རྒྱ་ནག་གཞུང་གིས་མཚན་མཐུན་དགའ་རོགས་སྒྲིག་པ་དང་གཉེན་སྒྲིག་སོགས་ཀྱི་ཐོག་མའི་འབྲེལ་མཐུད་ཡོང་སའི་མཉེས་ཆས་གྲགས་ཅན་ཞིག་བཀག་སྡོམ་བྱས་པར་ཁེ་ན་ཌའི་རྒྱལ་སྤྱིའི་བདེ་འཇགས་དང་ཐོབ་ཐང་ཞིབ་འཇུག་གི་ཚོགས་པ་ཞིག་གིས་རྒྱ་ནག་ལ་སྐྱོན་བརྗོད་བྱས་འདུག
དེ་རིང་རྒྱ་གར་གྱི་ཨན་ནེ་ (ANI) གསར་ཁང་གིས་གནས་ཚུལ་སྤེལ་བ་ལྟར་ན། ཁེ་ན་ཌའི་ནང་རྟེན་གཞི་བྱས་པའི་རྒྱལ་སྤྱིའི་ཐོབ་ཐང་དང་བདེ་འཇགས་ཉམས་ཞིབ་ཀྱི་གླེང་སྟེགས་ (IFFRAS) ཞེས་པའི་ཚོགས་པས། རྒྱ་ནག་གཞུང་གིས་རྒྱལ་སྤྱིའི་གྲགས་ཁྱབ་ཆེ་བའི་མཚན་མཐུན་གྱི་དགའ་རོགས་ཕན་ཚུན་འབྲེལ་འདྲིས་བྱེད་ས་ (Grindr) ཞེས་པའི་མཉེན་ཆས་ཤིག་བཀག་སྡོམ་བྱས་ཏེ། རྒྱ་ནག་གི་མཚན་མཐུན་མ་ནིང་མོ་ལོག་(LGBT) སྤྱི་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་མེད་པར་བཟོ་ཡི་ཡོད་པའི་སྐྱོན་བརྗོད་བྱས་འདུག
དེ་འབྲེལ་གནས་ཚུལ་ནང་། རྒྱ་ནག་དམར་ཤོག་ཚོགས་པས་མཚན་མཐུན་མ་ནིང་མོ་ལོག་གི་སྤྱི་ཚོགས་ཀྱིས་རང་གི་གཞི་རྩའི་ཐོབ་ཐང་དང་མངོན་འདོད་སོགས་སྲུང་སྐྱོབ་ཀྱིས། རྒྱལ་སྲིད་བདེ་འཇགས་དང་སྤྱི་ཚོགས་བརྟན་ལྷིང་ལ་ཉེན་ཁ་བསྐྲུན་སྲིད་པའི་འདངས་སྐྲག་འོག རྒྱ་ནག་གཞུང་གིས་མཚན་མཐུན་མ་ནིང་མོ་ལོག་དང་འབྲེལ་མཉེན་ཆས་བཀག་འགོག་བྱས་ཏེ། ཁོ་ཚོའི་ཐོབ་ཐང་བཀག་འགོག་བྱེད་ཀྱི་ཡོད་པ་མ་ཟད། མཚན་མཐུན་དགའ་རོགས་དང་འབྲེལ་བའི་བརྩེ་དུང་གི་གློག་བརྙན་ཡང་བཀག་སྡོམ་བྱས་ཡོད་པ་དང། དེ་ཡང་འདས་ལོར་རྒྱ་ནག་གིས་སྐད་འཕྲིན་གྱི་མཉེན་ཆས་ (WeChat app) ནས་མཚན་མཐུན་མ་ནིང་མོ་ལོག་དང་འབྲེལ་བའི་དྲ་ཚིགས་ཁག་བཀག་སྡོམ་བྱས་པ་དང་རྩ་མེད་བཟོས་ཡོད་སྐོར་སོགས་བརྗོད་འདུག
ཕྱི་ལོ་ ༡༩༩༧ ལོར་རྒྱ་ནག་གཞུང་གིས་མཚན་མཐུན་འཁྲིག་སྦྱོད་ནི་ཁྲིམས་འགལ་མིན་པར་ངོས་འཛིན་བྱས་ཡོད་པ་དང་རྒྱལ་ཚོགས་ཀྱི་ལྷན་ཚོགས་སྐབས་རིམ་པར་རྒྱ་ནག་གཞུང་གིས་མཚན་མཐུན་དང་མ་ནིང་མ་ལོག་གི་ཐོབ་ཐང་ལ་རྒྱལ་སྐྱོར་བྱས་དང་བྱེད་མུས་ཡིན་པའི་ཁས་ལེན་བྱས་ཡོད་ཀྱང་། ད་ལྟ་ད་དུང་རྒྱ་ནག་ནང་མཚན་མཐུན་གཉེན་སྒྲིག་དང་མཚན་མཐུན་གྱི་སྤྱི་ཚོགས་ལ་ཁྲིམས་ཐོག་ནས་རྒྱབ་སྐྱོར་དང་ངོས་འཛིན་ཐོབ་མེད་པར་བརྟེན། ཁོ་ཚོར་ད་དུང་རང་དབང་ངང་རང་ཉིད་ཀྱི་བཟའ་ཟླ་འཚོལ་བའམ་མཚན་མཐུན་འཁྲིག་སྤྱོད་བྱེད་པའི་ཐོབ་ཐང་མེད་པ་རེད་འདུག
ད་ཐེངས་ནི་རྒྱ་ནག་གཞུང་གིས་མཚན་མཐུན་མ་ནིང་མ་ལོག་དང་འབྲེལ་བའི་མཉེན་ཆས་སྒོ་བརྒྱབ་པ་ཐོག་མ་དེ་མ་ཡིན་པར། ཕྱི་ལོ་ ༢༠༡༧ ལོར་རྒྱ་ནག་གཞུང་གིས་མཚན་མཐུན་དགའ་རོགས་འབྲེལ་འདྲིས་བྱེད་སའི་ (Zank) ཟེར་བའི་མཉེན་ཆས་དེའི་ནང་། འཆལ་སྤྱོད་ཀྱི་རྣམ་འགྱུར་དང་འབྲེལ་བའི་གནད་དོན་ཡོད་པའི་སྐྱོན་བརྗོད་བྱས་ཏེ་མཉེན་ཆས་དེ་བཀག་སྡོམ་བྱས་ཡོད་པ་དང་། ཞི་ཅིན་ཕིན་གྱིས་སྣེ་ཁྲིད་པའི་རྒྱ་ནག་གཞུང་གིས་དྲ་ཐོག་གི་དཀྲོག་གཏམ་དང་ཆགས་སྤྱོད་ཀྱི་རིགས། རྨོངས་དད་ལ་སོགས་པ་སྟངས་འཛིན་བྱེད་ཀྱི་ཡོད་ལུགས་བརྗོད་ནས། ཆེད་དུ་མཚན་མཐུན་དང་མ་ནིང་མ་ལོག་གི་སྤྱི་ཚོགས་དང་འབྲེལ་བའི་དྲ་ཐོག་གི་མཉེན་ཆས་དང་བྱེད་སྒོ་ཡོངས་སྒོ་རྒྱག་གི་ཡོད་པ་མ་ཟད། རྒྱ་ནག་ཏུ་ཡོད་པའི་རྒྱལ་སྤྱིའི་ཚོང་ལས་དང་ཁྲིམས་ཀྱི་ཁོར་ཡུག་སོགས་མེད་པར་བཟོས་ཏེ་མཚན་མཐུན་མ་ནིང་མོ་ལོག་གི་སྤྱི་ཚོགས་ལ་དཀའ་ངལ་ལྷག་མ་འཕྲད་ཀྱི་ཡོད་སྐོར་སོགས་བརྗོད་འདུག
