ཁ་སང་ནས་གནས་མཆོག་རྡོ་རྗེ་གདན་དུ་དཔལ་ཇོ་ནང་པའི་སྨོན་ལམ་ཆེན་མོ་སྐབས་བཅུ་དྲུག་པ་དབུ་འཛུགས་ཀྱིས་ཉིན་གྲངས་བཞིའི་རིང་འཚོག་གི་ཡོད་འདུག
འདི་ལོར་ཀུན་མཁྱེན་དོལ་པོ་སངས་རྒྱས་སྐུ་ཞི་བར་གཤེགས་ནས་ལོ་ ༦༦༠ འགོར་བའི་དུས་དྲན་དང་སྟབས་བསྟུན། ནོར་གླིང་ཇོ་ནང་དུས་འཁོར་གྲྭ་ཚང་གི་གོ་སྒྲིག་འོག ཁང་སང་ཕྱི་ཚེས་ ༡༩ ཉིན་ནས་གནས་མཆོག་རྡོ་རྗེ་གདན་གྱི་མཆོད་རྟེན་ཆེན་མོའི་ལྷོ་ཕྱོགས་སུ་༧སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་དབུ་བཞུགས་ཐོག་དགོན་སྡེ་ཁག་གི་མཁན་ལས་ཟུར་རྣམ་པ་དང་། དགེ་བའི་བཤེས་གཉེན་རྣམས་གཙོས་རྡོ་རྗེ་གདན་དུ་ཆོས་ཞུ་བར་ཕེབས་པའི་དད་ལྡན་སེར་སྐྱ་མང་ཚོགས་བཅས་འཛོམས་ཐོག་ནས། ༧དཔལ་རྒྱལ་བ་ཇོ་ནང་པའི་སྐབས་བཅུ་དྲུག་པའི་སྨོན་ལམ་ཆེན་མོ་དབུ་འཛུགས་གནང་ཡོད་པ་དང་། སྨོན་ལམ་ཆེན་མོ་དེ་ཉིད་ཀྱི་སྐབས་སུ་ཤེས་རབ་སྙིང་པོ་དང་བར་ཆད་ལམ་སེལ། ཟབ་ལམ་རྡོ་རྗེ་རྣལ་འབྱོར་གྱི་སྔོན་འགྲོ སྒྲོལ་ཆོག ལྟུང་བཤགས། བླ་མ་མཆོད་པ། འཇམ་དཔལ་མཚན་བརྗོད། བཟང་སྤྱོད་སྨོན་ལམ། འཕྲིན་བཅོལ། ཀུན་མཁྱེན་ཚོགས་མཆོད། རིས་མེད་བསྟན་རྒྱས་སྨོན་ལམ། སྨོན་ལམ་རྒྱལ་བ་རྒྱ་མཚོ། དུས་འཁོར་སྨོན་ལམ། ༧གོང་ས་ཐམས་ཅད་མཁྱེན་པའི་གསུང་ཇོ་ནང་བསྟན་རྒྱས་སྨོན་ལམ། བསྟན་འབར་མ་བཅས་གསུང་གནང་མཛད་བཞིན་པ་མ་ཟད། མཆོག་སྤྲུལ་འཇིགས་མེད་གཞན་ཕན་ཆོས་ཀྱི་ཉི་མ་དང་། མཆོས་སྤྲུལ་ཀུན་དགའ་ངེས་དོན་རྒྱ་མཚོ་རྣམ་གཉིས་ལ་ཁྲི་འདོད་གྱི་མཛད་རིམ་ཞིག་ཀྱང་ཡོད་པ་རེད་འདུག་ལ། སྨོན་ལམ་ཆེན་མོ་དེ་ཉིད་ཕྱི་ཚེས་ ༡༩ ནས་ ༢༢ བར་ཉིན་གྲངས་བཞིའི་རིང་འཚོག་གིན་ཡོད་པ་དང་ཉིན་བཞི་བར་ཇོ་ནང་༧རྒྱལ་ཚབ་རིན་པོ་ཆེ་མཆོག་གིས་ཀུན་མཁྱེན་ཡབ་སྲས་ཀྱི་རྗེས་གནང་གི་བཀའ་དབང་སྩལ་གཏན་འཁེལ་ཡོད་འདུག
ཟླ་འདིའི་ཕྱི་ཚེས་ ༢༥ ཉིན་ནས་ཕྱི་ལོ་ ༢༠༢༣ ཟླ་ ༡ ཚེས་ ༥ བར་ཉིན་གྲངས་བཅུའི་རིང་དཔལ་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་སྐབས་སོ་གཅིག་པ་དེ་གནས་མཆོག་རྡོ་རྗེ་གནད་དུ་འཚོག་གཏན་འཁེལ་ཡོད་པ་དང་། སྨོན་ལམ་ཆེན་མོའི་སྐབས་དཔལ་ལྡན་ས་སྐྱ་པའི་བཤད་སྒྲུབ་ལས་གསུམ་གྱི་ྦཡ་ཀུན་གེགས་མེད་ཆོས་བཞིན་དུ་འགྲུབ་པའི་ཆེད་དམིགས་བསལ་སྤྱི་རིམ་རྟེན་འབྲེལ་སྙིང་པོ་དང་། པ་པཎ་འདས་མཆོད་ཉིན་བླ་མཆོད་དང་འབྲེལ་ཤེས་བྱ་མ་གང་མང་བགྲང་གསོག་ཉིན་གཉིས་རིང་འཚོག་གཏན་ཁེལ་ཞིང་། ༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་སྐྱབས་མགོན་གོང་ཁྲི་འཛིན་རྣམ་གཉིས་གཙོས་བསྟན་བདག་བླ་ཆེན་རྣམ་པ་ཚོགས་མགོན་དུ་ཆིབས་བསྒྱུར་དང་། འཆར་ཅན་བཞིན་༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ལ་བརྟན་བཞུགས་འདེགས་འབུལ་ཞུ་རྒྱུ་བཅས་ཡིན་འདུག
ཡང་ཕྱི་ཚེས་ ༢༩ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་གནས་མཆོག་རྡོ་རྗེ་གདན་དུ་ཉིན་གྲངས་གཉིས་རིང་གསུང་ཆོས་སྩལ་གཏན་ཁེལ་བ་དང་སྟབས་བསྟུན། རྒྱལ་སྤྱིའི་དགེ་ལྡན་ལྷན་ཚོགས་ཀྱི་སྨོན་ལམ་གོ་སྒྲིག་ཚོགས་ཆུང་གིས་གོང་ས་མཆོག་ལ་གསོལ་འདེབས་ཞུས་དོན་བཞིན། ཕྱི་ཚེས་ ༢༩ ཉིན་ནས་ཕྱི་ལོ་ ༢༠༢༣ ཟླ་ ༡ ཚེས་ ༣ ཉིན་གྲངས་ལྔའི་རིང་དགེ་ལྡན་ལྷན་ཚོགས་ཀྱི་སྨོན་ལམ་འཕར་མ་ཞིག་འཚོག་གཏན་ཁེལ་ཡོད་པ་དང་། ཕྱི་ལོ་གསར་བའི་ཚེས་གཅིག་ཉིན་དགེ་ལུགས་པ་ཡོངས་ནས་གནས་མཆོག་རྡོ་རྗེ་གདན་དུ་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུ་གཏན་ཁེལ་ཡོད་པ་རེད།
