བོད་རྒྱལ་ལོ་ ༢༡༤༨ རབ་གནས་ལྕགས་གླང་ལོའི་གནམ་ལོ་གསར་པ་ཚེས་ལ་ཉེ་བའི་སྐབས་དང་བསྟུན་༧གོང་ས་མཆོག་ནས་ལོ་སར་འཚམས་འཕྲིན་སྩལ་བའི་ནང་མགོན་པོ་གང་ཉིད་བོད་དུ་བཞུགས་ཐུབ་མེད་ཀྱང་རྒྱ་གར་འཕགས་པའི་ཡུལ་དུ་སངས་རྒྱས་ཀྱི་བསྟན་པར་ཞབས་འདེགས་དཔྱིས་ཕྱིན་པ་གནང་མུས་ཡིན་བསམ་སྟེ་ཚང་མས་བློ་བདེ་བོ་གནང་དགོས་སྐོར་གསུངས་འདུག
བླ་མ་བཟོད་པ་རིན་པོ་ཆེ་མཆོག་དང་ཁོང་གི་ཆོས་ཚོགས་ཐེག་ཆེན་འཛིན་སྐྱོང་ཚོགས་པ་ནས་ཇི་ལྟར་གསོལ་འདེབས་ཞུས་དོན་ལྟར། དེ་རིང་ཕྱི་ཚེས་ ༨ ཉིན་དྲ་ལམ་བརྒྱུད་༧གོང་ས་རྒྱལ་བ་རིན་པོ་ཆེ་མཆོག་ནས་ལྕང་སྐྱ་རོལ་བའི་རྡོ་རྗེས་མཛད་པའི་ལྟ་མགུར་ཨ་མ་ངོས་འཛིན་གྱི་གསུང་ཆོས་སྩལ་སྐབས། བོད་ཕྱི་ནང་གཉིས་སུ་ཡོད་པའི་བོད་མི་དང་སོག་པོ། ཧི་མ་ལ་ཡའི་རི་རྒྱུད་ཁུལ་གྱི་བོད་ཀྱི་ལོ་སར་རྩིས་མཁན་ཚང་མར་མི་ཚེ་དོན་དང་ལྡན་པ་ཞིག་ཡོང་ཐབས་དགོས་པའི་ལོ་སར་གྱི་འཚམས་འཕྲིན་སྩལ།
འཚམས་འཕྲིན་ནང་༧གོང་ས་མཆོག་གིས། ལོ་སར་ཞེས་པ་ནི་ལོ་རྙིང་པ་ཞིག་རྫོགས་ཏེ་ལོ་གསར་པ་ཞིག་སླེབ་ཡོང་གི་ཡོད་པ་རེད། གང་ལྟར་ང་ཚོའི་དུས་ཡུན་རྫོགས་འགྲོ་ཡི་ཡོད་པ་རེད། ལོ་རྙིང་པའི་ནང་སོ་སོར་དགེ་སེམས་གང་འདྲ་སྐྱེས་ཡོད་མེད་དང་། སྤྱིར་ཆོས་པ་དང་ནང་སྒོས་སུ་སངས་རྒྱས་པའི་ཆོས་པ་ཞིག་གི་ངོས་ནས་ཐོས་བསམ་སྒོམ་གསུམ་གང་འདྲ་བྱུང་ཡོད་མེད་ཀྱི་ཐད་ཕྱིར་མིག་ཅིག་བལྟས་ཏེ་བསམ་བློ་གཏོང་དགོས་པ་དང་། ཐོས་བསམ་སྒོམ་པ་ཏོག་ཙམ་བྱུང་ཡོད་ཚེ་དེའི་ཐད་རྗེས་སུ་ཡི་རངས་དང་། ལོ་གསར་པའི་ནང་བཅོམ་ལྡན་འདས་དང་ཀླུ་སྒྲུབ་ཡབ་སྲས་ལ་སོགས་ཀྱི་འཇམ་མགོན་བླ་མ་ཙོང་ཁ་བ་ཆེན་པོ་ཡབ་སྲས་སོགས་ཀྱི་ལེགས་བཤད་རྨད་དུ་བྱུང་བ་དག་མུ་མཐུད་ཐོས་བསམ་སྒོམ་གསུམ་བྱས་ཏེ་མི་ཚེ་དོན་དང་ལྡན་པ་ཞིག བཅོམ་ལྡན་འདས་ནས་བཟུང་དྲིན་ཆེན་རྩ་བའི་བླ་མའི་བར་གྱི་རྩ་རྒྱུད་ཀྱི་བླ་མ་གོང་མ་རྣམ་གྱི་ཐུགས་དགོངས་རྫོགས་པ་ཞིག་བྱ་རྒྱུ་ཡིན་པའི་སྙིང་སྟོབས་བསྐྱེད་དེ་དམ་བཅའ་འཇོག་དགོས་པ་དེ་གལ་ཆེན་པོ་རེད། ཅེས་བཀའ་བསྩལ་འདུག
ཡང་༧གོང་ས་རྒྱལ་བ་རིན་པོ་ཆེ་མཆོག་ནས་བཙན་བྱོལ་གྱི་བོད་མི་ཚོ་དང་ཡུལ་ལུང་འདྲ་མིན་གྱི་ཆོས་གྲོགས། ལྷག་པར་དུ་བོད་གངས་ཅན་གྱི་ལྗོངས་སུ་ད་ལྟ་རང་དབང་བྲལ་ནས་ཡོད་ནའང་། སྙིང་སྟོབས་དང་དད་པ་ཞུམ་པ་མེད་པར་བསྡད་ཡོད་སྐོར་གསུངས་པ་དང་འབྲེལ། ངའི་ལུས་པོ་འདི་རྒྱ་གར་དུ་བསྡད་ཡོད་པ་རེད། བོད་ལ་གནས་ཐུབ་ཡོད་པ་མ་རེད། ཡིན་ནའང་། མི་ལ་ཕན་ཐོགས་བྱེད་པར་བོད་ལ་ཡོད་པ་ལས་རྒྱ་གར་ནང་ཡོད་པ་དེ་ཕལ་ཆེར་ཁྱབ་ཆེ་བ་འདྲ་བོ་རེད། དེ་འདྲ་ཡིན་དུས། བོད་ནང་དུ་ཡོད་པའི་བོད་པ། ང་ལ་དད་པ་དང་དགའ་མོས་ཡོད་མཁན་ཚོས་༧རྒྱལ་བ་རིན་པོ་ཆེ་རྒྱ་གར་འཕགས་པའི་ཡུལ་ལ་ཡོད་པས། དངོས་གནས་དྲང་གནས་སངས་རྒྱས་བསྟན་པའི་ཞབས་འདེགས་དཔྱིས་ཕྱིན་པ་བསྒྲུབས་དང་སྒྲུབ་མུས་རེད་བསམ་སྟེ། ཁྱེད་རང་ཚོ་ཚང་མ་བློ་བདེ་བོ་བྱས་ནས་སྡོད་ཨང་། ཞེས་གསུངས་སོང་།
གསར་འགོད་པ། ཀླུ་མགོན་ཐར།
ཚང་མ་ལ་ལོ་སར་བཟང་།