རྒྱ་ནག་གི་ས་གནས་དྲག་ཆས་ཉེན་རྟོག་རུ་ཁག་གིས་ཝུ་ཁན་མི་མང་གི་ངོ་རྒོལ་ལས་འགུལ་ལ་དྲག་གནོན་བྱས་ཏེ་ཡུལ་མི་ ༡༣ འཛིན་བཟུང་བྱས་ཡོད་འདུག
ཧོང་ཀོང་རང་དབང་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཞོགས་པའི་ཐོ་རངས་ཆུ་ཚོད་ ༤ ཙམ་ལ་རྒྱ་ནག་ལྷོ་རྒྱུད་ཀོང་ཏུང་ཞིང་ཆེན་གྱི་ཝུ་ཁན་ (Wukan) གྲོང་གསེབ་ཏུ། ས་གནས་རྒྱ་ནག་དྲག་ཆས་ཉེན་རྟོག་རུ་ཁག་གིས་གློ་བུར་དུ་ཝུ་ཁན་ཡུལ་མིའི་སྡོད་ཁང་ནང་གློ་བུར་སྔོག་བཤེར་བྱས་ཏེ། དེ་སྔ་ས་གནས་དེའི་མི་མང་ཚོས་གཞུང་ལ་ངོ་རྒོལ་རབས་དང་རིམ་པ་བྱེད་སྐབས་ཀྱི་སྣེ་ཁྲིད་དོགས་ཡོད་མི་སྣ་ ༡༣ འཛིན་བཟུང་བྱས་པ་མ་ཟད། མི་མང་ཐོག་འགྱིག་མདེལ་དང་དུག་རླངས་སོགས་སྤྱད་དེ་དྲག་གནོན་བྱེད་སྐབས། མི་མང་གིས་རྡོ་དང་སོ་ཕག་སོགས་འཕངས་ཏེ་དྲག་ཆས་ཉེན་རྟོག་པར་འཐབ་འཛིང་བྱས་ཡོད་འདུག
རྒྱལ་སྤྱིའི་ཉེས་ཡངས་ཚོགས་པའི་རྒྱ་ནག་གི་ཆབ་སྲིད་ཞིབ་འཇུག་པ་ཕོན་ (Poon) ཟེར་བ་ཞིག་གིས། ཐེངས་འདིའི་ཝུ་ཁན་ས་གནས་མི་མང་དང་དྲག་ཆས་ཉེན་རྟོག་བར་གྱི་འཁྲུག་འཛིང་སྐོར་ལ་རྒྱུས་ལོན་གསལ་བོ་བྱེད་ཐབས་མེད་ནའང་། དྲག་ཆས་ཉེན་རྟོགས་པས་ས་གནས་ལས་འགུལ་བ་མང་པོ་འཛིན་བཟུང་བྱས་ཡོད་པ་དང་། རྒྱ་ནག་གི་དབང་འཛིན་དཔོན་རིགས་ཚོས་ཝུ་ཁན་ས་གནས་མི་མང་གི་ངོ་རྒོལ་ལས་འགུལ་ལ་དྲག་གནོན་བྱེད་དོན་གཙོ་བོ་ཝུ་ཁན་ས་གནས་ཀྱི་ས་ཞིང་བདག་དབང་གི་རྩོད་གླེང་དང་འབྲེལ་བའི་ས་གནས་གྲོང་གསེབ་གཞན་དག་ནང་དུའང་ངོ་རྒོལ་ལས་འགུལ་སྤེལ་སྲིད་པར་དོགས་གཞི་བྱེད་བཞིན་ཡོད་སྐོར་བརྗོད་འདུག
ལུ་ཧྥིང་ (Lufeng) སྤྱི་བདེ་ཁང་གིས་བསྒྲགས་གཏམ་ཞིག་སྤེལ་བའི་ནང་། ཝུ་ཁན་ས་གནས་ཀྱི་གནད་དོན་ཞི་འཇགས་གཏོང་བཞིན་ཡོད་པས། ལུ་ཧྥིང་ཉེན་རྟོག་ཁང་གིས་རྒྱལ་ཁབ་ཀྱི་བཅའ་ཁྲིམས་གཞིར་བཟུང་གིས་ཝུ་ཁན་ས་གནས་སུ་བྱུང་བའི་གནས་ཚུལ་རིགས་འུད་སྒྲོག་བྱེད་མཁན་དང་ཁྲིམས་འགལ་གྱི་ལས་འགུལ་སྤེལ་མཁན་ཚང་མ་འཛིན་བཟུང་བྱེད་རྒྱུ་ཡིན་སྐོར་བཀོད་འདུག
