་མ་ཟད། ཤུལ་ལུས་རྣམས་བཅོན་འཇུག་བྱས་པ་དང་། དེའི་ཁྲོད་ཀྱི་མི་མང་པོ་ཞིག་ཕྱི་རྒྱལ་ཁག་ཏུ་བྲོས་བྱོལ་བྱས་ཡོད།

ཁ་སང་ཕྱི་ཟླ་ ༦ ཚེས་ ༤ ཉིན་འཛམ་གླིང་ཡུལ་གྲུ་གང་སར། རྒྱ་རིགས་རང་དབང་དོན་གཉེར་བ་ཚོས་རྣམ་པ་འདྲ་མིན་ཐོག་དྲུག་བཞིའི་དུས་དྲན་སྲུང་གཙི་ཞུས་ཡོད་ཅིང་། ཉིན་མོ་འདི་ལ་ “རྣམ་བདེ་སྒོ་མོ་ཆེའིི་དོན་རྐྱེན” དང་། “དྲུག་བཞིའི་དམར་གསོད་ཆེན་མོ།” “རྒྱ་ནག་གི་དམངས་གཙོའི་གསར་བརྗེ” སོགས་སུ་འབོད།    

ཁ་སང་བོད་རང་བཙན་སློབ་ཕྲུག་ཚོགས་པ་དང་དྷ་ས་ས་གནས་གཞོན་ནུའི་གོ་སྒྲིག་འོག རྒྱ་ནག་གནམ་བདེ་སྒོ་མོ་ཆེའི་ཐང་ཆེན་དུ་དྲུག་བཞིའི་དོན་རྐྱེན་བྱུང་ནས་ལོ་ངོ་ ༢༦ འཁོར་བའི་དུས་དྲན་སྲུང་གཙི་བྱས་ཏེ། ཞོགས་པ་ནས་དྲུག་བཞིའི་དོན་རྐྱེན་སྐོར་གྱི་ཡིག་ཆ་བཀྲམ་ཡོད་པ་དང་། ཕྱི་དྲོའི་ཆུ་ཚོད་ ༦།༠༠ ཐོག་དྷ་ས་མེག་གྷན་ཉིན་སློབ་ཚོགས་ཁང་དུ། དངོས་བྱུང་གློག་བརྙན་ལྕགས་ཁྲབ་འཁོར་ལོའི་མདུན་གྱི་མི་ (The Tank Man ) ཞེས་པ་ཞིག་མི་མང་ལ་བསྟན་ཡོད།

སྐབས་དེར་བསྟན་འཛིན་ཚེ་ལྷ་ལགས་ཀྱིས་བརྗོད་དོན། ང་ཚོའི་བོད་པར་མཚོན་ན་དེ་རིང་གི་ཉིན་མོ་འདི་ནི་གལ་ཆེན་ཞིག་ཡིན་སྟབས། རྒྱ་གཞུང་གི་དྲག་གནོད་འོག་སྡུག་བསྔལ་མྱོང་བཞིན་པའི་རྒྱ་རིགས་ཚོའི་དཀའ་ངལ་དེ་རྒྱལ་ཁབ་ཕྱི་ལ་སྟོན་རྒྱུ་དང་། ལོ་ངོ་ ༢༦ སྔོན་ལ་བྱུང་བའི་དོན་རྐྱེན་དེ་ད་དུང་བྱུང་མིན་ལ་ཞེ་སྣང་བྱེད་ཀྱི་ཡོད་པའི་ངོས་འཛིན་འོག་ལས་འགུལ་འདི་སྤེལ་ཡིན་བ་ཡིན་སྐོར་དང་། ད་ལྟའི་རྒྱ་ནག་ནང་ཁུལ་གྱི་བརྒྱུད་ལམ་ཁག་ཏུ་ ༦།༤ བཀག་འགོག་ནན་མོ་བྱས་ཡོད་སྟབས། སློབ་ཕྲུག་ཁ་ཤས་ཀྱིས་ཟླ་ ༦ ཚེས་ ༤ ཡི་ཆེད་དུ་ཟླ་ ༥ ཚེས་ ༣༥ ཞེས་པའི་ལས་འགུལ་ཤུགས་ཆེན་པོ་སྤེལ་བཞིན་ཡོད་པ་སོགས་བརྗོད་སོང་།

