ཁྱིམ་ཚང་གཅིག་གི་བཟའ་མི་ཚོས་པེ་ཅིན་ཨོ་རྩེད་ལ་ངོ་རྒོལ་གྱི་ལས་འགུལ་སྤེལ་བཞིན་པ།

ཁ་སང་དབྱིན་ཡུལ་དུ་གནས་སྡོད་བོད་པའི་ཁྱིམ་ཚང་ཞིག་གིས་དབྱིན་ཡུལ་གྱི་གྲོང་ཁྱེར་བྷ་ཐི ( Bath) ནས་མགོ་བཙུགས་ཏེ་ཁྲག་དྲི་བྲོ་བའི་རྩེད་འགྲན་མི་དགོས། འགྲོ་བ་མིའི་ཐོབ་ཐང་གཙུག་ཏུ་བཀུར་དགོས། མི་རིགས་རྩ་གཏོར་གྱི་རྩེད་འགྲན་ལ་ངོ་རྒོལ་ཡོད་ཅེས་པེ་ཅིན་ཨོ་རྩེད་ལ་ངོ་རྒོལ་གྱི་ལས་འགུལ་སྤེལ་བཞིན་འདུག

ཁྱིམ་ཚང་དེའི་ཨ་མ་བསྟན་འཛིན་བཟང་མོ་ལགས་ཀྱིས་འདི་གའི་གསར་འགོད་པར་ལས་འགུལ་གྱི་དགོས་དམིགས་སོགས་ཀྱི་སྐོར་ངོ་སྤྲོད་གནང་སྐབས། ལས་འགུལ་གྱི་དམིགས་ཡུལ་གཙོ་བོ་ནི་རྒྱ་ནག་ཏུ་འཚོག་གྲབས་ཡོད་པའི་རྒྱལ་སྤྱིའི་ཨོ་ལིམ་པིག་གི་རྩེད་འགྲན་དེར་ངོ་རྒོལ་བྱེད་ཀྱི་ཡོད་པ་དང་། དབྱིན་ཡུལ་དུ་རྟེན་གཞི་བྱས་པའི་མི་མང་རྣམས་ཀྱིས་དགུན་དུས་ཨོ་རྩེད་གྱི་ཐད་གཏོང་ལ་མ་ལྟ་རོགས་ཞེས་རེ་སྐུལ་ཞུ་ཡི་ཡོད་པ་མ་ཟད། ལས་འགུལ་སྐབས་བོད་དོན་སྐོར་གྱི་ཡིག་ཆ་སོགས་བགོ་འགྲེམས་བྱེད་ཀྱི་ཡོད། ཅེས་དང་། ལས་འགུལ་དེའི་ནང་བསྟན་འཛིན་བཟང་མོ་ལགས་ཀྱི་བཟའ་ཟླ་དང་བུ་མོ་གཉིས་ཀྱིས་ཀྱང་མཉམ་ཞུགས་བྱེད་ཀྱི་ཡོད་ལ། དབྱིན་ཡུལ་གྱི་ན་གཞོན་ལོ་ཆུང་མང་པོ་ཞིག་གིས་བོད་དོན་ལ་དམིགས་བསལ་གྱི་དོ་སྣང་བྱས་ཏེ། ཡུལ་མི་མང་པོ་ཞིག་གིས་ཁྱིམ་ཚང་དེའི་ལས་འགུལ་ལ་བསྔགས་བརྗོད་དང་འབྲེལ། དགུན་དུས་ཨོ་རྩེད་ཀྱི་ཐད་གཏོང་ལ་བལྟ་རྒྱུ་མིན་པའི་ཁས་ལེན་བྱས་ཡོད་སྐོར་བརྗོད་བྱུང་།

རྒྱ་ནག་ཏུ་འཚོག་འཆར་ཡོད་པའི་དགུན་དུས་ཨོ་ལིམ་པིག་གི་རྩེད་འགྲན་ལ་ངོས་ལེན་མེད་པའི་ངོ་རྒོལ་ལས་འགུལ་དེ་ནི་དབྱིན་ཡུལ་གྱི་གྲོང་ཁྱེར་བྷ་ཐི་( Bath) ནས་མགོ་བཙུགས་ཀྱིས། དེ་རིང་དབྱིན་ཡུལ་གྱི་གྲོང་ཁྱེར་ཁའེ་བྷེ་ཧྥུ (Cardiff) དང་རིམ་པས་གྲོང་ཁྱེར་( Bristol) སོགས་ཕྱི་ཚེས་ ༢ བར་བོད་དོན་དྲིལ་བསྒྲགས་ཀྱི་ཡིག་ཆ་འགྲེམས་སྤེལ་བྱེད་བཞིན་འདུག་ལ། ཁྱིམ་ཚང་དེས་ངོ་དེབ་ཐད་གཏོང་བརྒྱུད་ས་ཁུལ་ཁག་ཏུ་གནས་སྡོད་བོད་མི་ཚོས་ལས་འགུལ་དེར་མཉམ་ཞུགས་གང་མང་བྱ་རྒྱུའི་འབོད་སྐུལ་ཡང་བྱེད་ཀྱི་འདུག་ལ། ཨ་མ་བསྟན་འཛིན་བཟང་མོ་ལགས་ཀྱི་སྣེ་འཁྲིད་འོག ཕྱི་ལོ་༢༠༢༠ ཟླ་ ༨ ཚེས་ ༥ ནས་ཚེས་ ༡༠ བར།  རྒྱ་ནག་གཞུང་གིས་བོད་མི་དང་ཡུ་གུར། ཧོང་ཀོང་མི་མང་བཅས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ངོ་རྒོལ་དང་བོད་དོན་གོ་རྟོགས་སྤེལ་ཆེད། དབྱིན་ཡུལ་གྱི་གྲོང་ཁྱེར་བྷི་རི་སི་ཊོལ་ (Bristol) ནས་རྒྱལ་ས་ལོན་ཊོན་ (London) བར་བོད་དོན་ཞི་བའི་གོམ་བགྲོད་ལས་འགུལ་ཞིག་ཀྱང་སྤེལ་ཡོད་འདུག

