ཁྲོ་བོ་དཔལ་འབར།
དེ་ཡང་དཔལ་ལྡན་མི་རྗེ་སྲིད་སྐྱོང་མཆོག་གིས་ཉེ་ཆར་རྒྱ་གར་བྱང་ཤར་རྡོར་གླིང་བོད་མིའི་རང་འཚོ་བཟོ་གྲྭར་བཀའ་མོལ་གནང་བ་ཞིག་སྐབས་འཚོལ་བ་འགས་བཅད་གཏུབས་ཀྱིས་གླེང་གཞི་བཟོས་ཏེ་སྤྱི་ཚོགས་རྙོག་ཟིང་ཅན་དུ་བསྒྱུར་དང་སྒྱུར་བཞིན་པ་ཚང་མས་ཤེས་གསལ་ལྟར་རེད། སྤྱིར་བཏང་སྐབས་འཚོལ་བ་དག་གིས་རྟག་ཏུ་འདི་ལྟར་གཞི་རྩ་མེད་བཞིན་དུ་གླེང་གཞི་བཟོས་ཏེ་རང་གི་དགོས་དོན་སྒྲུབ་ཀྱིན་ཡོད་སྟབས། ཁོང་ཚོར་བདེན་པའི་གསལ་བཤད་བྱས་ཀྱང་ཕན་པའི་རེ་བ་མ་མཆིས་མོད། འོན་ཀྱང་མང་ཚོགས་བྱིངས་ཁོང་ཚོའི་འདོད་དོན་སྒྲུབ་བྱེད་ཀྱི་ལག་ཆ་མི་ཆགས་རྒྱུར་དམིགས་ཏེ་དོན་དངོས་ཁག་ཅིག་གླེང་གི་ཡིན།
གཅིག དཔལ་ལྡན་སྲིད་སྐྱོང་མཆོག་གིས་ལོ་རྒྱུས་ལ་འཁྱོག་བཤད་བྱས་ཡོད་དམ།
དུས་རབས་བཅུ་གཅིག་ནང་ཇོ་བོ་རྗེ་དཔལ་ལྡན་ཨ་ཏི་ཤ་བོད་དུ་ཕེབས་པ་དང་། མངའ་རིས་སུ་ལོ་གསུམ་བཞུགས་ཤིང་མངའ་རིས་ཀྱི་དགེ་བའི་བཤེས་གཉེན་སོགས་གདུལ་བྱ་རྣམས་ལེགས་པའི་ལམ་དུ་བཀོད་རྗེས། ཇོ་བོ་སླར་རྒྱ་གར་དུ་ལོག་པར་སྟ་གོན་བྱེད་ལ་ཉེ་བའི་སྐབས་ཤིག་འབྲོམ་སྟོན་པ་ཕེབས་ཏེ་ཇོ་བོ་ཡུལ་དབུས་སུ་གདན་དྲངས། དེའི་ཚུལ་ཇོ་བོའི་དངོས་སློབ་[1]ནག་ཚོ་ལོ་ཙཱ་བས་གསུངས་པའི་ཇོ་བོའི་རྣམ་ཐར་ལས། “ [2]དགེ་བཤེས་ལོ་ཙཱ་བ་ཡང་དང་པོའི་ཆད་སོ་ཡོད་པས་ཕར་བསྐྱལ་བར་དགོངས། ལྷ་བཙུན་པ་ཡང་ཇོ་བོ་བཞུགས་ན་དགྱེས་པར་འདུག་པ་ལ་ཞུ་བ་འབུལ་བའི་ཡིད་མི་སྣང་ནས། སྟོན་པས་ནན་ཟེར་མ་ནུས། འོན་ཀྱང་འབྲོམ་སྟོན་པ་ཐུགས་དཀྱེལ་ཆེ་བས་རྒྱལ་པོ་ཁྲིམས་ཡོད་ཀྱི་ཡུལ་ཡིན་ན་གུང་བློན་ཆེན་པོ་ཐུགས་ཀྱི་མཁྱེན་པ་ཆེན་པོ་ཡོད་པ་མངའ་བ་ཡིན་པས། བོད་ཀྱི་ལྷ་ས་བསམ་ཡས་ལ་སོགས་པའི་གཙུག་ལག་ཁང་དང་དགེ་འདུན་མང་པོ་བཞུགས་པའི་ལོ་རྒྱུས་ཀྱང་སྙན་དུ་གསོལ།
དེ་ཐམས་ཅད་ཇོ་བོ་བོད་དུ་བྱོན་པ་ལ་ཐུགས་དགྱེས་པ་ལགས་ཞུས་པས། ཇོ་བོ་ཤིན་ཏུ་དགྱེས་ནས་ཚངས་སྤྱོད་གྲངས་མང་དེ་ལྟ་བུ་རྒྱ་གར་ན་ཡང་དཀོན། དེ་ཙམ་བཞུགས་ན་དགྲ་བཅོམ་པ་འབྱུང་བར་བཅོམ་ལྡན་འདས་ཀྱིས་ལུང་བསྟན་པ་ཡིན་པས་དགྲ་བཅོམ་པ་བཞུགས་ཏེ་མཆི་གསུངས་ནས་བོད་ཀྱི་ཕྱོགས་སུ་ཕྱག་མང་པོ་མཛད།” ཅེས་པའི་ནག་ཚོ་ལོ་ཙཱ་བའི་གསུང་དུམ་འདིའི་ནང་སྐབས་དེ་ཙམ་ན། མངའ་རིས་ནས་དབུས་ཕྱོགས་ལ་བོད་ཅེས་ཐ་སྙད་སྦྱོར་གྱི་ཡོད་པ་རྟོགས་ཐུབ་ལ། ཇོ་བོས་བོད་ཀྱི་ཕྱོགས་ལ་ཕྱག་མཛད་ས་ཡང་དེང་གི་མངའ་རིས་ཞེས་བརྗོད་པའི་ས་ཁོངས་དེ་ལས་གཞན་ཞིག་མ་ཡིན་ནོ། །