ཁ་སང་ཨོ་སི་ཀྲོ་ལི་ཡའི་སི་ཌི་ནེ་གྲོང་ཁྱེར་གྱི་བྷལ་མོར་གླིང་ཁ་(Belmore Park) ཞེས་པར་དྲུང་བཞིའི་དུས་དྲན་སྲོང་གཙིའི་མཛད་སྒོ་ཞིག་ཚོགས་ཡོད་ཅིང་། དེར་སི་ཌི་ནེའི་རྒྱ་ནག་དམངས་གཙོ་འབྲེལ་ལམ་ལྷན་ཚོགས་ (Sydney Network for Democracy in China) ཞེས་པས་ཨ་རིའི་འཇིམ་རྐོས་པ་གྲགས་ཅན་སྐུ་ཞབས་ཁྲིན་ཝེ་མིན་ (Cheng Weiming) དང་ཁོ་རང་གིས་བཟོས་པའི་རང་དབང་གི་ལྷ་མོ་ཞིག་གདན་འདྲེན་ཞུས་ཏེ། ནེའུ་སོ་ཐི་ཝ་ལེས་ (New South Wales) ཀྱི་ས་གནས་གཞུང་འབྲེལ་ལས་བྱེད་རྒྱ་རིགས་ཇེན་ལེན་ (Jenny Leong) རྗེས་དྲན་ལས་འགུལ་སྟེང་ཞུགས་ཏེ། རང་དབང་ལྷ་མོའི་འཇིམ་སྐུ་དེ་ཞལ་འབྱེད་བྱས་ཡོད་འདུག  

ཁ་སང་དགོང་མོ་ཐེ་ཝན་གྱི་རྒྱལ་ས་ཐེ་པེ་གྲོང་ཁྱེར་གྱི་རང་དབང་ཐང་ཆེན་དུ། “གནམ་བདེ་སྒོ་མོ་ཆེར་ལོག་འགྲོ ཉི་གདུགས་བཟུང་ནས་དྲུག་བཞིར་མྱ་ངན་ཞུ།” ཞེས་པའི་མགོ་བརྗོད་འོག་དྲུག་བཞིའི་དུས་དྲན་སྲུང་གཙིའི་མཛད་སྒོ་ཞིག་ཚོགས་ཡོད་ཅིང་། དེར་གར་ཐོག་བརྩེགས་གཉིས་སྟེང་ནས་གནམ་བདེ་སྒོ་མོ་ཆེའི་རྒྱབ་ལྗོངས་དང་། ལོ་སྔོན་མའི་ཧོང་ཀོང་གི་ཉི་གདུགས་གསར་བརྗེའི་ལས་འགུལ་གྱི་འབོད་ཚིག དེ་བཞིན་རང་དབང་དང་དམངས་གཙོ། འགྲོ་བ་མིའི་ཐོབ་ཐང་སོགས་ལ་རྒྱ་གཞུང་གིས་དྲག་གནོན་བྱེད་བཞིན་པའི་མཚོན་བྱེད་སྣ་ཚོགས་འགྲེམས་སྟོན་བྱས་ཡོད་འདུག

