གཞོན་སྐྱེས་ཚོར་འཛམ་གླིང་སྤྱི་ལ་ཕན་ཐོཊ་སྒྲུབ་པའི་གོ་སྐབས་དང་འོས་འགན་ཡོད།

དེ་རིང་མེས་དབོན་གཙུག་ལག་དཔེ་སྟོན་སློབ་གྲྭའི་དུས་དྲན་ཐོག ༧གོང་ས་མཆོག་གིས་བོད་ཕྱི་ནང་གཉིས་ཀྱི་མི་རབས་རྒན་པ་རྣམས་རིམ་གྱིས་རྫོཊ་འགྲོ་བཞིན་ཡོད་པས་མི་རབས་གསར་པ་ཚོས་སེམས་ཤུགས་སྐྱེད་དེ་ཧུར་ཐག་བྱེད་དགོས་སྐོར་གསུངས་སོང་།

དེ་རིང་གངས་སྐྱིད་དཔེ་སྟོན་སློབ་གྲྭ་རུ། མེས་དབོན་གཙུག་ལག་དཔེ་སྟོན་སློབ་གྲྭ་དབུ་བརྙེས་ནས་མི་ལོ་ཧྲིལ་པོ་ ༡༠ འཁོར་བའི་དུས་དྲན་མཛད་སྒོ་ཚོགས་སོང་བ་དང་། མཛད་སྒོར་༧གོང་ས་མཆོག་དབུ་བཞུགས་ཐོག་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གི་དབུས། བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང། བོད་མིའི་ཤེས་ཡོན་སྡེ་ཚན་ཁག་གི་འགན་འཛིན་རྣམ་པ། དེ་བཞིན་དགེ་རྒན་ཕ་མའི་ཚོགས་ཆུང་གི་གཙོས་དཔེ་སྟོན་སློབ་གྲྭ་སྟེང་འོག་གཉིས་ཀྱི་དགེ་ལས་སློབ་ཕྲུག་དང་ཁྱིམ་བདག་ཕ་མ་བཅས་མི་གྲངས་ ༡༠༠༠ ལྷག་འཛོམས་འདུག

མཛད་སྒོའི་ཐོག་མར་༧གོང་ས་མཆོག་གིས་དཔེ་སྟོན་སློབ་གྲྭའི་པར་རིས་འགྲེམས་སྟོན་ལ་གཟིགས་ཞིབ་སོགས་མཛད་རྗེས། དཔེ་སྟོན་སློབ་གྲྭའི་སློབ་ཕྲུག་ཁག་ཅིག་གིས་༼དུས་བཟང་གཉིས་འཛོམས་ཀྱི་མཆོད་སྤྲིན༽ཞེས་པའི་བཀྲ་ཤིས་རྟེན་འབྲེལ་གྱི་མཉམ་གཞས་གཟིགས་འབུལ་ཞུས་པ་དང་། དེ་བཞིན་སློབ་ཕྲུག་ཁག་ཅིག་གིས་བོད་ཡིག་སྙན་རྩོམ་༼དུས་ཆེན་གཉིས་འཛོམས་ཀྱི་སྨོན་ཚིག་ངག་གི་རོལ་མོ༽དང་༼༧སྐྱབས་མགོན་ལགས།༽། དབྱིན་ཡིག་སྙན་རྩོམ་༼Remembering and Celebration Our Journey with Petoen༽དང་༼Just for You༽། ༼My Guru༽། རྒྱ་ཡིག་སྙན་རྩོམ་༼ཐུགས་རྗེ་ཆེ་༧གོང་ས་མཆོག ཐུགས་རྗེ་ཆེ་མ་ཡུམ་དཔེ་སྟོན་སློབ་གྲྭ༽ཞེས་པ་བཅས་གྱེར་འདོན་བྱས་པ་དང་། གཞན་ཡང་། མཛད་སྒོའི་ཐོག་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་དཔེ་སྟོན་སློབ་གྲྭའི་སློབ་ཕྲུག་བུ་མོ་བརྒྱད་ཀྱིས་བརྩམས་པའི་༼ཁྱེད་ཀྱི་ལེགས་སྐྱེས༽ཞེས་པའི་སྙན་རྩོམ་ཕྱོགས་སྒྲིག་གི་དེབ་ཅིག་དབུ་འབྱེད་གནང་ཡོད་པ་དང་། དེ་བཞིན་ཤེས་རིག་བཀའ་བློན་མཆོག་ནས་དཔེ་སྟོན་དབུ་བརྙེས་པ་ནས་བཟུང་མུ་མཐུད་ཞབས་ཞུ་སྒྲུབ་བཞིན་པའི་དགེ་ལས་ ༦ ལ་གཟེངས་བསྟོད་གྱི་ཕྱག་ཁྱེར་བཅས་གནང་སོང་།

