ལུག་མགོ་བཀལ་ནས་ཁྱི་ཤ་ཚོང་བའི་ཤན་པ།

ཁྲིམས་ལུགས་རིག་པ་བ་བློ་བཟང་ཆོས་འབྱུང་།

གཅིག གླེང་སློང་བ།

བསྟན་འཛིན་རང་གྲོལ་ཟེར་བ་ཞིག་གིས་བོད་ཀྱི་དུས་བབ་དྲ་རྒྱའི་སྟེང་། ཆེས་མཐོའི་ཁྲིམས་ཞིབ་ཁང་གིས་ཅི་ཞིག་ནོར་ཡོད་དམ་ཞེས་པ་ཞིག་བཀོད་འདུག་པ་དེ་བཀླགས་པར། བློ་མ་བདེ་བ་ཞིག་བྱུང་། འབྲི་བ་པོ་དེས་སྤྱི་འཐུས་རྒྱུན་ལས་ཀྱིས་ཁྲིམས་ཞིབ་ཁང་ལ་སྒལ་རལ་བཙོང་བ་དང་། སྤྱི་འཐུས་བློ་བཟང་ཆོས་འབྱོར་ལ་ཁྱད་གསོད་ཀྱི་འདྲི་ཞིབ་བྱས་པའི་ནང་མའི་བརྒྱུད་རིམ་མང་དག་ཅིག་བཀོད་འདུག་པར་བལྟས་ན། བློ་གཟུ་བོར་གནས་ཏེ་གནད་དོན་གླེང་སློང་བྱེད་པ་མ་ཡིན་པར། རང་ཉིད་དོན་རྐྱེན་དེའི་ནང་ཚུད་པའི་སྡུག་གྱོང་ཁུར་མ་འདོད་པའི་ཚོར་བའི་དབང་དུ་ཕྱིན་པ་གསལ་པོ་རེད་འདུག་ལ། སྤྱི་འཐུས་ལྷན་ཚོགས་སུ་ཁྲིམས་ཞིབ་པ་གསུམ་འཕོ་འགྱུར་གྱི་གྲོས་ཆོད་བཞག་པའི་སྐོར་ལ་དག་འབུད་དང་། ཟམ་གདོང་རིན་པོ་ཆེས་བཅའ་ཁྲིམས་སྦོ་ལུག་པའི་དོན་རྐྱེན་དེའི་སྐོར་ལ་བཅའ་ཁྲིམས་ཀྱི་དགོངས་དོན་འགྲེལ་ཕྱོགས་དགོངས་ཚུལ་གསུངས་པ་ལའང་མཇལ་འདུག་པར་བལྟས་ན། རྩོམ་འབྲི་པ་དེ་ནི་ཁྲོམ་སྲང་ན་རྒྱུགས་པའི་ཙི་ཙི་ཇི་བཞིན་ཐེ་ཚོམ་ཀྱི་ཀློང་ན་གར་འགྲོ་འདི་འགྲོ་མ་ཤེས་པར་ལུས་ཡོད་པ་ཚོད་དཔག་བྱེད་ཐུབ་པ་མ་ཟད། བོད་མིའི་སྒྲིག་འཛུགས་གཏོར་བཤིག་གཏོང་མཁན་ལུག་མགོ་བཀལ་ནས་ཁྱི་ཤ་འཚོང་མཁན་གྱི་ཤན་པ་ ༣༡ གྲས་ཤིག་ཀྱང་མིན་ནམ་སྙམ། ད་དུང་རང་སྣང་ཚད་མར་བཟུང་སྟེ་ཁྲིམས་ལུགས་ཀྱི་རྒྱུན་ཤེས་ཐོག་རྩོད་སློང་བྱེད་སྟངས་ལ་བལྟས་ན། རྩོམ་འབྲི་པ་ནི་རྩོད་པའི་རླུང་ཁམས་ཀྱིས་དེད་དེ་ཁྲིམས་ལུགས་དང་སྲིད་དོན་ཚན་རིག་སྦྱངས་པ་མེད་པའི་རང་མཚང་སྦེད་མི་ཤེས་མཁན་ཞིག་ཡིན་པའང་ཚོད་དཔག་བྱེད་ཐུབ།

