དེ་རིང་ལྡེ་ར་རྡུན་བདེ་སྐྱིད་གླིང་འཕྲོད་བསྟེན་སྨན་ཁང་དུ་རྒྱ་གར་གཞུང་ནས་མཐུན་འགྱུར་གནང་བའི་སྨན་སྒར་གསར་པ་གསུམ་དབུ་འབྱེད་དང་འབྲེལ་༧ས་སྐྱ་གོང་མ་ཁྲི་ཆེན་མཆོག་གི་དབུས་པའི་སྐུ་འཁོར་ལྔ་དང་མི་མང་བཅས་ལ་ཏོག་དབྱིབས་སྔོན་འགོག་གི་སྨན་ཁབ་བསྒྲོན་ཡོད་པ་རེད།
དེ་རིང་སྔ་དྲོའི་ཆུ་ཚོད་ ༩།༣༠ ཡས་མས་ཙམ་ལ་ལྡེ་ར་རྡུན་གྱི་ས་གནས་གཞིས་མགོ་དང་འཕྲོད་བསྟེན་ལས་ཁུངས་གཉིས་ཀྱི་གོ་སྒྲིག་འོག དཔལ་༧ས་སྐྱ་གོང་མ་བདག་ཁྲི་རིན་པོ་ཆེ་མཆོག་གི་དབུས་པའི་སྐུ་འཁོར་ལྔ་བཅས་ལ་ཏོག་དབྱིབས་སྔོན་འགོག་སྨན་ཁབ་བསྒྲོན་ཡོད་པ་དང་བསྟུན། དེ་རིང་ནས་ལྡེ་ར་རྡུན་ཁུལ་གྱི་ལོ་ན་ ༦༠ ཡན་གྱི་བཙན་བྱོལ་བོད་མིར་ཏོག་དབྱིབས་སྔོན་འགོག་གི་སྨན་ཁབ་བརྒྱབ་མགོ་བརྩམས་ཡོད་འདུག
འདི་གའི་གསར་འགོད་པས་ཁ་པར་བརྒྱུད་ལྡེ་ར་རྡུན་གྱི་གཞིས་མགོ་ནོར་བུ་ལགས་སུ་བཀའ་འདྲི་ཞུས་སྐབས། ང་ཚོ་ས་གནས་གཞིས་མགོ་དང་འཕྲོད་བསྟེན་ལས་ཁུངས་གཉིས་མཉམ་འབྲེལ་ཐོག་ནས། འབྲེལ་ཡོད་མངའ་སྡེའི་གཉན་རིམས་སྔོན་འགོག་ཁང་ལ་འབྲེལ་བ་ཞུས་ཏེ། དབུས་གཞུང་ནས་རོགས་རམ་གནང་བའི་འབོད་སྐུལ་ཞུས་པ་ལྟར། དབུས་གཞུང་གི་རྒྱབ་སྐྱོར་འོག ང་ཚོས་བདེ་སྐྱིད་གླིང་འཕྲོད་བསྟེན་སྨན་ཁང་དུ་སྨན་སྒར་གསུམ་གསར་རྒྱག་བྱས་པ་ཡིན་ལ། དེ་རིང་སྨན་སྒར་གསུམ་དབུ་འབྱེད་མཛད་སྒོ་དང་འབྲེལ་ནས། སྒྲོལ་མ་ཕོ་བྲང་ལ་སྙན་གསེང་ཞུས་པ་བཞིན། དཔལ་ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་དང་སྐུ་འཁོར་བཅས་ལ་ཏོག་དབྱིབས་སྔོན་འགོག་གི་སྨན་ཁབ་བསྒྲོན་པ་རེད། ཅེས་བརྗོད་བྱུང་།
