ར་མ་འཕག་ནས་ར་ཚང་བཤིག་ཐུབ་ཀྱི་མ་རེད་ཟེར།

ཁྲིམས་ལུགས་རིག་པ་བ་བློ་བཟང་ཆོས་འབྱུང་།

དེང་སང་སྤྱི་འཐུས་ཁག་ཅིག་གིས་རྙོག་དྲ་སློང་གི་ཡོད་པའི་གནད་དོན་ཁ་ཤས་ཐོག་ཁྲིམས་དཔོན་ཆེ་བ་ཟུར་པ་ཞིག་ལ་བཀའ་འདྲི་ཞུས་པའི་བཀའ་ལན་ཕྱོགས་བསྒྲིགས་ཞུས་པ་གཤམ་གསལ།

༡། ཁྲིམས་ཞིབ་པ་གསུམ་སྐད་གཏོང་མཁན་མེད་ནས་གོ་གནས་ཐོག་རང་འཇགས་ཡོང་བ་རེད་དམ།

མ་རེད། ཁྲིམས་ཞིབ་པ་གསུམ་སྐད་གཏོང་མཁན་བཀའ་ཤག་སྐབས་ ༡༥ པ་དང་། སྤྱི་འཐུས་སྐབས་ ༡༦ པ་རེད། སྲིད་སྐྱོང་བློ་བཟང་སེང་གེ་ལགས་ཀྱིས་ཁྲིམས་ཞིབ་པ་གསུམ་གྱི་ཚབ་གསར་འོས་མི་རག་མ་སོང་གསུངས་ཡོད་པ་དང་། འདེམས་སྒྲུག་ཚོགས་ཆུང་གི་ཚོགས་མི་བཀའ་ཟུར་ཚེ་རིང་ཕུན་ཚོགས་ལགས་ཀྱིས་ཀྱང་འོས་མི་མ་རག་པའི་གནས་ཚུལ་ཞིབ་ཕྲ་གསུངས་ཡོད་རེད། འོས་མི་མ་རག་ན་ཁྲིམས་ཞིབ་པ་གསུམ་གྱི་ཚབ་གསར་འདེམས་བསྐོ་བྱེད་ཀྱི་ཡིན་ཟེར་བའི་བྱ་རིམ་དེའི་ཐོག་གོམ་པ་རྒྱག་ས་མེད་པ་ཆགས་པ་རེད། སྤྱི་འཐུས་ལྷན་ཚོགས་ནས་ཚོགས་འདུ་འཕར་མ་སྐོང་མ་ཐུབ་པ་རེད། སྤྱི་འཐུས་ཚོས་ཁྲིམས་ཞིབ་པ་འཕོ་འགྱུར་གྱི་གྲོས་ཆོད་བཞག་ཐུབ་ཡོད་ནའང་། བོད་མིའི་སྒྲིག་འཛུགས་ཀྱི་དབུ་ཁྲིད་ཚོའི་དམ་བཅའ་འབུལ་ཡུལ་སུ་ཡིན་བཅའ་ཁྲིམས་ནང་ཆ་རྐྱེན་བཟོ་ཐུབ་ཡོད་མ་རེད། དེ་ལྟར་ཕྱིན་ན་སྲིད་སྐྱོང་དང་བཀའ་བློན། སྤྱི་འཐུས་ཚང་མ་དམ་བཅའ་འབུལ་ཡུལ་མེད་པ་ཆགས་ནས། བོད་མིའི་སྒྲིག་འཛུགས་འཐོར་འགྲོ་གི་རེད། དེ་ལྟར་བཀའ་ཤག་སྐབས་ ༡༥ པ་དང་། སྤྱི་འཐུས་སྐབས་ ༡༦ པ་གཉིས་ཀར་རྙོག་དྲ་དེ་གཙང་མ་བཟོ་བའི་གོ་སྐབས་ཤོར་ཚར་བ་རེད། བྱས་ཙང་། ཁྲིམས་ཞིབ་པ་གསུམ་གོ་གནས་ཐོག་སྐད་གཏོང་མཁན་བཀའ་སྤྱི་གཉིས་རེད།

