༧གོང་ས་མཆོག་གིས་བཞུགས་སྒར་དྷ་སར་རྩོམ་རིག་དུས་སྟོན་ཐོག་མ་བསྡུས་པའི་སྟེང་འཚེ་བ་མེད་པ་དང་བྱམས་སྙིང་རྗེ་སྐོར་གྱི་རྒྱ་གར་གྱི་གནའ་བོའི་རིག་གཞུང་ལ་དོ་སྣང་བྱ་རྒྱུའི་ཐུགས་རེ་འཆང་བཞིན་ཡོད་སྐོར་གསུངས།
དེ་རིང་བཞུགས་སྒར་དྷ་སའི་རྫོང་དཔོན་ལས་ཁུངས་ཀྱིས་དྷ་ས་ཁུལ་དུ་རྩོམ་རིག་དར་འཕེལ་ལ་དམིགས་ཏེ། ཆེས་ཐོག་མའི་དྷ་རམ་ས་ལའི་རྩོམ་རིག་དུས་སྟོན་ (Dharamshala Literature Festival) ཞིག་བསྡུས་ཡོད་ཅིང་། ༧གོང་ས་རྒྱལ་བ་རིན་པོ་ཆེ་མཆོག་ནས་རྩོམ་རིག་དུས་སྟོན་དེར་གསུང་འཕྲིན་ཞིག་སྩལ་བའི་ནང་། དུས་སྟོན་འདིའི་བརྒྱུད་ནས་འཚེ་བ་མེད་པ་དང་བྱམས་སྙིང་རྗེ་སྐོར་གྱི་རྒྱ་གར་གྱི་གནའ་བོའི་རིག་གཞུང་ལ་དོ་སྣང་བྱ་རྒྱུའི་ཐུགས་རེ་འཆང་བཞིན་ཡོད་སྐོར་གསུངས་ཡོད་འདུག
བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་རྩོམ་རིག་དུས་སྟོན་སྟེང་། ༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་སྒྲོག་སྦྱང་གནང་བའི་ནང་། ངོས་རང་གི་འདས་པའི་ལོ་ངོ་ ༦༠ ལྷག་རིང་གི་ཁྱིམ་གཞིར་གྱུར་བའི་གྲོང་སྡེ་དྷ་རམ་ས་ལའི་ནང་རྩོམ་རིག་དུས་སྟོན་ཞིག་བསྡུས་པ་དེར་དགའ་ཚོར་ཆེན་པོ་བྱུང་ལ། ངོས་ནས་དུས་སྟོན་ལ་ཞུགས་མཁན་ཚང་མར་འཚམས་འདྲི་ཞུ་ཡི་ཡོད། ཅེས་དང་། དྷ་སའི་རྩོམ་རིག་དུས་སྟོན་འདི་བཞིན་དཔེ་ཆ་དང་དཔེ་ཀློག་སྲུང་གཙི་ཞུ་རྒྱུའི་དུས་ཚིགས་ཤིག་ཏུ་འགྱུར་རྒྱུ་རེད། དེར་བརྟེན། ངོས་ནས་ཁྱེད་ཚོ་ཚང་མས་སེམས་དང་སེམས་ཚོར་སྐོར་གྱི་རྒྱ་གར་གྱི་གནའ་བོའི་རིག་གཞུང་ཕྱུག་པོ་དག་དང་། དེ་དག་གིས་ཉོན་མོངས་ལ་ཁ་གཏད་ཇི་ལྟར་གཅོག་གི་ཡོད་མེད་སྐོར་ལ་དོ་སྣང་བྱ་རྒྱུར་རེ་བ་བྱེད་ཀྱི་ཡོད། མདོར་བསྡུས་ན། (རྒྱ་གར་གྱི་གནའ་བོའི་རིག་གཞུང་) དེ་ལ་ཞི་བདེ་དང་བདེ་སྐྱིད་ལྡན་པའི་འཛམ་གླིང་བསྐྲུན་རྒྱུར་ནུས་པ་ཆེན་པོ་ཡོད་པ་རེད། ཅེས་གསུངས་ཡོད་འདུག
