བོད་པའི་སློབ་མ་རྣམས་ལ་སློབ་ཡོན་སྤར་སྣོན་གྱི་དཀའ་ངལ་ཡོད་པ་དེ་སེལ་ཐབས་གནང་གི་འདུག

ཤེས་རིག་ལས་ཁུངས་ཀྱིས་བོད་རིགས་སློབ་ཕྲུག་རྣམས་ལ་རྒྱ་གར་གྱི་ཡུལ་མིའི་སློབ་མ་གཅིག་མཚུངས་ཀྱིས་སློབ་ཡོན་ཆག་ཡང་གཏོང་བར་རེ་བ་གནང་གི་འདུག

ཕྱི་ལོ ༢༠༡༩ ཕྱི་ཟླ་ ༧ པ་བཟུང་། རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཇ་བ་ཧར་ལལ་ནེ་རུ་གཙུག་ལག་སློབ་གྲྭ་ཆེན་མོས། ཕྱི་གླིང་བའི་སློབ་མ་ཚོར་སློབ་ཡོན་སྤར་སྣོན་གྱི་སྲིད་བྱུས་ཤིག་ལག་བསྟར་བྱེད་མགོ་བརྩམས་ཡོད་པ་ལྟར། ཉེ་ལམ་བོད་མིའི་སྒྲིག་འཛུགས་ཤེས་རིག་བཀའ་བློན་ཐར་ལམ་སྒྲོལ་མ་མཆོག་དང་། དྲུང་ཆེ་འཇིགས་མེད་རྣམ་རྒྱལ་ལགས་གཉིས་ཀྱིས་གཙུག་ལག་སློབ་གཉེར་ཁང་དེའི་ཉེ་བའི་རིགས་བདག་ལྕམ་སན་ཊུ་ཤི་རུ་པན་ཌུ་ཏི་ (Santishree D Pandit) ལགས་ཀྱི་གཙོས་གནད་ཡོད་མི་སྣ་ཁག་ཅིག་དང་མཇལ་འཕྲད་ཀྱིས། བོད་ཕྲུག་ཚོར་སློབ་ཡོན་ཆག་ཡང་གནང་དགོས་སྐོར་གླེང་སློང་བྱས་ཡོད་པ་རེད།

དེའི་ཐད་ཤེས་རིག་ལས་ཁུངས་ཀྱི་དྲུང་ཆེ་འཇིགས་མེད་རྣམ་རྒྱལ་ལགས་ཀྱིས། བར་ལམ་ནེ་རུ་གཙུག་ལག་སློབ་ཁང་དུ་སྐྱོད་བཞིན་པའི་བོད་ཕྲུག་མང་པོ་ཞིག་ལ་སློབ་ཡོན་ཆེན་པོ་ཆགས་པའི་རྐྱེན་གྱིས། མཐོ་སློབ་དེར་མུ་མཐུད་ནས་སློབ་སྦྱོང་བྱ་རྒྱུར་དཀའ་ངལ་འཕྲད་བསྡད་ཡོད་པ་རེད། ཕྱི་ཟླ་ ༤ ཚེས་ ༢༨ ཉིན་ཤེས་རིག་ལས་ཁུངས་ཀྱི་སྐུ་ངོ་བཀའ་བློན་མཆོག་དང་། དྲུང་ཆེ་གཉིས་ལྡི་ལིར་ཆེད་དུ་ཕེབས་ཏེ་མཐོ་སློབ་དེའི་རིགས་བདག་མཆོག་དང་མཇལ་འཕྲད་ཞུས་ནས། རྒྱ་གར་ནང་ཡོད་པའི་བོད་ཕྲུག་རྣམས་ནི་སྐྱབས་བཅོལ་བོད་མིའི་མི་རབས་གསུམ་པ་དང་བཞི་བ་ཆགས་ཡོད་ཅིང་། ལྷག་པར་སློབ་ཕྲུག་དེ་ཚོ་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱིས་ངོས་ལེན་ཡོད་པའི་སློབ་གྲྭ་ནས་ཐོན་པ་ཤ་སྟག་ཡིན་སྟབས། དཀའ་ངལ་དེ་དག་སེལ་ཐབས་ཀྱིས་རོགས་ཞུ་སྐབས། ཁོང་ཚོས་ཀྱང་གསན་བཞེས་ཡག་པོ་གནང་བྱུང་བས། ང་ཚོས་གྲུབ་འབྲས་ཡག་པོ་ཞིག་འཐོན་པའི་ཡིད་ཆེས་བྱེད་བཞིན་ཡོད། འོན་ཀྱང་ཁོང་ཚོའི་ཚོགས་འདུ་དང་། དེ་བཞིན་ཁྲིམས་དང་སྒྲིག་གཞི་མང་པོར་བསྟུན་དགོས་པའི་གནས་སྟངས་ཆགས་བསྡད་ཡོད་རེད། ཅེས་གསུངས་སོང་།