༧གོང་ས་མཆོག་གིས་འདས་པའི་ལོ་ངོ་ ༡༠ ནང་དཔེ་སྟོན་གྱི་དབུ་ལས་ཡོངས་ནས་འབད་བརྩོན་གནང་བ་ལ་བརྟེན་ནས་གྲུབ་འབྲས་ཡག་པོ་བྱུང་ཡོད་སྐོར་གསུངས་དོན། ང་ཚོས་སློབ་གྲྭ་ཆུང་ཆུང་ཞིག་འདིར་བཙུགས་ཏེ་དཔེ་སྟོན་སློབ་གྲྭ་ཞེས་ལབ་པ་ལྟར་གྲུབ་འབྲས་གང་ལ་གང་འཚམ་ཐོན་ཏེ་བློ་གཟུ་བོར་གནས་པའི་མི་ཚོས་བསྟོད་བསྔགས་བྱེད་ས་ཞིག་དང་། ཡིད་དབང་འཕྲོག་པ་ཞིག་ཆགས་ཡོད་པ་རེད། ཞེ་དྲགས་ཡག་པོ་བྱུང་འདུག འདིར་ཉིན་ནས་ཉིན་བསྟུད་ཟླ་བ་ནས་ཟླ་བ། ལོ་ནས་ལོ་བསྟུད་དེ་དཀའ་ལས་རྒྱག་མཁན་གྱི་དགེ་རྒན་ལས་བྱེད་སོགས་ཁྱེད་རང་ཚོ་ཚང་མར་ཐུགས་རྗེ་ཆེ་ཞུ་ཡི་ཡིན། དེ་བཞིན་མཐུན་འགྱུར་རོགས་རམ་གནང་མཁན་དང་འཛིན་སྐྱོང་བཀའ་ཤག་གི་ཐོག་ནས་མཐུན་འགྱུར་དང་རྒྱབ་སྐྱོར་གནང་བཞིན་ཡོད་པས། འབྲེལ་ཡོད་ཚང་མར་ཐུགས་རྗེ་ཆེ་ཞེས་ཞུ་འདོད་བྱུང་། དཔེ་སྟོན་སློབ་གྲྭ་ཐོག་མར་མགོ་བཙུགས་པ་ནས་བཟུང་འཁུར་རྐང་བཞེས་མཁན་ཟམ་གདོང་རིན་པོ་ཆེ་རེད། ང་ནང་བཞིན་བྱས་ཏེ་རིན་པོ་ཆེ་ཡང་རྒས་ཤིང་འཁོགས་པ་ཆགས་འགྲོ་ཡི་ཡོད་ཀྱང་། སོ་སོའི་མི་ཚེ་ཧྲིལ་པོ་བོད་བསྟན་པ་དང་བོད་མི་མང་གི་ཤེས་ཡོན་སོགས་ཀྱི་ཆེད་དུ་བཏང་གནང་བའི་མི་ཞིག་ཡིན་པས། རིན་པོ་ཆེར་ཐུགས་རྗེ་ཆེ་ཞུ་ཡི་ཡོད། ཞེས་གསུངས་སོང་།

ཡང་བོད་རིགས་གཞོན་སྐྱེས་ཚོར་འཛམ་གླིང་སྤྱི་ཡོངས་ལ་ཕན་ཐོགས་སྒྲུབ་ཐུབ་པའི་གོ་སྐབས་དང་འོས་འགན་གཉིས་ཀ་ཡོད་སྐོར་ཁོང་གིས། བོད་གངས་ཅན་ལ་ཆ་བཞག་ན། མི་རབས་རྒན་པ་ཚོ་རྫོགས་འགྲོ་ཡི་ཡོད་པ་དང་། ང་ཚོ་བཙན་བྱོལ་ལ་ཆ་བཞག་ནའང་ཕྱི་ལོ་ ༡༩༥༩ ལོར་བཙན་བྱོལ་དུ་ཡོང་བའི་མི་རབས་དེ་མང་ཆེ་བ་རྫོགས་ཚར་བ་རེད། ང་ཚོའི་འཐབ་རྩོད་དེ་མི་རིགས་ཤིག་གི་འཐབ་རྩོད་ཡིན་སྟབས། མི་ཐོག་གཅིག་གི་སྐད་ཆ་མ་རེད། མི་རབས་ནས་མི་རབས་ཀྱི་སྐད་ཆ་ཡིན་པས། ཁྱེད་རང་ཚོ་དངོས་གནས་བོད་གངས་ཅན་པའི་ཤ་ཁྲག་རུས་གསུམ་གྱིས་གྲུབ་པའི་མི་རབས་གསར་པ་ཚོ་བསླེབས་བསྡད་ཡོད་པ་དང་། ཁྱེད་རང་ཚོས་དངོས་གནས་ཇི་སྲིད་བསྟན་འགྲོའི་ལག་ཆ་དེ་ཚོ་སྙིང་ལ་བཟུང་བའི་ཐོག བོད་མི་རིགས་རང་གི་རིག་གཞུང་གཏིང་ཟབ་ཡོད་པ་དེ་ཚོ་ཉམས་པ་སོར་ཆུད་དང་མ་ཉམས་གོང་འཕེལ་གཏོང་བ་དང་། དེ་བརྒྱུད་ནས་འཛམ་བུ་གླིང་སྤྱི་ལ་ཕན་ཐོགས་སྒྲུབ་ཐུབ་པའི་གོ་སྐབས་ཡོད་ལ། འགན་ཡང་ཡོད་པ་རེད། དེར་བརྟེན་ཁྱེད་རང་ཚོ་དུས་རབས་ཉེར་གཅིག་པའི་གཞོན་ནུ་ཚང་མས་སེམས་ཤུགས་སྐྱེད་དེ་ཧུར་ཐག་བྱས་ཨཱ། ཞེས་དང་། ཆུང་དུས་ནས་སོ་སོའི་རྒྱུད་ལ་ཡོད་པའི་བསམ་བློའི་འཁྱེར་སོ་བཟང་པོ་དེ་ལག་ལེན་བསྟར་བར་ཤེས་ཡོན་དགོས་པ་དང་། སེམས་བརྩེ་དང་ལྷག་བསམ་གཉིས་ཟུང་འབྲེལ་གྱི་ཐོག་ནས་འགྲོ་ཐུབ་པ་ཡིན་ན་རང་དང་སྤྱི་ཚོགས་ལ་ཕན་པ་མ་ཟད། འཛམ་བུ་གླིང་སྤྱི་ལའང་ཕན་ཐོགས་ཡོད་སྐོར་གསུངས་སོང་།

བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་མེས་དབོན་གཙུག་ལག་དཔེ་སྟོན་སློབ་གྲྭའི་ཤེས་ཡོན་སྲིད་བྱུས་ལག་བསྟེར་བྱེད་བཞིན་པར་གྲུབ་འབྲས་གང་ལ་གང་འཚམ་ཐོན་གྱི་ཡོད་པའི་སྐོར་ལ། ཤེས་ཡོན་སྲིད་བྱུས་ཀྱི་ངོ་བོ་དང་སྒྲོམ་གཞི། རྒྱུ་མཚན་སོགས་ཟམ་གདོང་རིན་པོ་ཆེ་མཆོག་གིས་ཤེས་ཡོན་སྲིད་བྱུས་ཀྱི་སྔོན་གླེང་ནང་གསལ་བོར་བཀོད་ཡོད་པ་རེད། ཉེ་ཆར་མེས་དབོན་གཙུག་ལག་དཔེ་སྟོན་སློབ་གྲྭ་བཙུགས་ནས་ཤེས་ཡོན་སྲིད་བྱུས་དངོས་སུ་ལག་བསྟར་བྱས་ཏེ་ལོ་ངོ་ ༡༠ འཁོར་བའི་དུས་དང་སྟབས་བསྟུན། མང་ཚོགས་ནང་ཤེས་ཡོན་སྲིད་བྱུས་ཚད་དང་ལྡན་པ་ལག་ལེན་བསྟར་ཐུབ་ཡོད་མེད་ཀྱི་གླེང་སློང་བྱུང་ཡོད་སྟབས། བོད་མི་མང་སྤྱི་འཐུས་ལྷན་ཚོགས་ནས་སྤྱི་འཐུས་ལྔ་ལས་གྲུབ་པའི་ཚོགས་ཆུང་ཞིག་བཙུགས་ཏེ། འདས་པའི་ལོ་ངོ་ ༡༠ རིང་ཤེས་ཡོན་སྲིད་བྱུས་ལག་བསྟར་དང་འབྲེལ་བའི་གནས་སྟངས་ཇི་བཞིན་ཞིབ་ཚགས་པོ་བལྟས་པ་དང་། གྲོས་ཚོགས་ཀྱི་ཚོགས་དུས་ ༡༠ བའི་སྟེང་ཉིན་གཅིག་ལྷག་རིང་བགྲོ་གླེང་བྱས་པ་ཡིན། ཚོགས་ཆུང་གི་གཟིགས་ཞིབ་ནང་མེས་དབོན་གཙུག་ལག་དཔེ་སྟོན་སློབ་གྲྭའི་སློབ་ཕྲུག་ཚོ་སློབ་གྲྭ་གཞན་གྱི་སློབ་ཕྲུག་དང་མི་འདྲ་བའི་གནས་སྟངས་ཡག་པོ་ཞེ་དྲགས་ཆགས་ཡོད་སྟབས། ཚོགས་ཆུང་གི་རྒྱབ་གཉེར་ནང་མ་འོངས་པར་བོད་པའི་སློབ་གྲྭ་ཚང་མར་ཤེས་ཡོན་སྲིད་བྱུས་ལག་བསྟར་བྱ་དགོས་པའི་གྲོས་ཆོད་བཞག་ཡོད་པ་རེད། ད་ལྟ་སློབ་གྲྭ་ཁག་ཅིག་ནང་ཤེས་ཡོན་སྲིད་བྱུས་གཞིར་བཟུང་འགྲོ་ཐུབ་མིན་གྱི་གནས་སྟངས་འོག ཁག་ཅིག་ནང་དགེ་རྒན་ཉུང་བའི་སྐྱོན་ཡོད་དུས་དགེ་རྒན་གསོ་སྐྱོང་བྱ་རྒྱུར་འབད་བརྩོན་བྱས་ནས་སློབ་གྲྭ་ཁག་ཚང་མས་ཤེས་ཡོན་སྲིད་བྱུང་བེད་སྤྱོད་གཏོང་ཐུབ་པ་ཡོང་བར་བོད་མི་མང་སྤྱི་འཐུས་ལྷན་ཚོགས་ཀྱིས་རེ་བ་ཞུ་བཞིན་ཡོད། ཅེས་གསུངས་སོང་།

ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་ཤེས་ཡོན་ནི་རྒྱལ་ཁབ་ཀྱི་ལྡེ་མིག་ལྟ་བུ་ཡིན་སྐོར་གསུངས་དོན། ཤེས་ཡོན་ནི་མི་སྒེར་དང་རྒྱལ་ཁབ། སྤྱི་ཚོགས་ཡར་རྒྱས་གཏོང་བའི་ལྡེ་མིག་ཡིན་པ་དང་། ཤེས་ཡོན་ནི་མི་རིགས་འཚོ་གནས་དང་དར་སྤེལ་གྱི་ཆ་རྐྱེན་དམ་པ་ཡིན། ཕྱི་ནང་གི་ཤེས་ཡོན་ལྡན་པ་ མི་རིགས་ལར་ཞེན་དང་ལྡན་པ། ཡ་རབས་བཟང་སྤྱོད་དང་ལྡན་པ། ལྷག་བསམ་སྙིང་སྟོབས་དང་ལྡན་པ་བཅས་བདེན་པ་བཞིའི་ཁྱད་ཆོས་ཚང་ཞིང་། ཕྱི་ནང་རིག་གནས་ལ་མཁྱེན་པ་རྒྱས་པ་ཞིང་། ནང་བཟང་པོའི་ཡོན་ཏན་གྱིས་ཕྱུག་པ་བྱུང་ན་ཤེས་ཡོན་གྱི་དགོས་པ་ཚང་ཞིང་། ༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་དགོངས་གཞི་འགྲུབ་པ་དང་ཤེས་ཡོན་སྲིད་བྱུས་ཀྱི་དམིགས་ཡུལ་འགྲུབ་པ། བོད་མིའི་སྒྲིག་འཛུགས་ཀྱི་རེ་བ་འགྲུབ་པ་བཅས་འགྲུབ་པ་གསུམ་གྱི་རྒྱན་པར་ཡོང་རྒྱུ། རང་རིགས་སློབ་ཕྲུག་ཕ་མ་བཅས་འབྲེལ་ཡོད་ཚང་མས་ཤེས་ཡོན་ཐོག་ཐུགས་ཁུར་ཆེར་བཞེས་ཡོང་བར་གོ་སྐབས་འདི་རྒྱུད་ནས་འབོད་སྐུལ་ཞུ་རྒྱུ་ཡིན། གཞན་ཡང་ཕ་མ་ནི་དགེ་རྒན་དང་པོ་དང་ཁྱིམ་ཚང་ནི་སློབ་གྲྭ་དང་པོ་ཡིན་ཞེས་པ་གསུང་རྒྱུན་དོན་ལ་གནས་ཏེ་འདི་ག་དཔེ་སྟོན་སློབ་གྲྭའི་ཕ་མའི་ཚོགས་ཆུང་ནས་རྒྱུན་གཏན་སློབ་གྲྭར་འཕྱར་གྲུ་མཉམ་འདེགས་གནང་བར་ཡི་རང་བསྔགས་བརྗོད་ཞུ་རྒྱུ་དང་། ས་གནས་གཞན་གྱི་ཕ་མའི་ཚོགས་ཆུང་ཁག་ནས་ཀྱང་སློབ་གྲྭར་འཕྱར་བ་གྲུ་འདེགས་ཡོང་རྒྱུའི་རེ་སྐུལ་ཞུ་རྒྱུ་དང་། མདོར་ན། སློབ་ཕྲུག་དང་དགེ་རྒན། འཛིན་སྐྱོང་དང་ཕ་མ་ཚང་མས་མཉམ་རུབ་གནང་ཚེ་རང་རེའི་སྤྱི་ཚོགས་དེ་བཞིན་ཤེས་ཡོན་ཅན་གྱི་སྤྱི་ཚོགས་ཤིག་ཏུ་འགྱུར་རྒྱུ་གདོན་མི་ཟ། ཞེས་གསུངས་སོང་།