གཞན་ཡང་ “ [3]དེ་ནས་ཇོ་བོ་དཔོན་གཡོག་གིས་ལ་སྟོད་དུ་བྱོན། དེའི་དུས་སུ་དགེ་བཤེས་ཀ་བས་བོད་ཀྱི་མི་ཆེན་རྣམས་ལ་དགེ་བཤེས་སྟོན་པའི་ཤོག་འཕྲིན་གཏད་ནས།” ཞེས་དང་། “[4] དེའི་དུས་སུ་བོད་སྟོན་རྣམས་ལ་སྣ་ལེན་དུ་ལ་སྟོད་པ་རྣམས་ཀྱིས་བསྙེན་བཀུར་མང་པོ་བྱས།” ཞེས་པ་རྣམས་ཀྱིས་སྐབས་དེ་ཙམ་ན་བོད་ཅེས་པའི་ཐ་སྙད་དེ་བཞིན་རྒྱུ་མཚན་ཅི་ཞིག་གིས་དབུས་ཁུལ་ལ་བརྡ་སྦྱོར་དམིགས་བསལ་ཡོད་པ་ལྟར་རོ། །དེ་ཚུལ་གཞན་ཞིག་ཡང་། [5]“ དེ་ནས་དགེ་བཤེས་སྟོན་པས་དབུས་སུ་ཕེབས་སྐབས་བོད་མི་སྐ་བ་ཤཱཀྱ་སོགས་ལ་བཀའ་གྲོས་མཛད་པ་ལྟར།” ཞེས་པས་ཀྱང་ཤེས་སོ། །
༸རྒྱལ་མཆོག་བསྐལ་བཟང་རྒྱ་མཚོའི་སྐུའི་ཡོངས་འཛིན་ཁྲི་ཆེན་ངག་དབང་མཆོག་ལྡན་གྱི་རྣམ་ཐར་ལྕང་སྐྱ་རོལ་པའི་རྡོ་རྗེས་མཛད་པ་ལས། ༸རྒྱལ་དབང་མཆོག་དང་སྐུའི་ཡོངས་འཛིན་རྣམ་གཉིས་[6]མགར་ཐར་དུ་བཞུགས་སྐབས་ཀྱི་རྣམ་ཐར་ལས། [7]“ ཙིའུ་དམར་པོ་ཡིན་རྒྱུ་བ་དེས་རྒྱལ་དབང་མཆོག་གི་ཕྱག་ནས་བཟུང་སྟེ། མཐེ་བོང་ལ་བྱི་བ། མཛུབ་མོ་ལ་གླང་། གུང་མོ་སྟག སྲིན་ལག་ལ་ཡོས་ཡོད་ཟེར་ནས་ཡོས་ལོར་བོད་དུ་ཕེབས་རྒྱུ་དེ་གསལ་བོར་ཞུས་སོང་གསུང་།” ཞེས་ཡོས་ལོར་༸རྒྱལ་མཆོག་བདུན་པ་ཆེན་པོ་དང་སྐུའི་ཡོངས་འཛིན་རྣམ་གཉིས་མགར་ཐར་ནས་སླར་ལྷ་ལྡན་དུ་ཕེབས་རྒྱུ་ལ་བོད་དུ་ཕེབས་རྒྱུ་ཞེེས་འབྱུང་བ་དང་།
དེ་བཞིན་གྲུབ་པའི་དབང་ཕྱུག་[8]ཀློང་རྡོལ་བླ་མ་རིན་པོ་ཆེ་ངག་དབང་བློ་བཟང་[9]སྙེ་ཐང་དུ་སྒྲུབ་པ་ལ་གཞོལ་སྐབས་ཤིག་བཀའ་བློན་རྡོ་རིང་བསྟན་འཛིན་དཔལ་འབྱོར་གོར་བོད་འཁྲུག་གཞིའི་རྐྱེན་གྱིས་གཉའ་ནང་དུ་དོན་དཔྱོད་དུ་འགྲོ་རྒྱུར་བགེགས་འཚུབ་ཡོད་མེད་ཞུས་པ་ལས། [10]“དབུས་མ་དེ་རི་ལ་གནས་པའི་སེམས་ཅན་ཉམས་ཆུང་ཁ་སྤུ་སོག་སོག་ཅིག་ཡོང་བ་དེའི་མིང་ལ་ཁྱེད་བོད་པ་རྣམས་ཀྱིས་ཅི་ཟེར་ཞེས་བླ་མ་རིན་པོ་ཆེས་མི་མཁྱེན་པའི་ཚུལ་གྱིས་བཀའ་འདྲི་ཕེབས་བྱུང་བ་ན་ངེད་གཉིས་ཀས་རི་བོང་ཨེ་ཡིན་ཞུས་པར།” ཞེས་དང་། [11]“ ཁྱེད་བོད་ཀྱི་མི་ཆེན་རྣམས་ཀྱིས་ངེད་ཁམས་པ་སྤྲང་པོ་ཞིག་ལ་ཕྱག་བཙལ་ནས་ཚ་འདྲི་བཏང་ན་ཡང་།” ཞེས་དང་། [12]སུམ་པ་མཁན་པོ་ཡེ་ཤེས་དཔལ་འབྱོར་གྱི་ཆོས་འབྱུང་དཔག་བསམ་ལྗོན་བཟང་དུ། [13]“ ཆུ་ཡོས་ལོར་ཁོ་བོ་བོད་དུ་སོང་།” ཞེས་དང་།
