དམག་སྒར་ཨང་ ༢༢ པའི་བོད་དམག་ཞིག་ལ་རྒྱ་གར་གྱི་ཆེ་བསྟོད་གཟེངས་རྟགས་ཐོབ།

བོད་མིའི་དམག་སྒར་ཨང་ ༢༢ པའི་དམག་མི་ནོར་བུ་ཚེ་རིང་ལགས་ནས་སྙིང་སྟོབས་ཞུམ་པ་མེད་པར་གངས་གཟིག་འཐབ་རྒོལ་ཞེས་པའི་ལ་དྭགས་ཁུལ་གྱི་ས་མཚམས་རྩོད་རྙོག་ཁྲོད་ཞུགས་པར་ཆེ་བསྟོད་གཟེངས་རྟགས་ཐོབ་ཡོད་འདུག

ཁ་སང་རྒྱ་གར་གྱི་དམངས་གཙོའི་ཉིན་མོ་དང་བསྟུན། རྒྱ་གར་གཞུང་གིས་སོ་སོའི་རྒྱལ་ཁབ་དང་མི་རིགས་ཀྱི་ཆེད་དུ་རང་ཉིད་ཀྱི་སྲོག་ཀྱང་དོར་དང་འདོར་བཞིན་པའི་བྱས་རྗེས་ཅན་གྱི་མི་སྣ་ ༥༤ ཁྲོད། བོད་མིའི་དྭང་ཞབས་དམག་སྒར་ཨང་ ༢༢ (Special frontier force) པའི་དབུས་དམག་སྤྱི་ (MAJ PRASHANT PASBOLA)དང་། གངས་གཟིག་འཐབ་རྒོལ་བ་ཚེ་རིང་ནོར་བུ་ལགས་གཉིས་དང་། དབུས་དྭངས་ཞབས་དམིགས་བསལ་ཆེད་ལས་དམག་མི་ (NEERAJ KUMAR SINGH) ལགས་སུ་ (SENA MEDA) ཆེ་བསྟོད་གཟེངས་རྟགས་ཐོབ་པའི་མཚན་གཞུང་གསལ་བསྒྲགས་གནང་འདུག

རྒྱ་གར་གཞུང་ཕྱོགས་ཀྱི་གསལ་བསྒྲགས་ལྟར་ན། བོད་པའི་དྭང་ཞབས་དམག་མི་ཚེ་རིང་ནོར་བུ་ལགས་ལ་དྭགས་ཀྱི་བོད་ཧིན་ས་མཚམས་སུ་རྒྱ་གར་གྱི་གངས་གཟིག་འཐབ་རྒོལ་ཞེས་པའི་ཁྲོད་ཞུགས་པར། ཁོང་གི་དཔའ་མཛངས་རྟུལ་ཕོད་ཀྱི་སྙིང་སྟོབས་ལ་ངོས་འཛིན་ཞུ་ཆེད། རྒྱ་གར་གྱི་ཆེ་བསྟོད་གཟེངས་རྟགས་འབུལ་གཏན་འཁེལ་ཡོད་པ་དང་། གཟེངས་རྟགས་དེ་ནི་རྒྱ་གར་གྱི་སྙིང་སྟོབས་ཆེ་ཞིང་བྱས་རྗེས་ཅན་གྱི་མི་སྣ་ངོས་འཛིན་སླད་སྤྲོད་སྲོལ་ཡོད་པའི་གཟེངས་རྟགས་ཤིག་ཡིན་པ་རེད།

ད་རེས་བྱས་རྗེས་ཅན་གྱི་མི་སྣ་ ༥༤ ཁྲོད་ཀྱི་མི་ཕལ་ཆེ་བ། འདས་ལོའི་ཕྱི་ཟླ་ ༦ ནང་ལ་དྭགས་ཀྱི་ས་མཚམས་རྩོད་རྙོག་ཁྲོད་རྐྱེན་འདས་སུ་ཕྱིན་པ་དང་རྒྱ་དམག་ལ་འཐབ་རྒོལ་བྱེད་མཁན་རྒྱ་གར་གྱི་དམག་མི་ཡིན་པ་དང་། སྐབས་དེར་རྒྱ་དཀར་ནག་བར་གདོང་ཐུག་བྱུང་སྟེ་རྒྱ་གར་གྱི་དམག་མི་ ༢༠ ཙམ་རྐྱེན་འདས་སུ་ཕྱིན་ཡོད་པ་དང་རྒྱ་གར་ལ་གྱོང་གུད་ཤུགས་ཆེན་ཕོག་ཡོད། འོན་ཀྱང་། ལོ་དེའི་ཕྱི་ཟླ་ ༩ ནང་བོད་པའི་དྭང་ཞབས་དམག་མི་ཚོས་ཕྱི་ལོ་ ༡༩༦༢ ལོར་རྒྱ་ནག་ལ་ཤོར་བའི་ས་ཆ་ཚུར་འཕྲོག་སྟེ་དཔའ་ངར་བཞག་ཡོད་པ་དང་། ད་རེས་ཚེ་རིང་ནོར་བུ་ལགས་སུ་འང་བོད་པའི་དམག་སྒར་ཨང་ ༢༢ པའི་ས་མཚམས་ཀྱི་འཐབ་འཛིང་དང་འབྲེལ་ནས་ཆེ་བསྟོད་གཟེངས་རྟགས་ཕུལ་བ་ཞིག་ཆགས་ཀྱི་ཡོད་པ་རེད།

