དེ་རིང་རྒྱ་ནག་ཤིན་ཧྭ་གསར་ཁང་གིས་ཀྲུའུ་ཡོང་ཁཱང་ལ་ཚེ་བཙོན་གྱི་ཁྲིམས་ཐག་བཅད་ཟིན་སྐོར་བསྒྲགས་འདུག
དེ་རིང་རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། ཕྱི་ཟླ་ ༥ ཚེས་ ༢༢ ཉིན་རྒྱ་ནག་ཐེན་ཅིན་གྲོང་ཁྱེར་འབྲིང་རིམ་མི་མང་ཁྲིམས་ཁང་དང་པོས་ཡོངས་ཁྱབ་མིན་པའི་ཐོག་ནས་རྒྱ་ནག་དབུས་ཆབ་སྲིད་ལྷན་ཁང་གི་མགོ་ཁྲིད་ཟུར་པ་ཀྲུའུ་ཡོང་ཁཱང་ལ། ལྐོག་རྔན་འབོར་ཆེན་བླངས་བ་དང་དབང་ཆ་ལོག་པར་སྤྱད་པ། བསམ་བཞིན་དུ་རྒྱལ་ཁབ་ཀྱི་གསང་བ་ཕྱིར་གྱར་བའི་ནག་ཉེས་འོག་ཚེ་བཙོན་དང་། ཚེ་གང་ཆབ་སྲིད་ཀྱི་ཁེ་དབང་འཕྲོག་པའི་ཁྲིམས་ཐག་བཅད་ཡོད་པ་དང་། སྐབས་དེར་ཁྲིམས་རའི་ནང་ཀྲུའུ་ཡོང་ཁཱང་གི་བུ་ཀྲུའུ་པིན་དང་བཟའ་ཟླ་ཅཱ་ཞོ་ཡེ་གཉིས་དང་། ནག་ཉེས་བདེན་དཔང་དུ་ཁོ་བོའི་ངན་འབྲེལ་ལག་རོགས་ཅང་ཅེ་མིན་དང་ཝུའུ་པིན་སོགས་ཡོད་སྐོར་བསྒྲགས་འདུག
ཁྲིམས་བཤེར་སྐབས་ཀྲུའུ་ཡོང་ཁྰང་གིས་ངན་འབྲེལ་ལག་རོགས་ཚོར་ཁྱོན་རྒྱ་སྒོར་དུང་ཕྱུར་ ༢༡ ལྷག་ (༢༡.༣༦)གིས་ཁྲིམས་འགལ་གྱི་ཁེ་ཕན་བསྐྲུན་ཏེ། རྒྱལ་ཁབ་དང་སྤྱི་པའི་རྒྱུ་ནོར་ལ་ཁྱོན་རྒྱ་སྒོར་དུང་ཕྱུར་ ༡༤..༨༦ གིས་གྱོང་གུད་བཟོས་ཡོད་པ་དང་། སྔ་ཕྱིར་རྒྱ་སྒོར་དུང་ཕྱུར་ ༡ ལྷག་(༡.༢༩༧༧༢༡༡༣)གི་ལྐོག་རྔན་བླངས་ཡོད་པའི་ནག་ཉེས་བགྲངས་འདུག་ཀྱང་། སྒེར་གྱི་རྒྱུ་ནོར་གཞུང་བཞེས་བཏང་མེད་ལུགས་བརྗོད་འདུག
ཡང་གནས་ཚུལ་ནང་ཀྲུའུ་ཡོང་ཁཱང་གིས་ཁྲིམས་རའི་ནང་དུ། ཁོ་བོས་ཁྲིམས་ཆད་དང་ལེན་བྱས་ཏེ་བསྐྱར་དུ་ཁྲིམས་གཏུག་བྱ་རྒྱུ་མིན་ལུགས་དང་། ཁྲིམས་འཛིན་ཁང་གིས་ཁོ་བོའི་ནག་ཉེས་ལ་གནས་ལུགས་དང་རྒྱུ་མཚན་ལྡན་པའི་ཐོག་ནས་ཞིབ་བཤེར་བྱས་པ་དེས་རྒྱལ་ཁབ་ཀྱི་ཁྲིམས་འཛིན་ལམ་ལུགས་གོང་འཕེལ་དུ་ཕྱིན་པ་མངོན་ཡོད་ཚུལ་དང་། ཁོ་བོས་ཏང་གི་བྱ་གཞག་ལ་གྱོང་གུད་དང་སྤྱི་ཚོགས་ལ་ཤུགས་རྐྱེན་ཚབས་ཆེན་བཞག་པའི་ནག་ཉེས་ངོས་ཟིན་ཡོད་སྐོར་སོགས་བརྗོད་པ་བཀོད་འདུག
གསར་འགོད་པ། པདྨ་མཚོ།
