ལོ་སར་བསླེབ་ལ་ཉེ་བའི་སྐབས་དང་བསྟུན་རྒྱ་ནག་གཞུང་གིས་བོད་མངའ་རིས་ས་ཁུལ་གྱི་སྒེར་རྩེ་རྫོང་དང་མཚོ་ཆེན་རྫོང་སོགས་བོད་ཁུལ་ཁག་ཅིག་ཏུ་བོད་མི་ཚོར་ལོ་སར་སྐབས་མི་མང་འདུ་འཛོམས་དང་བསང་གསོལ་མཆོད་འབུལ་རིགས་བྱེད་མི་ཆོག་པའི་བཀག་གཏོང་གི་ཡོད་འདུག
དེ་རིང་འདི་གའི་གསར་འགོད་པར་བོད་ནས་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། བོད་ཀྱི་ལོ་སར་བསླེབ་ལ་ཉེ་བར་བརྟེན། བོད་མངའ་རིས་ས་ཁུལ་གྱི་ཁོངས་གཏོགས་སྒེར་རྩེ་རྫོང་དང་མཚོ་ཆེན་རྫོང་ཁོངས་ཀྱི་བོད་མི་ཚོར་བོད་ཀྱི་ལོ་སར་སྐབས་མཆོད་འབུལ་བསང་གཏོང་དང་མི་མང་དགའ་འཛོམས་རིགས་བྱེད་མི་ཆོག་སྐོར་བརྗོད་དེ་དམ་དྲགས་ཆེན་པོ་བྱེད་བཞིན་ཡོད་འདུག
ཟླ་འདིའི་ཕྱི་ཚེས་ ༡༨ ཉིན་སྒེར་རྩེ་རྫོང་དང་མཚོ་ཆེན་རྫོང་གི་ཁོངས་གཏོགས་ས་གནས་ཁག་ཏུ་ཉེན་རྟོག་པ་དང་གཞུང་འབྲེལ་མི་སྣ་ཡོང་སྟེ། ཏོག་དབྱིབས་ནད་ཡམས་འགོས་ཁྱབ་སོགས་ཀྱི་ཉེན་ཁ་ཡོད་སྟབས། འདི་ལོའི་བོད་ཀྱི་ལོ་སར་སྐབས་མི་མང་འདུ་འཛོམས་རིགས་བྱེད་མི་ཆོག་པ་དང་། དེ་བཞིན་རི་ལ་རླུང་རྟ་མཆོད་པ་དང་བསང་གསོལ་གཏོང་བ། དགོན་པ་ཁག་ཏུ་མཆོད་འབུལ་ཕྱག་སྐོར་སོགས་བྱེད་མི་ཆོག་སྐོར་དང་། སྐབས་དེར་འབྲེལ་ཡོད་སྡེ་ཁག་ནས་ལྟ་རྟོག་ནན་པོ་བྱ་རྒྱུ་ཡིན་པས་ཁྲིམས་སྒྲིག་དང་འགལ་བའི་བྱ་སྤྱོད་སྤེལ་མཁན་ཡོད་ཚེ་ཁྲིམས་ལྟར་ཉེས་ཆད་གཅོད་རྒྱུ་ཡིན་སྐོར་ཉེན་བརྡ་བཏང་འདུག
ས་གནས་བོད་མི་ཞིག་གིས་འདི་གའི་གསར་འགོད་པར། ང་ཚོས་ལོ་གཅིག་ལ་ལོ་སར་གཅིག་མ་གཏོགས་གཉིས་ཟེར་བ་ཞིག་གཏོང་འདོད་མེད། ས་གནས་ཀྱི་དགོན་པ་ཁག་ནས་ག་དུས་ལོ་སར་གཏོང་གི་ཡོད་ན་དེ་དུས་ང་ཚོ་སྡེ་མི་ཚོས་ཀྱང་ལོ་སར་གཏོང་གི་ཡོད་པ་རེད། ལོ་སར་ལ་དཔལ་འབྱོར་བཟང་ངན་དང་མི་རྩ་ཡོད་མེད་ལ་མ་ལྟོས་པར་ཁྱིམ་མི་ཚང་མ་ལྷན་དུ་འཛོམས། སྡེ་མི་ཚང་མ་ལྷན་དུ་འཛོམས་བསྡད་ཡོད་པ་རེད། དགོན་ཁག་ཏུ་མཆོད་འབུལ་ཕྱག་སྐོར་དང་ཡུལ་ལྷ་གཞིས་བདག་སོགས་ལ་མཆོད་པ་འབུལ་བ་དེ་བོད་སྲིད་པ་ཆགས་ནས་བཟུང་དར་བསྡད་ཡོད་སྟབས། ལོ་སར་ལ་མཆོད་འབུལ་བསང་གཏོང་དང་འདུ་འཛོམས་རིགས་མི་ཆོག་ལབ་དུས་དཔེ་དཀའ་ལས་ཁག་པོ་དང་། རྟགས་དང་རྟེན་འབྲེལ་ལའང་མི་འགྲོ་བ་ཞིག་རེད། ཅེས་བརྗོད་བྱུང་།
གསུམ་བཅུའི་དུས་དྲན་དང་བོད་ལུགས་ལོ་སར་སྐབས་ལོ་ལྟར་རྒྱ་ནག་གཞུང་གིས་བོད་ཁུལ་གང་སར་དམ་དྲགས་སྔར་ལས་ཆེན་པོ་བྱེད་བཞིན་ཡོད་པ་ལྟར། ད་ལྟའི་ཆར་ས་གནས་དེ་དག་ནང་ཉེན་རྟོག་པ་འགྲེམས་འཇོག་བྱས་ཏེ་ལྟ་རྟོག་དང་ཞིབ་བཤེར་བྱེད་བཞིན་ཡོད་འདུག་ལ། བོད་མཚོ་སྔོན་ཞིང་ཆེན་གྱི་ཁོངས་གཏོགས་ས་གནས་ཁག་ཅིག་དང་རྔ་བ་ཁུལ་སོགས་ཀྱི་ནང་དུའང་དམ་དྲགས་དོགས་གཟོན་བྱེད་བཞིན་ཡོད་སྐོར་ས་གནས་བོད་མི་ཁག་ཅིག་གིས་བརྗོད་བྱུང་།
དུས་བབ་ས་གནས་གསར་འགོད་པས་སྤེལ།