བཀའ་བློན་ཁྲི་ཟུར་ཟམ་གདོང་རིན་པོ་ཆེ་བློ་བཟང་བསྟན་འཛིན་མཆོག་གིས་ཤེས་ཡོན་སྲིད་བྱུས་འདི་གྲོས་ཚོགས་ཀྱིས་གཏན་ལ་ཕབ་པའི་སྲིད་བྱུས་ཤིག་ཡིན་པ་ལས་ཁོང་གི་མིན་སྐོར་གསུངས་དོན། བོད་པའི་སྤྱི་ཚོགས་ནང་ཤེས་ཡོན་སྲིད་བྱུས་འདི་ངས་བཟོས་བཞག་པ་འདྲ་པོ་ཞིག་དགོངས་མཁན་དེ་འདྲ་ཡོད་ས་རེད། ངས་བཟོས་པའི་ཤེས་ཡོན་སྲིད་བྱུས་དང་། ངས་བརྩམས་པའི་ཤེས་ཡོན་སྲིད་བྱུས་རེད་ཟེར་བ་དེ་འདྲ་འབྲི་མཁན་དང་གསུང་མཁན་ཡོང་གི་འདུག ང་ཚོ་བཀའ་ཤག་གི་སྐབས་ལ་མགོ་འཛུགས་བྱས་པ་དངོས་ཡོད་གནས་ཚུལ་རེད་མ་གཏོགས། ཤེས་ཡོན་སྲིད་བྱུས་འདི་ངས་མི་གཅིག་གིས་བཟོས་བཞག་པ་ཞིག་མིན་པ་དེ་ངེས་པར་དུ་མཁྱེན་དགོས་པ་ཞིག་རེད། དཔེར་ན། རྒྱ་གར་ནང་ལ་ཌོག་ཌར་བྷི་ཨར་ཨེམ་བྷེ་ཌ་ཁཱར་ ( Dr.B. R. Ambedkar) མཆོག་ལ་རྒྱ་གར་རྩ་ཁྲིམས་ཀྱི་རྩོམ་པ་པོ་རེད་ཟེར་ནས་ལབ་མཁན་དེ་འདྲ་བྱུང་བ་རེད། དེ་འདྲ་ལབ་མཁན་ཡོང་སྐབས་ཨེམ་བྷེ་ཌ་ཁཱར་མཆོག་གིས་གྲོས་ཚོགས་ནང་ང་རང་ངོ་ཚ་སྟེ་རྔུལ་ཆུ་ཐོན་གྱི་འདུག་ཅེས་གསུངས་མྱོང་བ་རེད། གང་ཡིན་ཟེར་ན། ཨེམ་བྷེ་ཌ་ཁཱར་རྒྱ་གར་རྩ་ཁྲིམས་ཀྱི་ཟིན་བྲིས་ཚོགས་ཆུང་གི་ཚོགས་གཙོ་གནང་པ་རེད། ངས་ནི་ཤེས་ཡོན་སྲིད་བྱུས་ཟིན་བྲིས་ཚོགས་ཆུང་ནང་ཡིན་ཡང་ཐེ་གཏོགས་གང་ཡང་བྱས་མེད། ཤེས་ཡོན་སྲིད་བྱུས་འདིའི་ཐོག་མའི་བསམ་བློའི་ས་བོན་ག་ནས་བརྙེད་པ་རེད་ཟེར་ན། འདས་པའི་ལོ་བཞི་བཅུ་ཞེ་གྲངས་རིང་ལ་༧གོང་ས་སྐྱབས་མགོན་རིན་པོ་ཆེ་མཆོག་གིས་ཡང་ནས་ཡང་དུ་བོད་མིའི་མ་འོངས་ཤེས་ཡོན་ཐོག་ལ་བཀའ་སློབ་རིམ་པ་གནང་བ་དེ་ཚོའི་ནང་ནས་ཕྱོགས་བསྡུས་དང་། སྟོན་པ་བཅོམ་ལྡན་འདས་ཀྱིས་ལེགས་པར་གསུངས་པའི་དམ་པའི་ཆོས་ནས་འབྱུང་བའི་རིགས། དེ་བཞིན་རྒྱ་གར་ནང་གི་སྔོན་བྱུང་མཁས་པ་མང་པོའི་གསུངས་དེ་ཚོར་གཞི་ལ་བཞག་སྟེ། ༢༠༠༢ ལོའི་ཕྱི་ཟླ་ ༡ པའི་ནང་ལ་ཤེས་རིག་ཚོགས་ཆེན་ཐེངས་དྲུག་པ་རྒྱུན་རིང་ཉམས་མྱོང་ཡོད་པའི་དགེ་རྒན་དང་། སློབ་སྤྱི་ ༢༠༠ ཡས་མས་སྐོར་ཞིག་འདུ་འཛོམས་བྱས་པ་དེས། ཉིན་མ་གསུམ་གྱི་བགྲོ་གླེང་གི་གྲུབ་དོན་ནང་ནས་བསམ་བློའི་ས་བོན་འདྲ་པོ་དེ་བརྙེད་ཡོད་པ་རེད། དེའི་ཐོག་ནས་བརྙེད་པའི་བསམ་བློའི་ས་བོན་དེར་དངོས་སུ་ཡིག་ཐོག་ལ་ཕབ་མཁན་དེ། སྐབས་དེའི་དུས་ཀྱི་ཤེས་རིག་དྲུང་ཆེ་ཀརྨ་དགེ་ལེགས་ཀྱི་གཙོ་སྐྱོང་འོག་བོད་ཁྱིམ་གྱི་དགེ་ཟུར་ཌོག་ཌར་བུ་མོ་ཚེ་རིང་དང་། བོད་ཁྱིམ་གྱི་ཤེས་རིག་འགན་འཛིན་ངག་དབང་རྡོ་རྗེ། རིགས་ལམ་སློབ་གྲྭའི་དགེ་རྒན་བློ་བཟང་རིན་ཆེན། ཤེས་རིག་གི་ལས་བྱེད་ཆུང་ཚེ་རིང་ཁོ་ཚོ་ལས་གྲུབ་པའི་ཟིན་བྲིས་ཚོགས་ཚུང་བཙུགས་ཏེ། ཟིན་བྲིས་དང་པོ་དང་གཉིས་པ་གཉིས་ཀ་ཟིན་བྲིས་ཚོགས་ཆུང་དེ་རང་གིས་བརྒྱབ་པ་རེད། དེའི་རྗེས་ལྡི་ལིར་རྒྱ་གར་མཁས་པ་ཁག་གི་ཚོགས་འདུ་དང་། ལྡེ་རུ་རྡུན་གྱི་སྲོང་བཙན་དཔེ་མཛོད་ཁང་དུ་བོད་ཀྱི་མཁས་པ་ཁག་གི་ཚོགས་འདུ། དེ་རྗེས་རྡ་རམ་ས་ལར་ནུབ་ཕྱོགས་མཁས་པ་ཁག་གི་ཚོགས་འདུ། ༧གོང་ས་མཆོག་སྐྱབས་མགོན་རིན་པོ་ཆེ་དབུ་བཞུགས་ཀྱི་ཐོག་ནས་ཚོགས་འདུ་རིམ་པ་ནང་ལ་ཞིབ་བསྡུར་བྱས། དེ་བཞིན་བཙན་བྱོལ་བོད་མིའི་སྤྱི་ཚོགས་ཡོངས་རྫོགས་ཀྱི་འབྲེལ་ཡོད་ཚང་མར་ཟིན་བྲིས་དང་པོ་དང་གཉིས་པ་འགྲེམས་སྤེལ་ཞུས་ནས། དེའི་ནང་ལ་དགོངས་འཆར་ཡོང་བ་ཆ་ཚང་ཕྱོགས་བསྡུས་བྱས་པ་དེ། མཐའ་མ་ཟིན་བྲིས་ཚོགས་ཆུང་དང་བཀའ་ཤག་གིས་གཏན་ལ་ཕབ་པ་དེ། ཕྱི་ལོ་ ༢༠༠༤ལོའི་ཕྱི་ཟླ་ ༩ པའི་ནང་བོད་མི་མང་སྤྱི་འཐུས་ལྷན་ཚོགས་ལ་ཕུལ། སྤྱི་འཐུས་ལྷན་ཚོགས་ཀྱིས་སྤྱི་ཡོངས་ཀྱི་བགྲོ་གླེང་དང་། དེ་བཞིན་ཚོགས་ཆུང་ཟུར་བགོས་ཀྱིས་བགྲོ་གླེང་། དེའི་རྗེས་དོན་ཚན་རེ་རེ་བཞིན་སྤྱི་མོས་མང་མོས་ཀྱིས་གཏན་ལ་ཕབ་ནས་དོན་ཚན་མང་ཆེ་བ་ཞིག་ཆེས་མཐོའི་མང་མོས་ཐོག་ནས་ཕྱིན་པ་དང་། མཐའ་མའི་ཕྱོགས་བསྡོམས་ཀྱི་ཡིག་ཆ་དེ་སྤྱི་མོས་ཀྱི་ཐོག་ནས་གཏན་ལ་ཕབ་པ་རེད། དེ་འདྲ་ཡིན་དུས་ཤེས་ཡོན་སྲིད་བྱུས་ཀྱི་ཡིག་ཆ་འདི་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་ཁྲིམས་དང་གནས་ཚད་མཉམ་པའི་ཡིག་ཆ་ཞིག་ཡིན་པར་ངོས་ལེན་གནང་དགོས་པ་ཞིག་ཡིན་སྟབས། མ་འོངས་པར་འདི་ལ་བསྐྱར་ཞིབ་དང་འགྱུར་བ་གཏོང་དགོས་པའི་རིགས་དེ་ཚོ་གང་ཟག་བྱེ་བྲག་པ་དང་། ལས་ཁུངས་བྱེ་བྲག་པ་གཅིག་གི་དབང་ཚད་ལ་མེད་པ་བྱས་ཏེ། སྤྱི་འཐུས་ལྷན་ཚོགས་རང་གིས་བསྐྱར་ཞིབ་དང་བསྐྱར་བཅོས་གནང་དགོས་པའི་གནས་སྟངས་ཤིག་ཆགས་བསྡད་ཡོད་པ་རེད། དེ་འདྲ་ཡིན་དུས་ཚང་མས་ཤེས་ཡོན་སྲིད་བྱུས་འདི་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་ཤེས་ཡོན་སྲིད་བྱུས་ཤིག་ཡིན་པ་དང་། སྤྱི་འཐུས་ལྷན་ཚོགས་ངོས་ནས་ཀྱང་འདི་རང་ཉིད་ཀྱིས་གཏན་ལ་ཕབ་པའི་ཡིག་ཆ་ཞིག་ཡིན་དགོངས་ཏེ། བདག་པོའི་འདུ་ཤེས་བཟུང་ནས་འདི་ལ་སྲུང་སྐྱོབ་དང་རྒྱུན་གནས་ཡོང་རྒྱུ་གཙོས། བསྐྱར་བཅོས་དགོས་པའི་རིགས་དེ་ཚོ་དུས་ལ་གཟིགས་ཐུབ་པ་གནང་དགོས་པ་དེ་གལ་ཆེན་པོ་རེད། ཅེས་གསུངས་སོང་།

