དབྱིན་ཡུལ་གཙོ་བོར་གྱུར་བའི་ཡུ་རོབ་རྒྱལ་ཁབ་ཁག་ནང་དུ་ཏོག་དབྱིབས་གཉན་རིམས་འགོས་ཁྱབ་བཀག་སྡོམ་ཤུགས་ཆེ་རུ་གཏོང་བཞིན་ཡོད་པས་དུས་ཐོག་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་འགྲོ་ཐུབ་མིན་ཐོག་བློ་འཚབ་དང་བཅས་དུས་ཡུན་ཕྱིར་འགྱངས་དགོས་པ་སོགས་ཀྱི་བསམ་ཚུལ་ཡོང་བཞིན་འདུག
དབྱིན་ཡུལ་གཙོས་པའི་ཡུ་རོབ་ཀྱི་རྒྱལ་ཁབ་འགའ་ཤས་ནང་ཏོག་དབྱིབས་གཉན་རིམས་འགོས་ཁྱབ་ཤུགས་ཆེ་རུ་འགྲོ་བཞིན་ཡོད་པ་དང་བསྟུན། རྒྱལ་ཡོངས་སུ་སྒོ་རྒྱ་བསྡམས་ཏེ་མི་མང་གི་འགྲུལ་བཞུད་སོགས་ལ་བཀག་སྡོམ་བྱེད་ཀྱི་ཡོད་པར་བརྟེན། ཕྱི་ལོ་ ༢༠༢༡ ཟླ་དང་པོའི་ཚེས་ ༣ ཉིན་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་བྱ་ཐུབ་མིན་དང་། དེ་བཞིན་རྒྱ་གར་གཙོས་པའི་འཛམ་གླིང་ཡུལ་གྲུ་ཁག་ཏུ་གཉན་རིམས་འགོས་ཁྱབ་སྔོན་འགོ་ཆེད་རང་ཁྱིམ་དང་། སྒྲིག་འཛུགས་ཀྱི་ཟུར་བཀག་ཁང་དུ་ཡོད་པའི་བོད་མི་རྣམས་ལ་བཅའ་ཁྲིམས་ཀྱིས་བསྩལ་བའི་འོས་བསྡུའི་ཐོབ་ཐང་མ་ཤོར་བ་ཇི་ལྟར་གནང་རྒྱུ་ཡིན་མིན་བཅས་ཀྱི་ཐོག་ལ་བློ་འཚབ་ཡོང་བཞིན་འདུག
དབྱིན་ཡུལ་ནང་ཏོག་དབྱིབས་གཉན་རིམས་ཤུགས་ཆེར་འགོས་ཁྱབ་འགྲོ་ཡི་ཡོད་པ་དང་བསྟུན། དབྱིན་ཡུལ་གཞུང་གིས་ཟླ་འདིའི་ཕྱི་ཚེས་ ༢༠ ཉིན་རྒྱལ་ཡོངས་སུ་སྒོ་རྒྱ་བསྡམས་པའི་བཀའ་རྒྱ་བཏང་ཡོད་ཅིང་། རྒྱལ་ས་ལོན་ཌོན་དང་། ལྷོ་བརྒྱུད་ཀྱི་ས་ཁུལ་ཕལ་ཆེ་བ་རིམ་པ་བཞི་པའི་(Tier 4) བཀག་སྡོམ་ས་ཁུལ་དུ་བཅུག་སྟེ། ས་གནས་དེ་དག་ནང་དགོས་མཁོ་ཅན་གྱི་ཅ་དངོས་ཚོང་ར་ཕུད་ཚོང་ཁང་དང་ཟ་ཁང་སོགས་ཚང་མ་སྒོ་བརྒྱབ་ཡོད་པ་མ་ཟད། མང་ཚོགས་འདུ་འཛོམས་རིགས་མི་ཆོག་པར་ཁྱིམ་སྡོད་བྱ་དགོས་པའི་བཀའ་རྒྱ་བསྒྲགས་ཡོད་འདུག་ལ། དེ་བཞིན་ཡུ་རོབ་ཀྱི་རྒྱལ་ཁབ་སྦེལ་ཇམ་དང་། ཧོ་ལན་ཌི་བཅས་སུའང་གནས་སྟངས་ཛ་དྲག་ཡིན་པར་བརྟེན། བོད་མིའི་ཁྲོད་འདི་ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་དེ་དུས་ཐོག་གནང་ཐུབ་མིན་ཐད་བློ་འཚབ་བྱེད་ཀྱི་འདུག