༢། ཁྲིམས་ཞིབ་པ་གསུམ་གྱིས་གྲོས་ཆོད་ཡིག་ཆ་ཨང་ ༣༩ པ་དེ་བརྩི་དགོས་ཀྱི་མ་རེད་དམ།

ཡིག་ཆ་དེ་རྩིས་མེད་བཏང་ཟིན་པ་རེད། ཁྲིམས་ཞིབ་པ་གསུམ་གྱིས་ལས་འགན་བཤོལ་བའི་གསལ་བསྒྲགས་ནང་། གྲོས་ཆོད་དེ་ཁྲིམས་ལུགས་ཀྱི་གཞི་རྟེན་མེད་པ་དང་། བྱ་རིམ་མེད་པར་ལག་བསྟར་བྱས་པ་ཞིག་རེད་ཅེས་གསུངས་འདུག ཁྲིམས་ལུགས་ཀྱི་གཞི་རྟེན་མེད་པ་དང་། བྱ་རིམ་མེད་པའི་ཐག་གཅོད་གང་ཞིག་ཡིན་ཡང་ནུས་མེད་རེད། ཁྲིམས་འགལ་རེད། དེ་ག་རང་ནས་རྩིས་མེད་བཏང་བ་རེད། ད་དུང་སྤྱི་འཐུས་ཚོགས་གཙོས་གྲོས་ཚོགས་ཀྱི་བྱ་རིམ་ཚུལ་མིན་དུ་སྤྱད་པ་དང་། སྤྱི་འཐུས་རྣམས་ལོག་ཁྲིད་བྱས་ནས་གྲོས་ཆོད་བཞག་པ་རེད་གསུངས་འདུག་ཨ། དེ་འདྲ་ཡིན་དུས། ཡིག་ཆ་དེ་ལ་ནུས་པ་ཡོད་ས་འགྲོ་གི་མ་རེད།

༣། སྤྱི་འཐུས་ཉི་ཤུ་རྩ་གྲངས་ཤིག་གིས་ཁྲིམས་ཞིབ་པ་གསུམ་ལ་མཛད་འགན་བཞེས་དགོས་པའི་སྙན་ཞུ་ཕུལ་བ་དེར་ནུས་པ་ག་རེ་ཡོད་རེད།

རྣམ་འགྱུར་བསྟན་པ་ཙམ་རེད། སྤྱི་འཐུས་ཚོགས་གཙོ་དང་རྒྱུན་ལས་གཅིག་གིས་རྩ་དགོངས་ཞུས་རྗེས། གྲོས་ཆོད་དེ་སྤྱི་འཐུས་རྩ་འབོར་གསུམ་ཆ་གཉིས་ཡན་གྱིས་ཐག་བཅད་པ་ཡིན་ཟེར་བ་དེ་སྦོ་ལུག་པ་རེད། ཁོ་གཉིས་ཀ་གྲོས་ཆོད་ཡིག་ཆ་དེ་འཇོག་སྐབས་ཀྱི་གཏེ་དཔོན་རེད། ཁོ་གཉིས་ཀས་དགོངས་ཞུའི་རྒྱུ་མཚན་དུ་གྲོས་ཆོད་ཡིག་ཆ་དེ་བགྲངས་ཡོད་རེད། དགོངས་པ་ཞུས་ཚར་ནས་ཡིག་ཆ་དེའི་ཐོག་ལག་པ་འཆང་རྒྱུའི་ཐོབ་ཐང་བརླགས་ཚར་བ་རེད། གྲོས་ཚོགས་སྐོང་མ་ཐུབ་པ་ལ་བརྟེན་ནས། སྤྱི་འཐུས་ ༢༡ གིས་ཁྲིམས་ཞིབ་ཁང་ལ་སྙན་ཞུ་ཕུལ་བ་དེས་འཕོ་འགྱུར་གྱི་གྲོས་ཆོད་དེར་ངོས་ལེན་མེད་པའི་རྣམ་འགྱུར་གསལ་པོ་ཞིག་བསྟན་པ་རེད། དམའ་མཐར་ཡང་སྤྱི་འཐུས་ལྷན་ཚོགས་ཀྱི་རྩ་འབོར་གྱི་བརྒྱ་ཆ་ ༥༠ ཡན་ནས་གྲོས་ཆོད་དེར་ངོས་འཛིན་གནང་སྟངས་ག་འདྲ་ཡིན་མིན་སྤྱི་ཚོགས་ནང་གསལ་པོ་བཟོས་པ་རེད། དེ་ཙམ་ཞིག་རེད།