མཛད་སྒོའི་ཐོག་དཔེ་སྟོན་སློབ་གྲྭའི་སློབ་སྤྱི་བསྟན་འཛིན་རྡོ་རྗེ་ལགས་ཀྱིས་ལས་བསྡོམས་སྙན་སྒྲོན་ཞུས་སོང་བ་དང་། ལས་བསྡོམས་ནང་དཔེ་སྟོན་སློབ་གྲྭའི་དགེ་སློབ་ཀྱི་གྲངས་འབོར་དང་མཐུན་རྐྱེན་སྐོར་བཀོད་པའི་ནང་། ཐོག་མར་སྤྱི་ཚོགས་ནང་ཤེས་ཡོན་སྲིད་བྱུས་ཐད་ཐེ་ཚོམ་དང་ལབ་གླེང། ལོག་རྟོག་སྣ་ཚོགས་ཁྱབ་གདལ་སོང་བས་དྷ་ས་ཉེ་འཁོར་ནས་སློབ་ཕྲུག་འདུ་སྐོང་མ་ཐུབ་པས་ཤེས་རིག་ལས་ཁུངས་ནས་གཞིས་ཆགས་ཁག་ཏུ་ཕེབས་ནས་ཤེས་ཡོན་སྲིད་བྱུས་ཀྱི་ལྟ་གྲུབ་དང་ནང་དོན་ཁག་གསལ་བསྒྲགས་ཏེ་ཐོག་མའི་ཆར་སློབ་ཕྲུག་ ༦༤ ཙམ་སློབ་འཇུག་བྱས།

