འདས་པའི་ལོ་གཉིས་ནང་མི་གྲངས་ས་ཡ་ ༡༤ ལྷག་རྐྱེན་འདས་སུ་ཕྱིན་ཡོད་འདུག 

འདས་པའི་ལོ་གཉིས་རིང་ལ་ཏོག་དབྱིབས་ནད་ཡམས་ལ་རྐྱེན་བྱས་ཏེ་འཛམ་གླིང་ཁྱོན་ཡོངས་ནས་མི་གྲངས་ས་ཡ་ ༡༤ ལྷག་རྐྱེན་འདས་སུ་ཕྱིན་ཡོད་སྟབས་རྒྱལ་ཁབ་ཚང་མས་ཏོག་དབྱིབས་ནད་ཡམས་གཙང་སེལ་བྱེད་བར་འཕྲོད་བསྟེན་སྐོར་གྱི་ཤེས་བྱ་གོང་མཐོར་གཏང་དགོས་པའི་སྐུལ་འདེད་གཏོང་གི་འདུག

འདས་པའི་ལོ་ཤས་རིང་རྒྱ་ནག་ཝུའུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་ཀྱིས་འཛམ་གླིང་ཁྱོན་ཡོངས་ཀྱི་སྲིད་འབྱོར་རིག་གསུམ་ལ་བསམ་ཡུལ་ལས་འདས་པའི་གྱོང་གུད་ཤུགས་ཆེན་ཐེབས་ཡོད་པ་མ་ཟད། མིའི་ཚེ་སྲོག་ལ་གནོད་སྐྱོན་ཚབས་ཆེན་བཏང་ཡོད་པ་ལྟར། ཟླ་འདིའི་ཕྱི་ཚེས་ ༥ ཉིན་འཛམ་གླིང་འཕྲོད་བསྟེན་ལྷན་ཚོགས་ཀྱིས་ཏོག་དབྱིབས་གཉན་རིམས་དང་འབྲེལ་བའི་སྙན་ཐོ་ཞིག་འགྲེམས་སྤེལ་བྱས་པའི་ནང་། འདས་པའི་ཟླ་བ་ ༢༤ རིང་ལ་ཏོག་དབྱིབས་རིམས་ནད་ཀྱི་རྐྱེན་གྱིས་འཛམ་གླིང་ཁྱོན་ཡོངས་ནས་མི་གྲངས་ས་ཡ་ ༡༤།༩ རྐྱེན་འདས་སུ་ཕྱིན་ཡོད་སྐོར་དང་། ད་ལྟའང་ཏོག་དབྱིབས་ཀྱི་ནད་མནར་མུ་མཐུད་ནས་ཡོང་བཞིན་ཡོད་སྐོར་བརྗོད་འདུག

སྙན་ཐོ་དེའི་ནང་། ཕྱི་ལོ་ ༢༠༢༠ ཟླ ༡ ཚེས ༡ ནས་འདས་ལོའི་ཕྱི་ཟླ ༡༢  ཚེས་ ༣༡ བར་ཏོག་དབྱིབས་གཉན་རིམས་རྐྱེན་གྱིས་འཛམ་གླིང་ཁྱོན་ཡོངས་ནས་མི་གྲངས་ས་ཡ་ ༡༤།༩ ཙམ་རྐྱེན་འདས་སུ་ཕྱིན་པའི་ཁྲོད་སྐྱེས་པའི་བརྒྱ་ཆ ༥༧ དང་བུད་མེད་ ༤༣ ལྷག་ཟིན་ཡོད་པ་དང་།  མི་གྲངས་ས་ཡ་ ༡༤།༩ ཙམ་འདས་གྲོངས་སུ་ཕྱིན་པའི་ཁོངས་ནས་མི་གྲངས་བརྒྱ་ཆ་ ༨༤ ལྷག་ལྷོ་ཤར་ཨེ་ཤ་ཡ་དང་། ཡུ་རོབ། ཨ་མི་རི་ཁ་བཅས་ནས་ཡིན་པ་མ་ཟད། བརྒྱ་ཆ་ ༦༨ འཛམ་གླིང་གི་རྒྱལ་ཁབ་ ༡༠ ནས་ཡིན་ཞིང་། དཔལ་འབྱོར་གྱི་ཡོང་འབབ་འབྲིང་ཙམ་ཡོད་པའི་རྒྱལ་ཁབ་ཁག་ནས་བརྒྱ་ཆ། ༨༡ དང་། དཔལ་འབྱོར་གྱི་གནས་བབ་ཞན་ཙམ་ཡོད་པའི་རྒྱལ་ཁབ་ནས་བརྒྱ་ཆ་ ༥༣། དཔའ་འབྱོར་གྱི་ཡོང་འབབ་མཐོ་བོ་ཡོད་པའི་རྒྱལ་ཁབ་ཁག་ནས་བརྒྱ་ཆ་ ༢༨ ལྷག་རྐྱེན་འདས་སུ་ཕྱིན་ཡོད་འདུག

