ཨ་རིས་ཐབས་ཇུས་ལྡན་པའི་ཁ་གཏད་ཁྲིམས་འཆར་ཞེས་རྒྱ་ནག་ལ་ཕྱི་སྲིད་ལས་དོན་ཐོག་ནས་ཁ་གཏད་གཅོག་ཐབས་ཀྱི་ཁྲོད་བོད་དང་ཧོང་ཀོང་། ཡུ་གུར་དང་ཐའེ་ཝན་བཅས་ཀྱི་གནད་དོན་ཚུད་ཡོད་འདུག
དེ་རིང་རྒྱ་གར་ཧིན་རྡུན་སི་ཐན་གསར་ཁང་ཐོག་སྤེལ་བའི་གནས་ཚུལ་ལྟར་ན། ཨ་རིའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གིས། ཤོག་ངོས་ ༢༨༣ ཅན་གྱི་རྒྱ་ནག་ལ་ཁ་གཏད་གཅོག་ཐབས་ཀྱི་ཁྲིམས་འཆར་ཞིག་ངོ་སྤྲོད་བྱས་ཏེ། ཨ་རིའི་གྲོས་ཚོགས་གོང་འོག་གཉིས་དང་སྲིད་འཛིན་བྷའེ་ཌན་མཆོག་ནས་རྒྱབ་སྐྱོར་བཀའ་འཁྲོལ་འཐོབ་རྒྱུར་རེ་བ་འཆང་བཞིན་ཡོད་པ་དང་བསྟུན། ཁྲིམས་འཆར་དེའི་ནང་བོད་དང་ཡུ་གུར། ཐའེ་ཝན་དང་ཧོང་ཀོང་བཅས་ཀྱི་གནས་སྟངས་ཐད་རྒྱ་ནག་ལ་གནོད་ཤུགས་སྤྲོད་རྒྱུ་མཚོན་པའི་དཔལ་འབྱོར་དང་ས་ཁམས་ཆབ་སྲིད་རིག་པའི་ཐོག་ནས་རྒྱ་ནག་ལ་སྔར་ལྷག་ཁ་གཏད་གཅོག་འཆར་ཡོད་འདུག
དེ་འབྲེལ་གནས་ཚུལ་ནང་། ཨ་རིས་དམངས་གཙོའི་ཆེ་མཐོང་གཙུག་ཏུ་བཀུར་ཏེ། རྒྱ་ནག་གིས་བོད་དང་ཧོང་ཀོང་། ཡུ་གུར་བཅས་ནང་རྣམ་པ་འདྲ་མིན་ཐོག་ནས་དྲག་གནོན་བྱེད་བཞིན་པ་མཚམས་འཇོག་ཡོང་ཐབས་དང་། དམིགས་བསལ་ཨ་རིའི་གོ་ལའི་གསར་འགྱུར་ལས་དོན་ཚོགས་པས། རང་དབང་ལྡན་པའི་གསར་ཁང་ཁག་སྤྱི་དང་བྱེ་བྲག་ཏུ་ཨེ་ཤ་ཡ་རང་དབང་རླུང་ཁང་གི་བོད་སྐད་དང་རྒྱ་སྐད། དེ་བཞིན། ཡུ་གུར་དང་ཧོང་ཀོང་གི་སྡེ་ཚན་བཅས་ལ་རོགས་དངུལ་ཁ་སྣོན་གྱིས། རྒྱ་ནག་གིས་རྒྱལ་སྤྱིའི་སྟེང་གནས་ཚུལ་རྫུན་བཟོའི་ལམ་ནས་ནུབ་ཕྱོགས་རྒྱལ་ཁབ་ཁག་ཏུ་ཤུགས་རྐྱེན་སྤྲོད་ཀྱིན་ཡོད་པ་མཚམས་འཇོག་བྱེད་ཀྱི་ཡོད་སྐོར་བརྗོད་འདུག
ཁྲིམས་འཆར་དེ་ནི་ཨ་རིའི་སྲིད་འཛིན་བྷའེ་ཌན་གཞུང་གི་རྒྱ་ནག་ལ་ཁ་གཏད་གཅོག་ཐབས་ཀྱི་སྲིད་ཇུས་ཐོག་མ་དེ་ཆགས་སྲིད་ཀྱི་ཡོད་པ་ལྟར། ཁྲིམས་འཆར་ནང་ཨ་རི་དང་ཡུ་རོབ་མཉམ་འབྲེལ་མཐུན་ཚོགས་ཐུན་མོང་ནས། རྒྱ་ནག་གི་སྒེར་གཅོད་དབང་སྒྱུར་གྱི་མ་དཔེ་འཛམ་གླིང་ནང་ཁྱབ་བརྡལ་མཚམས་འཇོག་དང་། རྒྱ་ནག་གཞུང་གིས་བོད་དང་ཧོང་ཀོང་། ཡུ་གུར་བཅས་ནང་དྲག་གནོན་སྲིད་ཇུས་ལག་བསྟར་བྱེད་བཞིན་པར་ཨ་རི་དང་ཡུ་རོབ་མཐུན་ཚོགས་གཉིས་ནས་དོ་མཉམ་འགན་བཞེས་ཀྱིས་རྒྱ་ནག་ལ་ཁ་གཏད་གཅོག་དགོས་སྐོར་སོགས་བརྗོད་ཡོད་འདུག