མགོན་པོ་མཆོག་གི་གསུང་འཕྲིན་ནང་། རྒྱ་གར་ལ་འཛམ་གླིང་གི་རྩོམ་རིག་རིག་གཞུང་རྙིང་གྲས་ཤིག་ཡོད་པ་དེས། སེམས་ལ་དམིགས་གཏད་དེ་བདེ་སྐྱིད་ཀྱི་འབྱུང་ཁུངས་འཚོལ་ཞིབ་བྱེད་ཀྱི་ཡོད། དོན་དུ་ང་ཚོས་བདེ་སྐྱིད་ཡོང་བར་སེམས་ལ་འགྱུར་བཅོས་གཏོང་དགོས། འདི་ནི་རྒྱ་གར་གྱི་སྲོལ་རྒྱུན་འཚེ་བ་མེད་པའི་ལྟ་བ་དང་། གཞན་སྡུག་བསྔལ་ལས་གྲོལ་ན་སྙམ་པའི་སྙིང་རྗེ་གཉིས་ཀྱི་གཞི་རྩ་ཡིན་པ་རེད། ལྟ་གྲུབ་འདི་དག་ནི་དུས་ད་ལྟའང་ཧ་ཅང་རན་ཞིང་འཚམ་པ་ཡིན། ངོས་ནས་འཛམ་གླིང་འདིར་དེང་རབས་ཀྱི་ཤེས་ཡོན་དང་གནའ་བོའི་སྲོལ་རྒྱུན་གཉིས་མཉམ་འབྲེལ་གྱི་ཐོག་ནས་སྔར་བས་ཞི་བདེ་ལྡན་པའི་གོ་ལ་སྐྲུན་རྒྱུའི་ནུས་པ་དེ་རྒྱ་གར་ཁོ་ནར་ཡོད་པ་ཡིད་ཆེས་བྱེད་ཀྱི་ཡོད། ཅེས་གསུངས་འདུག་ལ། རྒྱ་གར་དང་འཛམ་གླིང་གི་ས་ཕྱོགས་གཞན་གྱི་དེང་རབས་རྩོམ་རིག་ནི་གསུང་རབས་ཀྱི་ནང་དུ་ཡོད་པ་ཙམ་མིན་པར། རྩོམ་རིག་ནང་ལོ་རྒྱུས་དང་། བརྩམས་སྒྲུང་། གཏམ་བརྗོད་ཟློས་གར། སྙན་ངག ཁོར་ཡུག་བཅས་ཚུད་ཡོད་པ་དང་། རྩོམ་རིག་བརྒྱུད་ནས་མི་གཞན་གྱི་འཚོ་བར་རྒྱུས་ལོན་བྱེད་ཐབས་དེས། ས་འབབ་དང་གནམ་གཤིས། སྤྱི་ཚོགས་ཀྱི་གོམས་སྲོལ་འདྲ་མིན་ལས་ཐོན་པའི་སྣ་མང་རིག་གཞུང་ཁག་ལ་གོ་རྟོགས་ཡོང་རྒྱུར་ཕན་ཐོགས་ཡོད་སྐོར་དང་། ཕྱོགས་གཞན་ནས་དཔེ་ཀློག་བརྒྱུད། མི་ཚང་མ་ཞི་བདེ་དང་བདེ་སྐྱིད་འདོད་ཅིང་སྡུག་བསྔལ་མི་འདོད་པའི་འགྲོ་བ་མིའི་རིགས་གཅིག་ཡིན་པའི་བདེན་དངོས་དེར་ཡིད་ཆེས་ཡོང་ཐུབ་པ་མ་ཟད། དཔེ་ཀློག་བརྒྱུད་མི་གཞན་གྱི་བསམ་བློ་དང་ཚོར་བ། ཉམས་མྱོང་བཅས་ཤེས་རྟོགས་བྱུང་སྟེ་རང་གི་བསམ་བློ་རྒྱ་ཆེ་རུ་བསྐྱེད་ཐུབ་ཀྱི་ཡོད་སྐོར་གསུངས་ཡོད་འདུག
དེ་རིང་དྷ་ཤོད་ཀྱི་རྒྱ་གར་མཐོ་རིམ་སློབ་གཉེར་ཁང་དུ་འཚོག་པའི་རྩོམ་རིག་དུས་སྟོན་དེར། རྒྱ་གར་གྱི་རྩོམ་པ་པོ་དང་སྙན་ངག་པ་རྣམས་ཀྱིས་གཏམ་བཤད་བྱས་ཡོད་ལ། བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲོས་ལགས་དང་། སྙན་ངག་པ་དང་ཉམས་ཞིབ་པ་གཉན་ཚེ་རིང་བཀྲ་ཤིས་ལགས་གཉིས་ཀྱིས་བོད་ཕྱི་ནང་གི་རྩོམ་རིག་སྤྱིའི་གནས་བབ་སྐོར་ནས་གཏམ་བཤད་བྱས་ཡོད་པ་དང་། སྙན་ངག་པ་བསྟན་འཛིན་ཆོས་དབྱིངས་ལགས་ཀྱིས་སྙན་ངག་གྱེར་འདོན་བྱས་ཡོད་འདུག
གསར་འགོད་པ། པ་སངས་ཚེ་རིང་།
ལོ་བཅུ་རེད་དམ་་་ལྟ་ཡག
མཛོད།