རྒྱ་གཞུང་གིས་བོད་བརྒྱུད་ནང་བསྟན་གྱི་སྤྲུལ་སྐུ་འཚོལ་བཤེར་མ་ལག་ཟེར་བ་དེའི་ནང་དུ་དགེ་རྒྱས་རིན་པོ་ཆེའི་མཚན་མེད་པར་བརྟེན་ཁོང་སྤྲུལ་སྐུ་རྫུན་མ་ཡིན་ལུགས་བསྒྲགས་འདུག
ཟླ་འདིའི་ཕྱི་ཚེས་ ༢༡ ཉིན་རྒྱ་ནག་ཝེ་པའོ་དྲ་བའི་ཐོག བོད་བརྒྱུད་ནང་བསྟན་གྱི་སྤྲུལ་སྐུ་འཚོལ་བཤེར་མ་ལག་ཟེར་བ་དེ་འདི་ལོའི་ཕྱི་ཟླ་ ༡ ཚེས་ ༡༨ ཉིན་ཤར་གཏོང་བྱས་པ་ནས་བཟུང་སྟེ། སྤྲུལ་སྐུ་རྫུན་མ་མང་པོ་གོ་མེད་ཚོར་མེད་དུ་གྱུར་ཡོད་ཀྱང་། ཉེ་སྔོན་རྒྱ་ནག་བོད་ལྗོངས་དྲ་བ་ཞེས་པའི་སྤྲུལ་སྐུ་འཚོལ་བཤེར་མ་ལག་ཤར་གཏོང་ཁང་ལ་ཁ་པར་ཞིག་འབྱོར་ཏེ། སྟོད་མངའ་རིས་དགེ་རྒྱས་དགོན་གྱི་སྤྲུལ་སྐུ་དགེ་རྒྱས་རིན་པོ་ཆེས་(格杰仁波切)ས་གནས་དེ་རུ་སྒེར་གཉེར་འཛིན་གྲྭ་ཞིག་བཙུགས་ཏེ། ཐེངས་རེའི་ཟུར་འཁྲིད་ལ་རྒྱ་སྒོར་ཁྲི་ ༣༠ ལྷག་ལེན་གྱི་ཡོད་སྐོར་བརྗོད་དེ་གཏུག་བཤེར་བྱས་ཡོད་པ་དང་། འབྲེལ་ཡོད་ནས་བོད་བརྒྱུད་ནང་བསྟན་གྱི་སྤྲུལ་སྐུ་འཚོལ་བཤེར་མ་ལག་ནང་དགེ་རྒྱས་རིན་པོ་ཆེའི་མཚན་འཚོལ་ཞིབ་བྱེད་སྐབས་རྙེད་མེད་སྟབས། ཁོང་སྤྲུལ་སྐུ་རྫུན་མ་ཞིག་ཡིན་པ་ར་འཕྲོད་ཡོད་སྐོར་དང་། དགེ་རྒྱས་རིན་པོ་ཆེ་ཞེས་པའི་མཚན་དེ་ཝེ་པའོ་ནང་འཚོལ་སྐབས། དགེ་རྒྱས་རིན་པོ་ཆེ་དང་དགེ་རྒྱས་སྤྲུལ་སྐུ་རིན་པོ་ཆེ་ཞེས་པའི་མཚན་ཐོག་ནས་ཝེ་པའོ་ནང་ཁ་བྱང་གཉིས་ཡོད་ཅིང་། དགེ་རྒྱས་རིན་པོ་ཆེ་ཞེས་པ་དེའི་ཐོག་རྗེས་འཇུག་པ་ ༨༡༦༠༨ དང་། དགེ་རྒྱས་སྤྲུལ་སྐུ་རིན་པོ་ཆེ་ཞེས་པ་དེར་རྗེས་འཇུག་པ་ ༡༢༢༣༩ བྱུང་ཡོད་སྐོར་སོགས་བརྗོད་འདུག
