ཨ་རིའི་འོས་བསྡུ་ལྷན་ཚོགས་ཀྱིས་དམངས་གཙོ་ཚོགས་པའི་འོས་མི་རྗོ་བྷའེ་ཌན་མཆོག་ལ་ཨ་རིའི་སྐབས་ ༤༦ པའི་སྲིད་འཛིན་རྒྱལ་ཁ་ཐོབ་ཡོད་པ་ཡོངས་བསྒྲགས་གནང་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་ཨ་རིའི་འོས་བསྡུ་ལྷན་ཚོགས་གྱིས། ཕྱི་ལོ་ ༢༠༢༠ ལོའི་ཨ་རིའི་སྲིད་འཛིན་གྱི་རྒྱལ་ཡོངས་འོས་བསྡུའི་ཁྲོད། སྤྱི་མཐུན་ཚོགས་པའི་འོས་མི་སྲིད་འཛིན་ཊོམ་ཕུ་མཆོག་ལ་འོས་བསྡུ་ལྷན་ཚོགས་ཀྱི་འོས་གྲངས་ ༢༣༢ དང་དམངས་གཙོ་ཚོགས་པའི་འོས་མི་རྗོ་བྷའེ་ཌན་མཆོག་ལ་འོས་གྲངས་ ༣༠༦ ཐོབ་སྟེ། སྐབས་ ༤༦ པའི་ཨ་རིའི་སྲིད་འཛིན་ཆགས་པ་གཞུང་འབྲེལ་གསལ་བསྒྲགས་གནང་འདུག
ཨ་རིའི་རྒྱལ་ཡོངས་འོས་བསྡུ་ལྷན་ཚོགས་ཀྱིས་གཞུང་འབྲེལ་གསལ་བསྒྲགས་གནང་བ་དང་བསྟུན་བདམས་ཐོན་སྲིད་འཛིན་རྗོ་བྷའེ་ཌན་མཆོག་གིས། རྒྱལ་ཁབ་འདིའི་ནང་གནའ་སྔ་མོ་ནས་དམངས་གཙོའི་མེ་ལྕེ་སྤར་བ་རེད། ད་ལྟ་ཏོག་དབྱིབས་གཉན་རིམས་དང་དབང་ཆ་ལོག་སྤྱོད་ཀྱིས་དམངས་གཙོ་མེ་འདི་གསོད་ཐུབ་ཀྱི་མེད་ལ། ཨ་རིའི་ཆབ་སྲིད་པའི་དབང་ཆ་ནི་མི་མང་གིས་ཁོ་ཚོར་སྤྲད་པ་ཞིག་ཡིན་པ་ལས་ཁོ་ཚོས་བླངས་པ་ཞིག་མིན། ཞེས་སྲིད་འཛིན་ཊོམ་ཕུར་ཟུར་ཟ་བྱས་ཡོད་པ་དང་། ད་རེས་རྒྱལ་ཡོངས་འོས་འདེམས་ལྷན་ཚོགས་ཀྱི་ཐག་གཅོད་དེས་རྗོ་བྷའེ་ཌན་ལགས་དངོས་སུ་ཨ་རིའི་བདམས་ཐོན་སྲིད་འཛིན་ཆགས་པ་དང་སྲིད་འཛིན་ཊོམ་ཕུར་དབང་ཆ་རྩིས་སྤྲོད་དགོས་པའི་བརྡ་ལན་ཞིག་ཀྱང་ཆགས་ཡོད་འདུག
འདི་ལོའི་ཨ་རིའི་སྲིད་འཛིན་གྱི་རྒྱལ་ཡོངས་འོས་བསྡུའི་ཁྲོད་སྲིད་འཛིན་གཞོན་པ་ཟུར་པ་རྗོ་བྷའེ་ཌན་མཆོག་ལ་རྒྱལ་ཁ་འཐོབ་པ་དེ་སྔ་ནས་ཤེས་རྟོགས་བྱུང་ཡོད་ཀྱང་། ལས་ཐོག་སྲིད་འཛིན་ཊོམ་ཕུ་མཆོག་ནས་འོས་བསྡུའི་བརྒྱུད་རིམ་དྲང་པོ་མ་བྱུང་སྟབས་མཇུག་འབྲས་ཁས་ལེན་བྱེད་རྒྱུ་མིན་པ་དང་ཁྲིམས་གཏུགས་བྱས་པའི་རིགས་སོགས་བྱུང་ཡོད་ནའང་། ཨ་རིའི་མངའ་སྡེ་རིམ་པའི་ཁྲིམས་ཁང་ཁག་ཅིག་གིས་ཁྲིམས་གཏུགས་ཕྱིར་འཐེན་དང་རྩིས་མེད་བཏང་ཡོད་པ་རེད།
ཨ་རིའི་འོས་བསྡུ་ལྷན་ཚོགས་ནི་ཨ་རིའི་བཅའ་ཁྲིམས་ལྟར། མངའ་སྡེ་རེ་ནས་གྲོས་ཚོགས་འཐུས་མིའི་ཞབས་འགྱག་གི་གྲངས་རིམ་ལྟར་བསྐོ་གཞག་བྱེད་སྲོལ་ཡོད་པ་དང་། ཨ་རིའི་མངའ་སྡེ་ ༥༠ ནང་འོས་བསྡུ་ལྷན་ཚོགས་ལ་ཁྱོན་འཐུས་མི་ ༥༣༨ དང་སྲིད་འཛིན་གྱི་འོས་བསྡུའི་རྒྱལ་ཁ་འཐོབ་པར་འཐུས་མི་ ༢༧༠ ཡི་རྒྱབ་སྐྱོར་འཐོབ་དགོས་ཀྱི་ཡོད་པ་ཞིག་ཡིན་འདུག
འདི་ལོའི་ཨ་རིའི་སྲིད་འཛིན་འོས་བསྡུའི་ཁྲོད་རྗོ་བྷའེ་ཌན་མཆོག་ལ་མི་མང་ ༨༡༢༨༢༣༧༦ གི་འོས་ཐོབ་སྟེ། འོས་གྲངས་ཀྱི་བརྒྱ་ཆའི་ ༥༡།༣ ཟིན་པ་དང་། སྲིད་འཛིན་ཊོམ་ཕུ་མཆོག་ལ་མི་མང་ ༧༤༢༢༢༥༧༦ འོས་ཐོབ་སྟེ་འོས་གྲངས་བརྒྱ་ཆའི་ ༤༦།༩ ཡོད་ནའང་། བདམས་ཐོན་སྲིད་འཛིན་རྗོ་བྷའེ་ཌན་མཆོག་ལ་འོས་གྲངས་ས་ཡ་ ༧ ལྷག་མང་བ་ཐོབ་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