འདི་གས་གསར་འགོད་པས་ཞལ་པར་བརྒྱུད་དབྱིན་ཡུལ་གྱི་ས་གནས་འོས་བསྡུའི་འགན་འཛིན་ལས་རོགས་ཚེ་རིང་མཚོ་མོ་ལགས་སུ། ས་གནས་སུ་སྔོན་འགྲོའི་འོས་བསྡུར་གྲ་སྒྲིག་གི་གནས་སྟངས་ག་འདྲ་ཡིན་པ་དང་། དབུས་འོས་བསྡུ་ལས་ཁང་ནས་ལམ་སྟོན་ཇི་ཕེབས་སྐོར་བཀའ་འདྲི་ཞུས་པར་ཁོང་མོས། ཉེ་ལམ་དབྱིན་ཡུལ་ནང་གཉན་རིམས་འགོས་ཁྱབ་ཤུགས་ཆེར་འགྲོ་བཞིན་པའི་རྐྱེན་གྱིས། གནས་ཡུལ་གཞུང་གིས་ཚོང་ཁང་དང་ཟ་ཁང་སོགས་ཆ་ཚང་སྒོ་བརྒྱབ་དགོས་པ་དང་། མང་ཚོགས་ཀྱི་འགྲུལ་བཞུད་བཀག་སྡོམ་བྱས་ཏེ་གནད་དོན་གལ་ཆེན་ཡིན་ན་མ་གཏོགས་རང་ཁྱིམ་གྱི་ཕྱི་ལོགས་སུ་བསྐྱོད་མི་ཆོག་པའི་བཀའ་རྒྱ་བཏང་ཡོད་པ་དང་། བཀག་སྡོམ་གྱི་གནས་སྟངས་འདིའི་འོག་བོད་མི་ཚོས་འོས་ལྡུག་རྒྱུར་དཀའ་ལས་ཡོད་སྟབས། ཁ་སང་ཕྱི་ཚེས་ ༢༡ ཉིན་ས་གནས་ཀྱི་འོས་བསྡུའི་ཚོགས་མི་རྣམས་འཛོམས་ཏེ། ད་ལྟའི་གནས་སྟངས་ལ་གདོང་ལེན་གྱིས་འོས་བསྡུ་ཚུགས་ཐུབ་ཐབས་ཇི་ཡོད་སྐོར་ནས་གྲོས་བསྡུར་བྱས་རྗེས། དབུས་འོས་བསྡུ་ལས་ཁང་ལ་གནས་སྟངས་ཆ་ཚང་སྙན་གསེང་ཞུས་ཏེ་བཀའ་ལན་ལ་སྒུག་མུས་ཡིན་སྐོར་བརྗོད་བྱུང་། སྤྱིར་དབྱིན་ཡུལ་དོན་གཅོད་ཁང་གི་ཁྱབ་ཁོངས་སུ་རྒྱལ་ཁབ་ ༡༡ ཡོད་པའི་ཁྲོད་ནས་འདི་ལོར་བོད་རིགས་སྤྱི་མཐུན་ཚོགས་པ་ཡོད་སའི་རྒྱལ་ཁབ་ ༦ ནང་འོས་བསྡུའི་ས་གནས་བཀོད་སྒྲིག་གནང་གི་ཡོད་འདུག
