བོད་མིའི་སྒྲིག་འཛུགས་ཀྱིས་ཕྱི་ཟླ ༣ པ་ནས་ལོ་ ༡༢ ནས་ ༡༥ བར་གྱི་བྱིས་པ་ཚོར་འགོག་ཁབ་བརྒྱག་འཆར་ཡོད་འདུག  

འདས་པའི་བདུན་ཕྲག་ནང་བོད་པའི་ས་གནས་ཁག་ ༡༦ ནང་དྭང་བླངས་སྨན་ཞབས་པ་ ༢༢ འཕར་སྣོན་གནང་ཡོད་ནའང་ད་དུང་པ་རུ་ཝ་ལ་དང་སིམ་ལ་བོད་མིའི་གཞིས་ཆགས་སུ་དྭང་བླངས་སྨན་པ་མཁོ་གལ་ཡོད་པའི་གསལ་བསྒྲགས་གནང་འདུགཁ་སང་ཉིན་རྒྱབ་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༩༨  པ་སྤེལ་སྐབས། འདས་པའི་བདུན་ཕྲག་གཅིག་ནང་ཏོག་དབྱིབས་ནད་པ་གསར་པ་  ༢༣༣  བྱུང་བ་དང་བོད་མི་  ༢ འདས་གྲོངས་སུ་ཕྱིན། དེ་བཞིན་རྒྱ་བལ་གྱི་ས་གནས་ཁག་  ༡༥   ནང་རང་ཁྱིམ་དང་ཚོགས་སྡེའི་ཟུར་བཀག་ཁང་དུ་མི་གྲངས་ ༦༡༥  ལྷག་སྡོད་མུས་ཡིན་པ་རེད་འདུག

འཕྲོད་བསྟེན་ལས་ཁུངས་ཀྱི་་དྲུང་གཞོན་བསྟན་འཛིན་ཀུན་བཟང་ལགས་ཀྱིས། ཕྱི་ཟླ ༣ ནས་ལོ་ ༡༢ ནས་ ༡༥ བར་གྱི་བྱིས་པ་རྣམས་ལ་སྔོན་ཁབ་བརྒྱག་རྒྱུའི་རེ་བ་ཞིག་ཡོད་སྟབས། བྱིས་པ་དེ་དག་གི་ཐོ་གཞུང་བསྡུ་རུབ་གྲ་སྒྲིག་དགོས་པ་དང་།  འདས་པའི་བདུན་ཕྲག་ནང་དུ་བོད་པའི་ས་གནས་ཁག ༡༦ ལ་སྨན་ཞབས་པ་འཕར་མ་ ༢༢ འཕར་སྣོན་བྱས་ཡོད་ཀྱང་། པུ་རུ་ཝ་ལ་དང་སིམ་ལ་བོད་གཞིས་གཉིས་སུ་དྭང་བླང་སྨན་ཞབས་པ་མཁོ་གལ་ཡོད་སྟབས། དྭང་བླངས་སྨན་ཞབས་པ་རེ་ཡོད་ཚེ་འབྲེལ་ཡོད་ས་གནས་མགོ་འཛིན་ལ་འབྲེལ་བ་བྱ་དགོས་པ་དང་། དེང་གི་ཆར་བོད་མི་མང་པོ་ཞིག་དགུན་ཚོང་སོགས་ནས་རང་གནས་སུ་ལོག་མཁན་རྣམས་ཀྱིས་ས་གནས་སུ་ཏོག་ནད་ཟུར་བཀག་ཏུ་བསྡད་དགོས་པ་དང་། ཉེ་ལམ་རྒྱ་གར་ནང་དུ་ཏོག་དབྱིབས་རིམས་ནད་ཀྱི་གནས་སྟངས་ཇེ་ལེགས་སུ་ཕྱིན་ཡོད་ཀྱང་། བོད་མི་ཚོས་རྒྱུན་ལྡན་བཞིན་ཏོག་དབྱིབས་རིམས་ནད་སྔོན་འགོག་གི་ཐབས་ལམ་ཁག་བསྟེན་ཏེ། ཁ་རས་གྱོན་དགོས་པ། སྤྱི་ཚོགས་རྒྱང་བཀྱེད་ཀྱིས་འདུ་འཛི་ཆེ་སའི་ས་ཚིགས་སུ་འགྲོ་མི་ཉན་པ། ཆམ་ནད་སོགས་འགོས་ཁྱབ་བྱུང་ཚེ་བརྟག་དཔྱད་བྱ་དགོས་པ་དང་རིམས་ནད་འགོས་ཁྱབ་མི་ཡོང་ཆེད་ཟུར་བཀག་སོགས་སུ་ངེས་པར་དུ་བསྡད་དགོས་པའི་ལམ་སྟོན་སོགས་གནང་སོང་།

གསར་འགོད་གསལ་བསྒྲགས་སྟེང་སྨན་པ་བསྟན་འཛིན་བརྩོན་འགྲུས་ལགས་ཀྱིས། ཉེ་ལམ་འཛམ་གླིང་ས་ཕྱོགས་གང་སར་ནད་ཡམས་གནས་སྟངས་བཟང་དུ་འགྲོ་མུས་ཡིན་སྟབས། མི་མང་འགྲིམ་འགྲུལ་ཐད་གུ་ཡངས་སུ་འགྲོ་མུས་ཡིན་པར་བརྟེན།  ཕྱི་རྒྱལ་ནས་ཡོང་མཁན་རྣམས་དམིགས་བསལ་ཟུར་བཀག་ལ་བསྡད་མི་དགོས་ཀྱང་། ཉིན་གྲགས་བཅུ་བཞིའི་རིང་རང་ཉིད་ལ་རིམས་ནད་འགོས་ཡོད་མེད་བརྟག་དཔྱད་བྱ་དགོས་པ་དང་།  དེ་བཞིན་རྒྱ་གར་དུ་ཏོག་དབྱིབས་རིམས་ནད་འགོས་ཏེ་ཛ་དྲག་ཅན་དུ་འགྱུར་མཁན་མང་པོ་ཞིག་ནི་སྔོན་འགོག་སྨན་ཁབ་མ་རྒྱག་མཁན་རྐྱང་རྐྱང་ཡིན་པས། བོད་མི་ཚོས་གང་མགྱོགས་སྔོན་འགོག་སྨན་ཁབ་བརྒྱག་དགོས་དང་། འགོག་ཁབ་དང་པོ་ཐོབ་མཁན་རྣམས་ཀྱིས་ཉིན་གྲངས་ ༨༢ རིང་སྒུག་མི་དགོས་པར། ཉིན་གྲངས་ ༢༨ རྗེས་སུ་འགོག་ཁབ་གཉིས་པ་དེ་བརྒྱབ་ན་ཆོག་གི་ཡོད་སྐོར་སོགས་འགྲེལ་བརྗོད་གནང་སོང་།

ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་མི་གྲངས་  ༨༩༨༧  བྱུང་བའི་ཁྲོད་དྲག་སྐྱེད་ཟིན་པ་༨༥༩༩  དང་། རྐྱེན་འདས་སུ་ཕྱིན་པ་ ༡༦༦  ། ད་ལྟ་ཏོག་ནད་ཀྱིས་མནར་བཞིན་པའི་བོད་མི་གྲངས་ ༢༢༢  ཡོད་འདུག