བཙན་བྱོལ་བོད་མིའི་བཅའ་ཁྲིམས་སྲུང་སྐྱོབ་བྱེད་པའི་འགན་འཁུར་སུ་ལ་ཡོད་དམ།

ཐུབ་བསྟན་དབྱིག་གཉེན།

གཟའ་འཁོར་སྔོན་མར་སྲིད་སྐྱོང་སེང་གེ་མཆོག་གིས་སྤྱི་འཐུས་ཤར་གླིང་བསྟན་འཛིན་ཟླ་སྒྲོན་ལགས་བཀའ་བློན་ལ་མིང་འདོན་གནང་བ་དང་། དེ་ལ་སྤྱི་འཐུས་ལྷན་ཚོགས་ཀྱིས་མང་མོས་ངོས་ལེན་གནང་། ཆེས་མཐོའི་ཁྲིམས་ཞིབ་ཆེ་མོའི་མདུན་ལས་འཁུར་དང་གསང་རྒྱའི་དམ་བཅའ་བཞག་སྟེ། སྲིད་སྐྱོང་གིས་ཁོང་ལ་ཕྱི་དྲིལ་བཀའ་བློན་གྱི་ལས་འགན་བསྐུར་བ་མ་ཟད། གྲོས་ཚོགས་ནང་ཕྱི་དྲིལ་བཀའ་བློན་གྱི་མཚན་གནས་ཐོག་གྲལ་བཞུགས་གནང་ཡོད།

གློ་བུར་དྷ་རམ་ས་ལའི་གསར་འགོད་པ་ཚོས་ཤར་གླིང་བསྟན་འཛིན་ཟླ་སྒྲོན་ལགས་ལ་བཅའ་ཁྲིམས་དགོངས་དོན་ལོ་ན་སུམ་ཅུ་སོ་ལྔ་ཧྲིལ་པོར་ལོན་དགོས་པ་ཞེས་པའི་ཆ་རྐྱེན་དེ་ཚང་མེད་པའི་གནས་ཚུལ་ཤེས་རྟོགས་བྱུང་མཚམས་སྤྱི་འཐུས་ཚོགས་གཙོ་སྦྲེལ་པོ་དང་སྲིད་སྐྱོང་། བཀའ་བློན་བསྟན་འཛིན་ཟླ་སྒྲོན་ལགས་བཅས་པར་དེའི་སྐོར་ལ་བཅར་འདྲི་ཞུ་རྒྱུའི་འབད་བརྩོན་བྱས་པར་བཀའ་ལན་གསལ་པོ་གནང་མཁན་གཅིག་ཀྱང་བྱུང་མེད། དེ་ནས་ཉིན་རྗེས་མར་སྤྱི་འཐུས་གྲོས་ཚོགས་ཀྱི་ཚོགས་ཐུན་གཉིས་པའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་དམིགས་བསལ་དུས་ཚོད་ཞུས་ཏེ། བཀའ་བློན་ཤར་གླིང་བསྟན་འཛིན་ཟླ་སྒྲོན་ལགས་བཅའ་ཁྲིམས་དགོངས་དོན་བཀའ་བློན་ལ་འོས་པར་ཟླ་བ་གསུམ་གྱི་ལོ་ན་ཚང་མེད་སྟབས་བཀའ་བློན་གྱི་ལས་གནས་ནས་ཕྱིར་འཐེན་གནང་བ་ཡིན་ཞེས་དང་། སྤྱི་འཐུས་གྲོས་ཚོགས་ལ་དབུ་བསྐོར་(གནང་བ)ཞུས་པ་གང་ཡང་མེད་ཅེས་དང་། བཀའ་བློན་གསལ་བསྒྲགས་གནང་བའི་ཉིན་སྔོན་མ་སྟེ་རེས་གཟའ་ཟླ་བའི་ཉིན་བཀའ་བློན་འོས་མི་སོ་སོར་བཀའ་འདྲི་གནང་བར་ཁོང་གིས་སྤྱི་ལོ་ ༡༩༨༡ ལོར་འཁྲུངས་པའི་སྐོར་གསུངས་པ་བཞིན་ལོ་དེ་ནས་རྩིས་ན་ལོ་ན་ ༣༥ ལོན་གྱི་ཡོད་གཤའ་ལ་ངོས་འཛིན་གནང་བ་ཡིན། ད་ཆ་ཟླ་བ་གསུམ་གྱི་ཚང་གི་མི་འདུག་པས་བཀའ་ཤག་ལྷན་རྒྱས་བཀའ་བསྡུར་གནང་ནས་ཁོང་(ཤར་གླིང་བསྟན་འཛིན་ཟླ་སྒྲོན་ལགས)བཀའ་བློན་ནས་ཕྱིར་འཐེན་བྱ་རྒྱུར་བཀའ་ཤག་གིས་ཐག་གཅོད་གནང་བ་ཡིན་ཞེས་གསལ་བཤད་གནང་།

སྲིད་སྐྱོང་བློ་བཟང་སེང་གེ་མཆོག་གིས་གསལ་བཤད་དེ་མ་གནང་གོང་ཙམ་ལ་དབུས་གཙང་སྤྱི་འཐུས་ཟླ་བ་ཕུན་སྐྱིད་ལགས་ཀྱིས་གནད་དོན་དེ་སྲིད་སྐྱོང་གིས་གྲོས་ཚོགས་ལ་དབུ་བསྐོར་བཏང་སོང་ཞེས་དགོངས་འཆར་གསུངས་པ་དང་། དེའི་སྐོར་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་ལགས་ཀྱིས་གྲོས་ཚོགས་ལ་གསལ་བཤད་གནང་བའི་ནང་གྲོས་ཚོགས་ནང་བཀའ་བློན་འོས་མི་བཏོན་སྟངས་དེ་དཔལ་ལྡན་སྲིད་སྐྱོང་གིས་གྲོས་ཚོགས་ལ་དབུ་བསྐོར་བཏང་བར་ངོས་འཛིན་ཞུ་ཐུབ་ཀྱི་མི་འདུག་ཀྱང་། དཔལ་ལྡན་སྲིད་སྐྱོང་གིས་ལས་དོན་གནང་ཕྱོགས་ཚགས་ཚུད་པོ་མ་བྱུང་བ་དང་འཐུས་ཤོར་སོང་བར་ངོས་འཛིན་གནང་གི་ཡོད་ཅེས་གསུངས། གྲོས་ཚོགས་ལ་དབུ་བསྐོར་བཏང་བ་ཞེས་པ་དེ་ངོས་འཛིན་གང་འདྲ་ཞིག་ལ་གནང་དགོས་སམ། གྲོས་ཚོགས་ལ་དྲང་བདེན་མ་ཡིན་པའི་གནས་ཚུལ་གསུངས་ནས་སོ་སོའི་འདོད་ཕྱོགས་དེ་བསྒྲུབ་ཐབས་བྱས་པ་དེ་གྲོས་ཚོགས་དབུ་བསྐོར་བཏང་བ་ཞིག་ལ་ངོས་འཛིན་གནང་དགོས་ཚེ། ཤར་གླིང་བསྟན་འཛིན་ཟླ་སྒྲོན་ལགས་དང་བཀའ་བློན་གཞན་རྣམས་ཀྱི་ལོ་རྒྱུས་དང་། ལྷག་པར་རྒྱལ་དོན་དཔྱ་དངུལ་ལག་དེབ་ཀྱི་ངོ་བཤུས་གྲོས་ཚོགས་ལ་འབུལ་དགོས་སྐོར་གྲོས་ཚོགས་འཐུས་མི་མང་པོས་དགོངས་འཆར་གསུངས་རྗེས་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས་སྔར་ལམ་བྱེད་སྲོལ་བཞིན་གནང་ཡོད་ལུགས་དང་། བཀའ་བློན་འོས་མི་ཚང་མར་བཅའ་ཁྲིམས་ནང་གསལ་བའི་འོས་ཤོས་ཆ་ཚང་ལྡན་ཡོད་ཅེས་ཡང་ཡང་གསུངས་གནང་ཡོད་པ་རེད། ཤར་གླིང་བསྟན་འཛིན་ཟླ་སྒྲོན་ལགས་ལ་བཅའ་ཁྲིམས་ནང་གསལ་པའི་རང་ལོ་སུམ་ཅུ་སོ་ལྔ་ཧྲིལ་པོ་ལོན་པ་ཞེས་པ་ཚང་གི་མེད་པ་དེ་ཡང་རང་ཉིད་ཀྱིས་གསལ་པོ་མཁྱེན་དགོས་པ་དང་། མཁྱེན་པ་དེ་ཡང་བཅའ་ཁྲིམས་དགོངས་དོན་བཀའ་བློན་གྱི་འོས་ཆོས་ཚང་མེད་པ་དེ་ཡང་མཁྱེན་རྟོགས་ཡོད་དགོས་པ་ཞིག་ཡིན།

སྲིད་སྐྱོང་བློ་བཟང་སེང་གེ་མཆོག་གིས་༧གོང་ས་མཆོག་དབུ་བཞུགས་སར་ཆེས་མཐོའི་ཁྲིམས་ཞིབ་པ་ཆེན་མོའི་དྲུང་ནས་ལས་འཁུར་དང་གསང་རྒྱའི་དམ་བཅའ་ཕུལ་པའི་ནང་བཅའ་ཁྲིམས་ལ་ཡིད་ཆེས་གུས་བརྩི་ཞུ་རྒྱུའི་དམ་བཅའ་བཞག་ཡོད་པ་དང་། ཕྱོགས་མཚུངས་ཤར་གླིང་བསྟན་འཛིན་ཟླ་སྒྲོན་ལགས་ཀྱིས་སྤྱི་འཐུས་དམ་འབུལ་སྐབས་བཅའ་ཁྲིམས་ལ་ཡིད་ཆེས་དང་གུས་རྩིས་ཞུ་རྒྱུའི་དམ་བཅའ་བཞག་ཡོད། སྲིད་སྐྱོང་བློ་བཟང་སེང་གེ་ཆོག་གིས་བཀའ་བློན་འོས་མིར་འདེམས་སྒྲུག་གནང་སྐབས་བཅའ་ཁྲིམས་ནང་གསལ་པའི་འོས་ཆོས་ཚང་ཚང་ཡོད་མེད་གཟིགས་མ་ཐུབ་པ་དང་། ཡང་ན་ཐུགས་སྣང་མ་གནང་བ་བཅས་ནི་བཅའ་ཁྲིམས་ལ་གུས་བསྐུར་དང་བརྩི་བསྐུར་མ་ཞུས་པ་ཞིག་རེད། སྤྱི་འཐུས་གྲོས་ཚོགས་སུ་གྲོས་ཚོགས་འཐུས་མི་གཅིག་གིས་སྲིད་སྐྱོང་མཆོག་གིས་བཅའ་ཁྲིམས་ལ་ཐུགས་སྣང་མ་གནང་བའི་དགོངས་འཆར་གསུངས་པ་དེར་སྲིད་སྐྱོང་བློ་བཟང་སེང་གེ་མཆོག་གིས་ལན་འདེབས་གསལ་བཤད་གནང་བའི་ནང་ལོ་ཉི་ཤུ་རྒྱལ་སྤྱི་དང་རྒྱ་གར། ཨ་རི། བཙན་བྱོལ་བོད་མིའི་སྒྲིག་འཛུགས་བཅས་ལ་སློབ་སྦྱོང་གནང་ནས་འབུམ་རམས་པའི་ཕྱག་འཁྱེར་ཐོབ་པ་དེ་དོ་སྣང་ཆུང་བ་མིན་ཚུལ་འགྲེལ་བཤད་གནང་སོང་། འགྲེལ་བཤད་གནང་ཕྱོགས་ཀྱང་ཡ་རབས་བཟང་སྤྱོད་དང་དབུ་ཁྲིད་གཅིག་གིས་ལན་འདེབས་གནང་རྒྱུའི་ས་མཚམས་ལས་བརྒལ་ནས་ལུས་ཀྱི་རྣམ་འགྱུར་དང་ངག་གི་ཚིག་དོན་སོགས་ཉེ་དུས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བསྟན་པ་མགོ་ནས་བཤིག་གི་འདུག་ཅེས་གསུངས་པར་ཐུགས་ཁག་མི་འདུག་སྙམ།

