རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པས་རྒྱལ་ཁབ་བཅོ་ལྔ་ལྷག་གི་ཕྱི་སྲིད་བློན་ཆེན་ལ་རེ་སྐུལ་སྙན་ཞུ་ཕུལ་ཏེ་བོད་མིའི་རིགས་རྫས་བསྡུ་རུབ་ཀྱི་ལས་གཞི་མཚམས་འཇོག་དགོས་པའི་རེ་སྐུལ་གནང་འདུག
ཉེ་ལམ་རྒྱ་ནག་གཞུང་གིས་བཙན་དབང་གི་ཐོག་ནས་བོད་རང་སྐྱོང་ལྗོངས་ཟེར་བ་དང་མཚོ་སྔོན་ཞིང་ཆེན་སོགས་ནས་བྱིས་པ་ལོ་ ༦ ནས་བཟུང་ཚང་མར་རིགས་རྫས་བསྡུ་རུབ་བྱེད་བཞིན་ཡོད་པ་ལྟར། ཟླ་འདིའི་ཕྱི་ཚེས ༡༦ ཉིན་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པ་ (Inter-Parliamentary Alliance on China) ཡིས་རྒྱལ་ཁབ་བཅོ་ལྔ་ལྷག་གི་ཕྱི་སྲིད་བློན་ཆེན་རྣམ་པར་རེ་སྐུལ་སྙན་ཞུ་ཕུལ་ཏེ། རྒྱ་ནག་གཞུང་གིས་ཁྲིམས་མཐུན་མིན་པའི་ཐོག་ནས་བོད་མི་དང་ཡུ་གུར་མི་མང་གི་རིགས་རྫས་བསྡུ་རུབ་བྱེད་བཞིན་པ་མཚམས་འཇོག་དགོས་པའི་རེ་སྐུལ་གནང་འདུག
རེ་སྐུལ་སྙན་ཞུ་དེ་ཨོ་གླིང་ཕྱི་སྲིད་བློན་ཆེན་དང་གྲོས་ཚོགས་གོང་མའི་འཐུས་མི་ཕེན་ཝའེ་ཝོང་(Penny Wong)མཆོག་དང་། བྷེལ་ཇམ་ཕྱི་སྲིད་བློན་ཆེན་ཧེན་ཇ་ལབ་བྷིན་(Hadja Lahbib)མཆོག ཡུ་རོབ་ཕྱི་སྲིད་དང་བདེ་འཇགས་སྲིད་ཇུས་ཚན་པའི་འཐུས་མི་ཇོ་སི་ཧྥི་བྷོར་རིལ(Joseph Borrell)མཆོག ཁེ་ན་ཊ་དང་། སུད་སི། སུ་ཝེ་ཌིན་སོགས་ཕྱི་སྲིད་བློན་ཆེན་རྣམས་ཀྱི་མཚན་ཐོག་ཏུ་ཕུལ་ཏེ། རྒྱལ་ཁབ་དེ་དག་གིས་རྒྱ་ནག་གཞུང་གིས་བོད་དང་ཡུ་གུར་སོགས་ཀྱི་ནང་རིགས་རྫས་བསྡུ་རུབ་བྱེད་མུས་ཡིན་པའི་ལས་གཞི་མྱུར་ཏུ་མཚམས་འཇོག་བྱ་བཅུག་དགོས་སྐོར་དང་། ཨ་རིའི་འཕྲུལ་རིགས་ཚན་རྩལ་བཟོ་ཚོང་ཁང་ (Thermo Fisher Scientific) གིས་རིགས་རྫས་བསྡུ་རུབ་ཀྱི་མཁོ་ཆས་ཚོང་འབྲེལ་བྱས་ཏེ། ད་བར་དུ་ཉུང་མཐར་ཨ་སྒོར་༡༦༠། ༠༠༠༠ ལྷག་གི་ཡོང་བབ་བསགས་ཡོད་སྐོར་སོགས་བཀོད་འདུག