དེ་ནས་ལོ་ཤས་སློབ་ཁྲིད་རྒྱུན་སྲིང་བྱས་པའི་རྗེས་འབྲས་སུ་གྲུབ་འབྲས་མི་དམན་ཙམ་ཞིག་འབུར་ཐོན་བྱུང་བའི་འབྲས་བུར་སློབ་འཇུག་གྲངས་འབོར་ཀྱང་ཇེ་མང་དུ་སོང་བས། སློབ་དུས་ ༢༠༠༩ ལོར་འཛིན་རིམ་དྲུག་པ་གསར་འགོ་ཚུགས་པ་དང་། དེ་ནས་སློབ་ཕྲུག་གི་གྲངས་འབོར་ལ་གཞིགས་པའི་སློབ་གྲྭའི་འཛིན་ཁང་གི་རྒྱ་ཁྱོན་དང་ཁོར་ཡུག་སོགས་འདང་ངེས་ཤིག་མེད་སྟབས། ཕྱི་ལོ་ ༢༠༡༡ སློབ་དུས་ནས་བཟུང་གངས་སྐྱིད་སཾ་བྷོ་ཊ་ཉིན་སློབ་དེ་བཞིན་དཔེ་སྟོན་སློབ་གྲྭའི་ངོ་བོར་བསྒྱུར་ཏེ། མེས་དབོན་གཙུག་ལག་དཔེ་སྟོན་སློབ་གྲྭའི་འཛིན་སྐྱོང་གི་ཁྱབ་ཁོངས་སུ་ཟླ་བསྒྲིལ་བཏང་ནས། སྔོན་འགྲོའི་འཛིན་གྲྭ་ནས་འཛིན་རིམ་ལྔ་པ་བར་གངས་སྐྱིད་དཔེ་སྟོན་ཉིན་སློབ་དང་འཛིན་རིམ་དྲུག་པ་ཡན་རྣམས་དྷ་ཤོད་དཔེ་སྟོན་སློབ་གྲྭ་ཞེས་གཉིས་སུ་དབྱེ་ནས་ཚུགས་བཞིན་ཡོད། ད་ལྟའི་ཆར། སྔོན་འགྲོ་ནས་འཛིན་རིམ་བཅུ་པ་ཁྱོན་བསྡོམས་སློབ་ཕྲུག་ ༣༧༠ ཙམ་དང་། དགེ་རྒན་ ༣༨ དང་ལས་བྱེད་ ༡༥ བཅས་དགེ་ལས་ཁྱོན་བསྡོམས་ ༥༣ ཡོད། ཞེས་བཀོད་འདུག