དེ་བཞིན། ཤར་གླིང་བསྟན་འཛིན་ཟླ་སྒྲོན་ལགས་ཀྱིས་སོ་སོའི་ལོ་ན་གང་ཡིན་སོ་སོས་ལེགས་ཤོས་མཁྱེན་དགོས་ཀྱང་། གནད་དོན་དེར་ཐུགས་སྣང་མ་གནང་བ་དང་འགན་འཁུར་མ་བཞེས་པར་དེ་ནི་བཅའ་ཁྲིམས་ལ་ཐུགས་སྣང་དམན་པ་ལས་བྱུང་བ་རེད། འདས་པའི་ལོ་ལྔའི་རིང་ཁོང་སྤྱི་འཐུས་ཀྱི་འགན་འཁུར་བླངས་ཡོད་པས་བཅའ་ཁྲིམས་དང་ཁྲིམས་སྒྲིག་ལ་འགན་འཁུར་ཡོད་པའི་མི་སྣར་གྱུར་ཡོད་པ་དང་། བཀའ་བློན་འོས་མིའི་མཚན་གཞུང་གྲོས་ཚོགས་ལ་མ་ཕུལ་གོང་ལ་བཅའ་ཁྲིམས་ནང་གསལ་བའི་བཀའ་བློན་གྱི་འོས་ཆོས་རྣམས་ལྡན་ཡོད་མེད་མ་མཁྱེན་པ་དེ་ནི་འོས་གཞིར་འདོན་མཁན་དང་འོས་མིར་ངོས་ལེན་ཞུ་མཁན་གཉིས་ཀས་བཅའ་ཁྲིམས་སྲུང་སྐྱོབ་གནང་རྒྱུར་འགན་འཁུར་མ་བཞེས་པའི་མངོན་རྟགས་རེད།

ད་ལན་གྱི་གནས་ཚུལ་དེ་ནི་བཙན་བྱོལ་བོད་མིའི་བཅའ་ཁྲིམས་ནང་གསལ་པའི་དོན་ཚན་རྣམས་འཛིན་སྐྱོང་དང་ཆབ་སྲིད་ཀྱི་དབུ་ཁྲིད་མཐོ་ཤོས་སྲིད་སྐྱོང་གིས་བཅའ་ཁྲིམས་དང་འགལ་མེད་ཕྱག་ལས་གནང་གི་མེད་པའི་དཔེ་མཚོན་གཅིག་ཡིན་པ་དང་། གནས་ཚུལ་དེ་ཉེ་བའི་བོད་མིའི་ཆབ་སྲིད་ལོ་རྒྱུས་ནང་སུས་ཀྱང་གསུབ་ཐབས་མེད་པའི་རྙོག་ཟིང་ཆེ་བའི་གནས་ཚུལ་ཞིག་ཏུ་འགྱུར་རྒྱུ་ཡིན་པ་གདོན་མི་ཟ། དེ་བས་ཛ་དྲག་དང་བློ་ཚབས་བྱེད་དགོས་པ་ཞིག་ནི་བཙན་བྱོལ་བོད་མིའི་བཅའ་ཁྲིམས་སྲུང་སྐྱོབ་བྱེད་ཐུབ་དང་མ་ཐུབ་ཀྱི་དྲི་བ་དེ་རེད། སྤྱི་འཐུས་གྲོས་ཚོགས་ནང་བཀའ་བློན་འོས་མི་རྣམས་ངོ་སྤྲོད་གནང་སྐབས་ལོ་རྒྱུས་ངོ་སྤྲོད་གནང་སྟངས་དེ་ལམ་སྲོལ་རྙིང་པ་གཙོ་བཟུང་གནང་བ་དང་གྲོས་ཚོགས་འཐུས་མི་ཚོས་འོས་མི་ངོ་སྤྲོད་གནང་སྐབས་