གཉིས། ཁོའི་རྩོད་ཤགས།

རྩོམ་ཡིག་དེའི་ནང་དོན་གཙོ་བོ་ནི་ཁྲིམས་ཀྱིས་ངོས་བཞེས་ཐོག་ལ་ཡིན་པ་དང་། རྩོམ་ཡིག་དེར་་བཅའ་ཁྲིམས་ཀྱི་སྒྲོམ་གཞིར་ཁྲིམས་ཀྱིས་ངོས་བཞེས་ཞེས་པ་ཞིག་ཡོད་ན་ཏག་ཏག་བསྡད་ཡོད་དམ།   ་་་་་ ༢༠༡༩ ཟླ་ ༡༠ ཚེས་ ༡༤ གོང་ཁྲིམས་ཀྱིས་ངོས་བཞེས་ལག་བསྟར་གནང་མེད་པ། ་་་་ མེད་ཐབས་མེད་པ་ཞིག་ཡིན་པའི་རྒྱུ་མཚན་ད་བར་གསལ་བརྗོད་མ་གནང་དོན་ཅི། ་་་་ སྤྱི་འཐུས་ཁྲིམས་བཟོ་ལྷན་ཚོགས་ཆེས་མཐོའི་ཁྲིམས་ཞིབ་ཁང་གིས་གནས་དབྱུང་བཏང་ཆོག་གམ། ་་་་ ཁྲིམས་ཞིབ་ཁང་ནས་འགྲེལ་བརྗོད་སྐབས། ཚིག་ཐག་ཆོད་པོས་བཅའ་ཁྲིམས་ཀྱི་དོན་ཚན་དེའི་ཚིག་འདིས་བསྟན་ཡོད་ཅེས་མཐར་གཏུག་འགྲེལ་བརྗོད་གནང་མཁན་ནས་གསུང་ཐུབ་མེད་པ། ་་་་ བཅའ་ཁྲིམས་དོན་ཚན་ ༥ པ་དང་། དོན་ཚན་ ༦༦ དང་། ཁྲིམས་ཀྱིས་ངོས་བཞེས་ཀྱིས་ཁ་མཆུ་འཛུགས་ཡུལ་གནད་དོན་གསུམ་བར་གྱི་མ་འགལ་མ་ལྷག་པའི་ནང་དོན་གསལ་འགྲེལ་གནང་མེད་དོན་ཅི། ་་་་ དེ་སྔ་བོད་མི་མང་སྤྱི་འཐུས་རྒྱུན་ལས་ལ་དག་སེལ་གྱི་གོ་སྐབས་གང་ཡང་མི་སྤྲོད་པར། ་་་་ བཅའ་ཁྲིམས་དང་འགལ་བ་ཡིན། འགལ་བའི་ཆ་དེར་ཁྲིམས་ཞིབ་ཁང་ནས་བཅའ་ཁྲིམས་སྲུང་སྐྱོབ་ཆེད་ངོས་ལེན་ཞུ་དཀའ་ཞེས་བཞུགས་མ་ཐུབ་པ་ཅི་ཡིན་ནམ། ་་་་ ཁྲིམས་ཀྱིས་ངོས་བཞེས་ཕྱག་བསྟར་ཆོག་པ་བསྟན་ཡོད་ཅེས་གསལ་པོ་དག་པོ་ད་བར་འགྲེལ་བརྗོད་གནང་མེད། ་་་ སྤྱི་འཐུས་རྒྱུན་ལས་ནས་སྤྱི་འཐུས་རྣམས་ལོག་འཁྲིད་བྱས་ཚུལ་བཀོད་འདུག སྤྱི་འཐུས་རྣམས་ར་ལུག་ལྟ་བུ་གར་དེད་ཆོག་པ་ཞིག་ཡིན་ནམ། འདི་ལ་ཁུངས་སྐྱེལ་ཅི་ཞིག་ཡོད། ་་་་ དེ་སྔ་ ༢༠༢༠ ཟླ་ ༩ ཚེས་ ༤ ཉིན་སྤྱི་མང་ཁྲིམས་ཡིག་དོན་ཚན་ ༥༡ དགོངས་དོན་འོག་སྤྱི་འཐུས་རྒྱུན་ལས་ཚོའི་གདམ་བྱ་འདེམས་བྱེད་ཀྱི་ཐོབ་ཐང་བཀག་བསྐྱིལ་བྱེད་དགོས་ཆགས་རྒྱུའི་བཀའ་ཁྱབ་བཏང་ཡོད། ་་་ ༢༠༢༠ ཟླ་ ༩ ཚེས་ ༢༥ ཉིན་བཏང་བའི་བཀའ་ཁྱབ་ནང་འདེམས་བྱེད་ཀྱི་ཐོབ་ཐང་བཀག་བསྐྱིལ་བྱས་རབ་བཀོད་ཡོད། ་་་་ ཁ་དན་ཚིག་ལ་མི་གནས་པ། ་་་ གྲོས་ཚོགས་དབུས་སུ་བཞག་པའི་ལྟ་གྲུབ་ལ་ཁྲིམས་ཀྱིས་ངོས་བཞེས་ཀྱིས་མི་གནོད་ཚུལ་གསུང་ཐུབ་མཁན་དཀོན་པོ་བྱུང། ཞེས་སོགས་ནང་གསེས་ཚན་པ་ཁག་ཅིག་བཀར་ཏེ། དོགས་སློང་དང་དྲི་བ། དགག་པ། ཚོར་བ། རྣམ་རྟོག  ཚོད་དཔག  འཕྱ་དམོད་བཅས་འཆལ་ཉོག་ཏུ་བསྲེས་ནས་བཀོད་འདུག

