སེམས་དང་སྲོག་གི་ལྟེ་གནས་ཁང་གི་གོ་ལའི་གནམ་གཤིས་ཚ་དྲོད་ཀྱི་ཛ་དྲག་དཀའ་ངལ་སེལ་ཐབས་ཀྱི་བཀའ་མོལ་བགྲོ་གླེང་སྟེང་༧གོང་ས་མཆོག་གི་དབུས་པའི་འཛམ་གླིང་གི་གནད་ཡོད་མི་སྣ་ཁག་ཅིག་མཉམ་ཞུགས་གནང་གི་འདུག
ཕྱི་ལོ་ ༢༠༢༡ ལོའི་ཟླ་ ༡ ཚེས་ ༩ དང་ ༡༠ བཅས་ཉིན་གཉིས་རིང་། སེམས་དང་སྲོག་གི་ལྟེ་གནས་ཁང་གི་གོ་སྒྲིག་འོག ༧གོང་ས་རྒྱལ་བ་རིན་པོ་ཆེ་མཆོག་གིས་སའི་གོ་ལའི་གནམ་གཤིས་ཚ་དྲོད་སྲུང་སྐྱོབ་དང་ཁོར་ཡུག་ལས་འགུལ་བ་གྲགས་ཆེན་གཞོན་ནུ་མ་གྷེ་རེ་ཊ་ཐན་བྷག་ (Greta Thunberg) ལགས་དང་། དེ་བཞིན་དེང་དུས་ཚན་རིག་པ་ཁག་ཅིག་དང་ལྷན་དུ་ཐད་གཏོང་བརྒྱུད། གོ་ལའི་གནམ་གཤིས་ཚ་དྲོད་ཀྱི་ཛ་དྲག་གནས་སྟངས་དང་དེའི་དཀའ་ངལ་སེལ་ཐབས་སོགས་ཀྱི་སྐོར་ནས་བཀའ་སློབ་བསྩལ་གཏན་འཁེལ་ཡོད་པ་རེད།
སེམས་དང་སྲོག་གི་ལྟེ་གནས་ཁང་གི་དྲ་རྒྱ་ལྟར་ན། ༧གོང་ས་མཆོག་དང་ཁོར་ཡུག་ལས་འགུལ་བ། དེ་བཞིན་དེང་དུས་ཚན་རིག་པ་གྲགས་ཅན་ཁག་ཅིག་གིས། གནམ་གཤིས་ཚ་དྲོད་ཀྱི་ཛ་དྲག་དཀའ་སེལ་ཐབས་ཞེས་པའི་བརྗོད་གཞིའི་ཐོག་ཕན་ཚུན་བར་བཀའ་མོལ་གནང་རྒྱུ་དང་། ཐད་གཏོང་བཀའ་མོལ་བགྲོ་གླེང་སྐབས་བྱུང་བའི་བཀའ་སློབ་རྣམས་གློག་བརྙན་འཁྲབ་སྟོན་པ་རི་ཆར་ཌི་གྷེར་ (Richard Gere) ལགས་ཀྱིས་གཙོ་སྐྱོང་གནང་བའི་གོ་ལའི་གནམ་གཤིས་འགྱུར་ལྡོག་དང་འབྲེལ་བའི་སློབ་གསོའི་གློག་བརྙན་ཞིག་གི་ནང་གཏོང་འཆར་ཡོད་འདུག་ལ། བཀའ་མོལ་བགྲོ་གླེང་དེ་ཨ་རིའི་ཝེལ་སི་ལེ་ (Wellesley) མཐོ་སློབ་ཀྱི་འགན་འཛིན་ཌའེ་ནཱ་ཝལ་ཤི་ (Diana Chapman Walsh) ལགས་ཀྱིས་གཙོ་སྐྱོང་གནང་རྒྱུ་ཡིན་པ་རེད།
བཀའ་མོལ་བགྲོ་གླེང་ནང་༧གོང་ས་མཆོག་གི་དབུས་པའི་ཁོར་ཡུག་ལས་འགུལ་བ་གྷེ་རེ་ཊ་ཐན་བྷག་ལགས་དང་འཛམ་གླིང་ནང་སྙན་གྲགས་ཆེ་བའི་མི་སྣ་ཁག་ཅིག་འཛོམས་ཡོད་པ་དང་། དེའི་ཁྲོད་ཕྱི་ལོ་ ༢༠༠༧ ལོར་ནོར་སྦེལ་ཞི་བདེ་གཟེངས་རྟགས་མཉམ་བཞེས་གནང་མཁན་དང་གོ་ལའི་གནམ་གཤིས་ཚ་དྲོད་སྲུང་སྐྱོབ་ཐོག་གི་རྩོམ་པ་པོ་གྲགས་ཅན་ཝེ་ལིམ་མཱོ་ཝའོ་ (William Moomaw) ལགས་དང་། གོ་ལའི་བྱང་སྣེ་ (Arctic) ཐོག་གི་སྔོན་ཐོན་ཚན་རིག་པ་སའོ་ཟན་ནཱ་ཊ་ལེ་(Susan Natali) ལགས། དེ་བཞིན། ༧གོང་ས་མཆོག་གི་སྐུའི་གསུང་བསྒྱུར་བ་ཐུབ་བསྟན་སྦྱིན་པ་ལགས་དང་སེམས་དང་སྲོག་གི་ལྟེ་གནས་ཁང་གི་འགན་འཛིན་སའོ་ཟན་བྷའོ་ཝོ་ (Susan Bauer-Wu) ལགས་བཅས་ཡོད་པ་རེད།
ཡོང་རྒྱུ་བསྡད་པའི་བཀའ་མོལ་བགྲོ་གླེང་དེ་ནི་སེམས་དང་སྲོག་གི་ལྟེ་གནས་ཁང་གིས། གོ་ལའི་གནམ་གཤིས་ཚ་དྲོད་ཀྱི་ཛ་དྲག་གནས་སྟངས་དང་དེའི་དཀའ་ངལ་སེལ་ཐབས་སོགས་ལ་དམིགས་པ་ཞིག་ཡིན་པ་དང་། ལྟེ་གནས་ཁང་དེས་མུ་མཐུད་གོ་ལའི་གནམ་གཤིས་ཚ་དྲོད་ཀྱི་དཀའ་ངལ་སེལ་ཐབས་དང་འབྲེལ། ཕྱི་ལོ་ ༢༠༢༡ ཟླ་ ༦ ཚེས་ ༡༢ ཉིན་དྲ་ལམ་བརྒྱུད་གོ་ལའི་གནམ་གཤིས་ཚ་དྲོད་དང་མི་དང་སའི་གོ་ལའི་འབྲེལ་བ་ཞེས་པའི་བརྗོད་གཞིའི་ཐོག་ཚོགས་འདུ་ཞིག་ཀྱང་འཚོག་འཆར་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
