བོད་མི་གཉིས་ལ་ཕྱི་ལོ་ ༢༠༢༡ ལོའི་ཡར་ལུང་སོ་ནམ་གཟེངས་བསྟོད་བྱ་དགའ་ཐོབ།

བཙན་བྱོལ་བོད་མིའི་གཞིས་ཆགས་ཁག་གི་འཚོ་རྟེན་དུ་གྱུར་བའི་ས་ཞིང་བདག་ཉར་དང་གཞོན་སྐྱེས་རྣམས་ལ་ཞིང་ལས་ཐོག་དོ་དབྱིངས་ཡོང་སླད་བོད་མི་ཞིང་པ་གཉིས་ལ་འདི་ལོའི་སོ་ནམ་གཟེངས་བསྟོད་བྱ་དགའ་ཐོབ།

དེ་རིང་འདི་གའི་གསར་འགོད་པས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སོ་ནམ་དང་མཉམ་འབྲེལ་ཚན་པའི་འགན་འཛིན་དོན་འགྲུབ་ཚེ་རིང་ལགས་སུ་བཀའ་འདྲི་ཞུས་སྐབས། ཕྱི་ལོ་ ༢༠༢༡ ལོའི་ཡར་ལུང་སོ་ནམ་གཟེངས་བསྟོད་ཀྱི་བྱ་འགའི་ཁྲོད། བཙན་བྱོལ་བོད་མིའི་གཞིས་ཆགས་ཁག་ ༡༢ ནས་ཞིང་འབྲོག་གཉིས་ཀྱི་ལས་ལ་ཞུགས་བཞིན་པའི་བོད་མི་ ༢༤ ཡི་ཁོངས་ནས། མན་སྤར་ཕན་བདེ་གླིང་གཞིས་གཞིས་ཁོངས་བསྟན་འཛིན་འཕྲིན་ལས་ལགས་སུ་འདི་ལོ་སོ་ནམ་རྩེད་ཕུད་ཀྱི་གཟེངས་བསྟོད་དང་ཧིན་སྒོར་འབུམ་གཅིག་གི་བྱ་དགའ་ཐོབ་པ་དང་། སྦེལ་ཀོབ་བདེ་སྐྱིད་སླར་གསོའི་གཞིས་ཆགས་ཀྱི་གྲོང་མི་བློ་གྲོས་དགེ་ལེགས་སུ་ན་གཞོན་རྩེད་ཕུད་སོ་ནམ་པའི་གཟེངས་བསྟོད་དང་ཧིན་སྒོར་འབུམ་གཅིག་གི་བྱ་དགའ་ཐོབ་ཡོད་སྐོར་བརྗོད་བྱུང་།

དོན་འགྲུབ་ཚེ་རིང་ལགས་ཀྱིས་གསུངས་པ་ལྟར་ན། ཡར་ལུང་སོ་ནམ་གཟེངས་བསྟོད་བྱ་དགའ་སྤྲོད་པའི་དམིགས་ཡུལ་ནི། རང་རེའི་བཙན་བྱོལ་སྤྱི་ཚོགས་ཆུང་ཆུང་འདི་ཡང་དུས་ཀྱི་འགྱུར་འགྲོས་དང་བསྟུན། དེང་རབས་ཀྱི་ཕྱོགས་སུ་གོམ་པ་སྤོ་ཡི་ཡོད་པའི་གནས་སྟངས་འོག བཙན་བྱོལ་བོད་མིའི་གཞིས་ཆགགས་ཁག་གི་འཚོ་རྟེན་དུ་གྱུར་བའི་ས་ཞིང་བདག་ཉར་དང་གཞོན་སྐྱེས་རྣམས་སོ་ནམ་ཞིང་ལས་ཀྱི་སྤྲོ་སྣང་དང་འཚོ་ཐབས་སོགས་ལ་དོ་དབྱིངས་ཡོང་སླད་ཡིན་པ་རེད་ལ། ལས་གཞི་འདི་བཞིན་ཕྱི་ལོ་ ༢༠༡༩ ལོར་ནང་སྲིད་ལས་ཁུངས་ནས་དབུ་འཛུགས་ཞུས་ཡོད་འདུག

