རྒྱ་གར་ནང་བོད་མི་འཕྲོད་ལས་བ་སོགས་མི་གྲངས་ ༩༡ ཙམ་ལ་ཏོག་དབྱིབས་འགོག་ཁབ་བརྒྱབ་ཟིན་ཡང་ཟུར་སྐྱོན་སྡུག་པོ་བྱུང་མེད་པ་དང་འདས་པའི་བདུན་ཕྲག་གཅིག་ནང་བོད་མི་ཏོག་དབྱིབས་ནད་པ་ ༡༡ བྱུང་ཡོད་ཀྱང་འདས་གྲོངས་སུ་ཕྱིན་པ་གཅིག་ཀྱང་མི་འདུག
ཁ་སང་ཕྱི་ཚེས་ ༢༡ ཉིན། བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༤༣ པ་གནང་སྐབས། རྒྱ་གར་ནང་བོད་མི་གྲངས་ ༩༡ ཙམ་ལ་ཏོག་དབྱིབས་སྔོན་འགོག་སྨན་ཁབ་བརྒྱབ་ཟིན་པའི་ཁྲོད་དུ། མགོ་ན་བ་དང་མགོ་ཡོམ་འཁོར་བ་སོགས་ཀྱི་ཟུར་སྐྱོན་གྱི་རྣམ་པ་སྡུག་པོ་ཅི་ཡང་བྱུང་མེད་ལ། མི་མང་གིས་སྔོན་འགོག་སྨན་ཁབ་དེ་རྒྱག་མིན་དོ་བདག་སོ་སོའི་འདོད་མོས་ཡིན་སྐོར་བརྗོད་འདུག
གསལ་བསྒྲགས་སྐབས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཟུང་དྲུང་ཚེ་རིང་གཡུ་སྒྲོན་ལགས་ཀྱིས། སྔོན་འགོག་སྨན་ཁབ་དང་འབྲེལ་ནས་འཕྲོད་བསྟེན་ལས་ཁུངས་ཀྱི་ངོས་ནས་བོད་མི་འདུས་སྡོད་ཁལ་དུ་སྔོན་འགོག་སྨན་ཁབ་དང་འབྲེལ་ནས་གནས་སྟངས་གང་འདྲ་ཡོད་མེད་དང་། གྲ་སྒྲིག་གང་འདྲ་ཡོད་མེད་ཐད་དྲ་ཐོག་གི་ཚོགས་འདུ་བང་བསྒྲིགས་ཡོད་པ་བཞིན། ད་སྔ་ལྷོ་སྤྱི་ཡི་གཙོས་ལྷོ་ཕྱོགས་ཀྱི་ས་གནས་མགོ་འཛིན་རྣམས་དང་སྨན་ཁང་འགན་འཛིན་ལྔ། དབུས་ས་གནས་གསུམ་གྱི་ས་གནས་མགོ་འཛིན་དང་སྨན་ཁང་འགན་འཛིན་བཅས་ལ་དྲ་ཐོག་ཏུ་ཚོགས་འདུ་འཚོགས་ཟིན་པ་དང་། རྒྱ་གར་གཞུང་གིས་སྨན་ཁབ་རྒྱག་པའི་ལས་རིམ་གྲ་སྒྲིག་ཞུ་བཞིན་ཡོད་པ་ལྟར། ས་གནས་ཁག་ཏུ་བོད་མི་ཚོ་ལའང་གཅིག་མཚུངས་ཀྱི་མཐུན་རྐྱེན་སྐྲུན་བཞིན་ཡོད་སྐོར་དང་། འཕྲོད་བསྟེན་ལས་ཁུངས་ནས་རྒྱ་གར་གཞུང་གི་ལས་རིམ་དེར་མཐུན་རྐྱེན་གང་དགོས་སྦྱོར་སྤྲོད་གནང་རྒྱུ་དང་། རིམ་བཞིན་མི་མང་ཁྲོད་དུའང་སྔོན་འགོག་སྨན་ཁབ་རྒྱག་གི་ཡོད་ཀྱང་། བརྒྱག་རྒྱུ་ཡིན་མིན་དོ་བདག་གི་འདོད་མོས་ཡིན་པ་ལས་ཨུ་ཚུགས་བྱ་རྒྱུ་མིན་སྐོར་བརྗོད་འདུག
