དྲག་ཆར་རྐྱེན་གྱིས་ཆུ་ལོག་བྱུང་སྟེ་མི་མང་པོར་ཤི་རྨས་བྱུང་ཡོད་འདུག

ཨ་མར་ནཱ་ཐི་ཁུལ་དུ་ཆུ་ལོག་བྱུང་སྟེ་མི་མང་པོར་ཤི་རྨས་བྱུང་སྟབས་ད་ལྟའི་ཆར་གནས་མཇལ་བ་དང་ཡུལ་སྐོར་བ་ཚོ་བཀག་འགོག་བྱས་ཡོད་འདུག

ཁ་སང་ཕྱི་ཚེས་ ༡༠ ཉིན་རྒྱ་གར་བྱང་ཕྱོགས་ (Jammu and Kashmir) ནང་ཡོད་པའི་ཨ་མར་ནཱ་ཐི་དགོན་པ་ (Amarnath Temple) ཁུལ་དུ་དྲག་ཆར་རྐྱེན་གྱིས་ཆུ་ལོག་བྱུང་སྟེ་གནས་མཇལ་བ་དང་ཡུལ་སྐོར་སྤྲོ་འཆམ་པ་ ༡༦ རྐྱེན་འདས་དང་། ༣༥ ཙམ་ལ་རྨས་སྐྱོན་ཕོག་ཡོད་ཅིང་། ཡུལ་སྐོར་སྤྲོ་འཆམ་པ་ ༤༠ ལྷག་གར་སོང་ཆ་མེད་དུ་གྱུར་ཡོད་འདུག

གནད་དོན་དེའི་སྐོར་ལ་ཨ་མར་ནཱ་ཐི་མྱུར་སྐྱོབ་ཚན་པའི་འགན་འཛིན་ (Atul Karwal)གྱིས། ད་ལྟའི་ཆར་ཡུལ་སྐོར་སྤྲོ་འཆམ་པ་ ༡༦ རྐྱེན་འདས་དང་ ༤༠ གར་སོང་ཆ་མེད་དུ་གྱུར་ཡོད་པ་དང་། ས་རུད་ཀྱི་དཀའ་ངལ་བྱུང་མེད་ཀྱང་། ད་ལྟའང་ཆར་པ་བབས་བཞིན་ཡོད་ཀྱང་། ཁོང་ཚོས་གར་སོང་ཆ་མེད་དུ་གྱུར་པ་དང་རྨས་སྐྱོན་ཕོག་པའི་ཡུལ་སྐོར་སྤྲོ་འཆམ་པ་དེ་དག་འཚོལ་མུས་ཡིན་སྐོར་བརྗོད་ཡོད་འདུག

ཐེངས་འདིར་ཚོད་རྩིས་བྱས་ན་ཡུལ་སྐོར་སྤྲོ་འཆམ་པ་གནས་སྐོར་བ་སྟོང་ཕྲག་ ༡༥ ཡོད་ན་ཡང་། གནས་སྐབས་རིང་ཡུལ་སྐོར་སྤྲོ་འཆམ་པ་རྣམས་གནས་སྐོར་བཀག་འགོག་བྱས་ཡོད་པ་དང་།ད་ལྟའི་ཆར་མྱུར་སྐྱོབ་ཚན་པ་དང་དམག་མི།ས་མཚམས་ཀྱི་ཉེན་རྟོག་པ་ལ་སོགས་པས་ཐད་འཕུར་གནམ་གྲུ་སོགས་བེད་སྤྱོད་བྱས་ཏེ་རྨས་སྐྱོན་ཕོག་པ་རྣམས་སྨན་ཁང་དུ་སྨན་བཅོས་བྱེད་པར་འཁྲིད་བཞིན་ཡོད་འདུག

སྤྱིར་ཨ་མར་ནཱ་ཐི (Amarnath Yatra)ཟེར་བའི་ས་ཁུལ་དེ་ནི་ཆུ་ལོག་གི་དཀའ་ངལ་འཕྲད་སའི་ས་ཁུལ་ཞིག་ལ་ངོས་འཛིན་བྱེད་ཀྱི་ཡོད་པ་དང་། དམིགས་བསལ་གྱིས་ཆར་དུས་སུ་ཆུ་ལོག་དང་ས་རུད་ཀྱི་དཀའ་ངལ་མང་པོ་འཕྲད་ཀྱི་ཡོད་འདུག གཞན་ཡང་དགུན་དུས་གནམ་གཤིས་གྲང་དྲགས་པས་ཡུལ་སྐོར་སྤྲོ་འཆམ་པ་དང་གནས་སྐོར་བ་རྣམས་ལུས་པོ་འཁྱགས་ཏེ་འདས་གྲོངས་སུ་ཕྱིན་པ་སོགས་དཀའ་ངལ་མང་པོ་འཕྲད་ཀྱི་ཡོད་པར་བརྟེན།ཐེངས་མང་པོར་ཁུལ་དེར་གནས་སྐོར་དུ་འགྲོ་སྐྱོད་ཐད་དམ་དྲགས་ཡོང་གི་ཡོད་འདུག་

ད་ཐེངས་གཅིག་པུ་ཙམ་མ་ཡིན་པར།དེ་སྔ་ཕྱི་ལོ་ ༢༠༡༣ ཟླ ༧ ཚེས་ ༡༦ ཉིན་ཨ་མར་ནཱ་ཐི(Amarnath) ས་ཁུལ་དུ་ཆུ་ལོག་བྱུང་སྟེ། ཡུལ་མི་དང་ཡུལ་སྐོར་སྤྲོ་འཆམ་པ་ ༥༧༠༠ ལྷག་རྐྱེན་འདས་བྱུང་ཡོད་འདུག དེ་བཞིན་ཕྱི་ལོ་ ༡༩༩༦ ལོར་ས་ཁུལ་དེར་གནམ་གཤིས་ཡག་པོ་མེད་པ་དང་ཆུ་ལོག་གིས་ཡུལ་སྐོར་སྤྲོ་འཆམ་པ་ ༢༥༠ ལྷག་རྐྱེན་འདས་དང་། དགུན་འདུས་སུ་གནམ་གཤིས་ཧ་ཅང་གི་གྲང་མོ་ཡོད་པས། ཡུལ་མི་ ༢༤༢ ཙམ་ལུས་པོ་འཁྱགས་ཏེ་འདས་གྲོངས་སུ་ཕྱིན་པའི་གནས་ཚུལ་བྱུང་ཡོད་འདུག

གསར་འགོད་པ། བསྟན་འཛིན་ཕུར་བུ།