[14]“ལྕགས་ཕག་ལོར་ཁོ་བོ་བོད་དབུས་ནས་ཨ་མདོར་འོངས།” ཞེས་དང་། མདོ་མཁར་ཞབས་དྲུང་ཚེ་རིང་དབང་རྒྱལ་[15]གྱི་མི་དབང་རྟོགས་བརྗོད་ལས། དཀར་ཆག་གི་ནང་གསེས་སྡེ་ཚན་ཉེར་དྲུག་པར།[16]“ ཏཱ་ལའི་བླ་མ་སྐུ་ཕྲེང་བདུན་པ་སྐུ་འབུམ་ནས་བོད་དུ་གདན་དྲངས་པ་དང་”ཞེས་སོགས་མདོ་སྟོད་སྨད་གཉིས་དང་མངའ་རིས་བཅས་ནས་དབུས་ཕྱོགས་སུ་དམིགས་བསལ་བོད་ཅེས་འབོད་སྲོལ་ཡོད་པའི་ཡིག་ཆ་མང་དུ་མཆིས་ཀྱང་། མི་གོ་བ་ཅན་ལ་ཚིག་གཅིག རྟ་གོམ་འགྲོས་ཅན་ལ་ལྕག་གཅིག་ཅེས་པའི་དཔེ་ལྟར། ཡིག་ཚོགས་བསྐྱུང་ཕྱིར་ཕྱོགས་རེས་ཙམ་ལས་དཔེ་མཚོན་མ་དྲངས། འདི་དག་ནི་སྲང་ལམ་གྱི་ཅ་ཅོ་མ་ཡིན་པར་སྟོད་མངའ་རིས་ཁུལ་ནས། བར་དབུས་གཙང་། སྨད་མདོ་ཁམས་སྟོད་སྨད་བར་དུ་བྱོན་པའི་བོད་ཀྱི་རྩོད་མེད་མཁས་གྲུབ་དུ་མའི་གསུང་ན། དུས་ལྟའང་ལྷམ་མེར་ལྷན་ནེར་གསལ་ཡོད་པ་མིག་ཁྲ་རིལ་གྱིས་མཇལ་དུ་ཡོད་པ་ཞིག་ཡིན་ཙ་ན། དེ་ལྟར་མདོ་སྟོད་སྨད་མངའ་རིས་ཡུལ་དབུས་དང་བཅས་པའི་སྐྱེས་ཆེན་དག་གིས་དབུ་ལ་གསོལ་བཞིན་ཡོང་བའི་ལོ་རྒྱུས་ཀྱི་ཞྭ་མོ་རྙིང་པ་དེ། ད་ལྟ་གསར་པ་གསར་རྐྱང་ཡིན་མདོག་གིས་མི་རྗེ་དཔལ་ལྡན་སྲིད་སྐྱོང་མཆོག་ཁོ་ནའི་མགོར་བཙན་འགེབ་བྱེད་བཞིན་པ་འདི་ནི། མ་ཤེས་པར་བགྱིད་པ་ཞིག་ཡིན་ན་ནི་གཏི་མུག་ཅན་དང་། ཤེས་བཞིན་དུ་བགྱིས་ན་ནི་མ་རབས་ཐ་ཆད་ཀྱི་སྙིང་ཁམས་ཅན་དུ་འཁུམས་སོ། །
གཉིས། དཔལ་ལྡན་སྲིད་སྐྱོང་མཆོག་ལ་བོད་མི་རིགས་གཅིག་གི་འདུ་ཤེས་མེད་དམ།
དེ་ཡང་དགེ་འདུན་དཀོན་མཆོག་འབངས་ཀྱི་སྐྱེས་རབས་ལས། ཤར་རྡོ་རྗེ་གདན་གྱི་བྱང་ཕྱོགས་ན། །གནས་སྤུར་རྒྱལ་བོད་[17]ཅེས་བྱ་བ་ཡོད། །རི་མཐོན་པོ་གནམ་གྱི་ཀ་བ་ཡོད། །མཚོ་དམའ་མོ་གཡུ་ཡི་མཎྜལ་ཡོད། །གངས་དཀར་པོ་ཤེལ་གྱི་མཆོད་རྟེན་ཡོད། །སྤང་སེར་བོ་གསེར་གྱི་ལྷུན་པོ་ཡོད། །དྲི་ཞིམ་པོ་སྨན་གྱི་བདུག་སྤོས་ཡོད། །སྟོན་བཀྲ་བ་གསེར་གྱི་མེ་ཏོག་ཡོད། །དབྱར་བཀྲ་བ་གཡུ་ཡི་མེ་ཏོག་ཡོད། །ཀྱེ་གངས་རིའི་མགོན་པོ་སྤྱན་རས་གཟིགས། །གནས་དེ་ན་ཁྱོད་ཀྱི་ཞིང་ཁམས་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །ཅེས་པ་ལྟར། སྟོད་མངའ་རིས་སྐོར་གསུམ་ནས་བར་དབུས་གཙང་རུ་བཞི། སྨད་མདོ་ཁམས་སྒང་དྲུག་གི་སའི་ཁྱོན་དུ་གནས་པ་རྣམས་ནི། བོད་ཆོས་རྒྱལ་ཚོའི་སྐབས་ནས་དུས་ད་ལྟ་ལ་ཐུག་གི་བར་ལྷ་སྐལ་འཕགས་མཆོག་སྤྱན་རས་གཟིགས་དང་། ཆོས་སྐལ་མ་ཎི་ཡིག་དྲུག་གི་གདུལ་ཞིང་སྟེ། རང་བྱུང་གི་ས་བབ། ཆོས་དང་སྐད་ཡིག