༸སྐྱབས་རྗེ་རྡོ་གྲུབ་རིན་པོ་ཆེ་མཆོག་དགོངས་པ་ཆོས་དབྱིངས་སུ་འཐིམས།

༸སྐྱབས་རྗེ་རྡོ་གྲུབ་རིན་པོ་ཆེ་སྐུ་ཕྲེང་བཞི་པ་འཇིགས་མེད་ཐུབ་བསྟན་འཕྲིན་ལས་དཔལ་བཟང་པོ་མཆོག་དགོངས་པ་ཆོས་དབྱིངས་སུ་འཐིམས་ཏེ་ཐུགས་དམ་དུ་བཞུགས་ཡོད་འདུགཟླ་འདིའི་ཕྱི་ཚེས་ ༢༥ ཉིན་གྱི་ཕྱི་དྲོའི་ཆུ་ཚོད་ ༤ ཡས་མས་སུ། ༸སྐྱབས་རྗེ་རྡོ་གྲུབ་རིན་པོ་ཆེ་སྐུ་ཕྲེང་བཞི་པ་འཇིགས་མེད་ཐུབ་བསྟན་འཕྲིན་ལས་དཔལ་བཟང་པོ་མཆོག་རྒྱ་གར་བྱང་ཕྱོགས་འབྲས་ལྗོངས་ཀྱི་རྡོ་གྲུབ་མཆོད་རྟེན་དགོན་དུ་དགོངས་པ་ཆོས་དབྱིངས་སུ་འཐིམས་ཏེ་ཐུགས་དམ་དུ་བཞུགས་ཡོད་འདུག

འདི་གའི་གསར་འགོད་པར་རྡོ་གྲུབ་མཆོད་རྟེན་དགོན་གྱི་དགེ་བསྐོས་ཀརྨ་བསྟན་འཛིན་ལགས་ཀྱིས། རིན་པོ་ཆེ་མཆོག་ལ་སྐུའི་སྙུང་གཞི་གང་ཡང་མེད་པར་བདེ་བར་གཤེགས་ཏེ། ད་ལྟ་ཐུགས་དམ་དུ་བཞུགས་ཡོད་པ་དང་། སང་ཉིན་ཕྱི་ཚེས་ ༢༩ ཉིན་ནས་དགོངས་རྫོགས་ཀྱི་མཆོད་འབུལ་སྨོན་ལམ་འཚོག་རྒྱུ་ཡིན་སྐོར་བརྗོད་བྱུང་ལ། རྡོ་གྲུབ་མཆོད་རྟེན་དགོན་ཐེབས་རྩ་ནས་སློབ་འབངས་ཡོངས་ལ་གསལ་བསྒྲགས་ཤིག་གནང་བའི་ནང་དུ།  ཟླ་འདིའི་ཕྱི་ཚེས་ ༣༡ ཉིན་ཐུགས་དམ་ནས་གྲོལ་གྱི་ཡོད་པས་ཕྱི་ཟླ་ ༢ ཚེས་ ༡ ནས་དད་ལྡན་སེར་སྐྱ་མི་མང་ལ་སྐུ་གདུང་མཇལ་ཁ་གནང་འཆར་ཡོད་འདུག

༧སྐྱབས་རྗེ་རྡོ་གྲུབ་རིན་པོ་ཆེ་མཆོག་ནི་ཕྱི་ལོ་ ༡༩༢༧ ལོར་བོད་གསེར་རྟ་རྫོང་གསེར་ཁོག་ཏུ། ཡབ་རྗེས་དཀར་དགྲ་བླ་དང་ཡུམ་ཀ་ལི་སྐྱིད་གཉིས་ཀྱི་སྲས་སུ་སྐུ་འཁྲུངས་ཡོད་ཅིང་། རྫོགས་ཆེན་རིན་པོ་ཆེ་མཆོག་ནས་རྡོ་གྲུབ་ཆེན་རིན་པོ་ཆེ་སྐུ་ཕྲེང་གསུམ་པའི་ཡང་སྲིད་དུ་ངོས་འཛིན་མཛད་དེ་མཚན་ལ་ཐུབ་བསྟན་འཕྲིན་ལས་དཔལ་བཟང་པོ་ཞེས་གསོལ་ཏེ། དགུང་ལོ་བཞིའི་ཐོག་གྲུབ་ཆེན་དགོན་དུ་གསེར་ཁྲིར་མངའ་གསོལ་མཛད།

རྒྱ་ནག་དམར་པོས་བཙན་འཛུལ་དང་སུན་གཙེར་གྱི་དབང་གིས་དགུང་གྲངས་ ༣༡ བཞེས་སྐབས་ཏེ། ཕྱི་ལོ་ ༡༩༥༧ ཟླ་ ༡༠ ཚེས་ ༡༢ ཉིན་རྒྱ་གར་བྱང་ཕྱོགས་འབྲས་ལྗོངས་སྒང་ཐོག་ཏུ་ཞབས་སོར་འཁོད་དེ། ཕྱི་ལོ་ ༡༩༦༠ ཟླ་ ༤ ཚེས་ ༢༦ ཉིན་ནས་རྣམ་རྒྱལ་བོད་ཀྱི་ཤེས་རིག་ཉམས་ཞིབ་གནང་བ་སོགས་བསྟན་འགྲོའི་དོན་དུ་སྐུ་ངལ་ཚད་མེད་བསྐྱོན་ཡོད་པ་མ་ཟད། འབྲས་ལྗོངས་སུ་རྡོ་གྲུབ་མཆོད་རྟེན་དགོན་ཕྱག་བཏབ་སྟེ་བཤད་སྒྲུབ་གཉིས་ཀྱི་སྡེ་གསར་འཛུགས་གནང་བ་དང་། རྒྱ་བལ་འབྲུག་གསུམ་གཙོ་བོར་གྱུར་བའི་ནུབ་ཕྱོགས་རྒྱལ་ཁབ་ཁག་མང་པོའི་ནང་ཆིབས་བསྒྱུར་གྱིས་ཆོས་ཕྱོགས་ཀྱི་མཛད་པ་རྒྱ་ཆེར་བསྐྱངས་ཡོད་འདུག

གསར་འགོད་པ། དཔལ་ལྡན།