རྒྱ་ནག་གིས་བོད་དཔལ་ཡུལ་རྫོང་འབར་རྫིས་སྡེ་བའི་སྡེ་དཔོན་གསུམ་འཛིན་བཟུང་བྱས་རྗེས་མི་གཉིས་ཀློད་གྲོལ་བཏང་ཡོད་ནའང་། སྡེ་དཔོན་རྡོ་རྗེ་ལགས་ད་ལྟའི་ཆར་གར་སོང་ཆ་མེད་དུ་གྱུར་ཏེ་ཟླ་གཉིས་ཙམ་འགྲོ་ཡི་ཡོད་པ་རེད།
འདི་གའི་གསར་འགོད་པར་མིང་བརྗོད་འདོད་མེད་པའི་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༤ པའི་མཇུག་ཙམ་ལ་རྒྱ་ནག་གིས་བཅད་བགོ་བྱས་པའི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གྱི་དཔལ་ཡུལ་རྫོང་གི། འབར་རྫིས་སྡེ་བའི་སྡེ་དཔོན་རྡོ་རྗེ་ལགས་དང་ཆོས་ཉིད་ལགས། བསོད་ནམས་ཕུན་ཚོགས་ལགས་བཅས་བོད་མི་གསུམ་རྒྱ་ནག་གཞུང་གིས་གསལ་བཤད་གང་ཡང་མེད་པའི་ཐོག་ནས་འཛིན་བཟུང་བྱས་ཡོད་པ་དང་། ཕྱིས་སུ་བསོད་ནམ་ཕུན་ཚོགས་ལགས་དང་ཆོས་ཉིད་ལགས་གཉིས་ཀློད་གྲོལ་བཏང་ཡོད་ནའང་། སྡེ་དཔོན་རྡོ་རྗེ་ལགས་ད་དུང་ཀྱང་འཛིན་བཟུང་འོག་གར་སོང་ཆ་མེད་དུ་གྱུར་ཏེ་ཟླ་གཉིས་ཙམ་འགྲོ་ཡི་ཡོད་འདུག
གནས་ཚུལ་མཁོ་སྤྲོད་པས། སྤྱིར་སྡེ་དཔོན་གསུམ་གྱིས་རྒྱལ་ཁབ་ཀྱི་ཁྲིམས་དང་འགལ་བའི་ལས་ཀ་གཅིག་ཀྱང་སྒྲུབ་མེད་སྟབས་འཛིན་བཟུང་བྱེད་དགོས་མེད་མོད། རྒྱ་ནག་གཞུང་གིས་ལོ་རེར་མང་ཚོགས་ལ་སྤྲོད་བཞིན་པའི་རོགས་དངུལ་རྣམས་སྡེ་བའི་ཞབས་རིམ་བསྒྲུབ་སླད། སྐུ་གདུང་མཆོད་རྟེན་བཞེངས་པ་སོགས་ཆོས་ཕྱོགས་ལ་བཏང་བར་བརྟེན། དེ་མ་འགྲིག་ནས་སྡེ་དཔོན་གསུམ་འཛིན་བཟུང་བྱས་པ་ཡིན་སྲིད་ཀྱི་འདུག ཅེས་དང་། བོད་ཀྱི་སྡེ་བ་ཁག་གི་སྡེ་དཔོན་རྣམས་རྒྱ་ནག་དམར་ཤོག་ཚོགས་པའི་ཚོགས་མི་ཡིན་པ་དགོས་པ་ལྟར། ལོ་ན་སུམ་ཅུའི་གྲས་ཡིན་པའི་འབར་རྫིས་སྡེ་བའི་སྡེ་དཔོན་རྡོ་རྗེ་ལགས་ནི་ཁྲིམས་འགལ་བྱེད་མཁན་ཞིག་མིན་སྐོར་བརྗོད་བྱུང་།
གསར་འགོད་པ། སྐལ་བཟང་སྦྱིན་པ།
