༧གོང་ས་མཆོག་བཞུཊ་སྒར་དུ་ཞབས་སོར་བཀོད།

༧གོང་ས་མཆོག་གི་ཡུ་རོབ་ཁུལ་གྱི་ཟླ་ཕྱེད་རིང་གི་མཛད་འཕྲིན་རྣམས་ལེགས་པར་གྲུབ་སྟེ་དེ་རིང་སྔ་དྲོར་བཞུགས་སྒར་ཕོ་བྲང་དུ་ཞབས་སོར་བདེ་བར་བཀོད་སོང་།

དེ་རིང་སྔ་དྲོའི་ཆུ་ཚོད་ ༩།༣༠ སྟེང་༧གོང་ས་མཆོག་ཡུ་རོབ་རྒྱལ་ཁབ་ཕོ་ལན་ཌིའི་གྲོང་ཁྱེར་ཝ་རའོ་ཁི་ལོ་ (Wrocław) ནས་གཞུང་དང་གཞུང་འབྲེལ་མིན་པའི་གནད་ཡོད་མི་སྣ་ཁག་ཅིག་གིས་ཕེབས་སྐྱེལ་ཐོག་གྲོང་ཁྱེར་དེའི་གནམ་ཐང་བརྒྱུད་བཞུགས་སྒར་ཕོ་བྲང་དུ་ཞབས་སོར་བཀོད་ཡོད་པ་རེད།

ཟླ་འདིའི་ཕྱི་ཚེས་ ༦ ཉིན་གྱི་ཉིན་གུང་༧གོང་ས་མཆོག་བཞུགས་སྒར་ཕོ་བྲང་ནས་ཆིབས་ཐོན་གྱིས་ཡུ་རོབ་རྒྱལ་ཁབ་སྦེལ་ཇེམ་དང་ཧྥ་རན་སི། ཕོ་ལན་ཌི་བཅས་ཀྱི་མཛད་འཕྲིན་བསྐྱངས་ཡོད་པ་ལྟར། ཕྱི་ཟླ་ ༩ ཚེས་ ༩ ནས་ ༡༡ བར་སྦེལ་ཇེམ་རྒྱལ་ས་བྷར་སིལ་ (Brussels) གྲོང་ཁྱེར་གྱི་བྷོ་ཛར་སྒྱུ་རྩལ་ལྟེ་གནས་ཁང་ (Bozar Center for Fine Art) དུ“སེམས་དང་སྲོག་གི་ཞིབ་འཇུག་ཁང”གི་ཡུ་རོབ་ཡན་ལག་ཁང་གི་གོ་སྒྲིག་འོག་ཉིན་གྲངས་གཉིས་དང་ཕྱེད་ཀའི་རིང་ཚན་རིག་དང་དཔལ་འབྱོར། ཆོས་ལུགས་བཅས་ཀྱི་མཁས་ལས་མི་སྣ་དང་ལྷན་དུ“ནུས་པ་དང་གཅེས་སྐྱོང”ཞེས་པའི་བརྗོད་གཞིའི་ཐོག་སེམས་དང་སྲོག་གི་མཁས་པའི་བགྲོ་གླེང་གི་ཚོགས་མགོན་དུ་ཆིབས་སྒྱུར་བསྐྱངས་ཡོད་པ་རེད།

ཕྱི་ཚེས་ ༡༥ ཉིན་གྱི་སྔ་དྲོར་༧གོང་ས་མཆོག་ཧྥ་རན་སིའི་གྲོང་ཁྱེར་སི་ཊར་སི་སྦག་ (Strasbourg) ནང་ཡོད་པའི་ཡུ་རོབ་གྲོས་ཚོགས་ནང་ཆིབས་སྒྱུར་བསྐྱངས་ཏེ་བཀའ་སློབ་ལམ་སྟོན་གནང་ཡོད་པ་དང་། སྐབས་དེར་ཡུ་རོབ་གྲོས་ཚོགས་ཀྱི་ཚོགས་གཙོ་མར་ཊེན་ཤཱུལ་ཛི་ (Martin Schulz) མཆོག་གཙོས་པའི་ཡུ་རོབ་ལྷན་ཚོགས་ཀྱི་སྤྱི་ཁྱབ་དྲུང་ཆེ་ཐོར་བྷན་རྗག་ལན་ཌི་ (Thorbjørn Jagland) མཆོག་དང་། ཡུ་རོབ་ལྷན་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་འགན་འཛིན་ནེལ་སི་མུ་ཛེ་ནེ་ཁི་སི་ (Nils Muižnieks) མཆོག་བཅས་ཀྱིས་ཕེབས་བསུ་ཞུ་ཡོད་འདུག