འདི་ལོའི་སོ་ནམ་གཟེངས་བསྟོད་བྱ་དགའི་ཁྲོད་ཀྱི་བོད་མི་བློ་གྲོས་དགེ་ལེགས་ལགས་ཀྱིས། ཆུང་དུས་ནས་ཞིང་ལས་ལ་ཞུགས་ཏེ། ས་ཞིང་ཁྱོན་ཨེ་ཀ་ ༦༢ ནང་ཚོང་ཁེ་ཆེ་བའི་སྟོན་འབྲས་འདེབས་ལས་དང་། སྒོ་ཕྱུགས་གསོ་སྐྱོང་གིས་ཐོན་འབབ་ཁག་ས་གནས་མཉམ་འབྲེལ་བརྒྱུད་ཕྱིར་ཚོང་གནང་གི་ཡོད་ཅིང་། ཞིང་ལས་འདེབས་འཛུགས་ཀྱི་ལས་དོན་ཡར་རྒྱས་སླད་དགོས་མཁོ་ཆེ་བའི་འཕྲུལ་ཆས་གསར་བསྐྲུན་གྱི་ལམ་ནས་གཞོན་སྐྱེས་ཚོར་མིག་དཔེ་བསྟན་དང་སྟོན་མུས་ཡིན་པ་རེད། དེ་བཞིན། བསྟན་འཛིན་འཕྲིན་ལས་ལགས་ཀྱིས་ས་ཞིང་ཁྱོན་ཨེ་ཀ་ ༡༣༨ ནང་ལོ་ཁོར་མོ་ཡུག་ལ་ཞིང་ཆུ་འདྲེན་གཏོང་གིས། སྟོན་འབྲས་སྣ་ཚོགས་འདེབས་ལས་དང་། སྒོ་ཕྱུགས་གྲངས་ ༡༡ གསོ་ཉར་གྱིས་ཡོང་འབབ་ཐོན་སྐྱེད་ཁག་ཕྱིར་ཚོང་དང་། ཞིང་ལས་ཀྱི་ལས་དོན་ལ་ཧུར་ཐག་གིས་ཡོང་འབབ་དག་གིས་ཁྱིམ་ཚང་གི་འཚོ་གནས་སྲ་བརྟན་དང་མི་གཞན་ལའང་མིག་དཔེ་སྟོན་གྱི་ཡོད་འདུག

སྤྱིར་སོ་ནམ་ཞིང་ལས་པའི་གཟེངས་བསྟོད་བྱ་དགའ་དེ་བཞིན་ལོ་རེའི་བོད་ཀྱི་མང་གཙོའི་དུས་ཆེན་གྱི་གཞུང་འབྲེལ་མཛད་སྒོའི་སྟེང་ཕུལ་སྲོལ་ཡོད་ནའང་། འདི་ལོར་ཏོག་དབྱིབས་གཉན་རིམས་རྐྱེན་པས་གཞུང་འབྲེལ་མཛད་སྒོའི་སྟེང་ཕུལ་ཐུབ་མེད་པ་དང་། གཟེངས་བསྟོད་བྱ་དགའ་དེ་བཞིན་དབུས་ས་གཉིས་ཀྱི་འདེམས་སྒྲུག་ཚོགས་ཆུང་གིས་ཞིབ་འཇུག་གནང་བ་བརྒྱུད་ཕུལ་གྱི་ཡོད་པ་དང་། འདི་ལོར་བྱ་དགའ་ཐོབ་པའི་བོད་མི་གཉིས་ཕུད་པའི་གཞན་ཡང་ལས་གཞིའི་ནང་མཉམ་ཞུགས་གནང་མཁན་བོད་མི་གྲངས་ ༢༢ ལ་ཧིན་སྒོར་ཁྲི་གཅིག་རེའི་བྱ་དགའ་ཕུལ་ཡོད་འདུག

གསར་འགོད་པ། སྐལ་བཟང་སྦྱིན་པ།