བྱང་ཀོ་རི་ཡའི་རྒྱལ་ས་ཕེན་ཡང་ཁ་གསལ་གང་ཡང་མེད་པའི་ཐོག་ནས་ཐེམ་སྤང་བཀག་རྒྱ་བསྡམས་པ་དེས་ཁྱིམ་མཚེས་རྒྱལ་ཁབ་ཁག་ལ་སེམས་འཚབ་འཕར་མ་ཞིག་བཟོས་ཡོད་འདུག
རྒྱ་ནག་ཝུའུ་ཧན་ནས་ཆེས་ཐོག་མར་མཆེད་པའི་ཏོག་དབྱིབས་གཉན་རིམས་ཀྱིས་རྒྱལ་ཁབ་མང་པོ་ཞིག་གི་སྲིད་འབྱོར་རིག་གསུམ་ལ་གྱོང་གུད་ཚབས་ཆེན་ཐེབས་བཅུག་ཡོད་པས། རྒྱལ་ཁབ་ཁག་གིས་རང་རང་གི་རྒྱལ་ཁབ་ཏུ་རིམས་ནད་འགོག་སྲུང་སོགས་ཀྱི་སླད། ཐེམ་སྤང་བཀག་རྒྱ་དང་ས་མཚོ་གནམ་གསུམ་གྱི་འགྲིམ་འགྲུལ་རྣམས་བཀག་སྡོམ་བྱས་ཡོད་པ་ལྟར། དེ་རིང་རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གསར་ཁང་གིས་གནས་ཚུལ་སྤེལ་བ་ལྟར་ན། བྱང་ཀོ་རི་ཡའི་གཞུང་གིས། དེ་རིང་ནས་ཉིན་གྲངས་ལྔའི་རིང་བྱང་ཀོ་རི་ཡི་རྒྱལ་ས་ཕེན་ཡང་( Pyongyang) ནད་རྟགས་མི་ཆོད་ཅིང་ཁྱབ་གདལ་འགྲོ་བཞིན་པའི་གློ་བའི་འགོས་ནད་ཅིག་འགོག་སྲུང་གི་ཆེད་ཐེམ་སྤང་བཀག་རྒྱ་བསྡམ་རྒྱུ་ཡིན་ལུགས་བསྒྲགས་ཡོད་འདུག
ད་ལྟ་གསར་ལམ་ཁག་ཏུ་ཁ་གསལ་མེད་པའི་ན་ཚ་(unspecified illness) ཞིག་གི་དབང་གིས་བྱང་ཀོ་རི་ཡའི་རྒྱལ་ས་ཕེན་ཡང་ནང་བཀག་རྒྱ་བསྡམས་པ་ལས། ཏོག་དབྱིབས་རིམས་ནད་མཆེད་ནས་བཀག་རྒྱ་བསྡམས་པའི་གནས་ཚུལ་གང་ཡང་ཐོན་མེད་པ་དང་། རྒྱལ་སར་གནས་སྡོད་མི་མང་རྣམས་ཉིན་གྲངས་ལྔའི་རིང་སོ་སོའི་རང་ཁྱིམ་དུ་གནས་སྡོད་བྱ་དགོས་པ་ལས་ཕྱི་རོལ་སོགས་སུ་གང་བྱུང་འཁྱམ་ཉུལ་བྱ་མི་ཆོག་ཅིང་། མི་མང་ནས་ཉིན་རེ་བཞིན་ཡང་ནས་ཡང་དུ་ཚ་བ་བརྟག་དཔྱད་གཏོང་དགོས་པའི་བཀག་ཕབ་ཡོད་འདུག་ལ། དབྱེ་ཞིབ་པས་འཛམ་གླིང་སྤྱི་ཡོངས་ཀྱི་ཏོག་དབྱིབས་རིམས་ནད་ཀྱི་གནས་སྟངས་ཇེ་བཟང་དུ་འགྲོ་མུས་ཡིན་པའི་སྐབས་འདིར། བྱང་ཀོ་རི་ཡར་ཁ་གསལ་གང་ཡང་མེད་པའི་ཐོག་ནས། གློ་བུར་དུ་ནད་ཚ་ཞིག་གི་དབང་གིས་ཐེམ་སྤང་བཀག་རྒྱ་བསྡམས་པ་དེས། ཁྱིམ་མཚེས་རྒྱལ་ཁབ་མང་པོ་ཞིག་ལ་སེམས་ངལ་འཕར་མ་ཞིག་བཟོས་ཡོད་སྐོར་བརྗོད་འདུག
