འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་སྡུག་ཤོས་ཤིག་འགྲོ་བ་མིའི་ཐོབ་ཐང་གི་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་ནང་བསྐོས་པར་ངེས་པར་དུ་བསྐྱར་ཞིབ་དགོས།
ཁ་སང་ཕྱི་ཚེས་ ༧ ཉིན་བོད་མིའི་སྒྲིག་འཛུགས་ཀྱི་མགྲིན་ཚབ་པ་ཨརྱ་ཚེ་དབང་རྒྱལ་པོ་ལགས་ཀྱིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་ནང་རྒྱ་ནག་གི་སྐུ་ཚབ་བསྐོས་པའི་ཐད། རྒྱལ་ཚོགས་ཀྱིས་ངེས་པར་དུ་བསྐྱར་ཞིབ་གནང་དགོས་པའི་རེ་སྐུལ་ཞུས་འདུག་ལ། ཨ་རིའི་གྲོས་ཚོགས་འཐུས་མི་ཁག་ཅིག་དང་ཐའེ་ཝན་གཞུང་གིས་ཀྱང་རྒྱ་ནག་གོ་གནས་དེར་འོས་འཚམ་མིན་པ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་དོན་ལྷན་ཚོགས་ནང་རྒྱ་ནག་གི་བྱེད་སྒོ་ཁག་ལ་རྟོག་ཞིབ་ནན་མོ་བྱས་ཏེ། རྒྱ་ནག་གཞུང་གིས་དབང་ཆ་ལོག་སྤྱོད་བྱེད་པར་སྔོན་འགོག་བྱེད་དགོས་སྐོར་སོགས་བརྗོད་འདུག
དེ་ཡང་བོད་མིའི་སྒྲིག་འཛུགས་ཀྱི་མགྲིན་ཚབ་པ་དང་དྲིལ་བསྒྲགས་དྲུང་ཆེ་ཨརྱ་ཚེ་དབང་རྒྱལ་པོ་ལགས་ཀྱིས། རྒྱ་ནག་གཞུང་ལ་མཚོན་ན། འགྲོ་བ་མིའི་ཐོབ་ཐང་བརྡལ་བཤིག་གཏོང་མཁན་གཙོ་བོ་ཡིན་པ་རྒྱལ་སྤྱིའི་ཁྱོན་དུ་ཡོངས་གྲགས་རེད། བོད་ནང་ལ་མཚོན་ན། འགྲོ་བ་མིའི་ཐོབ་ཐང་རྟོག་ཞིབ་ཚན་པ་ཁག་གིས་ལོ་ལྔ་བསྟུད་མར་སྙན་ཐོ་བཏོན་པའི་ནང་དུ་འཛམ་གླིང་ནང་དམ་དྲག་ཤུགས་ཆེ་ཤོས་ཡོད་པའི་ས་ཁུལ་དུ་ངོས་འཛིན་བྱས་ཡོད། དྲ་རྒྱའི་རང་དབང་ཐོག་ལ་མཚོན་ནའང་འཛམ་གླིང་ནང་དམ་དྲག་ཆེ་ཤོས་བྱེད་མཁན་རྒྱ་ནག་དམར་པོའི་སྲིད་གཞུང་དེ་ཉིད་ཆགས་ཡོད། དེར་བརྟེན་འཛམ་གླིང་མཉམ་འབྲེལ་རྒྱལ་ཚོགས་ཀྱིས་ཐེངས་འདིར་རྒྱ་ནག་བསྐོ་གཞག་གནང་བ་དེར་སླར་ཡང་དགོངས་བཞེས་ཀྱིས་ཐག་གཅོད་དེར་བསྐྱར་ཞིབ་ངེས་པར་དུ་གནང་རོགས་གནང་ཞུ་རྒྱུ་ཡིན། ཞེས་གསུངས་འདུག
ཡང་ཁོང་གིས། རྒྱ་ནག་དམར་པོའི་སྲིད་གཞུང་ནི་འཛམ་གླིང་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་ཐོག་དམ་དྲག་ཤུགས་ཆེ་ཤོས་བྱེད་མཁན་དང་། བསམ་ཚུལ་བརྗེ་ལེན་དང་སྨྲ་བརྗོད་རང་དབང་བརྡལ་བཤིག་གཏོང་མཁན་གྱི་རྒྱལ་ཁབ་གཙོ་བོ་ཞིག་ཡིན་པ་ཡོངས་གྲགས་རེད། དེ་ལྟར་ཡིན་བཞིན་དུ་ཐེངས་འདིར་རྒྱལ་སྤྱིའི་སྒྲིག་འཛུགས་ཀྱིས་རྒྱ་ནག་ལམ་སྟོན་ཚོགས་ཆུང་གི་ཚོགས་མིའི་ཁོངས་སུ་བསྐོ་གཞག་བྱས་ཡོད། བྱེད་བབ་དེས་རང་དབང་དང་དྲང་བདེན་ལ་དགའ་བའི་རྒྱལ་སྤྱིའི་སྤྱི་ཚོགས་ནང་བརྡ་ལན་ལོག་པ་ཞིག་བཏང་བ་རེད། ལྷག་པར་རྒྱལ་སྤྱིའི་ཁྱོན་དུ་བཟང་ངན་ཤན་འབྱེད་ཆ་མ་འཚལ་བའི་གནས་སྟངས་ཆགས་རྒྱུ་མ་ཟད། རྒྱལ་སྤྱིའི་ཁྱོན་དུ་འགྲོ་བ་མིའི་ཐོབ་ཐང་གི་གནས་སྟངས་ཐོག་འགྲེལ་བརྗོད་བྱེད་སྟངས་ལའང་འགྲེལ་བརྗོད་ལོག་པ་དང་། ཤུགས་རྐྱེན་ངན་པ་ཞིག་ཐེབས་རྒྱུ་ཡིན་སྐོར་གསུངས་ཡོད་པ་རེད་ལ། བོད་མི་དང་རྒྱ་མི་རིགས། ཡུ་གུར་བ་དང་སོག་རིགས། ཧོང་ཀོང་མི་མང་བཅས་ཀྱི་རེ་ལྟོས་བཅོལ་ཡུལ་རྒྱལ་ཚོགས་ནང་། རྒྱ་ནག་ནི་དེའི་སྒྲིག་འཛུགས་སྲུང་མིར་བསྐོས་པ་དེ་ནི་སྤྱང་ཀི་ལུག་རྫིར་བསྐོས་པའི་དཔེ་ཡིན་སྐོར་གསུངས་ཡོད་པ་རེད།
རྒྱལ་ཚོགས་ཀྱི་ཐག་གཅོད་དེ་དང་འབྲེལ་ནས་ཟླ་འདིའི་ཕྱི་ཚེས་ ༦ ཉིན། ཨ་རིའི་གྲོས་ཚོགས་གོང་མའི་འཐུས་མི་ ༧ གྱིས་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཨན་ཊོ་ནཱོ་གྷ་ཊིར་ (Antonio Guterres) ཡི་མིང་ཐོག་ཏུ། རྒྱ་ནག་འགྲོ་བ་མིའི་ཐོབ་ཐང་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་ནས་ཕུད་དགོས་པའི་ཞུ་ཡིག་ཞིག་བྲིས་ཡོད་པའི་ནང་། རྒྱལ་ཚོགས་ཐོག་མར་འཛུགས་སྐབས་ཀྱི་དམིགས་ཡུལ་ནི་འགྲོ་བ་མིའི་རིགས་ལ་དཀའ་རྙོག་ཚད་མེད་བྱུང་ཡོད་པ་དེ་སླར་ཡང་མི་འབྱུང་ཆེད་ཡིན་པ་དང་། རྒྱ་ནག་གཞུང་ནི་རྒྱལ་ནང་དང་འཛམ་གླིང་ཕྱོགས་ཡོངས་སུ་འགྲོ་བ་མིའི་ཐོབ་ཐང་རྡོལ་རོལ་གཏོང་མཁན་སྡུག་ཤོས་ཀྱི་གྲས་ཤིག་ཡིན་པའི་དུས་སྐབས་འདིར། རྒྱ་ནག་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་དོན་ལྷན་ཚོགས་ཀྱི་ལས་དོན་ལ་ཤུགས་རྐྱེན་སྤྲོད་ཐུབ་པའི་གོ་གནས་དེར་མི་འོས་པ་ཞིག་ཡིན་པས། གྲོས་ཚོགས་འཐུས་མི་དེ་དག་གིས་སྤྱི་ཁྱབ་དྲུང་ཆེ་ཡིས་རང་དབང་དང་ཆེ་མཐོང་གི་རིན་ཐང་ལ་གོང་བཀུར་བྱས་ཏེ་རྒྱ་ནག་གོི་གནས་དེ་ནས་ཕུད་དགོས་པ་དང་། རྒྱལ་ཚོགས་ཀྱི་ཚོགས་མི་རྒྱལ་ཁབ་ཚོས་རྒྱ་ནག་དམར་ཤོག་ཚོགས་པས་འགྲོ་བ་མིའི་ཐོབ་ཐང་ལ་རྡོལ་རོལ་ཤུགས་ཆེན་གཏོང་བར་སྐྱོན་བརྗོད་བྱེད་པའི་འབོད་སྐུལ་བྱེད་ཀྱི་ཡོད་སྐོར་བཀོད་འདུག
