པདྨ་བཟང་པོ་ལགས་ཀྱིས་ལ་དྭགས་ས་གནས་ཁྲིམས་ཞིབ་པའི་ལས་ཁུར་དམ་བཅའ་ཕུལ།

དེ་རིང་སྔ་དྲོར་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་གི་མདུན་དུ་ལ་དྭགས་ས་གནས་ཁྲིམས་ཞིབ་པ་པདྨ་བཟང་པོ་ལགས་ནས་ལས་འཁུར་དམ་བཅའ་ཕུལ་སོང་།

བཙན་བྱོལ་བོད་མིའི་བཅའ་ཁྲིམས་དོན་ཚན་རེ་དགུའི་ནང་གསེས་དོན་ཚན་དང་པོའི་ནང་། ཆེས་མཐོའི་ཁྲིམས་ཞིབ་ཁང་གིས་ས་གནས་སོ་སོའི་འགོ་འཛིན་ཁག་དང༌། དེ་མིན་ལས་བྱེད་དང༌། སྐྱེ་བོ་སུ་འོས་ལ་ཁྲིམས་ཞིབ་ཀྱི་དབང་ཆ་སྤྲད་དེ་གཏན་འཇགས་དང༌། འཕྲལ་སེལ། ཡང་ན་སྐོར་བསྐྱོད་བཅས་ཀྱི་ཁྲིམས་ཞིབ་ཁང་འོག་མའི་ལས་དོན་སྐབས་བསྟུན་གྱིས་སྒྲུབ་ཆོག་པ་ཡིན། ཞེས་གསལ་ཡོད་པ་ལྟར། དེ་རིང་སྔ་དྲོའི་ཆུ་ཚོད་ ༡༠ ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་གི་དྲུང་ནས་ལ་དྭགས་ས་གནས་ཁྲིམས་ཞིབ་པ་གསར་པ་པདྨ་བཟང་པོ་ལགས་ནས་ལས་འཁུར་དམ་བཅའ་འབུལ་བའི་མཛད་སྒོ་ཚོགས་སོང་བ་དང་། མཛད་སྒོའི་སྟེང་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་དང་ཁྲིམས་དྲུང་ཡེ་ཤེས་དབང་མོ་ལགས་སོགས་ཆེད་ཕེབས་གནང་འདུག

མཛད་སྒོའི་ཐོག་པདྨ་བཟང་པོ་ལགས་ཀྱིས། མ་འོངས་པར་ས་གནས་ཁྲིམས་ཞིབ་པའི་ལས་སྒོ་མཐའ་དག་དེ་རིང་གི་དམ་འབུལ་གྱི་དགོངས་དོན། བཅའ་ཁྲིམས་རིན་པོ་ཆེ་དང་བོད་མི་དམངས་སྤྱི་འཐུས་ལྷན་ཚོགས་ཀྱིས་གཏན་འབེབས་གནང་བའི་ཁྲིམས་སྒྲིག་བཅས་གཞི་རྩར་བཟུང་བའི་ཐོག་ནས། ས་གནས་ཁྲིམས་ཞིབ་པའི་ཁྲིམས་དོན་དང་འཛིན་སྐྱོང་གི་ལས་དོན་དྲང་བདེན་གྱི་ཐོག་ནས་བྱ་རྒྱུའི་ཆོད་སེམས་བརྟན་པོ་ཡོད་སྐོར་སོགས་གསུངས་སོང་།

ལ་དྭགས་ས་གནས་ཁྲིམས་ཞིབ་པ་གསར་པ་པདྨ་བཟང་པོ་ལགས་ནི་ལ་དྭགས་སུ་སྐྱེས་ཤིང་། ཕྱི་ལོ ༢༠༡༣ ལོར་ཟླ་གསུམ་གྱི་རིང་ལ་དྭགས་ས་གནས་ཁྲིམས་ཞིབ་ཁང་དུ་ཁྲིམས་དྲུང་དང་རྩིས་པ་གཅིག་ལྕོགས་ཀྱི་ལས་འཁུར་ཞུས། དེ་ནས་ནང་སྲིད་ལས་ཁུངས་ཀྱི་དྲུང་གཞོན་དང་ཟུང་དྲུང་གནང་།   ཕྱི་ལོ ༢༠༢༡ ཟླ་༧ ཚེས་ ༡ ཉིན་ཁྲིམས་ཞིབ་ཁང་གི་ཟུང་དྲུང་དུ་བསྐོས། ཁོང་གིས་ད་བར་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་དང་དེའི་ཁྱབ་ཁོངས་ས་གནས་ཁྲིམས་ཞིབ་ཁང་དུ་ལོ་ལྔ་མ་ཟིན་ཙམ་དང་། ནང་སྲིད་ལས་ཁུངས་སུ་ལོ་གསུམ་དང་ཟླ་བརྒྱད་ལྷག་ལས་ཁུར་ཞུས་མྱོང་ཡོད་འདུག

ད་ལྟའི་ཆར་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྱབ་ཁོངས་སུ་རྡེ་ར་རྡུན་བདེ་སྐྱིད་གླིང་གཞིས་སྒར་དུ་བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་དང་། སྦེལ་ཀོབ་ལུགས་བསམ་གཞིས་ཆགས་སུ་ལྷོ་ཕྱོགས་བོད་མིའི་ས་གནས་ཁྲིམས་ཞིབ་ཁང་། དེ་བཞིན་ལ་དྭགས་བསོད་ནམས་གླིང་གཞིས་ཆགས་སུ་ལ་དྭགས་བོད་མིའི་ས་གནས་ཁྲིམས་ཞིབ་ཁང་བཅས་ཁྱོན་ས་གནས་ཁྲིམས་ཞིབ་ཁང་གསུམ་ཡོད་པ་རེད།

གསར་འགོད་པ། དཔལ་ལྡན།