སྤྱིར་བཏང་འདས་པའི་ལོ་མང་རིང་རྒྱ་གར་གཞུང་གིས་བོད་པའི་དྭང་ཞབས་དམག་སྒར་ཨང་ ༢༢ བར་གསང་རྒྱ་བྱེད་པ་དང་དེ་ཙམ་གྱི་ཆེ་མཐོང་ངོས་འཛིན་བྱེད་ཀྱི་མེད་ནའང་། འདས་ལོར་བརྒྱ་དཔོན་ཉི་མ་བསྟན་འཛིན་ལགས་ཀྱི་གཙོས་པའི་བོད་པའི་དམག་མི་ཚོས་ས་མཚམས་ནས་བྱས་རྗེས་བཞག་པར་རྒྱ་གར་རྒྱལ་ཡོངས་ཙམ་མ་ཟད། རྒྱལ་སྤྱིའི་སྟེང་ཁྱབ་བརྡལ་ཤུགས་ཆེན་བྱུང་བའི་རྐྱེན་གྱིས། རྒྱ་གར་ནང་བོད་པའི་དམག་སྒར་ཨང་ ༢༢ བར་ངོས་འཛིན་གསར་པ་ཞིག་ཐོབ་ཡོད་པ་རེད།

དེ་སྔ་འདི་གའི་གསར་འགོད་པར་བོད་མིའི་དྭང་ཞབས་དམག་མི་རྣམ་པའི་བྱས་རྗེས་སྐོར་ལ་བོད་དོན་འཐབ་རྩོད་པ་དང་རྩོམ་པ་པོ་བསྟན་འཛིན་བརྩོན་འགྲུས་ལགས་ཀྱིས། འདས་པའི་ལོ་རྒྱུས་ནང་བལྟས་པ་ཡིན་ནའང་། རང་བཙན་ལྡན་པའི་བྷང་ལ་ཌི་ཤི་དང་དམག་བརྒྱབ་སྐབས། བོད་པའི་དམག་མི་གང་འཚམ་ཞིག་གིས་ཚེ་སྲོག་ཤོར་ཡོད་ཀྱང་ལས་ཀ་གལ་ཆེ་ཤོས་དེ་བོད་པའི་དམག་མི་ཚོས་བྱས་ཡོད་པ་རེད། སྐབས་དེ་དུས་རྒྱ་གར་གཞུང་གིས་བོད་པའི་དམག་མི་སུམ་སྟོང་ནས་བཞི་སྟོང་བར་བཏང་ཡོད་པ་དང་། ས་བབ་མཐོ་བའི་ཧི་མ་ལ་ཡའི་རི་རྒྱུད་ཁུལ་དུ་ཛ་དྲག་གི་གནས་སྟངས་ག་དུས་བྱུང་ཡང་། རྒྱ་གར་གཞུང་གིས་བོད་པའི་དམག་མི་བཏང་སྟེ་རྒྱ་གར་ལ་ཕན་ཐོགས་པ་དང་བོད་པའི་དམག་མི་ཚོས་འཇོན་བསྡད་ཡོད་པ་རེད་དེ། རྒྱ་གར་གཞུང་གིས་དེ་ཚོ་གསང་བ་བྱས་ནས་བཞག་ཡོད། དཔེར་ན་ཇ་མུ་ཀ་ཤི་མུར་གྱི་དམག་འཁྲུག་སྐབས་བོད་པའི་དམག་མི་ཚོས་འཇོན་ཡོད་པ་དང་། ལྷག་པར་དུ་ ༡༩༩༩ ལོར་ (Tiger Hill)ཟེར་བའི་རི་སྒང་དུ་དམག་ཤོར་སྐབས་བོད་ཀྱི་དམག་མི་ཚོས་འཇོན་ཡོད་པ་རེད། བོད་པའི་དམག་མི་ཚོ་ག་དུས་ཡིན་ཡང་ས་མཐོ་འཁྱག་རོམ་ཁུལ་དང་ལ་དྭགས་དང་ཧི་མ་ཅལ། ཨོ་ཊར་ཁན། འབྲས་ལྗོངས་དང་ཨ་རུ་ན་ཅལ་ཁུལ་སོགས་སུ་བཏང་ཡོད་པ་དང་། བོད་པའི་དམག་མི་ཚོས་མཐའ་སྲུང་བྱས་ཏེ་འཇོན་བསྡད་ཡོད་པ་དང་། ད་རེས་གཞི་ནས་བོད་པའི་དམག་གི་འཇོན་ཐང་ལ་ངོས་འཛིན་ཡོང་གི་ཡོད་པ་རེད། ངོས་འཛིན་ཡོང་གི་ཡོད་པ་དེ་བོད་རྒྱལ་ཁབ་དང་མི་རིགས་ཀྱི་སྤོབས་པ་ཞིག་རེད་བསམ་གྱི་ཡོད། ཅེས་བརྗོད་བྱུང་།

གསར་འགོད་པ། སྐལ་བཟང་སྦྱིན་པ།