གསུམ། ཁྲིམས་ལུགས་རྒྱུན་ཤེས།

༡།​རྩོམ་འབྲི་བ་འདིའི་ཁྲིམས་ཡིག་ལོག་འགྲེལ་དང་། གོ་ལོག་བརྡ་ལོག་ཏུ་སོང་བའི་མུ་ཅོར་རྣམས་ཁྲིམས་ཞིབ་ཁང་ནས་སྤྱི་འཐུས་རྒྱུན་ལས་དང་བློ་བཟང་ཆོས་འབྱོར་ལ་བཏང་བའི་བཅད་ཁྲ་དང་། ཁྲིམས་ཞིབ་པ་གསུམ་གྱི་གསར་འགོད་གསལ་བཤད་ནང་བརྡ་སྟོན་འགྲེལ་བཤད་ཞིབ་ཚགས་གནང་འདུག་པ་དང་། དེ་བཞིན་མཁས་དབང་ཟམ་གདོང་རིན་པོ་ཆེར་ནོར་ཝེ་རླུང་འཕྲིན་ཁང་ནས་བཅར་འདྲིའི་བཀའ་ལན་དང་། ཁྲིམས་ལུགས་རིག་པར་སྦྱངས་པ་ཐོན་པའི་རྩོམ་པ་པོ་མང་པོ་ཞིག་གི་དཔྱད་རྩོམ། ལྷག་དོན་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཟུར་པ་ཐུན་མོང་གི་ཁྲིམས་དོན་ངོས་འཛིན་ཡོངས་བསྒྲགས་གནང་བའི་ནང་བདེན་རྫུན་དཀར་ནག་ཤན་འབྱེད་གསལ་པོ་བསྟན་ཟིན་པས། འདིར་བསྐྱར་ཟློས་ཀྱིས་གོ་བ་བསྐོན་འདོད་མ་བྱུང་།

༢།​ཆེས་མཐོའི་ཁྲིམས་ཞིབ་ཁང་ནི་བཅའ་ཁྲིམས་ཀྱི་བྱ་ར་བ་ཡིན་པའི་རྒྱུན་ཤེས་ལ་སྤྱི་འཐུས་བློ་བཟང་ཆོས་འབྱོར་དང་། སྤྱི་འཐུས་རྒྱུན་ལས་ནས་སྔ་ཕྱིར་རྩོད་ཤགས་བྱས་པ་དེར། ཁྲིམས་ཞིབ་ཁང་གི་བཅད་ཁྲ་གཉིས་ཀའི་ནང་ཕྲུ་གུར་འབྲི་ཀློག་བསླབས་པ་ལྟར་གོ་བརྡ་སྤྲད་འདུག་ཀྱང་། ད་དུང་དེའི་གོ་བ་ཙམ་ཡང་མ་ལོན་ན།བཅའ་ཁྲིམས་ཀྱི་དོན་ཚན་ཁ་ཤས་ཡར་འདེད་མར་འདྲེན་དང་། དངོས་བསྟན་གོ་དོན་ལ་མཐོ་བཤད་དམའ་བཤད་བྱས་པ་དེ་རིགས་ལ་དཔྱད་རིན་མ་མཐོང་།