འདི་གའི་གསར་འགོད་པས་དབུས་འོས་བསྡུ་ལས་ཁང་གི་འགན་འཛིན་དཔེ་ཟུར་དབང་འདུས་ཚེ་རིང་ལགས་སུ། གོང་འཁོད་གནད་དོན་ཐོག་དབུས་འོས་བསྡུ་ལས་ཁང་ནས་ཐག་གཅོད་ཇི་ལྟར་གནང་རྩིས་ཡོད་མེད་བཀའ་འདྲི་ཞུ་ཐབས་བྱས་ཀྱང་། ད་ལྟ་ཧ་ཅང་བྲེལ་བ་ཡིན་པས་བཀའ་ལན་གནང་བའི་ཆུ་ཚོད་མེད་སྐོར་གསུངས་བྱུང་།
ད་ལྟ་སུད་སིར་གནས་སྡོད་ཡུ་རོབ་དང་ཨ་ཧྤེ་རི་ཁའི་ཁུལ་གྱི་སྤྱི་འཐུས་ལས་ཐོག་ཟམ་མདོ་བྱམས་པ་ཚེ་རིང་ལགས་ཀྱིས་འདི་གའི་གསར་འགོད་པར། སུད་སི་ནི་ཡུ་རོབ་ས་ཁུལ་ནང་ནས་འོས་ལྡུག་མཁན་ཕོན་ཆེ་ཤོས་དེ་ཡིན་པ་དང་། ད་ལྟའི་ཆར་སུད་སི་རྒྱལ་ཡོངས་ནང་ལས་ཀ་དང་ཉོ་ཚོང་བྱེད་དུ་བསྐྱོད་ཆོག་གི་ཡོད་སྟབས། རྒྱལ་ཁབ་ཀྱི་ཁྲིམས་སྒྲིག་གི་ཆ་ནས་འོས་བསྡུ་ཚུགས་རྒྱུར་བཀག་སྡོམ་གང་ཡང་མེད་པ་དང་། འབྱུང་འགྱུར་ཡང་དཀའ་ངལ་ཆེན་པོ་འཕྲད་སྲིད་པའི་གནས་སྟངས་མེད་པ་ལྟ་བུ་ཡིན་སྐོར་དང་། ཁོང་གིས་ཤེས་རྟོགས་བྱུང་བ་ལྟར་ན། ད་ལྟའི་ཆར་དབྱིན་ཡུལ་དང་། ཨི་ཊ་ལི། ཧོ་ལན་ཌི། སྦེལ་ཇམ་བཅས་ནང་དཀའ་ངལ་ཡོད་པ་ལྟ་བུ་ཡིན་སྟབས། ཡུ་རོབ་ཀྱི་དོན་གཅོད་རྣམ་པ་དང་ས་གནས་འབྲེལ་མཐུད་པ་བཅས་ཀྱིས་གོ་བསྡུར་བརྒྱུད་ས་གནས་ཀྱི་གནས་སྟངས་ལ་དཔག་པའི་འོས་བསྡུ་ཚུགས་རྒྱུའི་ཐབས་ལམ་འདྲ་མིན་བཙལ་དང་འཚོལ་མུས་ཡིན་སྐོར་འགྲེལ་བརྗོད་གནང་བྱུང་ལ། ཁོང་སྒེར་གྱི་བསམ་ཚུལ་ལྟར་ན། ད་ལྟའི་ཆར་མང་ཚོགས་ཀྱིས་སྤྱི་ཚོགས་རྒྱང་བཀྱེད་སོགས་སྔོན་འགོག་ཐབས་ཇུས་རྣམས་ལག་བསྟར་བྱས་པ་བརྒྱུད་ནས་སྔོན་འགྲོའི་འོས་བསྡུ་ཚུགས་མ་ཐུབ་པའི་གནས་སྟངས་མེད་སྐོར་འགྲེལ་བརྗོད་གནང་བྱུང་།
གཞན་ཡང་། ཡུ་རོབ་ཀྱི་བོད་མི་མང་སྤྱི་འཐུས་ལས་ཐོག་བཀྲས་མཐོང་དབང་པོ་ལགས་ཀྱིས་འདི་གའི་གསར་འགོད་པར། གནས་སྟངས་ལ་འགྱུར་བ་འགྲོ་བཞིན་པའི་སྒང་ལ་ཡིན་སྟབས། ད་ལྟ་ཛ་དྲག་མེད་ཀྱང་བདུན་ཕྲག་རེ་གཉིས་རྗེས་གང་འདྲ་ཆགས་མིན་སུས་ཀྱང་བཤད་ཚོད་ཐིག་གི་མེད་སྟབས། དབུས་འོས་བསྡུ་ལས་ཁང་ངོས་ནས་གུ་ཡངས་ཙམ་བྱས་ཏེ་སྤྱི་འཐུས་རྒྱུན་ལས་དང་གྲོས་བསྡུར་བྱེད་ཀྱིན་བྱེད་ཀྱིན་ད་ཐེངས་དམིགས་བསལ་གྱིས་འོས་བསྡུ་དེ་ཕྱི་ཚེས་ ༣ ནས་མགོ་བཙུགས་ཏེ། བདུན་ཕྲག་གཉིས་གསུམ་གྱི་དུས་ཚོད་འཕར་མ་སྤྲོད་དགོས་པ་ལས། ཉིན་གཅིག་ནང་འོས་བསྡུ་བྱ་རྒྱུ་དེ་ཁག་པོ་ཆགས་ཡོད་སྐོར་འགྲེལ་བརྗོད་གནང་བྱུང་།
དེ་བཞིན། ད་ལྟ་སྦེལ་ཇམ་གྱི་རྒྱལ་ས་སྦིལ་ཛིལ་དུ་གནས་སྡོད་སྤྱི་འཐུས་འོས་མི་བོད་མི་བཀྲ་ཤིས་བདེ་ལེགས་ལགས་ཀྱིས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། སྤྱིར་སྦེལ་ཇམ་ནང་ཉེ་བའི་ཉིན་ཤས་གོང་ནས་ཚོང་ཁང་སོགས་སྒོ་ཕྱེས་ཡོད་ནའང་། སྤྱི་ཡོངས་ནས་ཕྱི་ཟླ་ ༡ ཚེས་ ༡༣ ཡས་མས་བར་དུ་དམ་དྲག་བྱས་ཏེ། དུས་ཆེན་རིགས་ཕྱིར་འཐེན་གྱིས་མང་ཚོགས་འདུ་འཛོམས་རིགས་མི་ཆོག་པ་བཟོས་ཡོད་སྐོར་དང་། ཉེ་ཆར་སྦེལ་ཇམ་ཀྱི་ས་གནས་འོས་བསྡུ་ལས་ཁང་གིས་དབུས་འོས་བསྡུ་ལས་ཁང་ལ་སྦིལ་ཛིལ་དུ་སྔོན་འགྲོའི་འོས་བསྡུ་ཚུགས་ཐུབ་ཀྱི་མེད་པའི་སྙན་གསེང་ཞུས་པ་ལྟར། དབུས་ནས་གནས་ཡུལ་གཞུང་གི་ཆོག་མཆན་ཐོབ་པའི་ཐོག་ནས་འོས་བསྡུ་ཚུགས་ཐུབ་རྒྱུའི་འབད་བརྩོན་ཞུ་དགོས་སྐོར་གྱི་ལམ་སྟོན་ཕེབས་པ་ལྟར། ད་ལྟ་ཐབས་ཤེས་བྱེད་མུས་ཡིན་སྐོར་དང་། རང་ཉིད་སྒེར་གྱི་བསམ་ཚུལ་ལྟར་ན། སྦེལ་ཇམ་ཙམ་མིན་པར་ཡུ་རོབ་ཁུལ་ཡོངས་ཀྱི་གནས་སྟངས་ལ་བལྟས་ཏེ། ད་ལན་གྱི་འོས་བསྡུ་དེ་ཕར་འགྱངས་བྱ་ཐུབ་ན་བཟང་བ་ཡོད་སྐོར་འགྲེལ་བརྗོད་གནང་བྱུང་། གཞན་ཡང་དབྱིན་ཡུལ་དུ་གནས་སྡོད་བོད་མི་ཁག་ཅིག་གིས། གལ་ཏེ་ད་ཐེངས་དབྱིན་ཡུལ་དུ་འོས་བསྡུ་མ་ཐུབ་ན། ས་གནས་ཀྱི་བོད་མིའི་འོས་བསྡུའི་ཐོབ་ཐང་འཕྲོག་པ་དང་གཅིག་མཚུངས་ཡིན་པས། དབུས་འོས་བསྡུ་ལས་ཁང་ངོས་ནས་སྦྲག་ཐོག་ནས་འོས་ལྡུག་ཐབས་སོགས་ལ་དགོངས་པ་བཞེས་གལ་ཆེ་སྐོར་བསམ་ཚུལ་འདོན་གྱི་འདུག