སྔོན་འགོག་ཁབ་བསྒྲོན་རྗེས་༧ས་སྐྱ་གོང་མ་ཁྲི་ཆེན་མཆོག་ནས་བཀའ་སློབ་ཅིག་བསྩལ་བའི་ནང་། ཏོག་དབྱིབས་སྔོན་འགོག་གི་ཁབ་དེ་མི་མང་པོར་བརྒྱབ་ཚར་བ་རེད་ལ། ཟུར་སྐྱོན་གྱི་གནས་སྟངས་སྡུག་བཅག་བྱུང་བའི་རིགས་མི་འདུག དེར་བརྟེན། ནད་ཡམས་སྔོན་འགོག་གི་ཆེད་དུ་མི་གང་མང་མང་གིས་བརྒྱབ་ཐུབ་ན་ཡག་པོ་ཡོད་པ་རེད། ཅེས་གསུངས་འདུག་པ་དང་། ༧གོང་མ་ཁྲི་ཆེན་མཆོག་ལ་འགོག་ཁབ་བསྒྲོན་རྗེས་དུས་ཡུན་སྐར་མ་ ༣༠ རིང་སྨན་སྒར་དུ་བཞུགས་ཡོད་པ་མ་ཟད། འགོག་ཁབ་སྒྲོན་སྐབས་སྐུ་མཉེལ་གང་ཡང་བྱུང་མེད་པ་རེད་ལ། ད་རེས་༧གོང་མ་ཁྲི་ཆེན་མཆོག་ལ་བསྒྲོན་པའི་སྔོན་འགོག་ཁབ་དེ་ནི་ཉེ་སྔོན་ཕྱི་ཚེས་ ༦ ཉིན་༧གོང་ས་མཆོག་ལ་བསྒྲོན་པའི་ (Covishield) ཟེར་བའི་ཏོག་དབྱིབས་སྔོན་འགོག་ཁབ་གཅིག་མཚུངས་ཡིན་པ་རེད།
གཞིས་མགོ་ནོར་བུ་ལགས་ཀྱི་གསུང་བ་ལྟར་ན། དེ་རིང་སྨན་སྒར་གསར་བ་གསུམ་དབུ་འབྱེད་ཀྱི་མཛད་སྒོར་སྐུ་མགྲོན་གཙོ་བོ་འབྲེལ་ཡོད་མངའ་སྡེའི་སྤྱི་ཁྱབ་འཕྲོད་བསྟེན་ལམ་སྟོན་པ་སྨན་པ་ཌའེ་ཤི་ཏི་ལགས་དང་། ས་གནས་འཕྲོད་བསྟེན་འགན་འཛིན་གྱི་གཙོས་པའི་སྨན་པ་དང་སྨན་ཞབས། གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་བཅས་འཛོམས་ཡོད་པ་དང་། དེ་རིང་ཁྱོན་ལོ་ན་ ༦༠ ཡན་གྱི་མི་གྲངས་ ༡༠༠ ལ་ཏོག་དབྱིབས་སྔོན་འགོག་ཁབ་རྒྱག་གི་ཡོད་འདུག
ཡང་ནོར་བུ་ལགས་ཀྱིས། ལྡེ་ར་རྡུན་གྱི་གཞིས་མགོའི་ཁྱབ་ཁོངས་སུ་གཞིས་ཆགས་ཁག་ལྔ་དང་ཁ་འཐོར་ས་གནས་ཁག་ལྔ་ཡོད་པའི་ཁྲོད་ལོ་ན་ ༦༠ ཡན་ཡིན་པའི་ཏོག་དབྱིབས་འགོག་ཁབ་བརྒྱབ་གནང་མཁན་མི་གྲངས་ ༡༥༠༠ ཙམ་ཡོད་པ་དང་། རྒྱ་གར་མངའ་སྡེ་གཞུང་ནས་དམིགས་བསལ་བོད་མི་རྣམས་ལ་མཐུན་འགྱུར་གནང་བའི་སྨན་སྒར་གསུམ་དེ་བརྒྱུད་ཉིན་གྲངས་ ༡༠ ཡས་མས་རིང་སྔོན་འགོག་ཁབ་བརྒྱབ་ཚར་ཐབས་བྱ་རྒྱུ་ཡིན་སྐོར་བརྗོད་བྱུང་།
གསར་འགོད་པ། སྐལ་བཟང་སྦྱིན་པ།