༣།​མང་གཙོའི་ཀ་བ་གསུམ་ལྗིད་མཉམ་སྟངས་འཛིན་ཞེས་པ་ནི། སྒྲིག་འཛུགས་ཀྱི་གཞི་རིམ་སྒྲོམ་གཞིར་འཛིན་སྐྱོང་དང་། ཁྲིམས་བཟོ། ཁྲིམས་འཛིན་བཅས་བཀོད་སྒྲིག་བྱས་པ་དེ་དག་འགན་ཁུར་དང་། དབང་ཚད་འདྲ་མཉམ་ཡིན་པ་གང་ཞིག  ཕན་ཚུན་གཅིག་གིས་གཅིག་ལ་ལྟ་རྟོག་སྟངས་འཛིན་བྱེད་དགོས་པའི་དོན་ཏེ། འཛིན་སྐྱོང་བཀའ་ཤག་གིས་སྤྱི་འཐུས་ལྷན་ཚོགས་ལ་འགན་ཁུར་བའི་ཐོག་ནས་ལས་དོན་སྙན་སེང་དང་། དྲི་བར་ལན་འདེབས།  རྩིས་རྒྱག་འགན་ཁུར་བྱེད་དགོས་པ་དང་། སྤྱི་འཐུས་ལྷན་ཚོགས་ཀྱིས་བཟོས་པའི་ཁྲིམས་ལུགས་དང་སྒྲིག་གཞི་གང་ཡང་རུང་བ་ཞིག་བཅའ་ཁྲིམས་ཀྱི་དོན་ཚན་གང་རུང་ངམ། རྒྱལ་སྤྱིའི་ཁྲིམས་ལུགས་དང་ཡུལ་ཁྲིམས་ལ་འགལ་བ་ཡིན་ན། འགལ་བའི་ཆ་དེ་ཆེས་མཐོའི་ཁྲིམས་ཞིབ་ཁང་ནས་རྩ་འཛིན་མེད་པ་བཟོ་ཆོག་པ་བཅའ་ཁྲིམས་དོན་ཚན་ ༥ པ་དང་ ༦ པས་བསྐུར་ཡོད་པའི་གཞི་རིམ་གྱི་ངོས་འཛིན་འདི་ཙམ་ཡང་ཤེས་ཀྱི་མེད་ཚེ། དོ་བདག་གིས་རྩོད་སློང་མ་བྱས་གོང་དུ་ཁྲིམས་ལུགས་ཤེས་བྱར་སློབ་སྦྱོང་བྱེད་དགོས་པ་ལས། སྣོད་ཁ་སྦུབ་ཆགས་ན་གོ་རྟོགས་ཡར་རྒྱས་འགྲོ་ལམ་ཁེགས་འགྲོ་གི་རེད།

༤།​བཅའ་ཁྲིམས་དོན་ཚན་ ༤༦ པར་སྤྱི་འཐུས་ཀྱི་དམིགས་བསལ་ཐོབ་ཐང་དང་། དོན་ཚན་ ༥༨ པར་སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་ཞིབ་བརྩད་གཅོད་མི་ཆོག་པ། དེ་བསྟུན་དོན་ཚན་ ༥༤ ནང་ཁྲིམས་ཞིབ་པའི་ལས་དོན་བྱེད་ཕྱོགས་སྐོར་སྤྱི་འཐུས་ལྷན་ཚོགས་སུ་གྲོས་བསྡུར་བཀག་སྡོམ་གནང་ཡོད་པ་འདིས། མང་གཙོའི་ཀ་བ་གཉིས་ཀའི་ལས་དོན་བྱེད་ཕྱོགས་ཐོག་གཞན་གྱི་གནོན་ཤུགས་མེད་པར་རང་དབང་གི་སྒོ་ནས་ལས་འགན་ལག་བསྟར་ཐུབ་རྒྱུར་དམིགས་ཡོད་པས། དབང་ཆ་སུར་མཐོའི་ཚད་གཞི་ཐོག་ནས་སྐེ་དཀྱོགས་ཏེ་ལྟ་སྟངས་དེ་ནི་རྒྱ་མ་ཆག་ཧྲུལ་གྱི་སྟེང་དུ་ལྗིད་ཚད་འཇལ་འདོད་དང་གཅིག་མཚུངས་ཆགས་ཀྱི་རེད།

༥།​ང་ཚོ་ནི་གྲོས་ཚོགས་དབུས་སུ་བཞག་པའི་ལམ་ལུགས་ཡིན་ཞེས་པ་དེ་ནི་མཁས་པའི་བསམ་ཚུལ་ཙམ་ལས་གཞི་རྟེན་མེད། དཔེར་ན། ༡༩༩༡ ལོའི་བཅའ་ཁྲིམས་སུ། ཁྲིམས་ཡིག་བཟོ་འགོད་དང་། གཏན་འབེབས་ཀྱི་དབང་ཚད་ཁྲིམས་བཟོ་ལྷན་ཚོགས་ལ་ཡོད་པ་གང་ཞིག དེར་༸གོང་ས་༸སྐྱབས་མགོན་ཆེན་པོའི་ཆོག་མཆན་བསྩལ་བ་ནས་ནུས་ལྡན་ཆགས་ཀྱི་ཡོད་པ་དང་། ༸གོང་ས་མཆོག་གིས་གྲོས་ཚོགས་ནས་གཏན་འབེབས་བྱས་པའི་ཁྲིམས་ཡིག་ལ་མོས་མཐུན་མ་བྱུང་ཚེ་ཕྱིར་སློག་གནང་ཆོག་པ་དང་། དེ་བཞིན་གྲོས་ཚོགས་མ་ཚུགས་པའི་སྐབས་སུ་ཁྲིམས་ཡིག་གི་ནུས་པ་ལྡན་པའི་བཀའ་རྩ་ཁྱབ་བསྒྲགས་ཀྱི་སྐུ་དབང་ཁྱབ་བསྒྱུར་མཛད་ཆོག་པས། གྲོས་ཚོགས་དང་རྒྱལ་ཁབ་དབུ་ཁྲིད་དབར་ཁྲིམས་བཟོའི་དབང་ཚད་ཆ་བགོས་གནང་ཡོད་ཀྱང་། ཁྲིམས་ཞིབ་ཁང་གི་ཁྲིམས་ཡིག་བཟོ་འགོད་གཏན་འབེབས་གནང་བ་ཞིག་ལ་༸གོང་མཆོག་གིས་ཆོག་མཆན་བསྩལ་རྒྱུ་ལས་ཕྱིར་སློག་གནང་ལམ་མེད་པ་མ་ཟད། དེར་བཀའ་རྩ་ཁྱབ་བསྒྲགས་ཀྱི་ཆ་རྐྱེན་ཡང་བཞག་མེད་པ་ལྟ་བུ་རེད།