གོམས་གཤིས། བཟའ་བཏུང་། རིགས་རུས། ཤ་ཁྲག་སོགས་གང་གི་ཆ་ནས་ཀྱང་བོད་མི་རིགས་གཅིག་གྱུར་པ་ཞིག་ཡིན་པའི་བསམ་བློ་དེ། མདོ་དབུས་ཁམས་གསུམ་གྱི་གཞིས་བྱེས་བོད་མི་ཚོར་ཇི་ལྟར་བརྟན་པོར་ཡོད་པ་ལྟར། མི་རྗེ་དཔལ་ལྡན་སྲིད་སྐྱོང་མཆོག་ལའང་དེ་ལྟའི་འདུ་ཤེས་གཅིག་མཚུངས་སུ་ཡོད་པ་སྨོས་མ་དགོས་པ་ཞིག་རེད། ལར་ནས་འགྲོ་མགོན་ཆོས་རྒྱལ་འཕགས་པར་སོག་པོའི་རྒྱལ་པོ་ཀུབ་ལའི་ཁཱང་གིས་བོད་ས་ཁྱོན་ཡོངས་རྫོགས་ཆོལ་ཁ་སྟེ་སྡེ་ཚན་གསུམ་དུ་ཆ་བགོས་ཀྱིས་གསང་སྔགས་རྡོ་རྗེ་ཐེག་པའི་དབང་ཡོན་དུ་ཕུལ་པ་ནས། བོད་ཆོལ་ཁ་གསུམ་ཞེས་པའི་ཐ་སྙད་དེ་ལོ་རྒྱུས་ཡིག་འཇོག་དུ་མའི་ནང་ཁྲ་ལམ་མེར་གསལ་ཞིང་། བོད་མི་སྤྱི་བོ་གནམ་བསྟན་ཡོད་དོ་ཅོག་ལ་ས་གྲགས་གནམ་གྲགས་ཀྱི་ཐ་སྙད་ཅིག་ཡིན་སྟབས། དེ་དཔལ་ལྡན་སྲིད་སྐྱོང་མཆོག་གིས་མ་མཁྱེན་པའམ། ཡང་ན་ཁུངས་མེད་གཟུ་ལུམ་གྱི་གཏམ་ཞིག་ནམ་ཞར་ཡང་སྨྲ་མི་སྲིད་ཅེས་ཁོ་བོས་གདེང་སྤོབས་ཆེན་པོས་མགྲིན་པ་གཟེངས་སུ་བཏེགས་ནས་བརྗོད་ཐུབ།
གསུམ། དཔལ་ལྡན་སྲིད་སྐྱོང་མཆོག་གི་བཀའ་མོལ་གྱི་དོན་དངོས་གང་ཡིན་ནམ།
དཔལ་ལྡན་སྲིད་སྐྱོང་མཆོག་གི་བཀའ་མོལ་གྱི་དོན་དངོས་ནི་སྟོད་མངའ་རིས་ནས་སྨད་རྒྱ་མོ་ཚ་བ་རོང་གི་བར་ཏེ། བོད་ཆོལ་ཁ་གསུམ་ཡོངས་རྫོགས་ཤ་ཁྲག་རུས་གསུམ་དང་། ཆོས་དང་སྐད་ཡིག ཡུལ་གོམས་གཤིས་ལུགས་གང་གི་ཆ་ནས་གཅིག་གྱུར་ཡིན་བསྡད་པ་ཞིག་ལ། ཐ་སྙད་འདོགས་ལུགས་དེ་འདྲ་ཞིག་ཡོང་བསྡད་པ་དེ་མི་འབྱུང་བ་དང་། དགའ་ལྡན་ཕོ་བྲང་གིས་མི་ལོ་སུམ་བརྒྱ་དྲུག་ཅུར་བོད་ཀྱི་སྲིད་དབང་བཟུང་བ་ནས། ཆབ་སྲིད་ཀྱི་ཤུགས་རྐྱེན་དེ་བོད་ཆོལ་ཁ་གསུམ་ལ་ཅི་ཙམ་ཞིག་ཁྱབ་བཞིན་ཡོད་མེད་ལ་མ་ལྟོས་པར། འདས་པའི་ལོ་རྒྱུས་ནང་དགའ་ལྡན་ཕོ་བྲང་གི་གཞུང་འཛིན་དཔོན་རིགས་བརྒྱ་ཆ་གོ་དགུ་དབུས་གཙང་ཁོངས་ནས་ཡོང་ཡོད་པ་དང་། གཞུང་དེའི་དབུ་འཁྲིད་ ༸གོང་ས་སྐུ་ཕྲེང་ན་རིམ་ཡང་སྤྱིའི་ཆ་ནས་རི་བོ་དགེ་ལུགས་པ་ཡིན་པར་བརྟེན། བོད་མིའི་དབུ་འཁྲིད་ ༸སྤྱི་ནོར་༸གོང་ས་༸སྐྱབས་མགོན་བཅུ་བཞི་པ་ཆེན་པོ་མཆོག་གི་ཕུགས་རྒྱང་རིང་བའི་རླབས་ཆེན་ཕྱག་རྗེས་ནི། ད་ལྟ་བཙན་བྱོལ་བོད་མིའི་སྒྲིག་འཛུགས་འདི་ཉིད་ཆོལ་ཁ་དང་ཆོས་བརྒྱུད་རིས་མེད་བོད་མི་ཡོད་དོ་ཅོག་གི་ཚབ་མཚོན་རང་བཞིན་གྱི་སྒྲིག་འཛུགས་ཏེ། སྔར་བཙན་པོའི་སྐབས་སུ་མ་གཏོགས་བྱུང་མ་ཉུང་བ་ཞིག་བཙན་བྱོལ་ནང་མངོན་འགྱུར་ཐུབ་པ་བྱུང་ཞིང་། དེ་ཡང་བོད་མིའི་དབུ་འཁྲིད་ ༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་བྱུང་ཚུལ་གྱི་ལོ་རྒྱུས་དོན་དངོས་ཤིག་གསུངས་པ་ཙམ་ལ། བོད་དུམ་བུར་གཏོང་བའི་ཧམ་གཏམ་བཤད་ཀྱི་འདུག་ཅེས་གཞི་མེད་བསྙོན་འཛུགས་བྱས་ན། དངོས་ནས་བོད་སྤྱིའི་འདུ་ཤེས་ཡོད་མཁན་ཞིག་ཡིན་ཚེ་བཀའ་མོལ་དེ་རིགས་ནི་རང་གཞན་ཚང་མར་གནོད་གཞི་ཁོ་ན་ལས་ཕན་ཐོགས་ཏིལ་འབྲུ་ཙམ་ཡང་མེད་པ་ཤེས་པར་གྱིས་ཤིག།།
བཞི། མཇུག་ཏུ་གླེང་བའི་གཏམ།
ཁོ་བོས་འདིར་གསལ་བོར་ཤོད་འདོད་པ་གཙོ་བོ་ཞིག་ནི་གོང་དུ་དྲངས་པ་ལྟར་མངའ་རིས་གུང་ཐང་གི་ནག་ཚོ་ལོ་ཙཱ་བ་ཆེན་པོ་དང་། མདོ་སྟོད་ཆབ་མདོའི་ཀློང་རྡོལ་བླ་མ་རིན་པོ་ཆེ། མདོ་སྨད་ཨ་མདོའི་ལྕང་སྐྱ་རོལ་པའི་རྡོ་རྗེ། དབུས་གཙང་ཞིང་གི་བཀའ་ཡི་བློན་པོ་མདོ་མཁར་ཞབས་དྲུང་སོགས་དམ་པ་མང་པོས་བོད་དབུས་གཙང་ལ་དམིགས་བསལ་བོད་ཅེས་ཐ་སྙད་སྦྱར་པ་ནི། དམ་པ་དེ་དག་གིས་རང་ཉིད་ཀྱི་འཁྲུངས་ས་འཁྲུངས་གཞི་བོད་ཡུལ་ཡིན་མིན་ལ་གཞིགས་ནས་དེ་ལྟར་ངོས་འཛིན་བྱས་པ་ཞིག་ཡིན་པ་ཡེ་མི་བསམ་ལ། ཡུལ་དང་གང་ཟག་དེ་དག་ཐམས་ཅད་བོད་ས་བོད་མི་དངོས་ཡིན་པ་གང་ཞིག་ལ། མི་ཉིད་དབུས་སྐྱེས་ཤིང་དབང་བོ་ཚང་ཞེས་པའི་དབུས་དེ་ཉིད་འཁོར་རྣམ་བཞི་རྒྱུ་བས་ན་ཡུལ་དབུས་ཞེས་པ་ལྟར། བོད་ཀྱི་ཡུལ་དབུས་དེའང་སྔོན་གྱི་ཆོས་རྒྱལ་ཚོའི་བཞུགས་གནས་དང་། རྒྱ་གར་གྱི་མཁས་གྲུབ་མང་པོ་ཕེབས་ཡུལ། ལྷ་ས། བསམ་ཡས། སྙེ་ཐང་། འཕན་པོ། ཡེར་པ་སོགས་ཡུལ་དབུས་ཀྱི་ཆ་མང་པོ་ཞིག་ལ་སྔོན་དུས་དམ་ཆོས་དར་སྔ་བ་སོགས་རྒྱུ་མཚན་དུ་བྱས་ནས་དབུས་གཙང་ལ་གཙོ་བདག་གིས་བོད་ཅེས་དམིགས་སུ་བརྗོད་མིན་བརྟག འདི་སྐོར་ལ་ལོ་རབས་དགུ་བཅུའི་ནང་དཔྱད་རྩོམ་ཞིག་བྲིས་ཏེ་དུས་དེབ་ཐོག་བཀོད། ད་དུང་ཞིབ་འཇུག་བྱེད་བཞིན་ཡོད། མདོ་དོན་དཔལ་ལྡན་སྲིད་སྐྱོང་མཆོག་གིས་བསམ་ཚུལ་ངོ་མ་ནི་བཀའ་མོལ་དེ་ག་རང་གི་མཇུག་ཏུ་ཡོད་པ་སྟེ། “ ཉེ་བའི་ཆ་ལའང་༸རྒྱལ་བ་རིན་པོ་ཆེས་བཀའ་གནང་གི་འདུག ཕྱི་ལོ་ ༡༩༥༩ ཕྱི་ཟླ་ ༣ ཚེས་ ༣༡ ཉིན་རྒྱ་གར་གྱི་ས་གནས་ཏེ་ཛུ་པུར་འབྱོར་དུས་ང་ཚོ་ Tibetan