བོད་དང་ཧོང་ཀོང་། ཡུ་གུར་དང་རྒྱ་རིགས་སོགས་ཀྱི་ལས་འགུལ་བ་སུམ་ཅུ་ལྷག་གིས་ཉི་ཧོང་རྒྱ་ནག་གཞུང་ཚབ་མདུན་དུ་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་མཚམས་འཇོག་དགོས་པ་དང་ཕྱི་ལོ་ ༢༠༢༢ ལོའི་རྒྱ་ནག་ཨོ་རྩལ་འགྲན་ཚོགས་མཚམས་འཇོག་དགོས་པའི་ངོ་རྒོལ་ལས་འགུལ་སྤེལ་ཡོད་པ་རེད།
རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། ཕྱི་ལོ་ ༢༠༢༢ ལོར་རྒྱ་ནག་གི་རྒྱལ་ས་པེ་ཅིན་དུ་དགུན་ཁའི་ཨོ་རྩལ་འགྲན་ཚོགས་བསྡུ་བར་ཉིན་གྲངས་ ༢༠༠ ཏག་ཏག་ལས་མེད་པ་དང་། ད་ལྟའི་ཆར་འཛམ་གླིང་རྒྱལ་ཁབ་ཁག་གི་རྩེད་འགྲན་པ་ཕལ་མོ་ཆེ་ཉི་ཧོང་དུ་འབྱོར་ཏེ། ཕྱི་ལོ་ ༢༠༢༡ ལོའི་དབྱར་ཁའི་ཨོ་རྩལ་རྩེད་འགྲན་མགོ་རྩོམ་ལ་ཉེ་བ་དང་བསྟུན། ཁ་སང་ཉི་ཧོང་དུ་ཡོད་པའི་རྒྱ་ནག་གཞུང་ཚབ་མདུན་དུ་བོད་མི་དང་ཡུ་གུར། སོག་པོ། ཧོང་ཀོང་དང་ཉི་ཧོང་། རྒྱ་རིགས་བཅས་ཀྱི་འགྲོ་བ་མིའི་ཐོབ་ཐང་རྩོད་ལེན་པ་ཁྱོན་མི་གྲངས་ ༣༠ ལྷག་གིས། རྒྱལ་སྤྱིའི་གསར་འགྱུར་བརྒྱུད་ལམ་ཁག་ཉི་ཧོང་ལ་ཁ་ཕྱོགས་ཡོད་པའི་གོ་སྐབས་དང་བསྟུན། རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་མཚམས་འཇོག་དགོས་པ་དང་། ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་ཏེ། རྒྱ་ནག་ཏུ་མི་གསོད་ཁྲག་སྦྱོར་གྱི་ཨོ་རྩལ་རྩེད་འགྲན་མཚམས་འཇོག་དགོས་པའི་འབོད་ཚིག་དང་སྦྲགས་ནས་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་ཡོད་པ་རེད།
འགྲོ་བ་མིའི་ཐོབ་ཐང་རྩོད་ལེན་པ་ཚོས། ཉི་ཧོང་ནང་ཡིད་དབང་འཕྲོག་པའི་ཨོ་རྩལ་རྩེད་འགྲན་འཚོག་པར་ཉིན་གྲངས་ ༣ ལས་མེད་པ་དང་། རྒྱ་ནག་གིས་ཉིན་གྲངས་ ༢༠༠ རྗེས་ནས་མི་གསོད་ཁྲག་སྦྱོར་གྱི་ཨོ་རྩལ་འགྲན་ཚོགས་བསྡུ་རྒྱུ་རེད། ཅེས་སྐྱོན་བརྗོད་གནང་ཡོད་པ་དང་སྦྲགས། ཉི་ཧོང་གི་རྒྱ་ནག་གཞུང་ཚབ་པར་ཞུ་ཡིག་ཅིག་སྤྲད་དེ། རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པ་མཚམས་འཇོག་དགོས་པའི་སྐུལ་མ་བཏང་ཡོད་པ་རེད།
ལས་འགུལ་བ་ཚོས་ངོ་རྒོལ་སྐབས་ཕྲེད་དར་ཞིག་བཟུང་བའི་སྟེང་། ཨོ་རྩལ་མཐུན་ཚོགས་ཀྱི་དབུས་རྒྱུན་ཚོས་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་རྩེད་འགྲན་རྒྱ་ནག་ཏུ་འཚོག་པར་ངོ་རྒོལ་བྱེད་ཀྱི་ཡོད། ཅེས་ཨོ་རྩལ་མཐུན་ཚོགས་ཀྱི་རྒྱུན་ལས་ནས་རྒྱ་ནག་གི་དགུན་ཁའི་ཨོ་རྩལ་རྩེད་འགྲན་མཚམས་འཇོག་དགོས་པའི་འབོད་སྐུལ་ཞུས་འདུག་ལ། ལས་འགུལ་བ་ཚོས་རང་གི་མི་རིགས་ཀྱི་ཁྱད་ཆོས་མཚོན་པའི་རྒྱལ་དར་དང་ཕྲེད་དར་སོགས་བཟུང་ཡོད་པའི་ཁྲོད། བོད་མི་ཁག་ཅིག་གིས་བོད་ཀྱི་རྒྱལ་དར་གཙོས་པའི་བོད་བསྟན་སྲིད་མི་རིགས་ཀྱི་ཆེད་དུ་སྐུ་ལུས་མཆོད་མེར་སྒྲོན་པའི་རྒྱ་གཅེས་དཔའ་བོ་དག་གི་སྐུ་པར་དང་མཚན་བྱང་བཅས་ལྡན་པའི་པར་དང་དར་ཆ་སོགས་བཟུང་འདུག
ཕྱི་ལོ་ ༢༠༢༢ ལོར་རྒྱ་ནག་ཏུ་དགུན་ཁའི་ཨོ་རྩལ་རྩེད་འགྲན་བསྡུ་བར་བཞུགས་སྒར་དུ་རྟེན་གཞི་བྱས་པའི་བོད་ཀྱི་གཞུང་འབྲེལ་མིན་པའི་ཚོགས་པ་ལྔ་ཡི་གཙོས་པའི་བོད་དང་བོད་མིར་རྒྱབ་སྐྱོར་གནང་མཁན་འཛམ་གླིང་གི་མི་རིགས་གཞན་དང་། དེ་བཞིན་དུ་ཡུ་གུར་དང་ཧོང་ཀོང་། ནང་སོག་དང་རྒྱ་རིགས་སོགས་རྒྱ་ནག་གཞུང་གི་ཁྲིམས་འགལ་གྱི་བྱ་སྤྱོད་རིགས་ལ་ངོ་རྒོལ་གནང་མཁན་ཡོངས་ནས། ངོ་རྒོལ་ལས་འགུལ་སྤེལ་གྱི་ཡོད་པ་མ་ཟད། ཉེ་ལམ་ཡུ་རོབ་མཐུན་ཚོགས་དང་དབྱིན་ཡུལ་གྲོས་ཚོགས་གཉིས་ནས་ཕྱི་ལོ་ ༢༠༢༢ ལོའི་རྒྱ་ནག་གི་ཨོ་རྩལ་འགྲན་ཚོགས་ལ་མང་མོས་འོས་བསྡུའི་ལམ་ནས་ངོ་རྒོལ་གྱི་རྣམ་པ་ཤུགས་ཆེན་བསྟན་ཡོད།
གསར་འགོད་པ། སྐལ་བཟང་སྦྱིན་པ།