དེ་རིང་རྒྱ་ནག་ལྷོ་རྒྱུད་ཀྱི་ཞོགས་པའི་ཆ་འཕྲིན་དྲ་བའི་ཐོག དགེ་རྒྱས་རིན་པོ་ཆེས་དྲ་ཐོག་ནས་མི་གྲངས་ས་ཡ་མང་པོའི་སེམས་བཀུག་ཡོད་པ་དང་། དེ་སྔོན་ཁོང་གིས་ཆེད་སྒྲིག་བརྙན་འཁོར་བཏོན་གནང་ཡོད་སྐོར་དང་། ཁོང་གིས་ཁོང་རང་སྐྱབས་རྗེ་གླིང་རིན་པོ་ཆེའི་ཡང་སྲིད་ཡིན་ལུགས་བརྗོད་དེ། ས་གནས་སུ་ཡང་སྲིད་སྐོར་ལ་ཟུར་འཁྲིད་འཛིན་གྲྭ་བཙུགས་ཏེ་རྒྱ་སྒོར་ཁྲི་ ༣༠ རེ་བླངས་ཡོད་སྐོར་སོགས་བསྒྲགས་འདུག
གོང་གི་གནས་ཚུལ་དེའི་ཐད་རྒྱ་ནག་ནང་བསྟན་མཐུན་ཚོགས་ཀྱིས། བོད་བརྒྱུད་ནང་བསྟན་གྱི་སྤྲུལ་སྐུ་འཚོལ་བཤེར་མ་ལག་ཟེར་བ་དེའི་ནང་ཁྱོན་སྤྲུལ་སྐུ་ ༡༣༠༧ ཡི་མཚན་དང་དགོན་པ། སྤྲུལ་སྐུའི་དཔང་ཨང་། ར་སྤྲོད་ཨང་གྲངས་སོགས་དྲིལ་བསྒྲགས་བྱས་ཏེ་ལས་གཞི་གང་འཚམ་འགྲུབ་ཚར་ཡོད་པ་དང་། འཚོལ་བཤེར་མ་ལག་དེའི་ནང་བོད་རང་སྐྱོང་ལྗོངས་དང་སི་ཁྲོན། ཡུན་ནན། ཀན་སུའུ། མཚོ་སྔོན། དེ་བཞིན་ནང་སོག་དང་ཤིན་ཅང་། ལོ་ལིན་སོགས་ཀྱི་སྤྲུལ་སྐུའི་མཚན་གཞུང་ཚུད་ཡོད་པ་དང་། སྤྲུལ་སྐུ་ངོ་མ་ཡིན་པ་ཚང་མའི་གནས་ཚུལ་མ་ལག་དེའི་ནང་ནས་འཚོལ་བཤེར་ཐུབ་ཀྱི་ཡོད་སྟབས། དགེ་རྒྱས་རིན་པོ་ཆེའི་མཚན་འཚོལ་བཤེར་མ་ལག་ནང་ནས་མ་རྙེད་པ་དེས་ཁོ་སྤྲུལ་རྫུན་ཞིག་ཡིན་པ་གསལ་བཤད་བྱས་ཡོད་སྐོར་བརྗོད་འདུག
ཡང་ཝེ་པའོ་ཐོག་གི་གནས་ཚུལ་དེའི་ནང་དུ། འདས་ལོར་རྒྱ་ནག་གི་གློག་བརྙན་འཁྲབ་སྟོན་པ་ཀྲང་ཐེ་ལིན་ཁྲི་འདོན་བྱས་པའི་གནད་དོན་སོགས་རྒྱ་ནག་ནང་སྤྲུལ་རྫུན་གྱི་གནད་དོན་རིམ་པར་བྱུང་རྗེས། འབྲེལ་ཡོད་ནས་རྒྱ་ནག་ཝེ་པའོ་དྲ་བའི་ནང་སྤྲུལ་སྐུ་ཞེས་པའི་ཚིག་དེ་འཚོལ་བཤེར་བྱེད་སྐབས། སྤྲུལ་སྐུ་ཞེས་པའི་མིང་བེད་སྤྱོད་བྱེད་མཁན་ཁྱོན་ ༤༦༦༤ རྙེད་ཡོད་པ་དང་། དེ་བཞིན་རིན་པོ་ཆེ་ཞེས་པའི་མིང་བེད་སྤྱོད་བྱེད་མཁན་༣༡༧༡ རྙེད་ཡོད་ལ། དེ་ཚོ་མང་ཆེ་བ་སྤྲུལ་སྐུ་འཚོལ་བཤེར་མ་ལག་ནང་མེད་པའི་སྤྲུལ་སྐུ་རྫུན་མ་ཡིན་སྐོར་སོགས་བརྗོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་པདྨ་ཆོས་སྒྲོན་ལགས་སུ། རྒྱ་ནག་གཞུང་གིས་བེད་སྤྱོད་གཏོང་བཞིན་པའི་སྤྲུལ་སྐུ་འཚོལ་བཤེར་མ་ལག་ཟེར་བ་དེས། མ་འོངས་པར་བོད་བརྒྱུད་ནང་བསྟན་གྱི་བླ་སྤྲུལ་རྣམ་པའི་མཛད་འཕྲིན་དང་ནང་པའི་བསྟན་པ་འཛིན་སྐྱོང་སྤེལ་གསུམ་ལ་གནོད་སྐྱོན་ཅི་ཡོང་སྐོར་དྲིས་པར། རྒྱ་ནག་གཞུང་གིས་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་གྱི་སྒྲིག་གཞི་དང་སྤྲུལ་སྐུ་འཚོལ་བཤེར་མ་ལག་ཟེར་བ་དེ་གཉིས་མ་འོངས་པར་མུ་མཐུད་བོད་པའི་སྤྱི་ཚོགས་ནང་ལག་བསྟར་བྱས་ཚེ། ངའི་ངོས་ནས་ག་རེ་བརྗོད་འདོད་ཡོད་ཟེར་ན། དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ངོས་ནས་བཤད་ན་ཐད་ཀར་ཆོས་དད་རང་མོས་ལ་རྡོག་རོལ་བཏང་བ་ཞིག་ཆགས་ཀྱི་ཡོད་ལ། སྤྲུལ་སྐུའི་ཡང་སྲིད་ངོས་འཛིན་གྱི་སྒྲིག་གཞི་དང་སྤྲུལ་སྐུ་འཚོལ་བཤེར་མ་ལག་ཟེར་བ་དེ་གཉིས་ཀྱི་རྒྱབ་ལོག་ལ་ཆབ་སྲིད་ཀྱི་དམིགས་ཡུལ་ངེས་ཅན་ཡོད་པ་ཞིག་དང་། ཆབ་སྲིད་ཀྱི་དགོས་མཁོ་ཞིག་གི་དབང་གིས་ཡིག་ཆ་དེ་ཚོ་བཟོས་ནས་མ་འོངས་པར་བོད་སྲོལ་རྒྱུན་གྱི་སྤྲུལ་སྐུའི་ཡང་སྲིད་ངོས་འཛིན་ལམ་ལུགས་ལ་ཐེ་གཏོགས་བྱེད་པའི་བསམ་བློ་ཡོད་པ་རེད། དེ་ནི་བོད་སྲོལ་རྒྱུན་གྱི་སྤྲུལ་སྐུའི་ཡང་སྲིད་ངོས་འཛིན་ལམ་ལུགས་ལ་རྡོག་རོལ་བཏང་བ་ཞིག་དང་། སྤྱི་ཡོངས་ནས་ཆོས་དད་རང་མོས་ལ་རྡོག་རོལ་བཏང་བ་ཞིག་ཆགས་ཡོད་པ་རེད། ཅེས་བརྗོད་བྱུང་།
གསར་འགོད་པ། པདྨ་མཚོ།