འོས་ཆོས་མ་ཚང་བའི་སྐོར་གླེང་སློང་གནང་མ་ཐུབ་པ་དེ་རྒྱུ་མཚན་གཅིག་ཡིན་སྲིད་ཀྱང་། སྲིད་སྐྱོང་བློ་བཟང་སེང་གེ་མཆོག་གིས་གནས་ཚུལ་དེའི་སྐོར་གྲོས་ཚོགས་ལ་གསལ་བཤད་གནང་རྗེས་སྤྱི་འཐུས་རྣམས་ཀྱིས་བཅའ་ཁྲིམས་དང་འགལ་བའི་ལས་དོན་གནང་བའི་ཐད་བགྲོ་གླེང་གནང་དགོས་ཀྱང་། སྤྱི་འཐུས་ཟླ་བ་ཕུན་སྐྱིད་ལགས་ཀྱིས་སྲིད་སྐྱོང་གི་གསལ་བཤད་མ་གནང་གོང་གནས་ཚུལ་དེ་སྐོར་གླེང་ཙམ་གནང་བ་དང་། རྗེས་སུ་སྤྱི་འཐུས་ཐུབ་བསྟན་ལུང་རིགས་ལགས་ཀྱིས་གླེང་ཙམ་གནང་བ་ཙམ་ལས་དེ་མིན་སྤྱི་འཐུས་སུས་ཀྱང་དེའི་སྐོར་གླེང་སློང་གནང་མཁན་བྱུང་མེད།

སྲིད་སྐྱོང་བློ་བཟང་སེང་གེ་མཆོག་གིས་ཤར་གླིང་བསྟན་འཛིན་ཟླ་སྒྲོན་ལགས་ལོ་ཚད་མ་ཚང་བའི་རྐྱེན་གྱིས་བཀའ་ཤག་ལྷན་རྒྱས་བཀའ་བསྡུར་གནང་ནས་ཁོང་བཀའ་བློན་ནས་ཕྱིར་འཐེན་གནང་བ་ཡིན་ཞེས་གསུངས་པ་དང་། བཙན་བྱོལ་བོད་མིའི་བཅའ་ཁྲིམས་ནང་བཀའ་བློན་གང་ཞིག་འཕོ་འགྱུར་གཏོང་ཕྱོགས་ལམ་སྟོན་གསལ་པོ་གནང་ཡོད་ནའང་། བཀའ་བློན་ནས་ཕྱིར་འཐེན་ཞེས་པའི་ཐ་སྙད་དེ་བཅའ་ཁྲིམས་ཀྱི་དོན་ཚན་གང་དུའང་གསལ་མེད། དེ་བཞིན་བཀའ་བློན་འོས་གཞིར་འདོན་མཁན་སྲིད་སྐྱོང་ཡིན་པ་ལས་བཀའ་ཤག་མིན་པས་དེར་བཀའ་ཤག་ལ་བཀའ་བསྡུར་གནང་བའི་འགན་དབང་བཅའ་ཁྲིམས་ནས་བསྐུར་མེད་པས་གནང་ཕྱོགས་དེ་དག་བཅའ་ཁྲིམས་དང་མཐུན་པར་གནང་ཡོད་མེད་གྲོས་ཚོགས་ནས་དྲི་བརྩད་ངེས་པར་གནང་དགོས།

སྲིད་སྐྱོང་བློ་བཟང་སེང་གེ་མཆོག་གིས་ལས་དུས་སྔོན་མར་ཡང་བཀའ་བློན་དགོངས་ཞུ་དང་འབྲེལ་བའི་གནད་དོན་རྣམས་སྲིད་སྐྱོང་གི་འགན་འཁུར་མ་བཞེས་པར་རྒྱུན་དུ་བཀའ་ཤག་གི་ཐག་གཅོད་ལ་ཁག་དཀྲི་ཤ་སྟག་གནང་ཡོད། དེ་བཞིན། ཆེས་མཐོའི་ཁྲིམས་ཞིབ་ཁང་གིས་བཀའ་བློན་ཤར་གླིང་ཟླ་སྒྲོན་ལགས་ཀྱིས་དམ་འབུལ་གནང་བ་དེ་ཕྱིར་འཐེན་གནང་བ་ཡིན་ཞེས་ཚོགས་དྲུང་ལས་ཁུངས་བརྒྱུད་སྤྱི་འཐུས་གྲོས་ཚོགས་ལ་ཕྱག་བྲིས་གནང་བྱུང་ཞེས་ཚོགས་གཙོ་མཁན་པོ་བསོད་ནམས་བསྟན་འཕེལ་ལགས་ཀྱིས་གྲོས་ཚོགས་ལ་གསལ་བསྒྲགས་གནང་། ཆེས་མཐོའི་ཁྲིམས་ཞིབ་ཁང་ལ་དམ་འབུལ་ཕྱིར་འཐེན་གནང་རྒྱུའི་འགན་དབང་ཁྲིམས་སྒྲིག་གང་དུ་གསལ་ཡོད། གནས་ཚུལ་བྱུང་རིམ་དེ་དག་ལ་གཞིགས་ན་བཅའ་ཁྲིམས་ཀྱི་འབྲུ་དོན་རྣམས་ཚུལ་བཞིན་ལག་བསྟར་མི་བྱེད་མཁན་བྱུང་ན་ཆེས་མཐོའི་ཁྲིམས་ཞིབ་ཁང་དང་སྤྱི་འཐུས་གྲོས་ཚོགས། འཛིན་སྐྱོང་བཀའ་ཤག་བཅས་ཀྱིས་འགན་སྲུང་བྱེད་ཐུབ་ཀྱི་རེད་སྙམ་པའི་ཡིད་ཆེས་བྱེད་དཀའ་བར་གྱུར། བཙན་བྱོལ་བོད་མིའི་མང་གཙོའི་ཀ་བ་གསུམ་སུས་ཀྱང་བཅའ་ཁྲིམས་སྲུང་སྐྱོབ་བྱེད་མ་ཐུབ་ན་མ་འོངས་པར་བཙན་བྱོལ་བོད་མིའི་མང་གཙོའི་སྒྲོམ་གཞི་དེ་ཁྲིམས་ཀྱི་དབང་བསྒྱུར་ནས་གང་ཟག་གི་དབང་བསྒྱུར་ལ་འགྱུར་རྒྱུ་མགོ་འཛུགས་ཉེན་ཡོད།

ཉིན་ཤས་གོང་སྲིད་སྐྱོང་དམ་འབུལ་མཛད་སྒོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཀའ་སློབ་བསྩལ་གནང་མཛད་པའི་མཇུག་ཏུ་ “ང་ལ་ཏོག་ཙམ་གྲོགས་པོའི་འདུ་ཤེས་ཡོད་ན་ཁ་ལ་ཉན་དགོས་རེད། ༧རྒྱལ་བ་རིན་པོ་ཆེ་ཞེས་མདུན་དུ་ཐུག་པའི་སྐབས་ལ་དགའ་རབ་ཡིན་མདོག་མདོག་བྱས། རྒྱབ་ལོགས་ལ་ཆོས་ལུགས་འཐེན་འཁྱེར་དང་ཆོལ་ཁའི་འཐེན་འཁྱེན་བྱས། སྐྱག་རྫུན་དང་ཧམ་པ་ཏོག་ཙམ་ཏོག་ཙམ་བཤད་བསྡད་པ་ཡིན་ན་ཡག་པོ་ཡོད་མ་རེད། ཤེས་སོང་ངམ” ཞེས་བློ་ཡུལ་ལ་ཤོང་དཀའ་བའི་བཀའ་སློབ་ཤིན་ཏུ་ལྕི་བོ་ཕེབས་པ་དེ་བཙན་བྱོལ་བོད་མིའི་དབུ་ཁྲིད་རྣམས་ཀྱིས་ཚིག་ཙམ་མིན་པར་བཀའ་སློབ་ཀྱི་དགོངས་དོན་ཇི་བཞིན་མངོན་ལྐོག་རྒྱབ་མདུན་མེད་པར་དོན་ལ་ལག་ལེན་འགེལ་མ་ཐུབ་ཚེ་རིམ་བཞིན་གཞུང་དམངས་བར་ཡིད་ཆེས་ལ་དོ་ཕོག་འགྲོ་ཉེན་མི་འདུག་གམ།