༸གོང་ས་རྒྱལ་བ་རིན་པོ་ཆེ་མཆོག་ལ་འཛམ་གླིང་ནང་སྙན་གྲགས་ཆེ་བའི་གྷི་རེ་མི་ཡི་རོལ་མོའི་གཟེངས་རྟགས་ཐོབ།
དེ་རིང་ཕྱི་ཚེས་ ༢ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཚེས་ ༡ ཉིན་འཛམ་གླིང་ནང་སྙན་གྲགས་ཆེ་བའི་གྷི་རེ་མི་རྒྱལ་སྤྱིའི་རོལ་དབྱངས་གཟེངས་རྟགས་སྤྲོད་པའི་མཛད་སྒོ་སྐབས་ ༦༨ པ་འཚོགས་ཡོད་ཅིང་། སྐབས་དེར་༸གོང་ས་རྒྱལ་བ་རིན་པོ་ཆེ་མཆོག་གི་བྱམས་སྙིང་རྗེ་དང་ཞི་བདེའི་གསུང་སྐད་ལྡན་པའི་རོལ་དབྱངས་ཤིག་ལ་གྷི་རེ་མི་ཡི་གཟེངས་རྟགས་ཐོག་མ་དེ་ཐོབ་ཡོད་པ་རེད།
གཟེངས་རྟགས་དེ་དང་འབྲེལ་ནས་དགའ་ལྡན་ཕོ་བྲང་གི་དྲ་ཚིགས་སྟེང་༸གོང་ས་མཆོག་གིས། ངོས་ནས་དགའ་སྤྲོ་དང་གུས་ཞབས་ཀྱི་སྒོ་ནས་གཟེངས་རྟགས་འདི་དང་ལེན་ཞུས་པ་ཡིན། ངོས་ནས་གཟེངས་རྟགས་འདི་ནི་ངོས་སྒེར་ལ་ཐོབ་པ་ཞིག་མིན་པར་ང་ཚོ་ཐུན་མོང་གི་ཡོངས་ཁྱབ་འགན་འཁྲི་ལ་ངོས་འཛིན་ཞུས་པར་མཐོང་གི་ཡོད། ངོས་ཀྱིས་འགྲོ་བ་མིའི་གཅིག་གྱུར་གྱི་འདུ་ཤེས་དང་ཁོར་ཡུག་གཅེས་སྐྱོང་། སྙིང་རྗེ་དང་ཞི་བདེ་བཅས་ནི་འགྲོ་བ་མི་ཐེར་འབུམ་བརྒྱད་ཀྱི་བདེ་དོན་སྤྱི་ལ་མེད་དུ་མི་རུང་བ་ཞིག་ཡིན་པར་ཡིད་ཆེས་ཟབ་མོ་ཡོད། གཟེངས་རྟགས་འདིས་ངོས་ཀྱི་འཕྲིན་ཡིག་དག་ཁྱབ་སྤེལ་ཆེ་རུ་གཏོང་བར་ཕན་ཐོགས་ཀྱི་ཡོད་པས་ངོས་རང་དགའ་པོ་བྱུང་། ཞེས་གསུངས།
༸གོང་ས་མཆོག་ལ་གྷི་རེ་མིའི་གཟེངས་རྟགས་ཐོབ་པར་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་འཚམས་འདྲི་ཞུས་འདུག་པ་དང་ཁོང་གིས། ༸གོང་ས་མཆོག་ལ་གྷི་རེ་མི་ཡི་གཟེངས་རྟགས་ཕུལ་བ་དེ་ནི་ལོ་རྒྱུས་རང་བཞིན་ཅན་ཞིག་ཆགས་ཡོད། དེ་ནི་ང་ཚོ་བོད་མི་ཙམ་མིན་པར་འགྲོ་བ་མིའི་རིགས་ཡོངས་ཀྱི་དགའ་ཚོར་བྱེད་ཡུལ་ཞིག་ཏུ་གྱུར་ཡོད། རྒྱུ་མཚན་ནི་༸གོང་ས་མཆོག་གི་བྱམས་སྙིང་རྗེ་དང་གཞན་ཕན་གྱི་བཀའ་སློབ་སོགས་ནི་ཧ་ཅང་གནད་འགག་ཆགས་ཡོད་ལ། ལྷག་པར་དུ་དེང་སྐབས་འཛམ་གླིང་ཡུལ་གྲུ་གང་སར་འབྱུང་བཞིན་པའི་གནས་སྟངས་ཁྲོད། ང་ཚོས་༸གོང་ས་མཆོག་གི་བཀའ་སློབ་འདི་དག་གོང་སྤེལ་དང་རྒྱུན་འཛིན་བྱ་རྒྱུ་གལ་ཆེན་ཡིན། ངས་གུས་བཀུར་ཆེན་པོས་༸གོང་ས་མཆོག་ལ་གྷི་རེ་མི་ཡི་གཟེངས་རྟགས་ཐོབ་པར་འཚམས་འདྲི་ཞུ་རྒྱུ་ཡིན། ༸མགོན་པོ་གང་ཉིད་མཆོག་གི་བྱམས་སྙིང་རྗེ་དང་འཇིག་རྟེན་ཀུན་ཁྱབ་ཀྱི་འགན་འཁྲིའི་བཀའ་སློབ་སོགས་ནི་རིག་གཞུང་དང་ཆོས་ལུགས་ཀྱི་ས་མཚམས་ལས་བརྒལ་ཡོད། ༸མགོན་པོ་མཆོག་ལ་གཟེངས་རྟགས་འདི་ཐོབ་པ་དང་འབྲེལ་ནས་༸ཁོང་གི་ཐུགས་དགོངས་མཐའ་དག་རིག་གཞུང་དང་ཆོས་ལུགས། རྒན་གཞོན་བཅས་དབྱེ་བ་མེད་པར་ཁྱབ་སྤེལ་ཐུབ་པའི་སྨོན་འདུན་ཞུ་རྒྱུ་ཡིན། འཛམ་གླིང་འདིར་བྱམས་བརྩེ་དང་སྙིང་རྗེ། བསམ་ཤེས་སོགས་ཧ་ཅང་དགོས་གལ་ཆགས་བསྡད་ཡོད་ལ། ངས་རེ་བར་མི་ས་ཡ་མང་པོས་བྱམས་བརྩེ་དང་སྙིང་རྗེ་བདམས་ཏེ་ཕན་ཚུན་བསམ་ཤེས་ཀྱིས་ཞི་བའི་ངང་འཚོ་བའི་སྨོན་འདུན་ཞུ་བཞིན་ཡོད་ཅེས་གསུངས་འདུག
དེ་རིང་འབྲས་ལྗོངས་ཀྱི་མངའ་སྡེའི་སྤྱི་ཁྱབ་བློན་ཆེན་པེ་རེམ་སིངྒ་ཏ་མང་ (Prem Singh Tamang) མཆོག་གིས། ༸གོང་ས་མཆོག་ལ་འཚམས་འདྲི་ཞུས་པའི་ནང་། ༸གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཚེ་གང་བོར་སྙིང་རྗེ་དང་། ཤེས་རབ། འཇིག་རྟེན་ཀུན་ཁྱབ་ཀྱི་འགན་འཁྲིའི་ཐོག་སྐུ་ལས་བསྐྱོན་པར་ཆེ་བསྟོད་ངོས་འཛིན་ཞུས་པ་རེད། ༸མགོན་པོ་གང་ཉིད་མཆོག་གི་ལྷོད་ཅིང་འཇམ་པའི་སྐད་དང་བསྐལ་བ་རྫོགས་མེད་ཀྱི་བཀའ་སློབ་ཁག་གིས་འཛམ་གླིང་གི་མི་གྲངས་མེད་པ་ལ་འགྲོ་བ་མི་རྣམས་གཅིག་ལ་གཅིག་བརྟེན་ཡིན་འདུ་ཤེས་ཇེ་ཟབ་ཏུ་གཏོང་བ་དང་སེམས་ཀྱི་ཞི་བདེའི་ཐོག་ལམ་སྟོན་མཛད་ཀྱི་ཡོད། ཅེས་དང་། ༸མགོན་པོ་གང་ཉིད་མཆོག་གི་བཀའ་སློབ་དང་སྒོམ་རྒྱག་སྟངས་སོགས་ཀྱིས་བྱམས་བརྩེའི་སྐོར་ལ་གོ་རྟོགས་སྤེལ་བ་དང་། སྙིང་རྗེ་དང་ཞི་བདེ་དང་ལྡན་པའི་འཛམ་གླིང་འཛུགས་སྐྲུན་བྱེད་པའི་ལམ་ལ་འོད་སྣང་སྦྱིན་གྱི་ཡོད། ༸གོང་ས་མཆོག་གི་བཀའ་སློབ་ལམ་སྟོན་དག་གིས་འགྲོ་བ་མིའི་རིགས་ལ་ཐུན་མོང་མ་ཡིན་པའི་སེམས་ཤུགས་སྤྲོད་ཀྱི་ཡོད། ཅེས་གསུངས་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་འཚམས་འདྲི་གནང་བའི་ནང་། ངས་དབུས་བོད་མིའི་སྒྲིག་འཛུགས་དང་བོད་མི་མང་ཡོངས་ཀྱི་ཚབ་ཞུས་ཏེ། ༸གོང་ས་རྒྱལ་བ་རིན་པོ་ཆེ་མཆོག་ལ་གྷི་རེ་མི་ཡི་གཟེངས་རྟགས་ཐོབ་པར་འཚམས་འདྲི་ཞུ་རྒྱུ་ཡིན། གཟེངས་རྟགས་དེ་ནི་༸གོང་ས་མཆོག་གིས་བསྐལ་བ་རྫོགས་མེད་ཀྱི་བཀའ་སློབ་ཁག་གིས་ཞི་བདེ་དང་མི་རིགས་གཅིག་གྱུར་ཐོག་ཁྱབ་གདལ་ཆེ་རུ་གཏོང་བའི་གོ་སྐབས་ཤིག་རེད། ༸མགོན་པོ་གང་ཉིད་མཆོག་གི་བཀའ་སློབ་དེ་དག་གིས་ང་ཚོ་ཚང་མ་དང་འཛམ་གླིང་ཡོངས་ལ་འགན་འཁྲི་མཉམ་སྤྱོད་བྱེད་དགོས་པའི་དྲན་སྐུལ་མུ་མཐུད་དུ་གནང་བའི་རེ་བ་ཡོད། ཅེས་གསུངས་འདུག
ཡང་དེ་རིང་རྒྱ་ནག་གཞུང་གིས་༸གོང་ས་མཆོག་ལ་གྷི་རེ་མི་གཟེངས་རྟགས་ཐོབ་པར་ངོས་ལེན་མེད་པའི་རྣམ་འགྱུར་བསྟན་འདུག་པ་དང་། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ལིན་ཇེན་ཟེར་བས། ༸ཁོང་ནི་ཆབ་སྲིད་ཀྱི་སྐྱབས་བཅོལ་འོག་ཡོད་ཅིང་ཆོས་ལུགས་ཀྱི་མིང་ཐོག་ནས་རྒྱ་ནག་ཁ་བྲལ་གྱི་ལས་འགུལ་སྤེལ་མཁན་ཞིག་ཡིན། ཞེས་དང་། གྷི་རེ་མི་གཟེངས་རྟགས་དེ་རྒྱ་ནག་ཁ་བྲལ་གྱི་ལས་དོན་ཐོག་བེད་སྤྱོད་བཏང་བར་དགག་པ་ཡོད་ཅེས་བརྗོད་འདུག
༸གོང་ས་མཆོག་གི་རོལ་དབྱངས་བརྩམས་ཆོས་དེ་ནི། འཇིག་རྟེན་ཀུན་ཁྱབ་ཀྱི་འགན་འཁྲི་དང་ཞི་གནས། བྱམས་བརྩེ་དང་ཞི་བདེ་སོགས་༸གོང་ས་མཆོག་གི་བཀའ་སློབ་ཀྱི་སྙིང་བོ་དག་གཞས་དབྱངས་གསར་པ་བརྒྱུད་ནས་མི་རྣམས་ལ་སྐུལ་མ་གཏོང་གི་ཡོད་པ་ཞིག་ཡིན་འདུག་ལ། རོལ་དབྱངས་བརྩམས་ཆོས་དེའི་ནང་དུ་ཆུ་ཚོད་ ༡༠༠ ལྷག་གི་༸གོང་ས་མཆོག་གི་བཀའ་སློབ་དང་གསུང་བཤད་སོགས་སྒྲ་འཇུག་བྱས་ཡོད་པ་རེད།
༸གོང་ས་མཆོག་གི་རོལ་མོའི་བརྩམས་ཆོས་དེ་ཕྱི་ལོ་ ༢༠༢༥ ཟླ་ ༨ པའི་ནང་ཐོག་མར་འགྲེམས་སྤེལ་བྱས་པ་དང་། འདས་ལོའི་ཟླ་ ༡༡ ནང་གྷི་རེ་མི་ཡི་གཟེངས་རྟགས་ཀྱི་འོས་གཞིའི་ཁོངས་སུ་ཚུད་ཡོད། བརྩམས་ཆོས་དེ་ནི་ཕྱི་ལོ་ ༢༠༠༩ ཙམ་ནས་རྒྱ་གར་གྱི་རོལ་མོའི་སྒྱུ་རྩལ་བ་ཨམ་ཇཱ་ཨ་ལི་ཁན་ (Amjad Ali Khan ) ལགས་དང་ཀ་བྷིར་སེ་གྷལ་(Kabir Sehgal) ལགས་གཉིས་ཀྱིས་བཟོ་བསྐྲུན་བྱེད་མགོ་བཙུགས་པ་ཞིག་ཡིན་འདུག
གསར་འགོད་པ། བསྟན་འཛིན་ཕུར་བུ། སྐལ་བཟང་སྦྱིན་པ།