ཞེས་པའི་ཚིག་གཅིག་གི་འོག་ཏུ་གནས་པ་རེད། དེ་སྐབས་དེར་ང་ཁམས་པ་ཡིན། ང་མདོ་ཡིན། ང་དབུས་གཙང་ཡིན་ཟེར་ནི་གཅིག་ཀྱང་མེད། ད་ལྟ་ཡིན་ནའང་གནས་སྟངས་དེ་ག་རེད། དེ་ཚོའི་རླབས་ཆེན་གྱི་དགོངས་པ་སེམས་ལ་ཉར་ཐུབ་པ་ཡིན་ན། འཐེན་འཁྱེན་གྱི་དཀའ་ངལ་འཕྲད་མི་དགོས་པ་རེད།” ཅེས་པ་འདི་རེད། འདི་གླེང་གཞི་བཟོ་བཞིན་པའི་བཀའ་མོལ་དེའི་མཇུག་རེད། གླེང་གཞི་བཟོ་མཁན་ཚོས་བཀའ་མོལ་དེ་ཉིད་བཅད་གཏུབ་རིམ་པ་མང་ཙམ་བྱས་འདུག གསུང་བཤད་ཆ་ཚང་བ་ཞིག་ཉན་ན། མི་རྗེ་དཔལ་ལྡན་སྲིད་སྐྱོང་མཆོག་གི་རླབས་ཆེན་གྱི་དགོངས་གཞི་ནི། ང་ཁམས་པ། ང་ཨ་མདོ། ང་དབུས་གཙང་གི་འདུ་ཤེས་ལས། བོད་མི་ཡོད་དོ་ཅོག་སྔར་བཞིན་བོད་པ་ཞེས་པའི་མིང་ཚིག་གཅིག་གི་འདུ་ཤེས་དེ་ཉིད་གཙོ་གལ་ཆེ་བར་འཛིན་དགོས་པ་དེ་རེད། དེ་ཁོང་གི་ཞེ་འདོད་རེད་ལ། ཞལ་གསུང་དྲོན་མོའི་སྙིང་དོན་ཡང་དེ་རེད།
[1] དགེ་བཤེས་ནག་ཚོ་ལོ་ཙཱ་བ་ནི་ལྕགས་མོ་ཕག་སྟེ་ཕྱི་ལོ་ ༡༠༡༡ ལ་གུང་ཐང་ཞེས་གྲགས་པ་མངའ་རིས་རྫོང་དགའི་ལྷ་གདོང་དུ་སྐུ་འཁྲུངས། གདུང་ནག་ཚོ། རབ་ཏུ་བྱུང་བའི་མཚན་ཚུལ་ཁྲིམས་རྒྱལ་བ། འདུལ་བ་མཁས་པར་མཁྱེན་པས་འདུལ་བ་འཛིན་པར་གྲགས། རྒྱ་བརྩོན་འགྲུས་སེངྒེ་ལ་མངོན་པ་གསན། དགུང་ལོ་ཉེར་བདུན་པ་ལ་ཇོ་བོ་སྤྱན་འདྲེན་ལ་རྒྱ་གར་དུ་བྱོན། ཇོ་བོ་རྗེ་ལོ་བཅུ་དགུའི་བར་ཚུལ་བཞིན་བསྟེན། ཡོན་ཏན་ཐམས་ཅད་རྫོགས་པར་མཛད། ཇོ་བོ་རྗེ་བོད་དུ་སྤྱན་དྲངས་པས་བོད་ཁམས་སྤྱི་ལ་བཀའ་དྲིན་ཆེ། རབ་བྱུང་དང་པོའི་ཤིང་འབྲུག་ཕྱི་ལོ་ ༡༠༦༤ ལོར་སྐུ་ཞི་བར་གཤེགས། མདོ་དང་བསྟན་བཅོས་མང་དུ་བསྒྱུར་པ་བཀའ་བསྟན་གཉིས་སུ་བཞུགས་པ་བཅས།
[2] ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཕྱོགས་བསྒྲིགས་ཤོག་གྲངས་ ༥༩༤ ཐོག་གསལ། མཚོ་སྔོན་མི་རིགས་དཔེ་སྐྲུན་ཁང་གིས་དཔར། དཔར་དུས་ཕྱི་ལོ་ ༢༠༡༣ དཔར་ཐེངས་དང་པོ།
[3] ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཕྱོགས་བསྒྲིགས་ཤོག་གྲངས་ ༥༩༧ ཐོག་གསལ། མཚོ་སྔོན་མི་རིགས་དཔེ་སྐྲུན་ཁང་གིས་དཔར། དཔར་དུས་ཕྱི་ལོ་ ༢༠༡༣ ལོའི་དཔར་ཐེངས་དང་པོ།
[4] ཇོ་བོ་རྗེ་དཔལ་ལྡན་ཨ་ཏི་ཤའི་རྣམ་ཐར་ཕྱོགས་བསྒྲིགས་ཤོག་གྲངས་ ༥༩༨ ཐོག་གསལ། མཚོ་སྔོན་མི་རིགས་དཔེ་སྐྲུན་ཁང་གིས་དཔར། དཔར་དུས་ཕྱི་ལོ་ ༢༠༡༣ ལོའི་དཔར་ཐེངས་དང་པོ།
[5] མངའ་རིས་སྐོར་གསུམ་གྱི་སྔོན་བྱུང་ལོ་རྒྱུས་ཤོག་གྲངས་ ༢༣༥ ཐོག་གསལ། བོད་ལྗོངས་མི་དམངས་དཔེ་སྐྲུན་ཁང་། དཔར་དུས་ཕྱི་ལོ་ ༡༩༩༦ དཔར་ཐེངས་དང་པོ།
