བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ད་ལྟའི་ཆར་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་སྐུ་གཟུགས་བདེ་ཐང་དང་སྐུ་ལྷོད་ལྷོད་བྱས་ནས་བཞུགས་ཡོད་པས་བོད་མི་ཚོས་སེམས་འཚབ་རྩ་བ་ནས་གནང་མི་དགོས་སྐོར་གསུངས་སོང་།
ཟླ་འདིའི་ཕྱི་ཚེས་ ༧ ཉིན་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་དགེ་བསྐུལ་གྱི་ཛ་དྲག་གསལ་བསྒྲགས་ཤིག་སྤེལ་བ་ལ་བརྟེན་ནས་སྤྱི་ཚོགས་ནང་༧གོང་ས་སྐྱབས་མགོན་ཆེན་པོ་མཆོག་གི་སྐུ་ཕྱྭ་ལ་སེམས་འཚབ་ཆེན་པོ་བྱེད་མཁན་དང་། ཛ་དྲག་གི་གསལ་བསྒྲགས་དེར་འགྲེལ་ལོག་དོགས་འདྲོག་བྱེད་མཁན་གང་ཙམ་ཡོང་གི་ཡོད་སྟབས། དེ་རིང་བོད་ཀྱི་འགྲེམས་སྟོན་ཁང་དབུ་འབྱེད་ཀྱི་མཛད་སྒོའི་སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། རྩ་བའི་ཆ་ནས་ང་ཚོས་ལས་དོན་ག་རེ་བསྒྲུབ་ཀྱང་༧གོང་ས་སྐྱབས་མགོན་ཆེན་པོ་མཆོག་གི་བཀྲིན་དང་ཐུགས་རྗེའི་བྱིན་རླབས་ཀྱི་འོག་ནས་ཡོང་གི་ཡོད་སྟབས། ང་ཚོས་འདས་མ་འོངས་ད་ལྟ་གསུམ་ལ་༧་རྒྱལ་བ་རིན་པོ་མཆོག་གི་དགོངས་པ་གཞིར་བཟུང་ནས་འགྲོ་ཡི་ཡོད་པ་རེད། ད་བར་ང་ཚོར་གཟེངས་སུ་ཐོན་པའི་ལས་དོན་གང་འདྲ་ཞིག་བྱུང་བ་ཡིན་ནའང་༧གོང་ས་སྐྱབས་མགོན་ཆེན་པོ་མཆོག་གི་ཐུགས་རྗེ་བཀྲིན་ལ་བརྟེན་ནས་བྱུང་གི་ཡོད་སྟབས། དེ་རིང་༧རྒྱལ་བ་རིན་པོ་ཆེ་མཆོག་གི་བཀྲིན་རྗེས་སུ་དྲན་པ་དང་། བོད་ནང་གི་བོད་མི་དང་བཙན་བྱོལ་དུ་ཡོད་པའི་བོད་མི་ཡོངས་ལ། བཀའ་ཤག་གིས་འགན་ཁུར་བའི་ཐོག་ནས་ཁ་གསལ་པོ་བྱས་ཏེ་ད་ལྟའི་ཆར་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་སྐུ་གཟུགས་བདེ་ཐང་དང་། སྐུ་ལྷོད་ལྷོད་བྱས་ནས་བཞུགས་ཡོད། ཅེས་དང་། ཡང་ཁོང་གིས། བཀའ་མོལ་ཞུས་པ་དེ་དག་ཀྱང་འཛིན་སྐྱོང་བཀའ་ཤག་གི་སྲིད་སྐྱོང་གི་མིང་ཁྱེར་བའི་ཐོག་ནས་འགན་ཆ་ཚང་ཁྱེར་ནས་ཞུ་ཡི་ཡོད། དེང་སང་སྤྱི་ཚོགས་ནང་དུ་དཀྲོག་གཏམ་འཆད་མཁན་ཁ་ཤས་ཤིག་ཡོད་དུས། སྐད་ཆ་དེ་དག་བོད་ནང་དུ་བསླེབས་ཡོད་པ་ཡིན་ན། བོད་ནང་གི་བོད་མི་ཚོས་ཐུགས་འཚབ་རྩ་བ་ནས་གནང་མི་དགོས། ཞེས་གསུངས་སོང་།
དེ་ཡང་ཁ་སང་ཆོས་རིག་ལས་ཁུངས་ནས་སྤེལ་བའི་ཡོངས་ཁྱབ་གསལ་བསྒྲགས་དེའི་ནང་དུ། ཛ་དྲག་གི་གསལ་བསྒྲགས་དེ་ནི་སྤྱི་དམངས་ཡོངས་ཀྱི་དགེ་བསྐུལ་སླད་དུ་ཡིན་པ་ལས། བྱེ་བྲག་པར་དམིགས་ཏེ་ཛ་དྲག་གི་གསལ་བསྒྲགས་སྤེལ་བ་ཞིག་མིན་པའི་ཡོངས་ཁྱབ་གསལ་བཤད་དང་འབྲེལ། ཐེངས་འདིའི་ཞབས་རིམ་གྱི་དམིགས་ཡུལ་ནི་༧རྒྱལ་བའི་སྐུ་ཕྱྭ་མཛད་འཕྲིན་རྒྱས་པ་དང་། མང་ཚོགས་བདེ་ཐབས་ཀྱི་ཆེད་དུ་ཡིན་པ་དང་། གཞི་འཛིན་ས་ནི་རྩིས་འབྲས་དང་བླ་ལྷའི་བཀའ་ལུང་དགོངས་དོན་ཡིན་པ། དུས་ཚེས་ནི་བོད་ཟླ་དང་པོའི་ནང་ཚུད་ཡིན་པ་བཅས་གསལ་བསྒྲགས་སུ་བཀོད་ཟིན་པ་ལྟར་ཡིན་པས། དེ་མིན་གྱི་འགྲེལ་ལོག་དང་། བཤད་ལོག་རྣམས་ཁུངས་ལུང་གཞི་རྩ་མེད་པའི་གཏམ་འཆལ་རང་ཡིན། ཞེས་དང་། གསལ་བསྒྲགས་ཀྱི་མགོར་ཛ་དྲག་ཅེས་བྲིས་པ་དེ་ཡང་སྤྱི་རིམ་སྨིན་སྒྲུབ་ཞུ་རྒྱུ་དུས་ཚོད་ཀྱིས་ཉེ་བར་གཏུགས་ཡོད་པའི་ཆ་ནས་དེ་ལྟར་བཀོད་པ་མ་གཏོགས། གནས་སྟངས་བྱེ་བྲག་པར་དམིགས་ཏེ་ཛ་དྲག་ཅེས་བཀོད་པ་ཞིག་མིན། ཅེས་འཁོད་ཡོད་པ་རེད་འདུག
གསར་འགོད་པ། དཔལ་ལྡན།