ནད་པའི་གནས་སྟངས་སྐོར་ལ་ཏོག་དབྱིབས་ཛ་དྲག་ལས་དོན་ཚོགས་ཆུང་གི་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས། འདས་པའི་བདུན་ཕྲག་གཅིག་གི་རིང་བོད་མི་ཏོག་དབྱིབས་གཉན་རིམས་ཀྱི་ནད་པ་ ༡༡ བྱུང་ཡོད་པའི་ཁྲོད་བགྲེས་ཤོས་ལོ་ན་ ༨༦ དང་ཆུ་ཤོས་ལོ་ན་ ༣༨ ཡིན་པ་དང་། འདས་པའི་བདུན་ཕྲག་གསུམ་གྱི་རིང་བོད་མི་འདས་གྲོངས་སུ་ཕྱིན་པ་གཅིག་ཀྱང་བྱུང་མེད་སྐོར་དང་། ད་ལྟ་རྒྱ་གར་གྱི་ས་གནས་ ༢༠ དང་བལ་ཡུལ་གྱི་ས་གནས་གཅིག་བཅས་སུ་ཟུར་བཀག་དུ་འདུག་མཁན་ཁྱོན་མི་གྲངས་ ༣༩༥ ཙམ་ཡོད་པ་དང་། ནུས་གསོའི་སྨན་གྲངས་ ༢༤༨༤༡ ལ་རིན་མེད་ཐོག་འགྲེམས་སྤེལ་ཞུས་ཡོད་པ། དེ་བཞིན་རྒྱ་གར་ནང་ས་གནས་ ༡༧ དང་བལ་ཡུལ་ནང་ས་གནས་ ༢ བཅས་སུ་ཁྱོན་མི་གྲངས་ ༢༦༡ ལ་བརྟག་དཔྱད་བྱས་ཡོད་སྐོར་བརྗོད་འདུག
བདེ་ལེགས་སྨན་ཁང་གི་སྨན་པ་བརྩོན་འགྲུས་ལགས་ཀྱིས། ད་ལྟའི་སྔོན་འགོག་གྱི་སྨན་ཁབ་དེ་བརྒྱབ་ཚེ་ད་ལྟའི་ཏོག་དབྱིབས་གཉན་རིམས་འདི་དང་ཉེ་ལམ་ནད་འབུའི་རང་བཞིན་འགྱུར་བ་ཐེབས་པ་དེའང་སྔོན་འགོག་ཐུབ་པའི་སྙན་ཐོ་ཐོན་ཡོད་པ་དང་། ད་ལྟའི་སྨན་ཁབ་དེ་ཡིས་མ་འོངས་པར་ནད་ཡམས་དེ་སྔོན་འགོག་ཐུབ་ཀྱི་ཡོད་པ་ལ་བརྟེན་འཕྲོད་ལས་པ་ཚོས་བརྒྱབ་ཡོད་སྐོར་དང་། སྔོན་འགོག་སྨན་ཁབ་དེ་ཐེངས་གཉིས་ལ་རྒྱག་དགོས་པ་དང་། ཐེངས་དང་པོ་མ་འཕྲོད་མཁན་ཚོར་སྨན་ཁབ་གཉིས་པ་བརྒྱབ་རྒྱུ་མིན་པ་དང་། དུས་རྒྱུན་ནས་ལུས་ཁམས་ལ་མི་འཕྲོད་པའི་ན་ཚ་ (allergy) དང་ཚ་བ་ཡོད་པ། དེ་བཞིན་རྨ་སོགས་བཟོ་སྐབས་ཁྲག་རྒྱུན་ཆད་དཀའ་བ་ཅན། དེ་བཞིན་སྦྲུམ་མ་དང་འོ་མ་འཐུང་གི་ཡོད་པའི་ཨ་མ་སོགས་ཀྱིས་སྔོན་འགོག་སྨན་ཁབ་མི་རྒྱག་པའི་ལམ་སྟོན་ཡོད་སྐོར་དང་། ཡང་ཟུར་སྐྱོན་དང་འབྲེལ་ནས། མི་ཉུང་ཤས་ཞིག་ལ་མགོ་ན་བ་དང་རུས་ཟུག་རྒྱག་པ་སོགས་ཟུར་སྐྱོན་ཕྲན་བུ་ཡོང་སྲིད་སྐོར་དང་། སྨན་ཁབ་བརྒྱབ་རྗེས་ཆུ་ཚོད་ཕྱེད་ཀའི་ནང་ཚུད་དུ་ཛ་དྲག་གི་ཟུར་སྐྱོན་ཅི་ཡོད་ཤེས་རྟོགས་ཐུབ་ཀྱི་ཡོད་སྟབས། སྨན་ཁབ་རྒྱག་སར་དེའི་ཐད་གྲ་སྒྲིག་ཆ་ཚང་བྱས་ཡོད་སྐོར་འབྲེལ་བརྗོད་གནང་འདུག
གསལ་བསྒྲགས་ཐོག་བོད་ཀྱི་ལོ་སར་བསླེབ་ལ་ཉེ་བ་དང་བསྟུན་ཏོག་དབྱིབས་གཉན་རིམས་སྐོར་ལ་ལམ་སྟོན་གནང་སྐབས། ལོ་སར་སྐབས་བྱུང་ན་འགྲུལ་བཞུད་རིགས་ལ་འཛེམས་དགོས་པ་དང་། གལ་སྲིད་ངེས་པར་དུ་འགྲུལ་བཞུད་བྱེད་དགོས་བྱུང་ཚེ་ས་གནས་ཀྱི་གནས་སྟངས་ལ་ཞིབ་འཇུག་བྱེད་དགོས་པ་དང་། ས་གནས་སུ་འབྱོར་རྗེས་ས་གནས་ཀྱི་ཁྲིམས་སྒྲིག་དང་ལམ་སྟོན་ལ་ངེས་པར་བརྩི་སྲུང་དགོས་སྐོར་དང་། མུ་མཐུད་ལག་པ་འཁྲུད་པ་དང་ཁ་རས་གྱོན་དགོས་སྐོར་བརྗོད་འདུག
དེ་རིང་གི་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་གནས་ཚུལ་ལྟར་ན། རྒྱལ་བལ་གཉིས་ཀྱི་ནང་ད་ལྟ་བར་དུ་ཁྱོན་བོད་མི་ཏོག་དབྱིབས་ནད་པ་གྲངས་ ༡༩༤༠ བྱུང་ཡོད་པའི་ཁྲོད་དྲག་སྐྱེད་བྱུང་བ་གྲངས་ ༡༤༣༠ དང་། རྐྱེན་འདས་སུ་ཕྱིན་པ་གྲངས་ ༣༧། ནད་མནར་འོག་ཡོད་མཁན་གྲངས་ ༢༣ ཙམ་ཡོད་འདུག དེ་བཞིན་ཕྱི་རྒྱལ་ཁག་ཏུ་ཁྱོན་བོད་མི་གྲངས་ ༢༡༣ བྱུང་བའི་ཁྲོད་དྲག་སྐྱེད་བྱུང་བ་གྲངས་ ༡༦༥ དང་རྐྱེན་འདས་སུ་ཕྱིན་པ་ ༩། ནད་མནར་འོག་ཡོད་པ་གྲངས་ ༣༩ ཡོད་འདུག
གསར་འགོད་པ། ཀླུ་མགོན་ཐར།
