༧གོང་ས་མཆོག་གིས་ཡུ་ཀེ་རེན་ནང་གང་མྱུར་ཞི་བདེ་ཡོང་བའི་ཐུགས་སྨོན་སྩལ།

༧གོང་ས་མཆོག་དང་ཡེ་ཤུའི་ཆོས་དཔོན་པོབ་མཆོག་རྣམ་གཉིས་ཀྱི་དབུས་པའི་སྲིད་སྐྱོང་སྤེན་པ་ཚེ་རིང་མཆོག་བཅས་ཀྱིས་ཡུ་ཀེ་རེན་ནང་བྱུང་བཞིན་པའི་དམག་འཁྲུག་ཐད་སེམས་འཚབ་དང་བཅས་དམག་འཁྲུག་དེ་གང་མགྱོགས་ཞི་འཇགས་ཡོང་བའི་ཐུགས་རེ་གནང་གི་འདུག

འདས་པའི་ཉིན་གྲངས་བཞི་རིང་འཛམ་གླིང་གི་སྟོབས་ཆེན་རྒྱལ་ཁབ་གྲས་སུ་ཡོད་པའི་ཨུ་རུ་སུས་རང་གི་ལྷོ་ཕྱོགས་ཁྱིམ་མཚེས་རྒྱལ་ཁབ་ཡུ་ཀེ་རེན་ (Ukraine) ལ་དཔུང་འཇུག་བྱས་ཏེ་བཙན་འཛུལ་བྱེད་བཞིན་པའི་སྐབས་འདིར། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་གཞུང་འབྲེལ་སྤྱི་ཚོགས་དྲ་ལམ་བརྒྱུད། ཡུ་ཀེ་རེན་གྱི་རྩོད་རྙོག་དེ་གྲོས་མོལ་གྱི་ལམ་ནས་སེལ་ཐབས་དགོས་སྐོར་གྱི་གསུང་འཕྲིན་ཞིག་སྩལ་གནང་ཡོད་འདུག

དེ་ཡང་མགོན་པོ་མཆོག་ནས་གཞུང་འབྲེལ་སྤྱི་ཚོགས་དྲ་ལམ་ངོ་དེབ་སྟེང་། ཡུ་ཀེ་རེན་གྱི་རྩོད་རྙོག་དེས་ངོས་རང་ཐུགས་ཕམ་ཆེན་པོ་བྱུང་སོང་། ང་ཚོའི་འཛམ་གླིང་འདི་གཅིག་ལ་གཅིག་རྟེན་ཡིན་པའི་དབང་གིས། རྒྱལ་ཁབ་གཉིས་དབར་གྱི་འཐབ་འཁྲུག་གིས་འཛམ་གླིང་བྱིངས་ལ་ཤུགས་རྐྱེན་སྤྲོད་ཀྱི་ཡོད་པ་རེད། དམག་འཁྲུག་ནི་དུས་ཚོད་ཡོལ་ཟིན་པ་ཞིག་དང་འཚེ་བ་མེད་པ་ནི་ཐབས་ལམ་གཅིག་པུ་དེ་རེད། ང་ཚོས་གཞན་རྣམས་རང་གི་མིང་སྲིང་ཡིན་པའི་ངོས་འཛིན་ཐོག་ནས་མིའི་རིགས་གཅིག་ཡིན་པའི་འདུ་ཤེས་དེ་སྐྱེད་ཐབས་བྱ་དགོས། དེ་ལྟར་བྱས་ཚེ། ང་ཚོས་འཛམ་གླིང་འདི་སྔར་བས་ཞི་བདེ་ལྡན་པ་ཞིག་ཏུ་བསྐྲུན་ཐུབ། ཅེས་གསུངས་འདུག

ཡང་མགོན་པོ་གང་ཉིད་མཆོག་ནས། དཀའ་ངལ་དང་མི་མཐུན་པ་རྣམས་གྲོས་མོལ་གྱི་ལམ་ནས་སེལ་ཐུབ་ཀྱི་ཡོད། དོན་དམ་པའི་ཞི་བདེ་ནི་ཕན་ཚུན་ལ་བསམ་ཤེས་དང་ཕན་ཚུན་གྱི་བདེ་དོན་ལ་བརྩི་བཀུར་ཡོད་པའི་ཐོག་ནས་སླེབས་ཐུབ་པ་ཞིག་རེད། ང་ཚོས་ནམ་ཡང་རེ་བ་འདོར་རྒྱུ་མེད། དུས་རབས་ ༢༠ དེ་དམག་འཁྲུག་དང་ཁྲག་གི་དུས་རབས་ཤིག་ཆགས་ཡོད་ནའང་། དུས་རབས་ ༢༡ འདི་ངེས་པར་དུ་གྲོས་མོལ་གྱི་དུས་རབས་ཞིག་ལ་འགྱུར་དགོས། ངོས་ནས་ཡུ་ཀེ་རེན་ནང་གང་མྱུར་ཞི་བདེ་སླར་གསོ་ཡོང་རྒྱུར་སྨོན་ལམ་ཞུ་ཡི་ཡོད། ཅེས་གསུང་འཕྲིན་སྩལ་ཡོད་འདུག