༤། སྤྱི་འཐུས་རྒྱུན་ལས་དང་། ཁྲིམས་ཞིབ་ཁང་ནས་ལས་འགན་བཤོལ་བ་ཟེར་བ་དེར་གོ་བ་ལེན་སྟངས་འདྲ་གི་མི་འདུག སྤྱི་འཐུས་རྒྱུན་ལས་ཀྱི་གསལ་བསྒྲགས་ནང་ལས་ཐོག་ཁྲིམས་ཞིབ་པ་གསུམ་ལ་ཟུར་པ་ཞེས་ལབ་འདུག

སྤྱི་འཐུས་རྒྱུན་ལས་ཀྱིས་ཚོར་བའི་སྐད་ཆ་ཤོད་ཀྱི་ཡོད་རེད། ཁྲིམས་ཞིབ་པ་གསུམ་གྱིས་ཁྲིམས་ལུགས་ཀྱི་གོ་དོན་འགྲེལ་བརྗོད་གནང་གི་ཡོད་རེད། སྤྱི་འཐུས་རྒྱུན་ལས་ལ་ཁྲིམས་ཡིག་འགྲེལ་བརྗོད་བྱེད་པའི་དབང་ཚད་ཡོད་མ་རེད། ཁྲིམས་ཞིབ་པས་ཁྲིམས་དོན་ལ་འགྲེལ་བརྗོད་གནང་བ་དེ་ཁྲིམས་ཡིག་ཆགས་ཀྱི་རེད། སྤྱི་མང་གཏུག་བཤེར་ཁྲིམས་ཡིག་དོན་ཚན་ ༧༩ ནང་གསལ་བ་ལྟར། ཁྲིམས་ཞིབ་བྱེད་མཁན་ཁྲིམས་ཞིབ་པ་དེར་གྱོད་ཡ་སུ་ཐད་ནས་ཕྱོགས་ལྷུང་གི་སྙན་ཞུ་ཕུལ་ན། ཁྲིམས་ཞིབ་པ་དེས་ལས་འགན་བཤོལ་དགོས་ཀྱི་རེད་ལ། ཁྲིམས་ཞིབ་པའམ། དེའི་འདོད་གཅིག་ནང་མིའམ་ཉེ་དུ། དགའ་ཉེ་གྲོགས་སྦྲེལ། དགྲ་ཟླ་ཁ་གཏད་གང་རུང་ཞིག་ཁ་མཆུ་དེའི་གྱོད་ཡ་ཆགས་པའམ། ཡང་ན་དེ་དག་སུ་རུང་ཞིག་ཁ་མཆུའི་གནད་དོན་དེར་ཕན་གནོད་ཆེན་པོའི་འབྲེལ་བ་ཆགས་པའམ། ཁྲིམས་ཞིབ་པས་ཁ་མཆུ་དེའི་གནད་དོན་ཐོག་གྱོད་ཡ་ཞིག་ལ་ཁྲིམས་རྩོད་པའམ་ངོ་ཚབ་བྱས་མྱོང་བའམ། ཁྲིམས་དོན་སློབ་སྟོན་དང་། རྣམ་པ་ཅི་རིགས་ཀྱི་འགན་འཁུར་བླངས་མྱོང་བའམ། ཁྲིམས་ཞིབ་པ་དེ་ཁ་མཆུ་དེའི་དཔང་པོ་ཆགས་པ་ཡིན་ན། ཁྲིམས་ཞིབ་པའི་ལས་འགན་བཤོལ་དགོས་ཞེས་བཀོད་འདུག་ཨ། དེའི་གོ་དོན་དེ་ཁ་མཆུ་དེ་རང་ལ་ལག་པ་འཆང་ཆོག་གི་མ་རེད་ཟེར་གྱི་ཡོད་རེད་མ་གཏོགས། གནས་དབྱུང་གཏོང་དགོས། རྩ་དགོངས་ཞུ་དགོས་གསུང་གི་ཡོད་མ་རེད། ཡིན་ནའང་བཅའ་ཁྲིམས་ནང་སྤྱི་འཐུས་ཚོགས་གཙོ་དང་ས་གནས་འཐུས་ཚོགས་ཀྱི་སྐོར་གསུང་སྐབས་ལས་འགན་བཤོལ་དགོས་གསུངས་པ་དེ་རྩ་དགོངས་ཞུ་དགོས་པའི་གོ་དོན་རེད། དེའི་སྐོར་ཁྲིམས་ཞིབ་པ་གསུམ་གྱི་ལས་ཁུར་རྒྱུན་སྐྱོང་གི་གསལ་བསྒྲགས་ནང་གསལ་ཁ་བཏོད་ནས་གསུངས་འདུག  ཁྲིམས་ཞིབ་པ་གསུམ་གྱིས་གསུངས་པ་དེ་ཁྲིམས་ཡིག་གི་གོ་དོན་ལེན་སྟངས་ག་འདྲ་ཡིན་མིན་གྱི་ཐག་གཅོད་རེད། དེ་ལ་རྩོད་པ་རྒྱག་ས་ཡོད་མ་རེད།