དེའི་ཐད་འཛམ་གླིང་འཕྲོད་བསྟེན་ལྷན་ཚོགས་ཀྱི་སྤྱི་ཁྱབ་འགན་འཛིན་ཊེ་ཌྲོ་སི་( Dr Tedros Adhanom Ghebreyesus) ལགས་ཀྱིས། སྙན་ཐོ་འདི་ནི་གཉན་རིམས་ཀྱིས་གནོན་ཤུགས་སྤྲོད་ཆེད་མ་ཡིན་པར་འཛམ་གླིང་རྒྱལ་ཁབ་ཚོས་གཉན་རིམས་ཀྱི་སྐབས་སུ་འཕྲོད་བསྟེན་གྱི་སྒྲོམ་གཞི་སྔར་ལས་ལྷག་པའི་ཡར་རྒྱས་གཏང་དགོས་པ་དང་། འཛམ་གླིང་འཕྲོད་བསྟེན་ལྷན་ཚོགས་ཀྱིས་རྒྱལ་ཁབ་ཚང་མར་གྲུབ་འབྲས་ཡག་པོ་ཡོང་སླད། འཕྲོད་བསྟེན་སྐོར་གྱི་ཤེས་བྱ་གོང་སྤེལ་དུ་གཏོང་བར་མཉམ་ལས་བྱ་རྒྱུར་ཁས་ལེན་བྱས་ཡོད་སྐོར་སོགས་འགྲེལ་བརྗོད་བྱས་ཡོད་འདུག་ལ། འཛམ་གླིང་འཕྲོད་བསྟེན་ལྷན་ཚོགས་ཀྱི་གནད་ཡོད་མི་སྣ་ཁག་ཅིག་གིས་ཀྱང་ཏོག་དབྱིབས་གཉན་རིམས་གཙང་སེལ་བྱ་བར་འཛམ་གླིང་རྒྱལ་ཁབ་ཚང་མས་མཉམ་རུབ་དགོས་པའི་རེ་འདུན་ཡང་བཏོན་ཡོད་འདུག

ཡང་འདས་པའི་ལོ་ཤས་རིང་རྒྱ་གར་ནང་ཏོག་དབྱིབས་གཉན་རིམས་ཀྱི་དཀའ་ངལ་ཤུགས་ཆེན་ཕྲད་དེ་མི་རྒྱུ་གཉིས་ལ་གྱོང་གུད་ཆེན་པོ་ཐེབས་ཡོད་པ་ལྟར། འཛམ་གླིང་འཕྲོད་བསྟེན་ལྷན་ཚོགས་ཀྱི་སྙན་ཐོ་ལྟར་ན། འདས་པའི་ལོ་གཉིས་རིང་ལ་ཏོག་དབྱིབས་གཉན་རིམས་ཀྱི་རྐྱེན་གྱིས་རྒྱ་གར་གྱི་མི་གྲངས་འབུམ་ ༤༧།༤ རྐྱེན་འདས་སུ་ཕྱིན་ཡོད་པ་མ་ཟད། རྒྱ་གར་ནི་འཛམ་གླིང་ཁྱོན་ཡོངས་ནས་རྐྱེན་འདས་སུ་འགྲོ་མཁན་མང་ཤོས་ཀྱི་རྒྱལ་ཁབ་ཨང་གསུམ་པར་གྱུར་ཡོད་སྐོར་དང་། རྒྱ་གར་གྱི་ཁྱིམ་མཚེས་རྒྱལ་ཁབ་པ་ཀི་སི་ནས་རྐྱེན་འདས་སུ་ཕྱིན་པའི་མི་གྲངས་དེ་འདས་གྲོངས་ཀྱི་སྤྱིའི་བརྒྱ་ཆ། ༡།༤ དང་། བྷང་ལ་ཌེ་ཤི་ནས་བརྒྱ་ཆ་ ༠།༩ འབར་མ་ནས་བརྒྱ་ཆ་ ༠། ༢། ཤྲི་ལིངྒ་ནས་མི་གྲངས་ ༨༨༣༣ དང་རྒྱ་ནག་ནས་ ༥༢༠༦༣ ལས་རྐྱེན་འདས་སུ་ཕྱིན་མེད་སྐོར་བཀོད་འདུག