ཡང་ཤེས་ཡོན་གྱི་གྲུབ་འབྲས་སྐོར་ལ། སྤྱིར་ཤེས་ཡོན་དང་འབྲེལ་བའི་གྲུབ་འབྲས་ནི། ཕྱི་ནང་གི་ཆ་རྐྱེན་མང་པོ་ཞིག་ལ་རག་ལས་པས་དུས་ཐུང་ནང་འབྲས་བུ་སྨིན་དཀའ་ཞིང་ཚོད་དཔག་བྱེད་རྒྱུ་ནི་དེ་བས་དཀའ། འདི་སློབ་ཏུ་སློབ་ཕྲུག་ཚོར་ཤེས་ཡོན་སློབ་སྦྱོང་སྤྲོད་པའི་བརྒྱུད་རིམ་ནང་འགྲན་སྡུར་དང་མཚུངས་བསྡུར། ཡིག་རྒྱུགས་གྲུབ་འབྲས་ཁོ་ནར་དཔྱད་གཞིར་བཟུང་སྟེ་སྔོན་དཔག་ཐག་གཅོད་བྱ་རྒྱུ་སྤོང་ཀྱང་། ད་ལྟའི་སྤྱི་ཚོགས་ནི་འགྲན་རྩོད་དྲག་པོའི་ཁོར་ཡུག་ནང་འཐིམས་ཤིང། ལྷག་པར་དུ་དེང་དུས་སློབ་གྲྭ་ཁག་ཚོང་རར་སྒྱུར་ནས་ཤེས་ཡོན་གྱི་གནས་ཚད་དེའང་ཡིག་རྒྱུགས་གྲུབ་འབྲས་ཁོ་ནར་གཞི་བཅོལ་དེ་འགྲན་སྡུར་དང་མཚུངས་སྡུར་གནང་བཞིན་ཡོད། ང་ཚོས་ཀྱང་མཐའ་གཅིག་ཏུ་དེའི་རྗེས་འབྲངས་སུ་མ་འགྱུར་ནས་འཛམ་གླིང་འདི་བཟང་ཕྱོགས་སུ་ཁ་ལོ་བསྒྱུར་ཐུབ་མཁན་གྱི་མ་འོངས་སོན་རྩ་གང་མང་སྐྱེད་སྲིང་ཆེད་ཕྱི་ནང་ཟུང་འབྲེལ་གྱི་ཤེས་ཡོན་སྤྲོད་བཞིན་པས་ད་ལྟའི་ཆར་སྤྱི་ཚོགས་ནང་གྲུབ་འབྲས་མི་དམན་པ་ཞིག་འབུར་ཐོན་བྱུང་ཡོད། ཕྱི་ལོ་ ༢༠༡༤ ལོར་འཛིན་རིམ་བཅུ་པའི་སློབ་ཐོན་དང་པོའི་སྐབས་སློབ་ཕྲུག་ ༢༣ ཕྱི་ལོ་ ༢༠༡༥ ལོར་སློབ་ཐོན་གཉིས་པའི་སྐབས་སློབ་ཕྲུག་ ༡༦ ཐོན་ཡོད། འདི་ནས་ཐོན་པའི་སློབ་ཕྲུག་རྣམས། གཏན་སློབ་ཁག་ཏུ་ཕེབས་ནས་འཛིན་རིམ་བཅུ་གཅིག་གི་ཡིག་རྒྱུགས་གྲུབ་འབྲས་སྐབས་ཨང་དང་པོ་གཉིས་པ་ཐོབ་པའི་སློབ་ཕྲུག་འགའ་ཤས་བྱུང་འདུག ཅེས་དང་།

གྲུབ་འབྲས་གཞན་ཁག

༡)         ཤེས་རིག་ལས་ཁུངས་ཀྱིས་ལོ་ལྟར་གོ་སྒྲིག་གནང་བཞིན་པའི་ཕུལ་བྱུང་རྩོམ་ཡིག་འགྲན་བསྡུར་དང་ཕུལ་བྱུང་ཡིག་གཟུགས་འགྲན་བསྡུར་བཅས་ནང་མཉམ་ཞུགས་བྱས་པ་མ་ཟད། ལོ་ལྟར་སློབ་ཕྲུག་རེ་འགའ་ལ་ཕུལ་བྱུང་དང་ལེགས་གསོལ་བྱ་དགའ་ཐོབ་དང་ཐོབ་མུས་ཡིན།

༢)        ༢༠༡༣ ལོར་ཤེས་རིག་ལས་ཁུངས་ཀྱི་གོ་སྒྲིག་འོག་གཏན་འབེབས་བརྡ་ཆད་སྦྱང་རྩལ་ཕུལ་བྱུང་བྱ་དགའ་ཨང་དང་པོ་དང་གཉིས་པ་ནི་དཔེ་སྟོན་སློབ་གྲྭའི་སློབ་ཕྲུག་གཉིས་ལ་ཐོབ།

༣)        ༢༠༡༤ དང་ ༢༠༡༥ ལོར་ཕྱི་ཟླ་དང་པོའི་ནང་ཤེས་རིག་ལས་ཁུངས་ཀྱི་གོ་སྒྲིག་འོག་བཙན་བྱོལ་བོད་མིའི་སློབ་གྲྭ་ཁག་འཛིན་རིམ་བཅུ་པའི་སློབ་ཕྲུག་ ༣༠༠ ལྷག་ཙམ་ལ་འགོ་ཁྲིད་ནུས་པ་སྐྱེད་སྲིང་གནང་ཕྱོགས་དང་འབྲེལ་བའི་ཟབ་སྦྱོང་གནང་སྐབས་བོད་ཡིག་དང་ཨིན་ཇིའི་གནས་ཚད་ལ་ཞིབ་འཇུག་གནང་ཡོད། སྐབས་དེར་དཔེ་སྟོན་སློབ་གྲྭའི་སློབ་ཕྲུག་རྣམས་ལ་བོད་ཡིག་དང་ཨིན་ཇིིའི་གནས་ཚད་སློབ་གྲྭ་རྩེ་ཕུད་གྲལ་ཚུད་ཡོད།