ཕྱི་ཚེས་ ༡༧ ཉིན་༧གོང་ས་མཆོག་གིས་ཧྥ་རན་སའི་སི་ཊར་སི་སྦག་ (Strasbourg) གྲོང་ཁྱེར་དུ་བོད་ཀྱི་ནང་ཆོས་མཐུན་ཚོགས་ཀྱིས་གོ་སྒྲིག་བྱས་པ་ལྟར། ཁུལ་དེར་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་ཆོས་བསྩལ་བ་དང་། ཕྱི་ཚེས་ ༡༨ ཉིན་གྱི་སྔ་དྲོར་སྤྱན་རས་གཟིགས་ཀྱི་བཀའ་དབང་བསྩལ། ཉིན་རྒྱབ་མགོན་པོ་གང་ཉིད་མཆོག་གིས་ཆོས་ལུགས་ཀྱི་མཚམས་ལས་འདས་པའི་བཟང་སྤྱོད་ (Ethics Beyond Religion) ཅེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བསྩལ་ཡོད་པ་རེད།

ཕྱི་ཚེས་ ༡༩ ཉིན་ཡུ་རོབ་རྒྱལ་ཁབ་ཕོ་ལན་ཌིའི་གྲོང་ཁྱེར་ཝ་རའོ་ཁི་ལོ་ (Wrocław) ནང་ཆིབས་སྒྱུར་བསྐྱངས་ཡོད་པ་དང་། ཕྱི་ཚེས་ ༢༠ ཉིན་ཁུལ་དེའི་ལོ་རྒྱུས་དངོས་མཛོད་བསྟི་གནས་ཁང་དུ་ (Depot History Centre) དུ་འགྲེམས་སྟོན་གཟིགས་སྒོར་མཛད་པ་དང་སྦྲགས། བསྟི་གནས་ཁང་དེར“བཟོད་བསྲན་དང་འདུམ་འགྲིག” (Forgiveness and Reconciliation) ཅེས་པའི་བརྗོད་གཞིའི་ཐོག་བཀའ་སློབ་བསྩལ་ཡོད།

ཕྱི་ཚེས་ ༢༡ ཉིན་གྱི་སྔ་དྲོར་ཕོ་ལན་ཌིར་གནས་སྡོད་བོད་མི་དང་སོག་པོ་མི་གྲངས་ ༣༠ ལྷག་ལ་མཇལ་ཁ་དང་བཀའ་སློབ་བསྩལ་རྗེས། ཉིན་དེའི་རྒྱལ་སྤྱིའི་ཞི་བདེ་ཉིན་མོ་སྲུང་གཙི་དང་སྟབས་བསྟུན། ༧གོང་ས་མཆོག་གྲོང་ཁྱེར་ཝ་རའོ་ཁི་ལོ་ (Wrocław) ནང་རྟེན་གཞི་བྱས་པའི་ཞི་བདེ་མཆོད་ཁང་ཆེན་མོའི་ (Church of Peace) དུ་ཆིབས་སྒྱུར་བསྐྱངས་ཡོད་པ་དང་། སྐབས་དེར་༧གོང་ས་མཆོག་གིས་ཞི་བདེའི་འབོད་སྐུལ་གྱི་ཞུ་སྙན་ལ་མཚན་རྟགས་བཀོད་པ་དང་སྦྲགས། འཛམ་གླིང་ཆོས་ལུགས་མཐུན་སྒྲིལ་དང་ཞི་བདེ་བསྐྲུན་ཐབས་སྐོར་ལ་བཀའ་སློབ་བསྩལ།

ཕྱི་ཚེས་ ༢༢ ཉིན་ཉིན་མགོན་པོ་གང་ཉིད་མཆོག་གི་བཞུགས་གནས་མགྲོན་ཁང་དུ་༧གོང་ས་མཆོག་དང་ཁོང་གི་གྲོགས་པོ་ཌ་སེ་མོན་ཌེ་ཀྲུ་ཀྲུ (TuTu) མཆོག་རྣམ་གཉིས་ཀྱིས་ལྷན་དུ་ལྗགས་རྩོམ་མཛད་པའི་ཕྱག་དེབ་<<བདེ་སྐྱིད་>><< The Book of Joy >>ཅེས་པ་དབུ་འབྱེད་དང་འབྲེལ་ཏེ། ཨ་རི་དང་དབྱིན་ཡུལ་གྱི་བརྒྱུད་ལམ་ཁག་གཉིས་ཀྱི་བཅར་འདྲིར་བཀའ་ལན་མཛད་ཡོད་པ་རེད།

ཕྱི་ཟླ་ ༡༠ ཚེས་ ༣ ནས་ ༦ བར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་ཐའེ་ཝན་གྱི་དད་ལྡན་ཆོས་ཞུ་བ་ཁག་གཅིག་གིས་་ཇི་ལྟར་གསོལ་འདེབས་ཞུས་དོན་ལྟར་འཕགས་པ་ལྷས་མཛད་པའི་དབུ་མ་བཞི་བརྒྱ་བའི་གསུང་ཆོས་བསྩལ་རྒྱུ་ཡིན་འདུག

 གསར་འགོད་པ། པདྨ་རྒྱལ་གྱིས་བསྡུ་སྒྲིག་བྱས།