རྒྱ་ནག་ཏུ་དགུན་དུས་ཨོ་ལིམ་པིག་འཚོག་པར་བདུན་ཕྲག་གཅིག་ལས་མེད་པའི་མཚམས་འདིར་བོད་པའི་ཚོགས་པ་ཁག་དང་མི་སྒེར་སོགས་ནས་ངོ་རྒོལ་གྱི་ལས་འགུལ་རབ་དང་རིམ་པ་སྤེལ་བཞིན་ཡོད་པ་ལྟར། ཟླ་འདིའི་ཕྱི་ཚེས ༢༨ ཉིན་དྷ་སར་རྟེན་གཞི་བྱས་པའི་བོད་རང་བཙན་སློབ་ཕྲུག་ཚོགས་པས་དྷ་སའི་དྷོ་ལ་དྷར་རི་ངོས་ཀྱི་གངས་ཁྲོད་དུ། བོད་དང་རྒྱ་གར་གྱི་རྒྱལ་དར་དང་འཕྲེད་དར་འཕྱར་ཏེ་རྒྱ་ནག་ཏུ་འཚོག་གཏན་ཁེལ་བའི་དགུན་དུས་ཨོ་རྩེད་འགྲན་ཚོགས་ལ་ངོ་རྒོལ་གྱི་ལས་འགུལ་ཞིག་སྤེལ་འདུག་ལ། ཨོ་ལིམ་པིག་མ་འཚོག་གོང་གི་ཉིན་གཅིག་སྔོན་ཏག་ཏག་སྟེ་ཕྱི་ཟླ་ ༢ ཚེས་ ༣ ཉིན་འཛམ་གླིང་ས་ཕྱོགས་གང་སར་ཡོད་པའི་བོད་དང་། ཡུ་གུར། ཧོང་ཀོང་གི་ལས་འགུལ་བ་སོགས་ཀྱིས་དུས་གཅིག་ཏུ་དགུན་དུས་ཀྱི་ཨོ་རྩེད་འགྲན་ཚོགས་ལ་ངོ་རྒོལ་གྱི་ལས་འགུལ་གཞི་རྒྱ་ཆེན་པོ་ཞིག་སྤེལ་འཆར་ཡོད་འདུག

ད་ལྟའི་ཆར་རྒྱ་ནག་གཞུང་གིས་དོགས་ཟོན་དང་དམ་དྲག་ཤུགས་ཆེན་འོག་པེ་ཅིན་ནི་འཛམ་གླིང་གི་ཨོ་ལིམ་པིག་རྩེད་འགྲན་ཐེངས་གཉིས་བསྡུ་ཡུལ་གྱི་གྲོང་ཁྱེར་དང་པོ་དེ་ཆགས་ཡོད་སྐོར་དང་། རྩེད་འགྲན་དེས་ཞི་བདེ་དང་མཉམ་གནས་མཐུན་སྒྲིལ་སོགས་མཚོན་གྱི་ཡོད་ཚུལ་དང་། མཛད་སྒོའི་ཐོག་མཛའ་མཐུན་འབྲེལ་བ་ཟབ་པའི་རྒྱལ་ཁབ་ཁག་གི་སྐུ་ཚབ་ཕེབས་ཀྱི་ཡོད་པའི་དྲིལ་བསྒྲགས་མང་པོ་བྱེད་བཞིན་ཡོད་པ་མ་ཟད། འདས་ལོར་རྒྱ་ནག་གཞུང་ཕྱོགས་ནས་ཨོ་ལིམ་པིག་ནང་མཉམ་ཞུགས་མི་བྱེད་མཁན་གྱི་རྒྱལ་ཁབ་ཁག་ལ་ཉེས་ཆད་གཅོད་རྒྱུ་ཡིན་པའི་ཉེན་བརྡའང་བཏང་ཡོད་པ་རེད། འོན་ཀྱང་། ད་སྔ་བར་ཨ་རི་གཙོ་བྱས་པའི་ཁེ་ན་ཌ་དང་དབྱིན་ཇི། ཨོ་གླིང་དང་ཉི་ཧོང་། ཐའེ་ཝན་སོགས་འཛམ་གླིང་རྒྱལ་ཁབ་ཁྱོན་ ༡༢ ལྷག་གིས་རྒྱ་ནག་གཞུང་གིས་བོད་དང་ཤར་ཊུར་ཀི་སི་ཐན་བཅས་སུ་མི་རིགས་རྩ་མེད་དང་འགྲོ་བ་མིའི་ཐོབ་ཐང་རྡོལ་རོལ་ཚབས་ཆེན་གཏོང་བཞིན་པར་ངོ་རྒོལ་གྱིས། རྒྱལ་ཁབ་སོ་སོའི་ཕྱི་འབྲེལ་མི་སྣ་དང་གཞུང་འབྲེལ་སྐུ་ཚབ་རྣམས་པེ་ཅིན་དུ་མངག་གཏོང་བྱ་རྒྱུ་མིན་པའི་ཐག་གཅོད་བྱས་ཡོད་པ་རེད།

གསར་འགོད་པ། དཔལ་ལྡན།