གསར་ལམ་ཁག་ཏུ་རྒྱ་གཞུང་གིས་ཀྲུའུ་ཡོང་ཁཱང་ལ་ནག་ཉེས་གསུམ་བགྲང་པའི་ཁྲོད་ད་དུང་ཁོའི་ནག་ཉེས་ཆེ་ཤོས་འགའ་ཚུད་མེད་སྐོར་དང་། ཀྲུའུ་ཡོང་ཁཱང་གི་རྗེས་སུ་མི་བཞི་ཤོག་ཁག་གསར་པའི་ནང་གི་ལིན་ཅི་ཧྭ་ལྷག་ཡོད་སྐོར་བརྗོད།
ཁ་སང་ཕྱི་དྲོར་རྒྱ་གཞུང་གི་དབུས་བརྙན་འཕྲིན་ཁང་གིས་གསལ་བསྒྲགས་སྤེལ་ཏེ། ཉེ་ལམ་ཕྱི་ཟླ་ ༥ ཚེས་ ༢༢ ཉིན། ཡོངས་ཁྱབ་མིན་པའི་ཐོག་རྒྱ་
རྒྱ་ནག་གཞུང་གིས་ཀྲུའུ་ཡོན་ཁཱང་ལ་ཁྲིམས་ཐག་གཅོད་སའི་ཁྲིམས་རའི་ནང་ཀྲུའུ་ཡོང་ཁཱང་གི་བུ་ཀྲུའུ་པིན་དང་བཟའ་ཟླ་ཅཱ་ཞོ་ཡེ་སོགས་ཡོད་པར་བརྗོད་ཡོད་ཀྱང་། དེ་རིང་པའོ་ཞོན་དྲ་བས་ཀྲུའུ་ཡོན་ཁཱང་ལ་ཁྲིམས་ཐག་བཅད་པའི་མཇུག་འབྲས་མ་བསླེབ་སྔོན་ལ་ཁོས་ཁྲིམས་རྩོད་པ་བརྒྱུད་དེ། སླར་ཡང་རང་ཉིད་ཀྱི་སྐྱེས་དམན་ལ་བཟའ་ཐོར་རྒྱག་རྒྱུའི་སྐུལ་མ་བྱས་ཡོད་པ་མ་ཟད། སྐབས་དེར་དགོངས་སེལ་གྱི་ཚིག་འབྲི་མང་པོ་བེད་སྤྱོད་བྱས་ཏེ་དགོངས་དག་ཞུས་ཡོད་འདུག ཡིན་ན་ཡང་ཅཱ་ཞོ་ཡེ་ད་དུང་རྒྱ་གཞུང་གི་བཙོན་འོག་ཏུ་ཡོད་འདུག
པེ་ཅིན་ནས་གནས་ཚུལ་མཁོ་སྤྲོད་བྱས་པ་ལྟར་ན། ༢༠༡༣ ལོའི་ཟླ་ ༡༢ ཚེས་ ༥ ཉིན་ཀྲུའུ་ཡོན་ཁཱང་ཀྲུང་ནན་ཧེ་རུ་ཡོད་སྐབས། སྐྱེས་དམན་ཅཱ་ཞོ་ཡེ་དང་མཉམ་དུ་རྒྱ་ནག་དབུས་གྱོད་དོན་ཆེད་མངགས་རུ་ཁག་གིས་འཛིན་བཟུང་བྱས་ཁྲིད་ཡོད་པ་དང་། ལོ་སྔོན་མའི་ཟླ་ ༡༢ པའི་ནང་ཀྲུའུ་ཡོན་ཁཱང་གུང་ཁྲན་ཏང་ནས་ཕྱིར་ཕུད་བྱས་སྐབས། ཀྲུའུ་ཡོན་ཁཱང་གིས་ཐེངས་དང་པོར་ཁྲིམས་རྩོད་པ་བརྒྱུད་ནས་སྐྱེས་དམན་ལ། ཁོའི་མཇུག་འབྲས་ཡག་པོ་མེད་སྟབས་བཟའ་ཚང་ཁ་ཁ་བྱས་ན་ལེགས་ཚུལ་བརྗོད་ཡོད་འདུག