སྐབས་དེར་ཐེ་ཝན་བོད་མིའི་ཕན་བདེ་ལྷན་ཚོགས་ཀྱི་ཚོགས་གཙོ་བཀྲ་ཤིས་ཚེ་རིང་ལགས་ཀྱིས། བོད་མི་རིགས་དང་རྒྱ་མི་རིགས། སོག་པོ། ཡུ་གུར་མི་རིགས་སོགས་ཀྱིས་རྒྱ་གཞུང་གི་དྲག་གནོན་སྡུག་སྦྱོང་མྱོང་གི་ཡོད་པ་རེད། ཅེས་བརྗོད་པ་དང་འབྲེལ་ཏེ། “རྒྱ་གཞུང་གིས་མིའི་ཚེ་སྲོག་བགྲང་ལས་འདས་པ་རྩ་མེད་བཟོས་ཀྱང་ད་དུང་ངོས་ལེན་བྱེད་ཀྱི་མེད་སྟབས། ང་ཚོ་དུས་ནམ་ཡང་ཁོ་ཚོས་བཤད་པའི་སྐད་ཆར་ཡིད་ཆེས་མེད།” ཅེས་དང་། ཁོང་གིས། གལ་སྲིད་རྒྱ་ནག་མི་མང་གིས་རང་དབང་ལྡན་པའི་དམངས་གཙོར་རོལ་ཐུབ་པའི་ཉི་མ་ཞིག་བྱུང་ན། ད་གཟོད་འཛམ་གླིང་ལ་ཞི་བདེ་ཡོང་སྲིད་པ་ཞིག་ཡིན་སྟབས། ཚང་མས་མུ་མཐུད་དུ་འབད་བརྩོན་བྱ་དགོས། ཞེས་བརྗོད་འདུག

ཁ་སང་ཕྱི་དྲོར་དབྱིན་ཇིའི་རྒྱལ་ས་ལོན་ཌོན་གྱི་རྒྱ་ནག་གཞུང་ཚབ་ཁང་གི་མདུན་དུ། མི་གྲངས་བརྒྱ་ལྷག་གིས་དྲུག་བཞིའི་དོན་རྐྱེན་རྗེས་དྲན་གྱི་རྔམ་སྟོན་དང་དགོང་མོ་སྒྲོན་མེ་འབར་ཏེ་མྱ་ངན་སོགས་ཀྱི་ལས་འགུལ་སྤེལ་ཡོད་འདུག ལས་འགུལ་གོ་སྒྲིག་གནང་མཁན་ཞའོ་ཅང་ (Shiao Jiang)ལགས་ཀྱིས། ལོ་ངོ་ ༢༦ སྔོན་ལ་བཅིངས་འགྲོལ་དམག་ཟེར་བས་པེ་ཅིན་ནས་ཕལ་ཆེན་མི་ ༡༠༠༠ ལྷག་མེ་མདའ་བརྒྱབ་ནས་དམར་གསོད་བཏང་ཡོད་པ་དང་། དམག་མིས་དྲག་གནོན་འོག་བུ་ཕྲུག་འདས་གྲོངས་སུ་ཕྱིན་པའི་ “གནམ་བདེ་སྒོ་མོ་ཆེའི་ཨ་མ་” ཚོ་གྲངས་འབོར་ནི་ ༢༠༣ ཡིན་ཡང་། ད་དུང་ས་ཁུལ་གཞན་ནས་པེ་ཅིན་ལ་ཡོང་པའི་སློབ་ཕྲུག་ཚོའི་གྲངས་འབོར་དང་གཞན་མི་ག་ཚོད་ཅིག་གྲོངས་ཡོད་པ་ཚོད་དཔག་བྱེད་དཀའ་བ་ཞིག་ཆགས་ཡོད། ཅེས་བརྗོད་འདུག