མཚན་མཐུན་དགའ་རོགས་སྒྲིག་པ་དང་གཉེན་སྒྲིག་གི་འབྲེལ་ལམ་མཐུད་སའི་(Grindr) ཞེས་པའི་མཉེན་ཆས་དེ་ནི། ཕྱི་ལོ་ ༢༠༠༩ ཟླ་ ༣ ཚེས་ ༢༥ ཉིན་ཨ་རིའི་མངའ་སྡེ་ (California) རྒྱལ་ས་ལོ་སི་ཨན་ཇིལ་སིའི་ (Los Angeles) འཕྲུལ་རིག་ཁེ་ལས་པ་སྐུ་ཞབས་ (Joel Simkhai) ལགས་ཀྱིས། གསར་དུ་བཟོས་ནས་ལོ་གཅིག་ཙམ་ལས་མ་འགོར་བར་མཉེན་ཆས་དེ་བེད་སྤྱོད་བྱེད་མཁན་མི་གྲངས་འབུམ་ ༥ ཙམ་བྱུང་ཡོད་ཅིང་། ཕྱི་ལོ་ ༢༠༡༡ ཟླ་ ༡ པོའི་ནང་མཉེན་ཆས་དེ་ནི་འཛམ་གླིང་གི་དགའ་རོགས་སྒྲིག་སའི་ཁ་པར་གྱི་མཉེན་ཆས་ལེགས་ཤོས་ (Best Mobile Dating App) ཀྱི་བྱ་དགའ་ཐོབ་རྗེས། མཉེན་ཆས་དེ་འཛམ་གླིང་རྒྱལ་ཁབ་ ༡༩༢ ནས་བེད་སྤྱོད་བྱེད་མཁན་མི་མང་ས་ཡ་ ༤ ལྷག་བྱུང་། དེ་ནས་ཕྱི་ལོ་ ༢༠༡༦ ལོར་མཉེན་ཆས་དེའི་བརྒྱ་ཆ་ ༦༠ རྒྱ་ནག་ནང་རྟེན་གཞི་བྱས་ཡོད་པའི་ (Kunlun Tech Co Ltd) བཟོ་གྲྭ་ལ་བཙོང་ཡོད་པ་དང་། ཕྱི་ལོ་ ༢༠༡༨ ལོར་རྒྱ་ནག་ནང་གི་ (Kunlun) བཟོ་གྲྭས་མཉེན་ཆས་ཆ་ཚང་ཉོས་ཡོད་འདུག ཕྱི་ལོ་ ༢༠༢༠ ལོར་ (Kunlun) བཟོ་གྲྭས་མཉེན་ཆས་ཀྱི་བརྒྱ་ཆ་ ༩༨།༥༩ ཨ་རིའི་ནང་རྟེན་གཞི་བྱས་ཡོད་པའི་ (San Vicente Acquisition LLC) བཟོ་གྲྭར་བཙོང་ཡོད་འདུག་ལ། མཉེན་ཆས་དེ་ནི་དྲ་ཐོག་བརྒྱུད་མཚན་མཐུན་སོགས་ཕན་ཚུན་གླེང་མོལ་དང་འབྲེལ་བ་བྱེད་སའི་མཉེན་ཆས་ཐོག་མར་ཞིག་ཆགས་ཀྱི་ཡོད་པ་མ་ཟད། ཕྱི་ལོ་ ༢༠༠༩ ལོར་གསར་བཟོ་བྱས་པའི་མཉེན་ཆས་དེ་འཛམ་གླིང་གི་ཆེས་སྙན་གྲགས་ཅན་གྱི་མཉེན་ཆས་ཤིག་ཀྱང་ཆགས་ཡོད་འདུག
གསར་འགོད་པ། བསྟན་འཛིན་ཕུར་བུ།
