བོད་ཀྱི་ཞོ་སྟོན་ཐེངས་ ༢༥ པའི་ཉིན་མཐའ་མར་སྐུ་མགྲོན་གཙོ་བོ་མཁན་པོ་བསོད་ནམས་བསྟན་འཕེལ་མཆོག་ནས་ལྷ་མོ་ཚོགས་པ་ཁག་དང་གཞོན་སྐྱེས་རྣམས་ཀྱིས་ཆ་ཤས་བཞེས་ཐུབ་ན་ཏན་ཏན་མ་འོངས་པར་ང་ཚོའི་རིག་གཞུང་དར་སྤེལ་དང་མུ་མཐུད་གནས་ཐུབ་རྒྱུར་ཁྱད་པར་བཟོ་ངེས་ཡིན་སྐོར་གསུངས་སོང་།
དེ་རིང་བཞུགས་སྒར་དྷ་རམ་ས་ལར་འདས་པའི་ཉིན་གྲངས་ ༨ རིང་འཚོགས་པའི་བོད་ཀྱི་ཞོ་སྟོན་ཐེངས་ ༢༥ པའི་ཉིན་མཐའ་མར་བོད་ཀྱི་ཟློས་གར་ཚོགས་པས་ལྷ་གཞུང་ཆོས་རྒྱལ་ནོར་བཟང་གཟིགས་འབུལ་ཞུས་པའི་ཐོག སྐུ་མགྲོན་གྱི་གཙོ་བོར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ཕེབས་ཏེ། ལྷ་མོ་ཚོགས་པ་རྣམས་ཀྱིས་དཀའ་ངལ་ཁྱད་བསད་ཀྱིས་ལྷ་གཞུང་འཁྲབ་སྟོན་གནང་བ་དེ་བོད་ཀྱི་རིག་གཞུང་དར་སྤེལ་ཐད་ཞབས་འདེགས་རླབས་ཆེན་བཞག་ཡོད་སྐོར་གསུངས་སོང་།
དེ་ཡང་སྐུ་མགྲོན་གཙོ་བོ་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གསར་འགོད་པར་ཞོ་སྟོན་དང་འབྲེལ་ནས། ད་ལན་ཕྱོགས་མཐའ་ཁག་ནས་ཕེབས་པའི་ལྷ་མོའི་ཚོགས་པ་རྣམས་དངོས་ནས་སྐུ་ལས་ཆེན་པོ་ཡོད་རེད་དེ། འདི་ལ་དཀའ་ངལ་ཁྱད་དུ་བསད་ནས་ང་ཚོའི་རིག་གཞུང་ལ་ཞབས་འདེགས་ཆེན་པོ་ཆགས་ཡོད་རེད་བསམ་གྱི་འདུག ཐེངས་འདིར་མཉམ་ཞུགས་བྱེད་མཁན་གཞོན་སྐྱེས་ཧ་ཅང་མང་པོ་འདུག དེ་ཚོའི་ཐོག་ནས་མ་འོངས་པར་ང་ཚོའི་རིག་གཞུང་དང་ལྷག་པར་དུ་རྣམ་ཐར་དང་ཟློས་གར་གྱི་རིག་གཞུང་མུ་མཐུད་གནས་ཐུབ་པའི་སྙིང་སྟོབས་གསར་པ་ཞིག་མཚོན་གྱི་ཡོད་པ་རེད། བོད་ནང་རྒྱ་ནག་གཞུང་གིས་ཆོས་དང་རིག་གཞུང་རྣམས་འཆར་གཞི་དང་ལྡན་པའི་ཐོག་ནས་རྩ་མེད་བཟོ་རྒྱུ་དང་། ལྷག་པར་དུ་བོད་ཀྱི་རིག་གཞུང་རྣམས་རྒྱ་ནག་གི་རིག་གཞུང་གི་ངོ་བོར་སྒྱུར་ཐབས་བྱེད་བཞིན་པའི་རྣམ་པ་ཐོན་གྱི་འདུག དེར་བརྟེན་ང་ཚོ་བཙན་བྱོལ་ནང་དུས་ནས་དུས་སུ་ཞོ་སྟོན་འཚོག་ཐུབ་རྒྱུ་དང་། དེའི་ནང་ལྷ་མོ་ཚོགས་པ་ཁག་དང་གཞོན་སྐྱེས་རྣམས་ཀྱིས་ཆ་ཤས་བཞེས་ཐུབ་ན། ཏན་ཏན་མ་འོངས་པར་ང་ཚོའི་རིག་གཞུང་དར་སྤེལ་དང་མུ་མཐུད་གནས་ཐུབ་རྒྱུར་ཁྱད་པར་བཟོ་ངེས་ཡིན་པ་རེད། ཅེས་གསུངས་སོང་།