༥། ཁྲིམས་ཞིབ་པ་གསུམ་གྱི་གསལ་བསྒྲགས་ནང་ད་ཆ་ལས་འགན་བཤོལ་བའི་གཞི་རྩ་མེད་པར་ཆགས་རེད་གསུངས་འདུག་པའི་གོ་དོན་ག་རེ་རེད།

གོང་དུ་སྤྱི་མང་ཁྲིམས་ཡིག་དོན་ཚན་ ༧༩ སྐོར་བཤད་པ་ནང་བཞིན། ཁྲིམས་ཞིབ་པའི་སྡོམ་ཁྲིམས་དང་པོ་ཕྱོགས་ལྷུང་སྤང་དགོས་ཀྱི་ཡོད་རེད། ཁྲིམས་ཞིབ་པ་དེས་རང་ཉིད་དང་ཤ་ཁྲག་གི་འབྲེལ་བ་ཡོད་པ་དང་། ཁེ་ཕན་གྱི་འབྲེལ་བ་ཡོད་མཁན་ཞིག་གི་ཁ་མཆུ་ལ་ཁྲིམས་ཞིབ་བྱས་ན་ཕྱོགས་ལྷུང་ཡོང་བའི་ཉེན་ཁ་ཡོད་པའི་ཆ་ནས་ཁྲིམས་ཞིབ་པའི་ལས་འགན་བཤོལ་དགོས་ཀྱི་ཡོད་རེད། ཡིན་ནའང་། ཁ་མཆུ་དེའི་ནང་རང་ཉིད་དང་འབྲེལ་བ་ཡོད་པ་དེ་མེད་ཆགས་པ་དང་། ཁྲིམས་ཞིབ་པ་གསུམ་ལས་མང་བས་ཁྲིམས་ཞིབ་བྱེད་སྐབས་དང་། རྒྱུ་མཚན་གཞན་དག་གི་ཐོག་ནས་ཕྱོགས་ལྷུང་གི་ཉེན་ཁ་འབྱུང་ཉེན་མེད་པ་ཆགས་ན། ལས་འགན་བཤོལ་བའི་གཞི་རྩ་མེད་པར་ཆགས་པ་རེད། བཀའ་ཤག་གིས་ཁྲིམས་ཞིབ་པའི་འོས་མི་རག་གི་མེད་ལུགས་གསལ་བསྒྲགས་གནང་བ་དང་། ཚོགས་དྲུང་ལས་ཁུངས་ནས་སྤྱི་འཐུས་ལྷན་ཚོགས་ཀྱི་ཚོགས་འདུ་འཕར་མ་ཚོགས་ཐུབ་ཀྱི་མེད་པའི་གསལ་བསྒྲགས་གནང་བར་བརྟེན། ཁྲིམས་ཞིབ་པ་གསུམ་ནས་ལས་འགན་བཤོལ་བའི་གཞི་རྩ་མེད་པར་ཆགས་པ་རེད། ཁྲིམས་ཞིབ་པ་གསུམ་གྱིས་ཡིག་ཆ་ཨང་ ༣༩ དེ་ཁྲིམས་འགལ་ཡིན་པའི་གསལ་བསྒྲགས་སྔོན་མ་ནས་གནང་ཟིན་པ་ཡིན་ཙང། ལས་ཁུར་རྒྱུན་སྐྱོང་གནང་མི་དགོས་པའི་རྒྱུ་མཚན་ཡོད་མ་རེད།

༦། སྤྱི་འཐུས་སྐོར་ཞིག་གིས་༸གོང་ས་མཆོག་གི་སྐུ་པར་གྱི་མདུན་ནས་ལས་ཁུར་དམ་འབུལ་བྱེད་ཀྱི་ཡིན་གསུང་གི་ཡོད་ཚོད་འདུག་པ་དེ་ཁྲིམས་མཐུན་རེད་དམ།