༦།​ཚོགས་གཙོ་པད་མ་འབྱུང་གནས་ཀྱིས་གྲོས་ཚོགས་སུ་བཅའ་ཁྲིམས་ཀྱི་མགོ་ནས་མཇུག་བར་ཁྲིམས་ཀྱི་ངོས་བཞེས་ཟེར་བ་ཞིག་མེད་ཚུལ་ཤོད་སྟངས་དང་།རྩོམ་འབྲི་པ་འདིའི་འབྲི་སྟངས་གཉིས་ཀས་ཁྲིམས་ཀྱིས་ངོས་བཞེས་ཞེས་པ་འདི་བྱ་རིམ་ཞིག་ཡིན་ནམ། ཡང་ན་དབང་ཚད་ཅིག་ཡིན་མིན་དབྱེ་བ་བཀར་ཤེས་མེད་པ་མ་ཟད། ཁྲིམས་ཞིབ་ཁང་གི་བཅད་ཁྲ་གཉིས་ཀའི་ནང་དེའི་ཐོག་རྩལ་དུ་བཏོན་ནས་གོ་བསྐོན་གནང་ཟིན་འདུག་པ་དེ་ད་དུང་མགོ་ཚོས་ཡོད་ཚོད་རེད་མི་འདུག

༧།​བཅའ་ཁྲིམས་དང་རྒྱལ་སྤྱིའི་ཁྲིམས་དང་འགལ་བའི་སྤྱི་ལྷན་གྱིས་གཏན་འབེབས་བྱས་པའི་ཁྲིམས་སྒྲིག་ཁག་དང་དེའི་ནང་གསེས་དོན་ཚན་ཁག་རྩ་འཛིན་མེད་པར་བཟོ་རྒྱུ་དང་། བོད་ཀྱི་ཡུལ་མིའི་ཐོབ་ཐང་དང་ལས་འགན་ལ་གནོད་འགལ་བྱེད་པོར་བཀོད་འདོམས། ཁྲིམས་ཞིབ་ཁང་གི་ངོ་བོ་དང་འགན་དབང་བཅས་བཅའ་ཁྲིམས་དོན་ཚན་ ༥ པ་དང་། དོན་ཚན་ ༡༤ པ་དང་། དོན་ཚན་༦༦ པར་གསལ་པོར་བཀོད་འདུག་པ་དེ་དག་ལག་བསྟར་གྱི་བྱ་རིམ་རྣམས་བཅའ་ཁྲིམས་སུ་བཀོད་མེད་པ་བདེན་པ་དང་། འགོད་སྲོལ་མེད་ལ། འགོད་དགོས་དོན་ཡང་མེད་པ་ནི། ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་དང་། འགྲོ་ལུགས་བཟོ་རྒྱུ་བཅའ་ཁྲིམས་དོན་ཚན་ ༦༧ པའི་ནང་ཆེས་མཐོའི་ཁྲིམས་ཞིབ་ཁང་ལ་བསྐུར་ཡོད་པས། ཆེས་མཐོའི་ཁྲིམས་ཞིབ་ཁང་ལ་རྩ་འཛིན་ཁྲིམས་ཡིག་བཟོ་འགོད་གཏན་འབེབས་ཀྱི་འགན་དབང་གནང་ཡོད་པ་དེའི་ཁོངས་སུ་ཁྲིམས་ཡིག་གི་བྱ་རིམ་ཡང་བཟོ་མི་ཆོག་པའི་རྩོད་སློང་བྱེད་པ་ནི་བཅའ་ཁྲིམས་རིན་པོ་ཆེར་བཙན་གཡེམ་བྱེད་པ་དང་གཅིག་མཚུངས་རེད།