ཡང་ཞུ་ཡིག་དེའི་ནང་། ཞུ་ཡིག་དེ་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་ནང་རྒྱ་ནག་བསྐོར་པར་བློ་ཕམ་བྱུང་བ་དང་ཐག་གཅོད་དེར་ངོ་རྒོལ་མཚོན་ཆེད་བྲིས་པ་ཡིན་པ་དང་། རྒྱ་ནག་ལ་དབང་ཚད་དེ་སྤྲད་པ་ནི་དུས་རྒྱུན་རྒྱ་ནག་གཞུང་གིས་དོན་མེད་འཛིན་བཟུང་བྱས་པ་དང་། གར་སོང་ཆ་མེད་དུ་གྱུར་བ། དེ་བཞིན་སྨྲ་བརྗོད་རང་དབང་དང་ཆོས་དད་རང་དབང་སོགས་ལ་རྡོག་རོལ་གཏོང་བཞིན་པ་དང་འབྲེལ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་རྟོག་ཞིབ་པ་ ༡༧ ལྷག་འདེམས་བྱེད་རྒྱུར་གོ་སྐབས་སྤྲད་པ་ཞིག་ཡིན་སྐོར་དང་། རྒྱ་ནག་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་ནད་ཡམས་གསར་པ་དེ་འགོག་རྒོལ་ཁྲོད། རྒྱ་ནག་གཞུང་གིས་རྒྱ་ནང་གི་སྨན་པ་ཚོར་དོན་མེད་ཉེས་འཛུགས་བྱས་ཏེ་སྨྲ་བརྗོད་རང་དབང་རྡོག་རོལ་བཏང་ཡོད་པ་དང་། རྒྱ་ནག་གཞུང་གིས་ཏོག་དབྱིབས་ནད་ཡམས་དང་འབྲེལ་བའི་གནས་ཚུལ་ཕྱི་གསལ་ནང་གསལ་བྱེད་ཀྱི་མེད་སྟབས། ནད་ཡམས་དེ་ད་ལྟ་རྒྱལ་སྤྱིའི་ཛ་དྲག་གི་ནད་ཡམས་ཞིག་ཏུ་གྱུར་ཡོད་པ་དཔེ་མཚོན་དུ་བཀོད་དེ། རྒྱ་ནག་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་ནང་མི་འོས་ཚུལ་བཀོད་འདུག
དེ་བཞིན་ཟླ་འདིའི་ཕྱི་ཚེས་ ༧ ཉིན་ཐའེ་ཝན་གྱི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཇོ་ནེ་ཨོ་ (Joanne Ou) ཡིས། འགྲོ་བ་མིའི་ཐོབ་ཐང་རྡོག་རོལ་གཏོང་བའི་གནད་དོན་ཆེན་པོ་ཡོད་པའི་རྒྱ་ནག་གཞུང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་ནང་བསྐོ་བཞག་བྱས་ཏེ། རྒྱལ་ཁབ་གཞན་གྱི་འགྲོ་བ་མིའི་ཐོབ་ཐང་གི་གནས་སྟངས་ལ་བཀོད་ཁྱབ་གཏོང་བ་ནི་ཕྱོགས་འགལ་ཡིན་པ་དང་། པེ་ཅིན་གྱིས་འབད་བརྩོན་བྱས་ཏེ་རྒྱལ་ཚོགས་ཀྱི་སྒྲིག་འཛུགས་ནང་ཤུགས་རྐྱེན་ཆེ་རུ་གཏོང་བ་དང་། རྒྱ་ནག་གི་ཁྱད་ཆོས་དང་ལྡན་པའི་འགྲོ་བ་མིའི་ཐོབ་ཐང་དྲིལ་བསྒྲགས་བྱེད་བཞིན་པ་དེ་ཡིས་དམངས་གཙོ་དང་གོ་ལའི་སྤྱི་ཚོགས་ལ་ཉེན་བརྡ་གཏོང་གི་ཡོད་སྐོར་བརྗོད་འདུག་ལ། འགྲོ་བ་མིའི་ཐོབ་ཐང་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་ནང་རྒྱ་ནག་བསྐོས་པའི་ཐག་གཅོད་དེ་ཡིས། རྒྱ་ནག་གཞུང་གིས་རྒྱལ་ཚོགས་ཀྱི་སྒྲིག་འཛུགས་ལ་ཇི་ཙམ་སྟངས་འཛིན་བྱེད་ཀྱི་ཡོད་པ་མཚོན་གྱི་ཡོད་པས། གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་དོན་ལྷན་ཚོགས་ནང་རྒྱ་ནག་གི་བྱེད་སྒོ་ཁག་ལ་རྟོག་ཞིབ་ནན་མོ་བྱས་ཏེ། རྒྱ་ནག་གཞུང་གིས་དབང་ཚད་དེ་སྤྱད་ནས་དབང་ཆ་ལོག་སྤྱོད་བྱེད་པར་སྔོན་འགོག་བྱེད་དགོས་སྐོར་སོགས་བརྗོད་འདུག
གསར་འགོད་པ། ཀླུ་མགོན་ཐར།
