རྒྱ་ནག་གཞུང་གིས་བོད་ཀྱི་སྒོ་ཕྱུགས་སེམས་ཅན་གཡག་དང་ཆུ་སོགས་ཀྱི་ཐོན་རྫས་ཧྲང་ཧེ་གྲོང་ཁྱེར་ནང་སྐྱེལ་འདྲེན་གྱིས། ད་ལྟ་རྒྱ་ནག་ནང་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་འོག་བཟའ་ཆས་འདང་ངེས་མེད་པའི་དཀའ་ངལ་སེལ་ཐབས་བྱེད་བཞིན་ཡོད་འདུག
ད་ལྟའི་ཆར་རྒྱ་ནག་ནང་ཨོ་མི་ཁུ་རོན་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་ཤུགས་ཆེན་ཕྲད་བཞིན་ཡོད་པ་དང་བསྟུན། ཉེ་ལམ་བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པ་དང་རྒྱ་ནག་དབུས་དམར་ཤོག་ཚོགས་པ་གཉིས་གྲོས་བསྡུར་བྱས་པ་བརྒྱུད། བོད་ཀྱི་སྒོ་ཟོག་སེམས་ཅན་གཡག་དང་དྭངས་གཙང་གི་ཆུ་སོགས་བོད་མཐོ་སྒང་གི་རང་བྱུང་ཐོན་རྫས་མི་ཉུང་བ་ཞིག་རྒྱ་ནག་གི་ཧྲང་ཧེ་གྲོང་ཁྱེར་ནང་སྐྱེལ་འདྲེན་གྱིས། ད་ལྟ་རྒྱ་ནག་གི་ཏོག་དབྱིབས་གཉན་རིམས་ཁྲོད་བཟའ་ཆས་འདང་ངེས་མེད་པའི་དཀའ་ངལ་སེལ་ཐབས་བྱེད་བཞིན་ཡོད་འདུག
དེ་འབྲེལ་རྒྱ་ནག་གཞུང་འབྲེལ་གྱི་གནས་ཚུལ་ནང་། བོད་ཀྱི་ཤར་ཕྱོགས་ཀྱི་གྲོང་ཁྱེར་ཧྲང་ཧེ་དང་བྱང་ཤར་གྱི་ཞིང་ཆེན་ཇི་ལིན་ནང་ཏོག་དབྱིབས་གཉན་རིམས་བཀག་འགོག་གི་འཐབ་རྩོད་བྱེད་བཞིན་པར་རྒྱབ་སྐྱོར་མཚོན་སླད། བོད་རང་སྐྱོང་ལྗོངས་ངོས་ནས་ཐོན་རྫས་ཀྱི་ཞལ་འདེབས་རྒྱག་གི་ཡོད་ཅེས་བརྗོད་འདུག་པ་དང་། ཟླ་འདིའི་ཕྱི་ཚེས་ ༡༠ ཉིན་ད་ལྟ་རྒྱ་ནག་ནང་ཏོག་དབྱིབས་འགོས་ཁྱབ་ཀྱི་དཀའ་ངལ་འཕྲད་ཡུལ་ཆེ་ཤོས་ཧྲང་ཧེ་གྲོང་ཁྱེར་ལ་གཡག་ཤ་སྐམ་པོ་ཏུན་གྲངས་ ༢༠༠ སམ་ཡང་ན་ཀི་ལོ་གྷི་རམ་འབུམ་ ༢ དང་བོད་ཀྱི་ཆུ་ཏུན་གྲངས་ ༣༠༠༠ སམ་ཡང་ན་ཀི་ལོ་གྷི་རམ་འབུམ་ ༣༠ ཚུད་པའི་བོད་ཀྱི་སྒོ་ཟོག་སེམས་ཅན་དང་འབྲེལ་བའི་རང་བྱུང་ཐོན་རྫས་ཀྱི་བཟའ་ཆས་མང་དག་ཅིག་རྒྱབ་སྐྱོར་གྱི་ཚུལ་དུ་སྐྱེལ་འདྲེན་བྱས་ཡོད་འདུག
ཐེངས་འདིར་བོད་ཀྱི་རང་བྱུང་ཐོན་རྫས་ཀྱིས། རྒྱ་རིགས་རྣམས་ལ་རོགས་འདེགས་བྱེད་བཞིན་པའི་ཐག་གཅོད་དེ་ནི། རྒྱ་ནག་དབུས་དམར་ཤོག་ཚོགས་པའི་བཀོད་འདོམས་འོག བོད་རང་སྐྱོང་ལྗོངས་ཟེར་བའི་དམར་ཤོག་ཚོགས་པས། སྐྱིན་ཚབ་དངུལ་དངོས་སོགས་གང་ཡང་མི་དགོས་པར་རྒྱབ་སྐྱོར་མཚོན་བྱེད་དུ་མཁོ་སྤྲོད་བྱས་ཚུལ་བརྗོད་འདུག་ཀྱང་། ཐེངས་འདིར་རྒྱ་ནག་གཞུང་གིས་བོད་ཀྱི་ནོར་ནག་ག་ཚོད་ཅིག་གི་སྲོག་བཅད་ཡོད་པ་དང་། ནང་པ་ཞིག་ལ་མཚོན་ན་སྲོག་གཅོད་པ་ནི་སྡུག་པ་ཆེས་ཆེ་བའི་བྱ་སྤྱོད་ཅིག་ཆགས་ཀྱི་ཡོད་པ་མ་ཟད། རྒྱ་ནག་གཞུང་གིས་བོད་ཀྱི་སྒོ་ཕྱུགས་སེམས་ཅན་ལའང་བཙན་འཛུལ་བྱེད་ཀྱི་ཡོད་པའི་གནད་དོན་ཞིག་ཆགས་ཀྱི་ཡོད་པ་རེད།