༨།​ཆེས་མཐོའི་ཁྲིམས་ཞིབ་ཁང་གི་བཅད་ཁྲའི་ནང་བཅའ་ཁྲིམས་ཀྱི་དགོངས་དོན་ལ་འགྲེལ་བཤད་གནང་སྐབས། ༡༩༦༣ ལོའི་བོད་ཀྱི་རྩ་ཁྲིམས་དང་། རྒྱ་གར་དང་། ཨ་རི། དབྱིན་ཇི་བཅས་ཀྱི་ཁྲིམས་སྲོལ་འགྲོ་ལུགས་བཅས་མཉམ་སྦྲགས་ཀྱིས་མཐར་ཆགས་སུ་བཀོད་འདུག་པ་དེར་ཞྭ་དཔེ་ལྷམ་འགེབས་ཞེས་འཕྱ་བ་ནི་ཁོང་དགོད་གཏིང་ནས་ཤོར་བའི་གླེན་རྟགས་ཤིག་སྟེ། ང་ཚོའི་བཅའ་ཁྲིམས་ཀྱི་གཞི་ཁུངས་གཙོ་བོ་ནི་ ༡༩༦༣ ལོའི་བོད་ཀྱི་རྩ་ཁྲིམས་ཡིན་པ་དང་། དེ་ཡང་རྒྱུན་ཆགས་ཁྲིམས་རྒྱུད་ common law ལ་གཏུགས་ཡོད་པའི་དོན་དངོས་དེའི་ཟུར་ཙམ་ཤེས་ཡོད་ན། ཆུ་མགོ་གངས་ལ་གཏུགས་ཡོད་མ་རེད་ཅེས་གནམ་ཟུག་རྒྱག་དགོས་དོན་མེད།

བཞི། སུན་འབྱིན་པ།

༡།​རྩོམ་འབྲི་པ་འདིས་ཁྲིམས་ཞིབ་ཁང་ཁ་དན་ཚིག་ལ་མ་གནས་པའི་དཔེ་མཚོན་དུ། དང་པོ་གདམ་བྱ་འདེམས་བྱེད་གཉིས་ཀ་འཕྲོག་རྒྱུ་ཡིན་ལུགས་དང་། ཕྱིས་སུ་འདེམས་བྱེད་མ་གཏོགས་བཀག་མེད་ཚུལ་བཀོད་པ་ནི་བརྡ་ཐོ་དང་བཀའ་ཁྱབ་ཀྱི་དབྱེ་བ་མ་ཤེས་པ་དང་། ཁྲིམས་ཡིག་གི་མགོ་སྔ་མ་རྟོགས་པའི་རྟགས་བསྟན་པ་ཞིག་སྟེ། ཁྲིམས་ཞིབ་ཁང་གིས་སྤྱི་འཐུས་རྒྱུན་ལས་ལ་ཁྲིམས་མཐུན་བཟོ་དགོས་པའི་བཀའ་ཁྱབ་དང་པོ་དེར་རྒྱུན་ལས་ཀྱིས་ངོས་ལེན་མ་བྱས་པར། སྤྱི་འཐུས་རྒྱུན་ལས་ཀྱིས་ཁྲིམས་འགལ་གང་ཡང་བྱས་མེད་པའི་གསལ་འདེབས་ཞེས་པ་ཞིག་༢༠༢༠།༨།༢༥ ཉིན་ཁྲིམས་ཞིབ་ཁང་ལ་ཕུལ་བར་བརྟེན། ཁྲིམས་ཞིབ་ཁང་ནས་༢༠༢༠།༨།༢༧ ཉིན་གསལ་འདེབས་ཡི་གེ་དེ་ཕྱིར་སློག་གི་བརྡ་ཐོ་བཏང་འདུག་པ་དང་། བརྡ་ཐོ་གཉིས་པ་ ༢༠༢༠།༨།༣༡ ཉིན་བཏང་བ་དེའི་ནང་སྤྱི་མང་གཏུག་བཤེར་ཁྲིམས་ཡིག་དོན་ཚན་ ༢༨ པ་དྲངས་ནས་གདམ་བྱ་འདེམས་བྱེད་འཕྲོག་སྲིད་པའི་ཉེན་བརྡ་སྤྲད་པ་དེར་རྒྱུན་ལས་ཀྱིས་ངོས་ལེན་བྱས་ཏེ། ༢༠༢༠།༩།༡ཉིན་ཁྲིམས་ཀྱི་བྱ་རིམ་བརྩི་མེད་ཡོང་བའི་ཞུ་སྐུལ་ཞེས་ཁྲིམས་ཞིབ་ཁང་གི་ཁྲིམས་འོག་ཏུ་ནོན་པའི་རྣམ་འགྱུར་གསལ་པོ་བསྟན་ཡོད། དོན་དངོས་སུ་བརྡ་ཐོ་གཏོང་མཁན་ཁྲིམས་དྲུང་ཡིན་པ་དང་། བཀའ་ཁྱབ་གཏོང་མཁན་ཁྲིམས་ཞིབ་པ་ཡིན་དགོས་ལ། ཁྲིམས་དྲུང་གི་བརྡ་ཐོ་དེ་ནི་ཁྲིམས་ཞིབ་པའི་བཀའ་ཁྱབ་ལག་བསྟར་ཡོང་བའི་ཆེད་དུ་བཏང་བ་ཞིག་ཡིན་པས། ཁྲིམས་དྲུང་གི་བརྡ་ཐོར་བརྩི་བཀུར་ཞུས་ཏེ་ངོས་བཞེས་བརྩི་མེད་ཡོང་བའི་ཞུ་སྐུལ་ཡི་གེ་ཕུལ་བ་དང་། ཁྲིམས་ཞིབ་པའི་བཀའ་ཁྱབ་གསུམ་ཀར་ཉམས་ལེན་ཞུས་མེད་པའི་དོན་དངོས་སྦས་ཏེ། ད་དུང་ཁྲིམས་ཞིབ་ཁང་ཁ་དན་ལ་མ་གནས་ཚུལ་ཀླན་འདེབས་དང་། (ཆད་འགེལ་)ཆག་ཡང་གཏོང་རྒྱུའི་ཁྲིམས་སྒྲིག་གི་ལམ་ཁ་མེད་ལུགས་སྒྲོགས་པ་ནི། རྐུ་མས་རྒྱུ་བདག་ལ་རྒྱུ་ནོར་ཆ་ཚང་རྐུ་རུ་མ་བཅུག་པའི་རྩོད་གླེང་བྱེད་པ་དང་འདྲ་མཚུངས་རེད།

