རྒྱ་ནག་གི་དཔོན་རིགས་ཚོས་དཔེ་ཀློག་མང་ཙམ་བྱེད་དགོས།

ཁ་སང་ཕྱི་དྲོ། རྒྱ་ནག་གཞུང་འབྲེལ་བརྒྱུད་ལམ་དུ། རྒྱ་ནག་གི་དཔོན་རིགས་ཚོས་རང་གི་མཚན་མཐོང་མཐོར་འདེགས་དང་ལྐོག་ཟ་རུལ་སུངས་ཇེ་ཉུང་དུ་གཏོང་ཆེད། དཔེ་ཀློག་མང་ཙམ་བྱེད་དགོས་པའི་འབོད་སྐུལ་བཏང་འདུག

དེ་ཡང་ཧོང་ཀོང་ཧྲིན་ཀྲོའུ་གྲོང་ཁྱེར་གྱི་དཔོན་རིགས་ཤིག་གི་ཁྱིམ་གྱི་དཔེ་སྟེགས་སྟེང་དུ། ཨ་རག་དང་རི་མོ་མ་གཏོགས་དཔེ་ཆ་གཅིག་ཀྱང་མཐོང་རྒྱུ་མེད་པ་རྒྱུ་མཚུན་དུ་བགྲངས་ཏེ། ཕྱིའི་དངོས་པོའི་རིག་གནས་ཤེས་བྱ་ཁོ་ན་སྦྱོང་བ་ནི། དེང་རབས་གཞོན་སྐྱེས་ཚོར་འོས་འཚམ་མིན་ལུགས་དང་། ནང་ཁུལ་གྱི་རུལ་སུངས་གཙང་བཤེར་བྱེད་པའི་ལས་འགུལ་འོག་ཏུ། རྒྱ་ནག་གི་དཔོན་རིགས་ཚོས་རང་གི་འདོད་ཡོན་དང་བག་མེད་ལོངས་སྤྱོད་ཀྱི་འཚོ་བར་ཚོད་འཛིན་བྱེད་དགོས་པའི་འབོད་སྐུལ་བཏང་ཡོད་ཅིང་། ཕྱི་ཟླ་གསུམ་པའི་ནང་། སྐུ་ཞབས་ཅིང་གིས་ལྐོག་རྔན་འབོར་ཆེན་སྤྲད་པ་དང་རྒྱན་པོ་འགྱེད་པ། ལོག་གཡེམ་བྱས་པ་བཅས་ཀྱི་ནག་ཉེས་འོག་འཛིན་བཟུང་བཙོན་འཇུག་བྱས་ཡོད་པ་དང་།

ཡང་རེས་གཟའ་ཕུར་བུའི་ཉིན། རུས་མིང་བརྗོད་འདོད་མེད་པའི་ཞིབ་དཔྱོད་པ་ཞིག་གིས། “སྐུ་ཞབས་ཅིང་ཚང་གི་གཞིས་ཀ་ཧ་ཅང་ཆེ་ཞིང་ཕར་བལྟོས་ཚོད་ཀྱིས། གོང་མའི་ཕོ་བྲང་དང་གཉིས་སུ་མེད་ལ། ཁོང་ཚང་གི་ཁང་ཁྱིམ་ཧྲིལ་བོ་རིན་གོང་མཐོ་བའི་ཨ་རག་དང་། ཡིག་གཟུགས། རི་མོ། གཡང་ཊིའི་དངོས་ཟོག་གིས་ཁེངས་ཡོད་པ་མ་གཏོགས། དཔེ་ཆ་མཐོང་ཡ་མི་འདུགཡིན་ནའང་། སྐུ་ཞབས་ཅིང་གི་མལ་ཁྲིའི་འཁྲིས་སུ་བཞག་འདུག་པའི་དུས་དེབ་དེ་ནི་དེང་སང་གི་གཞོན་སྐྱེས་ཚོས་བཀླག་མི་རུང་བ་རེད”ཟེར།

ཡང་རང་གི་རུས་མིང་བརྗོད་འདོད་མེད་པའི་རྒྱ་རིགས་བཅར་འདྲི་མཁན་གཞན་ཞིག་གིས། “སྤྱིར་དཔེ་ཀློག་ནི་དཔོན་རིགས་ཚོ་སྒེར་ངོས་ཀྱི་གནད་འགག་ཙམ་དུ་མ་ཟད། དེ་ནི་མིའི་གཤིས་རྒྱུད་དང་། མཐོང་རྒྱ། རིན་ཐང་ལྟ་ཚུལ། གོ་རྟོག་གི་ནུས་པ་སོགས་ཅི་ནས་ཀྱང་འགན་དུ་འཁུར་དགོས་པའི་གནད་འགག་ཆེན་པོ་རེད། དེར་བརྟེན། འབྱུང་འགྱུར་རྒྱ་ནག་གི་དཔོན་རིགས་ཚོས་རང་གི་བླ་སྲོག་གི་དར་ཆ་མཐོང་བ་དང་སྦྲགས་ཏེ། ཁོ་ཚོའི་བསམ་གཞིག་གི་གཏིང་ཇེ་ཟབ་ཏུ་འགྲོ་བ་དང་། ཐ་ན་ལྐོག་ཟ་རུལ་སུངས་ཀྱི་ནག་ཉེས་ཀྱང་ཇེ་ཉུང་དུ་འགྲོ་ངེས་རེད”ཟེར།

རྒྱ་ནག‘ནང་ཁུལ་གྱི་ལྐོག་ཟ་རུལ་སུངས་རྟོག་ཞིབ་དང་གཙང་བཤེར་ལྷན་ཁང’གི་གསར་ཤོག་སྟེང་དུ། རྒྱ་ནག་གཞུང་འབྲེལ་ཞིན་ཧྭ་གསར་ཁང་གི་དཔྱད་བརྗོད་པ་ཀྲང་ཡུ་ཧྲིན་གྱིས་སྤེལ་བའི་རྩོམ་ཐུང་ཞིག་གི་ནང་དུ། དེང་སྐབས་རྒྱ་ནག་ནང་གི་དཔོན་རིགས་ 71% ལྷག་གིས་དཔེ་ཀློག་གི་གོམས་གཤིས་ལ་སྐྱོན་བརྗོད་བྱེད་ཀྱི་ཡོད་པ་དང་། ཡང་རྒྱ་ནག་གཞུང་འབྲེལ་ཞིན་ཧྭ་གསར་ཁང་ནས་འགྲེམ་སྤེལ་བྱས་པའི་དུས་དེབ་ཅིག་གི་སྟེང་དུ། རྒྱ་རིགས་ཆེད་མཁས་པ་ཚོས། གནའ་བོའི་རྒྱ་ནག་གི་དཔོན་རིགས་རྣམས་ཀྱིས་ལོ་ངོ་མང་པོར། གོང་མའི་ཕོ་བྲང་གི་ཡིག་རྒྱུགས་ཆེན་མོ་ཁོ་ནར་སྦྱོང་བརྩོན་བྱེད་དགོས་པ་དང་། དེང་སང་གི་དཔོན་ངན་ཚོས་དཔེ་ཀློག་གི་འདུ་ཤེས་ཐེད་དུ་བོར་འདུག་པ་བཅས་ལ་སྡིགས་མོ་གཏོང་གི་ཡོད་ཚུལ་བསྒྲགས་འདུག་ལ། ཁྲུ་ཐེན་སེ་ཊེ་གསར་ཤོག་གི་དཔྱད་བརྗོད་པ་ཧྲོ་ཇེ་ཁུན་ཟེར་བ་ཞིག་གིས། “གལ་ཏེ་དུས་ཡུན་རིང་བོར་དཔེ་ཀློག་མི་བྱེད་པའི་མི་དེའི་ཡིད་སེམས་མི་འགྱང་བར་གཞན་དབང་དུ་འགྱུར་འགྲོ་བ་རེད”ཟེར།

གོང་བསྙད་ཀྲང་ཡུ་ཧྲིན་གྱི་རྩོམ་ཐུང་དེའི་ནང་དུ་ད་དུང་། ཉེ་ལམ་སྲིད་འཛིན་ཞི་ཅེན་ཕེན་གྱིས་རྒྱ་ནག་གི་དཔོན་རིགས་ཚོས་དཔེ་ཀློག་མང་ཙམ་བྱེད་དགོས་པའི་བཀའ་རྒྱ་བསྒྲགས་པ་མ་ཟད། ཕྱི་ལོ་ ༢༠༡༢ ལོར་ཁོས་རྒྱ་ནག་ནང་གི་ལྐོག་ཟ་རུལ་སུངས་མགོ་སྟེང་སློག་རྒྱུ་ཡིན་པའི་ཆོད་སེམས་བཅངས་ཤིང་། སྐབས་དེ་ནས་བཟུང་རྒྱ་ནག་གི་དཔོན་རིགས་སྟོང་ཕྲག་མང་པོར་ཞིབ་བཤེར་བྱེད་འགོ་བརྩམས་ཏེ། རེས་གཟའ་ཕུར་བའི་ཉིན། རྒྱལ་སྲིད་སྤྱི་ཁྱབ་ཁང་གི་འགོ་ཁྲིད་ཟུར་བ་ཀྲུའུ་ཡོང་ཁཱང་ལ་ཚེ་བཙོན་གྱི་ཉེས་ཆད་བཅད་པ་རེད་ཅེས་སོགས་འགྲེལ་བརྗོད་འདུག