ཏོག་དབྱིབས་གཉན་རིམས་ཀྱིས་རྐྱེན་འདས་སུ་ཕྱིན་པའི་གྲངས་འབོར་མི་འདྲ་བ་དང་རྒྱལ་ཁབ་སོ་སོའི་འཚོལ་སྡུད་བྱེད་ཕྱོགས་ཀྱི་ཐད་ལ་རྩོད་གླེང་མང་པོ་ཡོང་གི་ཡོད་པ་ལྟར། འཛམ་གླིང་འཕྲོད་བསྟེན་ལྷན་ཚོགས་ཀྱིས་འདས་པའི་ལོ་གཉིས་རིང་ཏོག་དབྱིབས་རིམས་ནད་ཀྱིས་དངོས་ཤུགས་ནས་མི་གྲངས་ས་ཡ ༡༩ ལྷག་རྐྱེན་འདས་སུ་ཕྱིན་ཡོད་སྐོར་བསྒྲགས་ཡོད་ཀྱང་། གཞུང་འབྲེལ་མི་སྣ་དག་གིས་ཇོན་སི་ཧུབ་ཀོན་མཐོ་རིམ་སློབ་གཉེར་ཁང་གིས་རྩིས་ཞིབ་ཁྲོད་མི་གྲངས་ས་ཡ་ ༦ ཙམ་མང་བ་ཡོད་པ་དང་། ཝ་ཤིན་ཌོན་མཐོ་རིམ་སློབ་གཉེར་ཁང་གི་ཚན་རིག་པ་རྣམས་ཀྱིས་ཞིབ་འཇུག་བྱས་པ་བརྒྱུད་འདས་པའི་མི་ལོ་གཉིས་ཀྱི་རིང་ལ་མི་གྲངས་ས་ཡ་ ༡༨ ལྷག་རྐྱེན་འདས་སུ་ཕྱིན་པ་མ་ཟད། འཛམ་གླིང་མཉམ་འབྲེལ་རྒྱལ་ཚོགས་ཀྱིས་རྒྱ་གར་ནས་རྐྱེན་འདས་སུ་ཕྱིན་པའི་མི་གྲངས་ས་ཡ  ༣ ལྷག་རྩིས་མེད་སྐོར་སོགས་བརྗོད་ཡོད་འདུག

འདི་ལོའི་ཕྱི་ཟླ ༤ པའི་ཟླ་དཀྱིལ་ཙམ་ནས་རྒྱ་གར་རྒྱལ་ས་ལྡི་ལིའི་ཁུལ་དུ་ཏོག་དབྱིབས་གཉན་རིམས་ཁྱབ་གདལ་གྱིས་ནད་པ་ཇེ་མང་དུ་འགྲོ་ཡི་ཡོད་སྟབས། རྒྱ་གར་ནང་དུ་ཏོག་དབྱིབས་གཉན་རིམས་ཀྱི་ནད་རླབས་བཞི་པ་བསླེབས་ཟིན་པའི་ཚོད་དཔག་བྱེད་ཀྱིན་ཡོད་ཀྱང་། འདས་པའི་བདུན་ཕྲག་གསུམ་རིང་རྒྱ་གར་ནང་གཉན་རིམས་ཁྱབ་གདལ་ཤུགས་ཆེན་ཕྱིན་མེད་སྐོར་འགྲེལ་བརྗོད་བྱས་འདུག ཡིན་ནའང་། འདས་པའི་ཆུ་ཚོད་ ༢༤ རིང་རྒྱ་གར་ནང་ནང་པ་གསར་པ་གྲངས་ ༣༨༠༥ བྱུང་ཡོད་འདུག

ད་བར་རྒྱ་བལ་ནང་བོད་མི་གྲངས་ ༩༡༥༣ ལ་ཏོག་དབྱིབས་འགོས་པའི་ཁྲོད་ནས་མི་ ༨༩༨༣ དྲག་སྐྱེད་བྱུང་བ་དང་མི་ ༡༦༨ རྐྱེན་འདས་སུ་ཕྱིན་ཡོད་འདུག

གསར་འགོད་པ། དཔལ་ལྡན།