དེ་འདྲ་གསུང་གི་ཡོད་ན། དེ་ཁྲིམས་ལུགས་ཀྱི་དཀྱིལ་འཁོར་ནང་དུ་བསྡད་ནས་སྐད་ཆ་ཤོད་ཀྱི་ཡོད་མ་རེད། བཅའ་ཁྲིམས་དོན་ཚན་ ༤༧ པ་ནང་བཞིན་འགྲོ་གི་མིན་ཟེར་གྱི་ཡོད་ན། ཁྲིམས་མཐུན་གྱི་གནང་སྟངས་གཞན་པ་ཞིག་ཡོང་ས་འགྲོ་གི་མ་རེད།

༧། སྤྱི་འཐུས་ ༢༠ ཙམ་ནས་ལས་ཁུར་དམ་འབུལ་མ་བྱས་ན་གནས་སྟངས་ག་རེ་ཆགས་ཀྱི་རེད།

བར་བརྒལ་ཚོགས་གཙོའི་ལས་འགན་ནི་སྤྱི་འཐུས་ལྷན་ཚོགས་ནང་ཉུང་མཐའི་གྲངས་ཚད་ ༣༠ ལོངས་ཐུབ་པ་བཟོས་ཏེ། ཚོགས་གཙོ་ཚོགས་གཞོན་འདེམས་བསྐོ་ཐུབ་པ་གནང་རྒྱུ་དེ་རེད། ཚོགས་གཙོ་ཚོགས་གཞོན་འདེམས་བསྐོ་བྱེད་མ་ཐུབ་པར་ལྷག་ན། དེའི་འགན་ཆ་ཚང་བར་བརྒལ་ཚོགས་རང་གིས་ཁུར་དགོས་ཀྱི་རེད། ང་ཚོའི་ཁྲིམས་སྒྲིག་དེ་ཚོའི་ནང་དམ་འབུལ་མི་བྱེད་མཁན་ལ་བྱེད་སྟངས་ག་རེ་ཡིན་མིན་གསལ་ཁ་ཡོད་ས་མ་རེད། ཡིན་ནའང་། བར་བརྒལ་ཚོགས་གཙོའི་ངོས་ནས། དམ་འབུལ་མི་བྱེད་མཁན་དེ་ཚོའི་གོ་ཡུལ་སྟོང་པ་ཐོན་ཡོད་མེད་དང་། ཡང་ན་ཁོ་ཚོ་རྩ་དགོངས་ཞུས་པ་ཡིན་མིན་བརྩད་གཅོད་གནང་དགོས་ཀྱི་རེད། དཔེར་ན། ཁོ་ཚོ་ལ་བརྡ་ཐོ་བཏང་ནས་དུས་བཀག་ནང་དམ་འབུལ་དུ་བཅར་དགོས་པ་དང་། མ་བཅར་ན་ཐག་གཅོད་འདི་དང་དེ་བྱེད་ཀྱི་ཡིན་ཞེས་སྔོན་བརྡ་བཏང་བ་ཡིན་ན། དམ་འབུལ་མི་བྱེད་པའི་རྒྱུ་མཚན་ག་རེ་ཡིན་མིན་གསལ་པོ་ཆགས་ཐུབ་པ་དང་། ཐག་གཅོད་ག་འདྲ་གནང་རྒྱུའི་གཞི་རྟེན་ཡང་རྙེད་ཀྱི་རེད། དཔེར་ན། བཅའ་ཁྲིམས་དོན་ཚན་ ༣༨ (༩) ནང་གསལ། བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་བློ་གཏད་མེད་པ་ཞིག་ཡིན་པར་ངོས་འཛིན་བྱ་དགོས་ཆགས་ཀྱི་རེད་ཅེས་སྔོན་བརྡ་བཏང་བའི་ཐོག་ནས་ཐག་གཅོད་གནང་བ་ཡིན་ན། དབུས་འོས་བསྡུ་ལས་ཁང་ལ་སྒུག་ཐོའི་གྲལ་མཚམས་ནས་མིང་ཐོ་འབུལ་དུ་བཅུག་སྟེ། སྤྱི་འཐུས་ཀྱི་ཉུང་མཐའི་གྲངས་ཚད་སུམ་ཅུ་ལོངས་པ་བཟོ་ཐུབ་ཀྱི་རེད།

མཆན། གོང་བཀོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ཡིན་པས་མ་ཁྱབ།