དེ་བཞིན་ཟླ་འདིའི་ཕྱི་ཚེས་ ༢༥ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ཀྱང་ཡུ་ཀེ་རེན་ལ་གདུང་སེམས་མཉམ་བསྐྱེད་གནང་བའི་ནང་། བོད་ཀྱི་གཏམ་དཔེ་ལ་འབུ་སྲིན་ཆེན་པོས་ཆུང་ངུ་བཟའ་བ་ཞེས་པ་ལྟར། (ཨུ་རུ་སུས་)ཡུ་ཀེ་རེན་ལ་བཙན་འཛུལ་བྱས་པ་དེས་ང་ཚོར་ཕྱི་ལོ་ ༡༩༥༠ ལོར་(རྒྱ་ནག་གིས)་བོད་བཙན་འཛུལ་བྱས་པ་ཕྱིར་དྲན་བྱས་སོང་། ཞེས་དང་། འཚེ་བ་སྤྱོད་རྒྱུ་ནི་ད་ལྟའི་དུས་སྐབས་སུ་མི་ཆོས་ལ་འདས་པ་དང་དུས་ཚོད་ཡོལ་ཟིན་པ་ཞིག་རེད། ཡུ་ཀེ་རེན་ནང་ཞི་བདེ་སླར་གསོ་ཡོང་དགོས། ཞེས་གསུངས་འདུག

ད་ལན་གོང་ས་མཆོག་ནས་ཨུ་རུ་སུའི་ཐད་གསུང་འཕྲིན་སྩལ་བ་ཐེངས་དང་པོ་དེ་མིན་པ་རེད། དེ་ཡང་ཕྱི་ལོ་ ༢༠༡༤ ཟླ་ ༩ པའི་ནང་༧གོང་ས་མཆོག་ནས་འཇར་མན་གྱི་ཚགས་པར་ཁང་ (Welt am Sonntag) གི་བཅར་འདྲི་ཞིག་གི་སྟེང་། སྲིད་འཛིན་པུ་ཀྲིན་གྱི་རང་གཅེས་འཛིན་གྱི་བསམ་བློ་དེ་ནི་དཀའ་རྙོག་ཀུན་གྱི་གཞི་རྩ་ཡིན་པ་དང་། པུ་ཀྲིན་གྱིས་བྷར་ལིན་གྱི་རྩིགས་གྱང་བསྐྱར་དུ་སློང་འདོད་ཡོད་པའི་རྣམ་པ་གཟིགས་ཀྱི་ཡོད་སྐོར་དང་། ཨུ་རུ་སུས་རྒྱལ་སྤྱིའི་ཁྲིམས་སྒྲིག་ངོས་ལེན་བྱ་འདོད་མེད་པ་དེས་ཨུ་རུ་སུར་དོ་ཕོག་ཆེན་པོ་ཐེབས་རྒྱུ་ཡིན་པ་དང་། ཨུ་རུ་སུས་འཛམ་གླིང་བྱིངས་དང་འབྲེལ་བ་བཅད་དེ་ཁེར་རྐྱང་དུ་འབུད་རྒྱུ་དེ། དོན་དུ་རང་སྲོག་བཅད་པ་དང་གཅིག་མཚུངས་ཡིན་སྐོར་སོགས་གསུངས་ཡོད་འདུག

