རྒྱ་ནག་དབུས་དམག་དོན་རྒྱབ་ཕྱོགས་བཀོད་འདོམས་ཁང་གི་འགན་འཛིན་གཞོན་པ་ཟུར་བ་གུ་ཅུན་ཧྲན་ལ་ལོ་གཉིས་ནར་འགྱངས་ཀྱིས་སྲོག་ཁྲིམས་ལག་བསྟར་བྱ་རྒྱུ་ཡིན་པ་ཕྱིར་བསྒྲགས་བྱས་འདུག
ཁ་སང་ཕྱི་དྲོར་རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་པ་ལྟར་ན། རྒྱ་ནག་དམག་དོན་ཁྲིམས་ཁང་གིས་དབུས་དམག་དོན་རྒྱབ་ཕྱོགས་བཀོད་འདོམས་ཁང་གི་འགན་འཛིན་གཞོན་པ་ཟུར་བ་གུ་ཅུན་ཧྲན་(Gu junshan) ལ་ཁྲིམས་བཤེར་བྱས་པ་བརྒྱུད། ཁོ་བོས་ལྐོག་ཟ་རུལ་སུངས་དང་ལྐོང་རྔན་སྤྲོད་ལེན་བྱས་པ། གཞུང་དངུལ་སྒེར་སྤྱོད་དང་དབང་ཆ་སྒེར་སྤྱོད་བྱས་པ་སོགས་ཀྱི་ནག་ཉེས་འོག ཁོ་བོའི་དམག་སྤྱི་འབྲིང་བའི་གོ་གནས་ཕྱིར་བསྡུ་བྱས་ཡོད་པ་མ་ཟད། ལོ་གཉིས་ནར་འགྱངས་ཀྱིས་སྲོག་ཁྲིམས་གཅོད་རྒྱུ་ཐག་གཅོད་བྱུང་ཡོད་ཀྱང་། སྒེར་གྱི་རྒྱུ་ནོར་རྒྱ་སྒོར་ཁྲི་ ༥༠ ལྷག་ཡོད་པ་གཞུང་བཞེས་བཏང་མེད་པ་ཁྱབ་བསྒྲགས་བྱས་འདུག
ཕྱི་ལོ་ ༢༠༠༩ ལོ་ནས་གུ་ཅུན་ཧྲན་གྱིས་བཅིངས་འགྲོལ་དམག་མིའི་དབུས་བཀོད་འདོམས་ཁང་གི་འགན་འཛིན་གཞོན་པའི་འགན་ཁུར་ཡོད་ཀྱང་། ཕྱི་ལོ་ ༢༠༡༢ ཟླ་ ༢ ཚེས་ ༡༡ ཉིན་རྒྱ་ནག་རྒྱལ་སྲུང་དྲ་བའི་སྟེང་། བཅིངས་འགྲོལ་དམག་མིའི་དབུས་རྒྱབ་ཕྱོགས་བཀོད་འདོམས་ཁང་གི་ལས་བྱེད་དག་ཐེར་བྱས་པ་བརྒྱུད། གུ་ཅུན་ཧྲན་གྱིས་འགན་འཛིན་གཞོན་པའི་གོ་གནས་མུ་མཐུད་ཁུར་རྒྱུ་མིན་པ་གཞུང་འབྲེལ་ཁྱབ་བསྒྲགས་བྱས་ཡོད་པ་རེད།
སྔར་ལོར་ཧོང་ཀོང་གསར་ལམ་ཁག་ནས་གུ་ཅུན་ཧྲན་རྒྱ་སྒོར་དུང་ཕྱུར་ ༣༠༠ ལྷག་གི་གྱོད་དོན་དང་འབྲེལ་བ་ཡོད་པ་དང་། རྒྱ་སྒོར་དུང་ཕྱུར་ ༦ ལྷག་གཞན་ལ་ལྐོག་རྔན་སྤྲད་ཡོད་ལུགས་བརྗོད་ཡོད་པ་མ་ཟད། རྩད་ཞིབ་བྱས་པ་ལྟར་ན། ཁོ་བོར་གསེར་སྤྱི་རྒྱ་ ༤༠༠ དང་། བྱང་ཤར་གྱི་སྟག་པགས་ ༡༡། ཨ་ཧྥི་རི་ཀའི་གླང་ཆེན་མཆེ་བ་ ༡༠། གསེར་གྱི་སྐུ་འདྲ་སྤྱི་རྒྱ་གཉིས་ཅན་ཁ་ཤས། དེ་མིན་གྱི་རྩ་ཆེའི་དངོས་པོ་སྣ་ཚོགས་ཡོད་སྐོར་བརྗོད་ཡོད་པ་རེད།
གསར་འགོད་པ། འཇིགས་མེད་རྒྱ་མཚོ།