ཡང་རྒྱལ་སྤྱིའི་གྲོས་ཚོགས་འཐུས་མི་མཉམ་འབྲེལ་ཚོགས་པའི་ཁོངས་མི་ ༡༥ ལྷག་གིས་མཚན་རྟགས་བཀོད་པའི་རེ་སྐུལ་སྙན་ཞུ་དེའི་ནང་། རྒྱ་ནག་གཞུང་གིས་བྱིས་པ་ཚུད་པའི་མི་སྒེར་གྱི་ཁེ་ཕན་འཕྲོག་པ་དང་། བོད་མི་དང་ཤར་ཏུར་ཀི་སི་ཐན་གཙོས་གྲངས་ཉུང་མི་རིགས་རྣམས་ལ་བྱ་ར་དང་ཉུལ་ཞིབ་སོགས་བྱས་དང་བྱེད་བཞིན་པ་དང་། གྲངས་ཉུང་མི་རིགས་རྣམས་ཀྱི་རིགས་རྫས་བརྟག་དཔྱད་བྱས་པར་བློ་ཕམ་ཆེན་པོ་ཡོད་པ་དང་། རྒྱལ་སྤྱིའི་སྤྱི་སྒེར་གྱི་ཚོགས་སྡེ་ཚོས་ཨ་རིའི་འཕྲུལ་རིགས་ཚན་རྩལ་བཟོ་ཚོང་ཁང་དང་རྒྱ་ནག་གི་ ( BGI Group)གཉིས་ཀྱིས་མུ་མཐུད་དུ་རིགས་རྫས་བསྡུ་རུབ་ཆེད་ཡོ་ཆས་ཉོ་ཚོང་བྱས་ཚེ། ཚོགས་སྡེ་དེ་གཉིས་ཀྱི་ཚོང་ལམ་བཀག་སྡོམ་དང་ཉེས་ཆད་སོགས་གཅད་དགོས་པའི་རེ་སྐུལ་ཡང་གནང་འདུག
དེ་བཞིན་ཟླ་འདིའི་ཕྱི་ཚེས ༡༤ ཉིན་ཁེ་ན་ཌའི་ཊོ་རོན་ཊོ་གཙུག་ལག་སློབ་གཉེར་ཁང་གི་སི་ཊི་ཛིན་བརྟག་དཔྱད་ཁང་(Citizen Lab) གི་ཉམས་ཞིབ་ཚན་པས་སྙན་ཐོ་ཞིག་བཏོན་པའི་ནང་། རྒྱ་གཞུང་ཉེན་རྟོག་པས་ཕྱི་ལོ་ ༢༠༡༩ ཟླ་ ༧ བར་བོད་མཚོ་ཤར་དང་མཚོ་བྱང་། སྐྱེ་རྒྱུ་མདོ་སོགས་ནས་བོད་མི་ས་ཡ་གཅིག་དང་ཕྱེད་ཀ་ཙམ་གྱི་མིག་འབྲས་རིགས་རྫས་བསྡུ་ལེན་བྱས་ཡོད་པ་མ་ཟད། རྒྱ་ནག་གཞུང་གིས་མཚོ་སྔོན་ཞིང་ཆེན་ཟེར་བའི་ནང་གི་མི་གྲངས་ས་ཡ་༥།༩ ཡི་མིག་འབྲས་བརྟག་དཔྱད་བྱས་ཡོད་པ་དང་། དེས་མཚོ་སྔོན་ཞིང་ཆེན་གྱི་མི་འབོར་གྱི་བརྒྱ་ཆའི་ ༢༦ ཙམ་ཟིན་ཡོད་སྟབས། དེ་ནི་རྒྱ་ནག་གཞུང་གིས་མཚོ་སྔོན་ཞིང་ཆེན་ནང་རིགས་རྫས་བརྟག་དཔྱད་བྱས་པའི་གྲངས་འབོར་མང་ཤོས་དེ་ཆགས་ཡོད་སྐོར་བསྒྲགས་ཡོད་པ་རེད།
གཞན་ཡང་། ཕྱི་ལོ ༢༠༡༦ ཙམ་ནས་རྒྱ་ནག་གཞུང་གིས་བོད་ཆབ་མདོ་གྲོང་ཁྱེར་དུ་རིགས་རྫས་བརྟག་དཔྱད་ཀྱི་ལས་གཞི་ལག་བསྟར་བྱས་ཏེ། ས་གནས་བོད་མིའི་མཛུབ་རྗེས་དང་། ཁྲག་རིགས་བསྡུ་ལེན་བྱས་ཡོད་པ་མ་ཟད། བོད་མི་དང་ཡུ་གུར་གཙོས་རྒྱ་ནག་གིས་བཙན་བཟུང་བྱས་པའི་གྲངས་ཉུང་མི་རིགས་རྣམས་ཀྱི་རིགས་རྫས་ཆོག་མཆན་མེད་པར་བེད་སྤྱོད་བཏང་ཡོད་པའི་གནས་ཚུལ་ཐོན་ཡོད་པ་རེད།
གསར་འགོད་པ། དཔལ་ལྡན།