༤)        ཕྱི་ལོ་ ༢༠༡༤ ཟླ་ ༡༡ ཚེས་ ༥ ནས་ ༦ བར་ཤེས་རབ་དགའ་ཚལ་སློབ་གླིང་དུ་ཐེངས་གཉིས་པའི་ཐ་སྙད་གསར་པའི་དྲི་རྩད་འགྲན་བསྡུར་གོ་སྒྲིག་གནང་ཡོད། དེར་དྷ་ས་ཉེ་འཁོར་གྱི་མཐོ་སློབ་དང་། གྲྭ་ཚང། བཙུན་དགོན། སློབ་ཁག་ཤེས་ཡོན་གྱི་བསྟི་གནས་ཁང་ ༡༦ ནས་ཁྱོན་མི་གྲངས་ ༨༠ འགྲན་སྡུར་ཆེན་མོའི་ནང་ཞུགས་ཡོད། དེར་མེས་དབོན་གཙུག་ལག་དཔེ་སྟོན་སློབ་གྲྭར་བརྒྱ་ཆ་ ༡༠༠ ནས་ཁྱོན་བསྡོམས་བརྒྱ་ཆ་༨༢ ཐོབ་སྟེ་ཨང་དང་པོའི་བྱ་དགའ་གསོལ་རས་གནང་ཡོད། ཅེས་བཀོད་འདུག

མཇུག་སྡོམ་ནང་།

༡)         ད་བར་ཤེས་ཡོན་སྲིད་བྱུས་ལས་ཤེས་ཡོན་སློབ་སྦྱོང་སྤྲོད་དགོས་པའི་དམིགས་ཡུལ་བཞི། རང་དབང་དང། གཞན་ཕན། རྒྱུན་འཛིན། གསར་གཏོད་བཅས་བཞི་དང་ལྡན་པའི་མི་སྣ་གསོ་སྐྱོང་བྱེད་བཞིན་ཡོད་པས། འབྱུང་འགྱུར་ཤེས་ཡོན་སྲིད་བྱུས་འོག་ནས་སློབ་ཐོན་བྱུང་བའི་སློབ་ཕྲུག་རྣམས་སྤྱི་ཚོགས་ཁྲོད་རང་རང་སོ་སོའི་ལས་གནས་ལ་བཞུགས་ནས་བོད་མི་རིགས་ཙམ་མིན་པར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་དགོངས་བཞིན་འཛམ་གླིང་མི་རིགས་ཡོངས་ལ་ཕན་ཐོགས་པའི་ཤེས་ཡོན་ཅན་གྱི་མི་སྣར་འགྱུར་ཐུབ་རྒྱུའི་ཕུགས་རེ་ཟབ་མོ་བཅངས་ཡོད།

༢) འདས་པའི་ལོ་ཤས་ནང་མེས་དབོན་གཙུག་ལག་དཔེ་སྟོན་སློབ་གྲྭར་སློབ་འཇུག་གི་གྲངས་འབོར་ཇེ་མང་དུ་སོང་ཏེ་སློབ་གྲྭའི་ས་ཆའི་གནས་བབ་ལ་གཞིགས་ཏེ་ལོ་ལྟར་སློབ་ཕྲུག་མང་པོར་སློབ་འཇུག་བྱེད་མུས་ཡིན། འོན་ཀྱང་ད་ལྟའི་སློབ་འཇུག་གི་བརྒྱུད་རིམ་དེ་མུ་མཐུད་གནས་ཤིང་དཔེ་སྟོན་སློབ་གྲྭ་སྟེང་ཤོད་གཉིས་ཀར་སློབ་ཕྲུག་མ་གཤོངས་བ་དང། སློབ་ཕྲུག་གི་འཚར་ལོངས་ལ་ད་ལྟའི་སློབ་གྲྭའི་ཁོར་ཡུག་གིས་འགོག་རྐྱེན་འཕྲད་ངེས་ཡིན་པས། དཀའ་ངལ་དེ་དག་མྱུར་སེལ་ཐུབ་པར་འཛིན་སྐྱོང་ལ་འབོད་སྐུལ་ཞུ་རྒྱུ་དང། ལྷག་པར་ད་ལྟའི་བཀའ་ཤག་གི་ལས་དོན་ཚང་མའི་ནང་ནས་གལ་ཆེ་ཤོས་སུ་ཤེས་ཡོན་གྱི་གནས་ཚད་ཡར་རྒྱས་གཏོང་རྒྱུ་དེ་ཡིན་པས། མེས་དབོན་གཙུག་ལག་དཔེ་སྟོན་སློབ་གྲྭའི་དགེ་སློབ་ཕ་མ་ཡོངས་ནས་སློབ་གྲྭར་ཕྱི་ནང་གཉིས་ཀའི་མཐུན་རྐྱེན་གང་ལེགས་སྦྱོར་ཐུབ་པའི་རེ་འདུན་ཞུ།

ད་ལན་མགོན་པོ་གང་ཉིད་སྨན་པ་རྣམས་ཀྱིས་སྐུ་ངལ་གསོ་དགོས་པའི་ལམ་སྟོན་ཕེབས་ཏེ་ཨ་རི་ལ་སོགས་ཕྱི་ཟླ་བཅུ་པའི་མཛད་འཕྲིན་གལ་ཆེ་ཁག་ཡོངས་རྫོགས་ཕྱིར་བསྡུ་གནང་འདུག་ནའང། མེས་དབོན་གཙུག་ལག་དཔེ་སྟོན་སློབ་གྲྭར་ལོ་བཅུ་འཁོར་བའི་དུས་དྲན་མཛད་སྒོར་ཆིབས་བསྒྱུར་བཀྲིན་བསྐྱངས་རྒྱུའི་བཀའ་བཞེས་བཟང་པོ་ཕེབས་པ་དེར་སླར་ཡང་འདི་གའི་དགེ་སློབ་དང་ཕ་མ་ཡོངས་ཀྱི་ཚབ་ཞུས་ཏེ་ཐུགས་རྗེ་བླ་ན་མ་མཆིས་ཞུ། མགོན་པོ་གང་ཉིད་སྐུ་ཚེ་སྐལ་བརྒྱར་བརྟན་ཅིང་ཐུགས་ཀྱི་བཞེས་དགོངས་མཐའ་དག་ལྷུན་གྱིས་གྲུབ་པ་དང། བོད་ལ་བདེ་སྐྱིད་ཀྱི་ཉི་མ་མྱུར་དུ་ཤར་བའི་སྨོན་འདུན་གྲངས་མེད་ཞུ། ཞེས་བཀོད་འདུག