རྒྱ་གར་ལྟ་བུའི་ནང་མཚོན་ན། ད་ལྟའི་ཆར་འགྲུལ་བཞུད་སོགས་ཀྱི་བཀག་སྡོམ་མེད་ནའང་། ཟླ་འདིའི་ཕྱི་ཚེས་ ༡༧ ཉིན་གྱི་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐོག་སྤེལ་བའི་གནས་ཚུལ་ལྟར་ན། རྒྱ་གར་གྱི་ས་གནས་ ༢༢ དང་བལ་ཡུལ་གྱི་ས་གནས་ ༣ བཅས་ནང་རང་ཁྱིམ་དུ་བོད་མི་ ༢༨༠ དང་སྒྲིག་འཛུགས་ཀྱི་འགོག་དབྱེ་ཟུར་འཇོག་ཁང་དུ་བོད་མི་ ༢༩༢ བཅས་ཁྱོན་བོད་མི་ ༥༧༢ འགོག་དབྱེ་ཟུར་འཇོག་ཁང་ནང་ཟུར་བཀག་ཁང་དུ་ཡོད་སྟབས། འདི་གའི་གསར་འགོད་པས་དྷ་ས་ས་གནས་འོས་བསྡུ་ལས་ཁང་གི་འགན་འཛིན་དང་ས་གནས་མགོ་འཛིན་གཅིག་ལྕོགས་ཀུན་དགའ་ཚེ་རིང་ལགས་སུ་གནད་དོན་དེའི་ཐོག་བཀའ་འདྲི་ཞུ་ཐབས་བྱས་ཀྱང་དུས་ཚོད་མེད་སྐོར་བརྗོད་བྱུང་།
དེ་ལན་འདེབས་གནང་མ་སོང་། འོན་ཀྱང་འོས་བསྡུའི་ཐོག་ཕྱག་ལས་གནང་མཁན་འབྲེལ་ཡོད་ཅིག་གིས་འདི་གའི་གསར་འགོད་པར། ད་ལྟའི་ཆར་དབུས་འོས་བསྡུ་ལས་ཁང་གིས་ས་གནས་འོས་བསྡུ་ལས་ཁང་ལ། འོས་བསྡུའི་ཉིན་སྒྲིག་འཛུགས་ཀྱི་ཟུར་བཀག་ནང་ཡོད་པའི་བོད་མི་ཚོའི་ཐད་ག་རེ་བྱེད་དགོས་མིན་གྱི་ལམ་སྟོན་ཕེབས་མེད་ལ། ས་གནས་ནས་ཀྱང་དེའི་སྐོར་གྲོས་བསྡུར་སོགས་བྱུང་མེད་སྐོར་འགྲེལ་བརྗོད་གནང་བྱུང་།
གཞན་ཡང་མོན་གྷོ་ས་གནས་འོས་བསྡུ་ལས་ཁང་གི་འགན་འཛིན་ལྷག་པ་ཚེ་རིང་ལགས་ཀྱིས། དོགས་ཡོད་དང་ནད་པ་སུ་རུང་ཞིག་ཟུར་བཀག་ནང་ཡོད་ཚེ། འོས་བསྡུའི་ཉིན་མོར་རང་སྲུང་གོས་ཆས་(PPE)གྱོན་ཏེ། འོས་བསྡུའི་ས་ཚིགས་ནང་འོས་ལྡུག་ཏུ་འཇུག་རྒྱུའི་གྲ་སྒྲིག་བྱས་ཡོད་སྐོར་བརྗོད་བྱུང་།
གསར་འགོད་པ། པ་སངས་ཚེ་རིང་།