ཨུ་རུ་སུའི་འདས་པའི་ཉིན་གྲངས་ ༤ རིང་ཡུ་ཀེ་རེན་ལ་དཔུང་འཇུག་དྲག་པོ་བྱེད་བཞིན་པར། རྒྱ་ནག་དང་བྷེ་ལུ་རུ་སིས་མཚོན་པའི་དབང་ཆ་གཅིག་བསྡུས་ཀྱི་སྲིད་གཞུང་རེ་ཟུང་མ་གཏོགས་ཕལ་ཆེ་བས་སྐྱོན་བརྗོད་དང་སྦྲགས། ཡུ་ཀེ་རེན་ལ་དངོས་སུ་དམག་མི་གཏོང་ཐབས་མེད་ནའང་། ནེ་ཊོ་དམག་དོན་སྒྲིག་འཛུགས་(Nato)བརྒྱུད་མཚོན་ཆ་དང་རོགས་དངུལ་མཁོ་སྤྲོད་བྱེད་མུས་ཡིན་ཞིང་། ལྷག་པར་དུ་འཛམ་གླིང་ས་ཕྱོགས་གང་སར་ཨུ་རུ་སུའི་དཔུང་འཇུག་ལ་ངོ་རྒོལ་གྱི་ལས་འགུལ་གཞི་རྒྱ་ཆེན་པོ་སྤེལ་བཞིན་པ་རེད། དེ་ཡང་ཁ་སང་ཕྱི་ཚེས་ ༢༧ ཉིན་འཇར་མ་ནིའི་རྒྱལ་ས་བྷར་ལིན་ནང་སྤེལ་བའི་རྔམ་སྟོན་ལས་འགུལ་སྟེང་མི་གྲངས་འབུམ་ ༡ ལྷག་མཉམ་ཞུགས་བྱས་ཡོད་པ་རེད། ཕྱིའི་རྒྱལ་ཁབ་ཙམ་དུ་མ་ཟད་ཨུ་རུ་སུའི་ནང་དུའང་སྲིད་འཛིན་པུ་ཀྲིན་གྱི་དམག་འཁྲུག་ལ་ངོ་རྒོལ་གྱི་ལས་འགུལ་སྤེལ་ཏེ། ལས་འགུལ་བ་བརྒྱ་ཕྲག་སྐོར་ཞིག་འཛིན་བཟུང་བྱས་ཡོད་པའི་གནས་ཚུལ་ཐོན་ཡོད་པ་རེད།

ད་ལྟའི་ཆར་འཛམ་གླིང་གི་ཆབ་སྲིད་མགོ་ཁྲིད་ཙམ་དུ་མ་ཟད་ཆོས་ལུགས་ཀྱི་མགོ་ཁྲིད་མང་པོས་ཨུ་རུ་སུར་སྐྱོན་བརྗོད་དང་ཡུ་ཀེ་རེན་ལ་རྒྱབ་སྐྱོར་གྱི་རྣམ་པ་ཤུགས་ཆེན་པོ་སྟོན་བཞིན་འདུག་ལ། དེའི་ཁྲོད་ནས་ཉེ་ལམ་མང་ཚོགས་ཀྱིས་བསྔགས་བརྗོད་ཆེན་པོ་བྱ་ཡུལ་ནི་ཡེ་ཤུའི་བླ་ཆེན་པོབ་ཧྥན་སི་སི་ (Pope Francis) ཆགས་ཡོད། དེ་ཡང་ཟླ་འདིའི་ཕྱི་ཚེས་ ༢༦ ཉིན་བླ་ཆེན་པོབ་ཀྱིས་གཞུང་འབྲེལ་འགྲོ་ལུགས་ལ་མ་བསྟུན་པར། ཝེ་ཊི་ཁན་སི་ཀྲི་(Vetican City) ནང་ཡོད་པའི་ཨུ་རུ་སུའི་གཞུང་ཚབ་ཁང་ནང་ཆེད་ཕེབས་ཀྱིས་ཡུ་ཀེ་རེན་ནང་གི་གནས་སྟངས་ཐད་ཐུགས་འཚབ་ཡོད་སྐོར་གསུངས་འདུག་ལ། ཁོང་གིས་རང་གི་གཞུང་འབྲེལ་ཊི་ཝི་ཊར་སྟེང་། དམག་འཁྲུག་གིས་ང་ཚོའི་འཛམ་གླིང་འདི་སྔར་བས་ཡ་ང་བའི་གནས་སུ་ལྷུང་ངེས་ཡིན། དམག་འཁྲུག་ནི་ཆབ་སྲིད་དང་མིའི་རིགས་ཀྱི་ཕམ་ཁ་ཞིག་ཡིན་སྐོར་སོགས་གསུངས་ཏེ་ཨུ་རུ་སུའི་བཙན་འཛུལ་ལ་སྐྱོན་བརྗོད་གནང་ཡོད་འདུག