༢།​ཁྲིམས་ཞིབ་ཁང་ནས་བཀའ་ཁྱབ་སྔ་རྗེས་གསུམ་དང་། བརྡ་ཐོ་སྔ་རྗེས་གཉིས་བཏང་འདུག་པ་དང་། དེ་དག་གི་ནང་སྤྱི་འཐུས་རྒྱུན་ལས་ལ་གསལ་བཤད་ཀྱི་གོ་སྐབས་སྤྲད་ཡོད་པ་མ་ཟད། ད་དུང་ཁྲིམས་ཡིག་ངོ་སྤྲོད་དང་། བྱ་རིམ་ལམ་སྟོན་གནང་སྟེ་རྒྱུན་ལས་ ༡༡ ཁྲིམས་ཞིབ་ཁང་གི་ཁྲིམས་འོག་ཏུ་བཅུག་ཐོག  སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཅིག་ཕྱིར་བསྡུ་བྱས་པ་ཡིན་། བཅའ་ཁྲིམས་དོན་ཚན་ ༤༠ པའི་དགོངས་དོན་ལ་བརྡལ་བཤིག་བཏང་བ་ཡིན་པས། དུས་བཀག་ནང་ཁྲིམས་མཐུན་གྱི་ཐབས་ལམ་བསྟེན་གལ་བཀའ་ཁྱབ་བཏང་བའི་བརྒྱུད་རིམ་རྣམས་ཁྲིམས་ཞིབ་ཁང་གི་དྲ་རྒྱ་དང་ངོ་དེབ་ནང་ཡིག་ཆ་འགོད་འཇུག་གནང་འདུག་པ་དེ་དག་ནང་གསལ་པོ་བཀོད་འདུག་པས། སྤྱི་འཐུས་རྒྱུན་ལས་ལ་དག་སེལ་གྱི་གོ་སྐབས་གང་ཡང་མི་སྤྲོད་ཟེར་བ་ནི་དཀར་ནག་གོ་ལྡོག་ཆགས་འདུག