ད་རེས་ཧྲང་ཧེ་ཙམ་མ་ཡིན་པར་རྒྱ་ནག་གི་ཞིང་ཆེན་ཇི་ལིན་ལའང་བོད་ཀྱི་ནོར་ནག་གི་ཐོན་རྫས་སྐྱེལ་འདྲེན་བྱས་ཡོད་པ་དང་། ཕྱི་ལོ་ ༢༠༢༠ ལོར་རྒྱ་ནག་གཞུང་གིས། བོད་ཀྱི་གསོ་བ་རིག་པའི་གཞུང་ལས་བྱུང་བའི་བོད་སྨན་རྒྱ་ནག་ནང་སྐྱེལ་འདྲེན་གྱིས། ཏོག་དབྱིབས་གཉན་རིམས་བཅོས་ཐབས་བྱས་ཡོད་ལ། སྐབས་དེར་རྒྱ་ནག་གི་ཏོག་ནད་ཀྱི་སྨན་པ་གཙོ་བོ་ཀྲུང་ནན་ཧྲན་སོགས་ཀྱིས་བོད་སྨན་ལ་གདེང་འཇོག་ཆེན་པོ་བྱས་ཤིང་། བོད་སྨན་གྱིས་ཏོག་ནད་ཀྱི་དཀའ་ངལ་སེལ་ཐུབ་སྐོར་སོགས་བརྗོད་ཡོད།
ད་ལྟ་རྒྱ་ནག་ནང་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་འོག ཞིང་ཆེན་རིམ་པའི་ས་ཁུལ་ ༡༨ དང་གྲོང་ཁྱེར་ཁག་ ༤༤ ནང་ཕྱེད་དང་ཁྱོན་ཡོངས་ནས་ཁྱིམ་སྡོད་བཀའ་རྒྱ་བཏང་ཡོད་པར་བརྟེན། རྒྱ་ནག་གི་གྲོང་ཁྱེར་མང་པོའི་ནང་མི་མང་ལ་ཉིན་རེའི་འཚོ་བའི་ཐད་དཀའ་ངལ་འཕྲད་དེ། ཕྱིར་ཐོན་ནས་གཞུང་ལ་ངོ་རྒོལ་བྱེད་པ་དང་། ཁག་ཅིག་གིས་རང་སྲོག་གཅོད་པ་སོགས་ཀྱི་གནས་ཚུལ་མང་དག་ཅིག་བྱུང་དང་བྱུང་མུས་ཡིན་པ་མ་ཟད། དམིགས་བསལ་རྒྱ་ནག་གི་ཚོང་འབྲེལ་གྱི་ལྟེ་བར་གྱུར་བའི་ཧྲང་ཧེ་གྲོང་ཁྱེར་གྱི་མི་གྲངས་ས་ཡ་ ༢༥ ལྷག་ཁྱིམ་སྡོད་བཀག་རྒྱའི་འོག་བཅུག་སྟེ། མི་མང་ལ་ཉིན་རེའི་འཚོ་བར་དཀའ་ངལ་ཤུགས་ཆེན་འཕྲད་ཀྱི་ཡོད་པ་དང་། ད་ལྟ་ཧྲང་ཧེ་གྲོང་ཁྱེར་ནང་ཏོག་དབྱིབས་ནད་པ་ ༣༠༨༤ དང་འདས་གྲོངས་སུ་ཕྱིན་པ་ ༧ བྱུང་འདུག་ལ། རྒྱ་ནག་རྒྱལ་ཡོངས་སུ་ད་སྔ་བར་ཏོག་དབྱིབས་ནད་པ་ཁྱོན་ ༡༩༡༡༡༢ དང་འདས་གྲོངས་སུ་ཕྱིན་པ་ ༤༦༥༥། དྲག་བསྐྱེད་བྱུང་བ་ ༡༥༥༦༨༤ བྱུང་ཡོད་སྐོར་རྒྱལ་སྤྱིའི་གསར་ཁང་(world ometer) གིས་སྤེལ་འདུག
ཉེ་ལམ་ནས་རྒྱ་ནག་གཞུང་གིས། མཚོ་སྔོན་ཞིང་ཆེན་གྱི་ཟི་ལིང་གྲོང་ཁྱེར་ཕྱོགས་ཡོངས་ནས་ཁྱིམ་སྡོད་བཀག་རྒྱའི་བཅུག་སྟེ། སྐུ་འབུམ་དགོན་པ་སོགས་སྒོ་བརྒྱབ་ནས་མང་ཚོགས་མཆོད་མཇལ་དུ་གཏོང་གི་མེད་པ་དང་། དེ་མཚུངས་བཞིན་བོད་ཀྱི་ས་ཁུལ་གཞན་དུ་ཏོག་དབྱིབས་གཉན་རིམས་ཀྱི་བརྟག་དཔྱད་བྱས་མེད་ཚུལ་བརྗོད་ནས་བོད་མི་ཁག་ཅིག་འཛིན་བཟུང་བྱས་པ་དང་དགོན་པར་མཆོད་མཇལ་མི་གཏོང་བ་སོགས་ཀྱི་གནས་ཚུལ་བྱུང་ཡོད།
གསར་འགོད་པ། སྐལ་བཟང་སྦྱིན་པ།
ནོར་ནག་གཅིག་བུ་ག་ལ་ཡིན། རྒྱ་ཡར་རྒྱས་གཏོང་བྱེད་བོད་རེད།