འདང་དགོང་ཧོང་ཀོང་ཝིག་ཊོ་རི་གླིང་ཀ་ (Victoria Park) ཡི་ནང་སྒྲོན་མེའི་འོད་མདངས་ཞེས་པའི་དྲུག་བཞིར་རྗེས་དྲན་དགོང་ཚོགས་ཤིག་བསྐོངས་པའི་སྟེང་མི་མང་ ༡༣༥༠༠༠ ལྷག་འདུ་འཛོམས་བྱུང་ཡོད་པ་དང་། དེའི་ཁྲོད་རྒྱ་ནག་སྐམ་ས་ནས་ཡོང་བའི་མི་མང་པོ་ཞིག་ཀྱང་མཉམ་ཞུགས་བྱས་ཡོད་འདུག བྷེ་བྷེ་སིའི་རྒྱ་ཡིག་སྡེ་ཚན་གྱིས་ལས་འགུལ་བ་ཧེ་ཅིན་རིན་(He Junren) ལ་བཅའ་འདྲི་བྱེད་སྐབས། ཁོང་གིས་ལོ་སྔོན་མ་དེ་མི་ལོ་ཧྲིལ་བོ་ཉེར་ལྔ་འཁོར་བའི་རྗེས་དྲན་ཡིན་སྟབས་དགོང་ཚོགས་ལ་འཛུལ་བཞུགས་བྱེད་མཁན་མང་པོ་ཡོད། ད་ལོ་དགོང་ཚོགས་ཀྱི་མི་གྲངས་ལོ་སྔོན་མ་དང་བསྡུར་ན་མི་ ༤༥༠༠༠ ལྷག་ཉུང་དུ་སོང་ཡོད་ཀྱང་། ད་ལོའི་རྗེས་དྲན་བྱེད་སྟངས་ལོ་སྔོན་མའི་རྗེས་དྲན་དང་ཁྱད་པར་ཆེན་པོ་མེད། ཡིན་ན་ཡང་། ད་ལོ་གལ་ཆེན་པོ་ཁ་ཤས་སྣོན་པ་བྱས་ཡོད་པ་ནི། དཔེར་ན། མགོ་འཛིན་དང་གཞས་པ་ཚོས་ཉི་གདུགས་འཛིན་དགོས་པ་དང་། ལས་འགུལ་ཁྲོད་འཛིན་བཟུང་བྱས་པའི་ནང་མི་ཚོར་བཅའ་འདྲིའི་བརྙན་ཐུང་དང་། གཞན། སློབ་ཆེན་ཆེ་ཁག་ ༤ ཡི་སློབ་མའི་འཐུས་མི་ཚོས་གར་སྟེགས་སྟེང་ནས་རྩ་ཁྲིམས་ཀྱི་དེབ་མེར་བསྲེགས་བཏང་ཡོད་པ་དེས། རྩ་ཁྲིམས་དེ་དམངས་གཙོ་མིན་པར་བསྒྱུར་བཅོས་བྱ་དགོས་པ་མཚོན་ཡོད། ཅེས་སོགས་བརྗོད་འདུག

དེ་རིང་བྷེ་བྷེ་སི་རྒྱ་ཡིག་སྡེ་ཚན་གྱིས་གནས་ཚུལ་སྤེལ་བ་ལྟར་ན། ད་ལོའི་དྲུག་བཞིའི་ཉིན་མོ་མ་བསླེབ་སྔོན་ནས་ཨ་རིའི་གཞུང་གིས་རྒྱ་ནག་གཞུང་ལ་དྲུག་བཞིའི་དོན་རྐྱེན་ལ་དྲག་གནོད་བྱེད་སྐབས་མི་ག་ཚོད་འདས་གྲོངས་སོང་ཡོད་མེད་ཀྱི་ཁ་གྲངས་དང་། དེ་བཞིན་དྲུག་བཞིའི་དོན་རྐྱེན་སྐབས་འཛིན་བཟུང་བྱས་ཏེ་ད་ལྟ་བཙོན་ཁང་དུ་ཡོད་པ་རྣམས་ཀློད་གྲོལ་གཏང་དགོས་སོགས་བརྗོད་ཡོད་འདུག

གསར་འགོད་པ། འཇིགས་མེད་རྒྱ་མཚོ།