དེ་རིང་ཞཱིན་ཐང་རིན་དྲ་བས་གནས་ཚུལ་སྤེལ་བ་ལྟར་ན། ཀྲུའུ་ཡོན་ཁཱང་གི་གྱོད་དོན་པའོ་ཞི་ལེ་ལྟར་ཡོངས་ཁྱབ་ཏུ་ཐག་གཅོད་བྱས་མེད་པ་དེ། གཅིག་མས་ཀྲུའུ་ཡོན་ཁཱང་གི་གྱོན་དོན་རྒྱ་གཞུང་ནང་ཁུལ་གྱི་གསང་བ་མང་པོ་ཞིག་ལ་འབྲེལ་བ་ཡོད་སྟབས། ཡོངས་ཁྱབ་ཏུ་ཐག་གཅོད་བྱས་ན་ཁྲིམས་ཁང་ནས་སྟངས་འཛིན་བྱ་ཁག་པོ་ཡིན་པ་དང་། གཉིས་པ་ནས་ཕྱིའི་རྒྱལ་ཁབ་ཀྱི་བྱུས་གཏོགས་ལ་གཡོལ་ཐབས་ཡིན་པ་སོགས་འཁོད་འདུག
ཧོང་ཀོང་མིན་གོ་གསར་ཁང་གིས་དཔྱད་བརྗོད་སྤེལ་པའི་ནང་། ཀྲུའུ་ཡོན་ཁཱང་གི་གྱོད་དོན་འདི་ལྟར་གློ་བུར་དུ་མཇུག་བསྡུས་ཏེ་གསང་བ་གང་མང་ཞིག་ད་དུང་ལྷག་ཡོད་པའི་ནང་། སྔོན་ཆད་ཞིབ་བཤེར་སྐབས་གྱོད་དོན་གཞན་ལ་འབྲེལ་བ་ཡོད་པའི་དོགས་གཞི་ཁག་གླེང་མེད་པ་མ་ཟད། ངག་རྒྱུན་དུ་ཤོད་བཞིན་པའི་སྐྱེས་དམན་སྔོན་མ་གསོད་མཁན་ཁོ་རང་ཡིན་པ་དེ་དང་། ལྐོག་ནས་མགོ་ཁྲིད་ཚོའི་གསང་བ་ཉན་པ་སོགས་ཀྱི་ནག་ཉེས་སྐོར་གང་ཡང་གསལ་ཁ་མེད་སྐོར་བཀོད་འདུག
དེ་བཞིན་ད་རེབ་ཁྲིམས་གཅོད་སྐབས། སྔོན་ཆད་ཀྲུའུ་ཡོན་ཁཱང་གི་གྱོད་གཞི་དང་འབྲེལ་བ་ཡོད་པའི་རྒྱ་ནག་སྤྱི་བདེ་ལས་ཁང་གི་འགན་འཛིན་གཞོན་པ་ལི་ཏོན་ཧྲིན་ (Li Dongsheng) དང་སི་ཁྲོན་ཞིང་ཆེན་གྱི་སྲིད་གྲོས་འགན་འཛིན་ལི་ཁྲོན་ཞི་ (Li Chongxi)། ཧེ་ནན་ཞིང་ཆེན་གྱི་ཞིང་ཆེན་འགན་འཛིན་གཞོན་པ་ཅི་ཝིན་ལེན་ (Ji Wenling)། ཀྲུའུ་ཡོན་ཁཱང་དང་མཉམ་དུ་བཀག་ཉར་བྱས་པའི་ཁོའི་དྲུང་ཡིག་ཡཱོ་ཀང་ (Yu Gang) དང་སྲུང་དམག་ཐེན་ཧོན་ (Tan Hong) སོགས་ཀྱི་མིང་གཅིག་ཀྱང་གླེང་མེད་པ་དེ་ནི། མ་ཉེས་ཁག་གཡོགས་ཐེབས་པ་རེད་དམ། ཡང་ན་ཀྲུའུ་ཡོན་ཁཱང་གི་གྱོད་དོན་དང་འབྲེལ་བ་མེད་པར་གྱོད་དོན་གཞན་ཡིན་གང་ཡང་གསལ་བོ་གླེང་མི་འདུག