ཡང་ཚོགས་གཙོ་མཆོག་གིས། འདི་ལོའི་ལྷ་མོ་འཁྲག་སྟོན་པ་ཁག་ཅིག་མ་གཏོགས་མང་ཆེ་བ་མི་རབས་རྒན་པ་ཆགས་ཡོད་པ་དང་། མི་རབས་རྒན་པ་རྣམས་ཀྱིས་སྐུ་ལས་བསྐྱོན་པ་ཞིག་ཡིན་པ་དང་། ལྷ་མོའི་རིག་གཞུང་འཁྲབ་པར་ལུས་ངག་གི་གར་དང་རྣམ་འགྱུར། ཕྱག་རྒྱ་སོགས་ལ་སྦྱངས་པ་མི་དམན་པ་ཞིག་དགོས་ཀྱི་ཡོད་པར་བརྟེན། ད་ལན་འཁྲབ་སྟོན་པ་རྣམ་པས་དངོས་སུ་འཁྲབ་སྟོན་བྱེད་ཐུབ་པ་དེ་ནི་བོད་ཀྱི་རིག་གཞུང་ལ་ཞབས་འདེགས་རླབས་ཆེན་ཞིག་བཞག་ཡོད་པ་དང་། མ་འོངས་པར་མུ་མཐུད་ནས་སེམས་ཤུགས་མ་ཆག་པར་རང་གི་རིག་གཞུང་དར་སྤེལ་གནང་ཐུབ་པ་དགོས་སྐོར་གསུངས་སོང་།
འདི་ལོའི་ཞོ་སྟོན་ཐོག་བོད་ཀྱི་ཟློས་གར་ཚོགས་པ་ཚུད་པའི་ལྷ་མོའི་ཚོགས་པ་བརྒྱད་མཉམ་ཞུགས་ཐུབ་ཡོད་ཅིང་། ཞོ་སྟོན་གྱི་ཉིན་དང་པོར་༧སྐྱབས་རྗེ་ཡོངས་འཛིན་མཆོག་སྤྲུལ་གླིང་རིན་པོ་ཆེ་མཆོག་གིས་གཙོས། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཨ་རུ་ན་ཅལ་མངའ་སྡེའི་རིག་གཞུང་འགན་འཛིན་བཅས་ཕེབས་ཏེ། ལྷ་མོ་ཚོགས་པ་ཁག་གིས་ལྷ་གཞུང་བསྡུས་པ་རེ་གཟིགས་ཕུད་ཞུས་ཡོད་པ་རེད། འདི་ལོར་མ་སུ་རི་བོད་ཁྱིམ་སློབ་གྲྭས་ལྷ་གཞུང་ཁྱེའུ་པདྨ་འོད་འབར་དང་། པོན་ཊ་ལྷ་མོ་ཚོགས་པས་ལྷ་གཞུང་གཟུགས་ཀྱི་ཉི་མ། ཨ་རི་ནས་ལྕགས་ཟམ་པ་བོད་ཀྱི་ལྷ་མོའི་གླུ་གར་ཚོགས་པས་ལྷ་གཞུང་ཆོས་རྒྱལ་ནོར་བཟང་། ཀ་སྦུག་བོད་མིའི་ལྷ་མོ་ཚོགས་པས་ལྷ་གཞུང་སྣང་ས་འོད་འབུམ། བྷན་རྡ་ར་ལྷ་མོའི་ཚོགས་པས་ལྷ་གཞུང་འགྲོ་བ་བཟང་མོ། ཀོ་ལི་གྷལ་ལྷ་མོ་ཚོགས་པས་ལྷ་གཞུང་གཅུང་པོ་དོན་ཡོད་དོན་གྲུབ། དེ་བཞིན་བལ་ཡུལ་བོད་ཀྱི་ལྷ་མོ་ཚོགས་པས་ལྷ་གཞུང་སྣང་ས་འོད་འབུམ་བཅས་གཟིགས་འབུལ་ཞུས་ཡོད་འདུག
ཟླ་འདིའི་ཕྱི་ཚེས་ ༧ ཉིན་ཐེག་ཆེན་གཙུག་ལག་ཁང་གི་ཆོས་རའི་ནང་དུ་ལྷ་མོའི་ཚོགས་པ་ཁག་དང་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་བཅར་བ་རྣམས་ལ་མཇལ་ཁ་བཀའ་སློབ་གནང་སྐབས། ང་ཚོ་བཙན་བྱོལ་བ་རེད་དེ་བོད་མི་རིགས་ཀྱི་ཆོས་དང་རིག་གཞུང་དེ་དག་དམ་འཛིན་བྱེད་ཀྱི་ཡོད་རེད། དེར་བརྟེན་ང་ཚོའི་ཟློས་གར་ནི་བོད་པའི་རིག་གཞུང་གི་ཆ་ཤས་ཆགས་ཀྱི་ཡོད་རེད། ང་ཚོས་རྒྱ་མི་ལ་འཁྲུག་པ་བརྒྱབ་ནས་ཡོང་ཐུབ་རྒྱུ་ཡོད་མ་རེད། ང་ཚོ་ལ་དགོས་པ་དེ་རང་སྐྱོང་མིང་དོན་མཚུངས་པ་ཞིག་དང་བོད་ཀྱི་སྐད་ཡིག་གཙོ་བོར་གྱུར་བའི་བོད་པའི་རིག་གཞུང་དེ་དག་བོད་པས་བདག་པོ་ཆ་ཚང་བརྒྱག་ཐུབ་དགོས་ཀྱི་ཡོད་རེད། ཅེས་དང་། དེ་རོང་ཁྱེད་རང་ཚོས་རྣམ་ཐར་བཏང་བ་དང་ངོས་རང་ཆུང་དུས་སྐབས་ཀྱི་ཞོ་སྟོན་གྱི་ཚོར་བ་དེ་བསླེབས་སོང་ཞེས་སོགས་བཀའ་སྩལ་ཡོད་པ་རེད།
གསར་འགོད་པ། པ་སངས་ཚེ་རིང་།