གནས་ཚུལ་ལྟར་ན། ཝུ་ཁན་ས་གནས་སུ་འབྱུང་བཞིན་པའི་དཀའ་རྙོག་འདིའི་ཐད་རྒྱལ་སྟེང་དོ་སྣང་དང་གླེང་སློང་ཤུགས་ཆེན་བྱེད་བཞིན་ཡོད་པ་དང་། གནད་དོན་འདིའི་འབྱུང་རྐྱེན་གཙོ་བོ་ནི། ཕྱི་ལོ་ ༢༠༡༡ ལོའི་ཟླ་ ༩ ཚེས་ ༢༡ ནས་ ༢༣ བར་ས་གནས་སྲིད་གཞུང་གི་དཔོན་རིགས་ཚོས་མི་མང་གི་ས་ཞིང་མང་པོ་བཙན་འཕྲོག་བྱས་ཏེ་ས་ཁང་འཛུགས་སྐྲུན་ཁེ་ལས་སྡེ་ཁག་ལ་བཙོང་བར་བརྟེན་ནས། ས་གནས་མི་མང་སྟོང་ཕྲག་མང་པོ་ས་གནས་སྲིད་གཞུང་དང་ཉེན་རྟོག་ཁང་། བཟོ་ལས་ཐོན་སྐྱེད་ཁང་སོགས་ཀྱི་སྒོ་འགྲམ་དུ་འདུ་འཛོམས་གྱིས། “ང་ཚོའི་ས་ཞིང་ཕྱིར་སྤྲོད། ང་ཚོར་ས་ཞིང་རྨོ་འདེབས་བྱེད་དུ་འཇུག་རོགས།” ཞེས་འབོད་ཚིག་བསྒྲགས་ཏེ་ངོ་རྒོལ་བྱས་ཡོད།
ཕྱིས་སུ་གོང་རིམ་ནས་ཝུ་ཁན་ས་གནས་མི་མང་གིས་ས་གནས་མགོ་ཁྲིད་འོས་འདེམས་བྱས་ཆོག་ལུགས་བཤད་ཀྱང་། ད་ལོའི་ཕྱི་ཟླ་ ༦ པའི་ཚེས་ ༡༨ ཉིན་དྲག་ཆས་ཉེན་རྟོག་རུ་ཁག་གིས་ཝུ་ཁན་ས་གནས་ཡུལ་མི་ཚོས་འོས་འདེམས་བྱས་པའི་མགོ་ཁྲིད་ལེན་ཙུ་ལུན་ (Lin Zuluan) གྱིས་གཞུང་འབྲེལ་མིན་པའི་ལས་མི་ཚོའི་ལག་ནས་ལྐོག་རྔན་བླངས་པའི་ཉེས་འཛུགས་བྱས་ཏེ། ཁོ་རང་ཁྱིམ་ནས་འཛིན་བཟུང་བཙན་ཁྲིད་བྱས་པ་དང་། ཕྱི་ཟླ་ ༨ ཚེས་ ༨ ཉིན་ཀོང་ཏུང་ཧྥོ་ཧྲན་ (Foshan) འབྲིང་རིམ་མི་མང་ཁྲིམས་ཁང་གིས་ལེན་ཙུ་ལུན་ལ་ལོ་ ༣ གྱི་ཁྲིམས་ཐག་བཅད་པ་དང་། སྐབས་དེར་ཝུ་ཁན་ས་གནས་མི་མང་གིས་ཉིན་ ༤ རིང་ཟས་བཅད་ངོ་རྒོལ་བྱས་པ་མ་ཟད། ལེན་ཙུ་ལུན་འཛིན་བཟུང་བྱས་པ་ནས་ད་ལྟའི་བར་ཉིན་གྲངས་ ༨༥ རིང་ལེན་ཙུ་ལུན་མྱུར་དུ་ཀློད་གྲོལ་གཏོང་དགོས་པའི་ངོ་རྒོལ་སྐད་འབོད་བྱས་ཡོད་པ་བཅས་སོགས་ཡིན་འདུག
གསར་འགོད་པ། པདྨ་རྒྱལ།