ཕྱི་ལོ ༢༠༡༧ ལོར་ནེ་རུ་གཙུག་ལག་སློབ་གྲྭ་ཆེན་མོས་ཕྱི་རྒྱལ་གྱི་སློབ་མ་ཚོར་སློབ་ཡོན་སྤར་སྣོན་གྱི་སྲིད་ཇུས་ཤིག་བཟོས་ཏེ། དེ་སྔོན་ཕྱི་གླིང་བའི་སློབ་ཕྲུག་ཅིག་གིས་སྤྱི་ཚོགས་ཚན་རིག་དང་ཚན་རིག་སོགས་ཀྱི་སློབ་ཚན་ལ་ལོ་རེར་ཨ་སྒོར་ ༢༠༠  ཡིན་ཡང་། སློབ་ཡོན་སྤར་སྣོན་བྱས་རྗེས་སྤྱི་ཚོགས་ཚན་རིག་ལ་སློབ་མ་རེ་ཡིས་ལོ་རེར་སློབ་ཡོན་ཁྱོན་ཨ་སྒོར་ ༢༤༠༠  དང་ཚན་རིག་ལ་ཨ་སྒོར་ ༣༤༠༠ བཅས་སྤྲོད་དགོས་བྱུང་ཡོད་སྟབས། ཕྱི་ལོ ༢༠༡༩ ལོ་གཅིག་པུར་མཐོ་སློབ་དེར་བོད་ཕྲུག་ ༤༡ ཚུད་རྒྱུགས་ཀྱི་ལམ་ནས་འདེམས་ཐོབ་བྱུང་བའི་ཁྲོད། སློབ་མ་གྲངས་ ༣ ལས་གཞན་རྣམས་ཀྱིས་སློབ་ཞུགས་བྱེད་ཐུབ་མེད་ཅིང་། ཨབ་གྷ་ནི་སི་ཐན་གྱི་སློབ་མ་གྲངས་ ༡༡ འདེམས་ཐོན་བྱུང་ཡོད་ཀྱང་། སློབ་མ་གྲངས་༢ ལས་གཞན་རྣམས་ཀྱིས་སློབ་ཞུགས་བྱེད་ཐུབ་མེད་པ་རེད་འདུག

སྤྱིར་ནེ་རུ་གཙུག་ལག་སློབ་གཉེར་ཁང་དེ་ནི་རྒྱ་གར་གྱི་རྒྱལ་ས་ལྡི་ལིའི་ཁུལ་གྱི་གཙུག་ལག་སློབ་གྲྭ་ཆེན་མོ་རྩེ་གྲས་ཤིག་ཡིན་ཅིང་། བོད་པའི་སློབ་ཕྲུག་མང་པོ་ཞིག་གིས་སློབ་ཆེན་དེར་ཞུགས་རྒྱུར་འབད་འབུངས་བྱེད་ཀྱིན་ཡོད་པ་ལྟར། ད་བར་བོད་ཕྲུག་མང་པོས་སློབ་ཆེན་དེར་འཛུལ་ཞུགས་གནང་ཐབས་བྱས་ཡོད་ཀྱང་། སློབ་ཡོན་སྤར་སྣོན་གྱི་སྲིད་ཇུས་ལག་བསྟར་བྱས་པ་ནས་བཟུང་། སྐྱབས་བཅོལ་བོད་མིའི་སློབ་ཕྲུག་མང་པོ་ཞིག་ལ་སློབ་ཡོན་འདང་ངེས་མེད་པའི་དཀའ་ངལ་འོག ཕྱི་ལོ་ ༢༠༢༠ ལོའི་ཐོ་གཞུང་ལྟར་ན། ད་ལྟ་ནེ་རུ་གཙུག་ལག་སློབ་གྲྭ་ཆེན་མོར་བོད་ཕྲུག་ ༥ ལས་མེད་པ་རེད།

གསར་འགོད་པ། དཔལ་ལྡན།