[6] དེའང་མདོ་ཁམས་ས་ཡི་ཐིག་ལེ་མི་ཉག་རབ་སྒང་གི་རྒྱན་དུ་གྱུར་པའི་ཆོས་སྡེ་ཆེན་མོ་མགར་ཐར་བྱམས་པ་གླིང་ནི་དཀར་མཛེས་ཁུལ་རྟའུ་རྫོང་ཞི་བདེ་ཤང་དུ་ཆགས་ཤིང་། མགར་ཐར་ཞེས་པའི་མིང་ཐོགས་དོན་ནི་བོད་ཀྱི་བློན་ཆེན་མགར་སྟོང་བཙན་རྒྱ་ཡི་ཡུལ་ནས་བྲོས་ཏེ་ཐར་བའི་གནས་ཡིན་པས་ན་མགར་ཐར་ཞེས་དྲན་གསོ་ཞུ་བྱེད་དུ་གྲགས་པ་ཡིན་ཞེས་ལྕང་སྐྱ་རོལ་པའི་རྡོ་རྗེ་སོགས་མཁས་དབང་དག་གིས་བཞེད་སྐད། ཕྱི་ལོ་ ༡༧༢༩ ལོར་༸རྒྱལ་དབང་བདུན་པ་ངག་དབང་བསྐལ་བཟང་རྒྱ་མཚོ་མཆོག་དང་སྐུའི་ཡོངས་འཛིན་ཁྲི་ཆེན་ངག་དབང་མཆོག་ལྡན་རྣམ་གཉིས་གནས་འདིར་ཕེབས། ལོ་དེའི་ཕྱི་མ་ ༡༧༣༠ ལ་༸རྒྱལ་བ་སྐུ་ཕྲེང་བདུན་པ་བསྐལ་བཟང་རྒྱ་མཚོས་དགོན་དེ་ཉིད་ཕྱག་བཏབ།
[7] དགའ་ལྡན་ཁྲི་རིན་པོ་ཆེ་ཨ་ཆི་ཐུ་ནོ་མིན་ཧན་གྱི་རྣམ་ཐར་མཁའ་སྤྱོད་འགྲུབ་པའི་གཏམ་སྙན་ལྷའི་རྔ་བོ་ཆེ་ཤོག་གྲངས་༥༢ ཐོག་གསལ། བོད་ཀྱི་དཔེ་མཛོད་ཁང་། ༢༠༠༠
[8] ཀློང་རྡོལ་བླ་མ་རིན་པོ་ཆེ་ངག་དབང་བློ་བཟང་ཁོང་ནི་རབ་བྱུང་བཅུ་གཉིས་པའི་ས་མོ་ཕག་ལོ་སྟེ་སྤྱི་ལོ ༡༧༡༩ ལོར་ཆབ་མདོའི་དགོན་པའི་ཉེ་འགྲམ་དབེན་ཕུ་ཞེས་པའི་སའི་ཆར་ཡབ་དབང་འབུམ་དང་ཡུམ་འབུམ་སྐྱིད་གཉིས་ཀྱི་སྲས་སུ་སྐུ་འཁྲུངས། དགུང་ལོ་དྲུག་པར་བློ་བཟང་དགེ་འདུན་ལ་དགེ་བསྙེན་དང་། དགུང་ལོ་བདུན་པར་ཆབ་མདོ་དགོན་པའི་ཆོས་གྲྭར་ཞུགས། དགུང་ལོ་བཅུ་གཉིས་པར་ཕུར་ལྕོགས་ངག་དབང་བྱམས་པའི་མདུན་རབ་ཏུ་བྱུང་ཞིང་དགེ་ཚུལ་གྱི་སྡོམ་པ་བླངས། དགུང་ལོ་བཅུ་བདུན་བར་ཡབ་ཡུམ་གྱི་མདུན་འབྲི་ཀློག་སྦྱངས། དགུང་ལོ་ཉི་ཤུར་ལི་ཐང་དགོན་དུ་ཕེབས། དགུང་ལོ་ཉེར་བཞི་པར་དབུས་ལྷ་ལྡན་སེར་བྱེས་སུ་ཕེབས་ནས་ཐུགས་གཉེར་གནང་། རྒྱལ་བ་པཎ་ཆེན་སོགས་ལས་ཆོས་བཀའ་མང་དུ་གསན་ཏེ་སྙེ་ཐང་ཀློང་རྡོལ་དུ་རྒྱུན་རིང་བཞུགས། རབ་བྱུང་བཅུ་གསུམ་པའི་ཤིང་མོ་ཡོས་ལོ་སྟེ་སྤྱི་ལོ ༡༧༩༥ ལོར་སྐུ་ཞི་བར་གཤེགས། གསུང་རྩོམ་མང་དུ་བཞུགས་ཤིང་མཁས་ཤིང་གྲུབ་པའི་སྙན་གྲགས་འབར་བ་བཅས།
[9] བོད་དབུས་ཆུ་ཤར་རྫོང་ཁོངས་ཀྱི་ས་མིང་ཞིག་གི་མིང་སྟེ་མཉེས་ཐང་ཞེས་འབྲི་བའང་ཡོད།
[10] རྡོ་རིང་པཎྚི་ཊའི་རྣམ་ཐར་ཤོག་གྲངས་ ༧༣༨ ཐོག་གསལ། སི་ཁྲོན་མི་རིགས་དཔེ་སྐྲུན་ཁང་གིས་དཔར། དཔར་དུས་ཕྱི་ལོ་ ༡༩༨༧ པར་ཐེངས་དང་པོ།
[11] རྡོ་རིང་པཎྚི་ཊའི་རྣམ་ཐར་ཤོག་གྲངས་ ༧༣༩ ཐོག་གསལ། སི་ཁྲོན་མི་རིགས་དཔེ་སྐྲུན་ཁང་གིས་དཔར། དཔར་དུས་ཕྱི་ལོ་ ༡༩༨༧ པར་ཐེངས་དང་པོ།