ཁྲིམས་འཆར་ནང་། ཨ་རིས་རང་གི་ཁྲོམ་རའི་ནང་ཡོད་པའི་རྒྱ་ནག་གི་བཟོ་གྲྭ་ཁག་ལ་ལོ་རེར་བསྐྱར་ཞིབ་བྱས་ཏེ། བཟོ་གྲྭ་ཁག་དེ་དག་ནས་བོད་དང་ཡུ་གུར་གཉིས་ཀྱི་གཙོས་རྒྱ་ནག་ཏུ་ཡོད་པའི་གྲངས་ཉུང་མི་རིགས་དང་དེའི་ཆོས་དང་རིག་གཞུང་ལ་དྲག་གནོན་རམ་འདེགས་བྱས་ཡོད་མེད་ཞིབ་འཇུག་མཐིལ་ཕྱིན་པ་གནང་རྒྱུ་ཡིན་ཞིང་། དམིགས་བསམ་ས་ཁུལ་ཆབ་སྲིད་ཀྱི་ཐོག་ནས་ཨ་རིས་བོད་བརྒྱུད་ནང་བསྟན་གྱི་རྗེས་སུ་འབྲངས་པའི་བོད་མི་རྣམས་ཀྱི་དམངས་གཙོ་གོང་མཐོར་དང་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ཡིན་སྐོར་སོགས་བཀོད་ཡོད་པ་རེད།
ཁྲིམས་འཆར་འདིའི་ཐད། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཀྲོའོ་ལི་ཅིན་ཟེར་བས། ཨ་རིའི་མི་ཁག་ཅིག་གིས་གྲང་དམག་སྐབས་ཀྱི་བསམ་བློ་དང་ཁེ་མེད་ཀྱི་ཁ་ཕྱོགས་དོར་ཏེ་རྒྱ་ནག་དང་མཉམ་འབྲེལ་བྱ་རྒྱུ་ལས་ལྡོག་སྟེ། རྒྱ་ནག་གི་མངོན་འདོད་དང་བདག་དབང་ལ་གནོད་གཞིར་གྱུར་བའི་ཁྲིམས་འཆར་འདོན་རྒྱུ་མཚམས་འཇོག་དགོས། ཞེས་ལན་འདེབས་བྱས་ཡོད་ནའང་། ཁྲིམས་འཆར་འདི་ལ་ཨ་རིའི་གྲོས་ཚོགས་གོང་འོག་གཉིས་ཀྱི་འཐུས་མི་མང་པོས་རྒྱབ་སྐྱོར་གནང་གི་ཡོད་པ་དང་། ཁྲིམས་འཆར་གྱི་ཁ་བྱང་ལ་ཐབས་ཇུས་ལྡན་པའི་ཁ་གཏད་ཁྲིམས་འཆར་ཞེས་བཏགས་ཡོད་འདུག
སྤྱིར་ཁྲིམས་འཆར་འདི་ཐོག་མར་འདོན་གནང་མཁན་ཨ་རིའི་ཕྱི་སྲིད་ལས་དོན་ཚོགས་ཆུང་གི་ཚོགས་གཙོ་བྷའོ་བྷི་(Bob Menendez) ལགས་དང་ཆཱག་ཤའོ་མཱར་(Chuck Schumer) ལགས་གཉིས་ཀྱི་གཙོས་གྲོས་ཚོགས་གོང་འོག་གཉིས་ཀྱི་འཐུས་མི་ཡོད་པ་དང་། ཟླ་འདིའི་ཕྱི་ཚེས་ ༡༤ ཉིན་ཨ་རིའི་གྲོས་ཚོགས་ཀྱི་རྒྱུན་ལས་ནང་ཁྲིམས་འཆར་འདིའི་ཐོག་ཉན་ཞིབ་གྲོས་མོལ་ཚོགས་ཡོད་འདུག་ལ། མི་འགྱངས་པར་ཨ་རིའི་གྲོས་ཚོགས་གོང་འོག་གཉིས་ནང་གླེང་སློང་བྱ་རྒྱུ་འདུག
གསར་འགོད་པ། སྐལ་བཟང་སྦྱིན་པ།