ཏཱ་ཅི་ཡོན་གྱི་དེང་དུས་སྲིད་དོན་དཔྱད་ཞིབ་པ་ཀྲུའུ་ཞོ་ཧུའི་ (Zhou Xiaohui) ཡིས་དབྱེ་ཞིབ་བྱས་པ་ལྟར་ན། སྲིད་གཞུང་གིས་ཀྲུའུ་ཡོན་ཁཱང་གི་གྱོད་དོན་འདི་ལྟར་ཐག་གཅོད་བྱེད་པ་དེ། ཀྲུའུ་ཡོན་ཁཱང་གི་སྐྱེས་དམན་སྔོན་མ་ཁོ་རང་ཉིད་ཀྱིས་བསད་པ་དང་གུང་ཁྲན་ཏང་ལ་ངོ་ལོག་བརྒྱབ་པ། དབང་བོ་གསོན་ལེན་སོགས་ཀྱི་གྱོད་དོན་གཅིག་ཀྱང་མཐོང་རྒྱུ་མེད་པ་མ་ཟད། སྲིད་གཞུང་གིས་ཞིབ་བཤེར་གྱིས་ལྐོག་ནས་འདྲི་གཅོད་བྱས་ཏེ། རྒྱལ་ཁབ་ཕྱི་ནང་གཉིས་སུ་གླེང་སློང་བྱེད་བཞིན་པ་དག་ལ་སྣང་ཆུང་བཏང་པ་འདིའི་རྒྱབ་ལོགས་ན། ཕྱོགས་གཉིས་ལ་ཁེ་ཕན་ཡོད་པའི་ཆ་རྐྱེན་ཞིག་དང་བརྗེ་བོ་བརྒྱབ་ཡོད་པ་གསལ་བོ་རེད། ཅེས་བརྗོད་འདུག
ཧོང་ཀོང་ཀུ་ཤུ་ཉིན་རེ་གསར་ཁང་གིས་གནས་ཚུལ་སྤེལ་བའི་ནང་། ཀྲུའུ་ཡོན་ཁཱང་ལ་ཁྲིམས་ཐག་བཅད་ནས་ཁྱབ་བསྒྲགས་བྱེད་པ་དེས། ཀྲུའུ་ཡོན་ཁང་དང་ཆབ་སྲིད་ཨུ་ཡོན་ཟུར་བ་པའོ་ཞི་ལེ། དབུས་དམག་དོན་འགན་འཛིན་གཞོན་པ་ཟུར་བ་ཞི་ཚད་ཧོ། རྒྱལ་ཡོངས་སྲིད་གྲོས་འགན་འཛིན་གཞོན་པ་ཟུར་བ་ལིན་ཅི་ཧྭ་སོགས་ཀྱི་མི་བཞི་ཤོག་ཁག་གི་རྩ་བ་ནས་གཏོར་རྒྱུ་དེ་ཡིན་པ་དང་། གུང་ཁྲན་ཏང་ནང་གི་རྒྱབ་སྐྱོར་འོག་ཞི་ཅིན་ཕིན་གྱིས་ལོ་གཅིག་ལྷག་ལ་ཞིབ་མཇུག་ནན་མོ་བྱས་མཐར་མི་བཞི་ཤོག་ཁག་གསར་བ་ཞིག་གི་གསང་བ་གཏོར་ཡོད་པ་དང་། ད་ལྟ་ལིན་ཅི་ཧྭ་ཁྲིམས་ཁང་དུ་འདྲི་རྩད་བྱ་རྒྱུ་ལྷག་ཡོད་པ་རེད་ཅེས་སོགས་བཀོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