༣།​ཁྲིམས་ཞིབ་་རྣམ་པའི་གསལ་བཤད་དོན་ཚན་ ༦ ནང་། སྤྱི་འཐུས་ཚོགས་གཙོས་གྲོས་ཚོགས་ཀྱི་བྱ་རིམ་ཚུལ་མིན་དུ་སྤྱད་པ་དང་། སྤྱི་འཐུས་ལོག་འཁྲིད་བྱས་མཐར། ་་་ཁྲིམས་ལུགས་དབང་འཛིན་རྨང་ནས་བསྒྱེལ་ཞེས་བཀོད་འདུག་པ་དང་། དེའི་སྒྲུབ་བྱེད་དུ། དོན་ཚན་ ༤ པར། སྤྱི་འཐུས་ཚོགས་གཙོས་ཁྲིམས་ཞིབ་པ་ཆེ་བར་ཐུག་འཕྲད་ཀྱི་བརྒྱུད་རིམ་དང་། ཁྲིམས་ཁང་གིས་བཀའ་ཁྱབ་བཏང་བའི་བརྒྱུད་རིམ། ཁྲིམས་ཞིབ་ཁང་གི་ཐག་གཅོད་བཀའ་ཁྱབ་ཀྱི་ཀུན་སློང་བཅས་པར་དངོས་བདེན་མ་ཡིན་པའི་གསལ་བཤད་ཇི་སྙེད་བྱས་པ་མ་ཟད། ཁྲིམས་ཀྱིས་ངོས་བཞེས་ལ་འགྲེལ་ལོག་དང་། སྒྲིག་གཞིར་ལྟོས་མེད་ཀྱི་སྒོ་ནས་གསང་བའི་འོས་བསྡུ་བྱེད་དུ་བཅུག་ཅེས་སོགས་བཀོད་འདུག་པ་ལས། ལོག་ཁྲིད་བྱེད་མཁན་སྤྱི་འཐུས་རྒྱུན་ལས་ཡིན་སྐོར་གསལ་མེད་པས། རྩོམ་འབྲི་པས། སྤྱི་འཐུས་རྒྱུན་ལས་ནས་སྤྱི་འཐུས་རྣམས་ལོག་འཁྲིད་བྱས་ཚུལ་བཀོད་འདུག སྤྱི་འཐུས་རྣམས་ར་ལུག་ལྟ་བུ་གར་དེད་ཆོག་པ་ཞིག་ཡིན་ནམ། འདི་ལ་ཁུངས་སྐྱེལ་ཅི་ཞིག་ཡོད་ཟེར་བ་ནི་ཨ་མ་དང་ར་མ་འཁྲུལ་བའི་སེམས་འཚོ་མ་ཟིན་པའི་གནས་སྐབས་ཀྱི་འཆོལ་བཤད་ཅིག་ཡིན་པ་འདྲ།

༤།​ཆེས་མཐོའི་ཁྲིམས་ཞིབ་ཁང་ནས་ཁྲིམས་ཀྱིས་ངོས་བཞེས་ཀྱི་བྱ་རིམ་འདི་ཁྲིམས་ཡིག་ནང་གཏན་འབེབས་གནང་བ་ནི་རང་རེའི་ཁྲིམས་ལུགས་དབང་འཛིན་གྱི་ལོ་རྒྱུས་ཀྱི་ལེ་ཚན་གལ་གནད་ཆེན་པོ་ཞིག་ཡིན་པ་སྨོས་མེད་ཡིན་ནའང་།ཁྲིམས་ཀྱིས་ངོས་བཞེས་གནང་ཟིན་པའི་ཁ་མཆུ་དེར་བརྡ་ཐོ་དང་བཀའ་ཁྱབ་གཏོང་རྒྱུའི་འགྲོ་ལུགས་གསལ་ཙམ་ཞིག་དགོས་པ་དང་། རྩོད་བཤད་སྐབས་སུ་གཞི་རྩའི་ཐོབ་ཐང་ངམ། ཁྲིམས་ཀྱི་ཐོབ་ཐང་། སྤྱི་པའི་ཁེ་ཕན་ལ་གནོད་འགལ་བྱེད་མཁན་རྩོད་ལན་པར་གདོང་ལེན་བྱེད་མཁན་གྱིས་མཚོན་པའི་འགྲོ་སྟངས་ཞིབ་གསལ་ཞིག་བཟོ་ཐུབ་པ་ཡིན་ན། བཙན་བྱོལ་སྤྱི་ཚོགས་ནང་འབུས་མ་ཐག་པའི་ཁྲིམས་ཀྱིས་དབང་བསྒྱུར་གྱི་མྱུ་གུ་རྩ་ཆེན་འདི་རྩ་བ་ཟུག་ཅིང་ལོ་འདབ་རྒྱས་པའི་གྲོགས་རྐྱེན་དུ་འགྲོ་རེ་སྙམ་པ་ཞོར་འཕྲོས་སུ་ཐལ་བའོ། །

འབྲེལ་ཡོད་རྩོམ་ཡིག https://tibettimes.net/2021/04/16/212267/

མཆན། གོང་བཀོད་བསམ་ཚུལ་རྩོམ་ཡིག་དེ་ནི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།