[12] མཚོ་སྔོན་རྨ་ཆུའི་འགྲམ་ཐོ་ལི་ཞེས་པར་ཡབ་རྡོ་རྗེ་བཀྲ་ཤིས་དང་། ཡུམ་བཀྲ་ཤིས་མཚོ་གཉིས་ཀྱི་སྲས་སུ་རབ་བྱུང་བཅུ་གཉིས་པའི་ཤིང་སྤྲེལ་ ༡༧༠༤ ལོར་སྐུ་བལྟམས། དགུང་ལོ་གསུམ་པའི་ཐོག་ཀུན་མཁྱེན་བླ་མས་སུམ་པ་བླ་མའི་སྐུ་སྐྱེར་ངོས་འཛིན་མཛད། ཐར་ཤུལ་ཆོས་སྐྱོང་རྒྱ་མཚོ་སློབ་དཔོན་དུ་བསྟེན་ཏེ་ཡི་གེ་འབྲི་ཀློག་ལེགས་པར་སྦྱངས། དགུང་ལོ་བདུན་པ་ལྕགས་སྟག་ ༡༢༡༠ ལོར་ཐར་ཤུལ་དཔོན་སློབ་ཀྱི་དྲུང་དུ་རབ་ཏུ་བྱུང་། མཚན་བློ་བཟང་ཆོས་སྐྱོང་ཞེས་བསྩལ། དགུང་ལོ་དགུ་པར་སྤྲུལ་སྐུར་ངོས་འཛིན་གྱིས་དགོན་ལུང་ཆོས་གྲྭར་ཞུགས། དགུང་ལོ་བཅུ་གསུམ་ལ་ཕེབས་དུས་རྣལ་འབྱོར་ཆེན་པོ་སློབ་དཔོན་ཆུ་བཟང་རིན་པོ་ཆེའི་མདུན་དགེ་ཚུལ་བསྒྲུབས། དགུང་ལོ་ཉི་ཤུ་པ་ཆུ་ཡོས་ ༡༧༢༣ ལོར་དབུས་སུ་གྲྭ་སྐོར་དུ་ཕེབས། པཎ་ཆེན་བློ་བཟང་ཡེ་ཤེས་ཀྱི་མདུན་དུ་དགེ་སློང་གི་སྡོམ་པ་བཞེས། མཚན་ཡེ་ཤེས་དཔལ་འབྱོར་ཞེས་གསོལ། གསུང་རྩོམ་དམ་ཆོས་དར་ཚུལ། གསོ་རིག་སྐར་རྩིས་སོགས་པོ་ཏི་བརྒྱད་ཙམ་བཞུགས། ས་སྤྲེལ་ ༡༧༨༨ ལ་སྐུ་ཞི་བར་གཤེགས།
[13] དཔག་བསམ་ལྗོན་བཟང་ཤོག་གྲངས་ ༧༧ ཐོག་གསལ། ཕྱི་ལོ་ ༡༩༥༩ ལོར་ The Arya Bharati Mudranalaya ཞེས་པས་ལྡི་ལིར་པར་དུ་བསྐྲུན།
[14] དཔག་བསམ་ལྗོན་བཟང་ཤོག་གྲངས་ ༧༨ ཐོག་གསལ། ཕྱི་ལོ་ ༡༩༥༩ ལོར་ The Arya Bharati Mudranalaya ཞེས་པས་ལྡི་ལིར་པར་དུ་བསྐྲུན།
[15] མདོ་མཁར་བ་ཞབས་དྲུང་ཚེ་རིང་དབང་རྒྱལ་ལགས་ནི། རབ་བྱུང་བཅུ་གཉིས་པའི་མེ་གླང་སྤྱི་ལོ་ ༡༦༩༧ ལོར་ཡབ་ངག་དབང་ཚངས་པ་དང་། ཡུམ་མདང་དྲུང་གཉིས་ཀྱི་བུར་བྱང་སྟག་ལུང་དུ་འཁྲུངས། དགུང་ལོ་རེ་བདུན་པ་ཆུ་ལུག་ཕྱི་ལོ་ ༡༧༦༣ ལོར་འདས། ཁོང་ནི་བོད་ཀྱི་རྩོམ་པོ་མཁས་ཅན་ཞིག་ཡིན་པ་མ་ཟད། བོད་གཞུང་དགའ་ལྡན་ཕོ་བྲང་གི་བཀའ་བློན་རྒྱུན་རིང་ཤོས་གནང་མཁན་གྲས་ཀྱི་ཕུལ་བྱུང་གི་མི་སྣ་ཞིག་ཀྱང་རེད།
[16] བོད་ཀྱི་དཔེ་མཛོད་ཁང་གིས་ལྡི་ལིར་གསར་བར་ཕྱི་ལོ་ ༢༠༡༩ ལོར་དཔར།
[17] དེབ་ཐེར་དམར་པོ་གསར་མ་ལས་ལུང་རྣམ་འབྱེད་དང་། དཔལ་དུས་ཀྱི་འཁོར་ལོ་སོགས་སུ་བོད་ཅེས་མིང་བྱུང་ཞེས་པར་གཞིགས་ན། བདག་ཅག་གི་སྟོན་པ་འཇིག་རྟེན་དུ་བྱོན་དུས་ནས་བོད་ཅེས་པའི་ཐ་སྙད་འདི་གྲུབ་ཡོད་པར་འདོད་དོ། །
མཆན། རྩོམ་ཡིག་འདི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།