འདས་ལོའི་ཕྱི་ཟླ ༧ ཚེས ༢༧ ཉིན་ནས་བྱང་ཀོ་རི་ཡས་ད་བར་རྒྱལ་ཁབ་དེར་ཏོག་དབྱིབས་རིམས་ནད་ཀྱི་ནད་པའི་ཁ་གྲངས་དང་། རིམས་ནད་ཀྱི་དབང་གིས་འདས་གྲོངས་སུ་གྱུར་བའི་གྲངས་འབོར་སོགས་གསལ་སྟོན་བྱས་མེད་པ་དང་། སྐབས་དེར་བྱང་ཀོ་རི་ཡར་མི་གྲངས་ས་ཡ་ ༢༥ ཙམ་ཡོད་པ་ལས། མི་གྲངས་ས་ཡ ༤།༧༧ ལྷག་ལ་ཆམ་པ་ཕོག་པ་དང་། ཚ་བ་སོགས་རྒྱས་ནས་ཏོག་དབྱིབས་རིམས་ནད་འགོས་ཁྱབ་བྱུང་ཟིན་པའི་ཚོད་དཔག་བྱས་ཡོད་ཅིང་། ད་ལན་གསལ་ཁ་གང་ཡང་མེད་པའི་ཐོག་ནས་གློ་བུར་དུ་ཐེམ་སྤང་བཀག་རྒྱ་བསྡམས་པ་དེ། ཏོག་དབྱིབས་རིམས་ནད་མཆེད་སྐབས་མཐུན་རྐྱེན་ལེགས་པོ་མེད་པ་མ་ཟད། བརྟག་དཔྱད་ཡག་པོ་བྱས་ཐུབ་མེད་པར། རིམས་ནད་འགོག་སྲུང་གི་ཐད་ལ་འཐུས་ཤོར་བཏང་བའི་དབང་གིས་ཡིན་སྲིད་པའི་ཚོད་དཔག་ཀྱང་བྱེད་ཀྱིན་འདུག
ཡང་གནད་དོན་དབྱེ་ཞིབ་པ་ཁག་གཅིག་གིས། བྱང་ཀོ་རི་ཡའི་གྲོང་ཁྱེར་ཆེ་ཤོས་རྒྱལ་ས་ཕེན་ཡང་ཐེམ་སྤང་བཀག་རྒྱ་བསྡམས་པ་དེས། བྱང་ཀོ་རི་ཡས་སླར་ཡང་མངོན་གསལ་དོད་པོའི་ཐོག་ནས་ཏོག་དབྱིབས་རིམས་ནད་ཀྱི་དཀའ་ངལ་ལ་གདོང་ལེན་དང་། ཏོག་དབྱིབས་རིམས་ནད་ནི་གནམ་གཤིས་འགྱུར་འགྲོ་སྐབས་སུ་མཆེད་ཀྱིན་ཡོད་པས། ད་ལྟ་གོར་ཐིག་འོག་གི་ཚགས་ ༢༢ ཆགས་ཡོད་པའི་བྱང་ཀོ་རི་ཡའི་རྒྱལ་སར་ཡང་གྲང་ངར་གྱི་རྐྱེན་གྱིས་ཆམ་རིམས་སོགས་བྱུང་ནས་རིམས་ནད་མཆེད་ཉེན་ཡོད་སྐོར་སོགས་བརྗོད་འདུག
རྒྱལ་ཁབ་མང་པོ་ཞིག་གིས་རང་རང་གི་མི་སེར་རྣམས་ཏོག་དབྱིབས་གཉན་རིམས་ཀྱི་འགོག་ཁབ་སོགས་བརྒྱབ་དང་རྒྱག་མུས་ཡིན་ཡང་། ཕྱི་ལོ་ ༢༠༢༡ ལོར་བྱང་ཀོ་རི་ཡས་རྒྱལ་སྤྱིའི་ཏོག་དབྱིབས་འགོག་ཁབ་ཀྱི་ལས་གཞིའི་ཁྲོད་ནས་འགོག་ཁབ་ས་ཡ་ ༣ ཙམ་སྤྲད་པ་དེ་བླངས་མེད་པ་དང་། དེ་བཞིན་ནོ་ཝ་ཝེག་སི་(Novavax) འགོག་ཁབ་འབུམ་ ༢། ༥ ལྷག་སྤྲད་པ་དེའང་དང་ལེན་བྱས་མེད་པས། ད་ལྟ་བྱང་ཀོ་རི་ཡ་ནི་འཛམ་གླིང་ནང་གི་འཕྲོད་བསྟེན་གྱི་ཆ་རྐྱེན་ཆེས་ཞན་པའི་རྒྱལ་ཁབ་ཅིག་ཏུ་ངོས་འཛིན་བྱེད་བཞིན་པ་མ་ཟད། ད་ལྟའང་མི་གྲངས་ས་ཡ་ ༢༥ ལ་ཏོག་དབྱིབས་འགོག་ཁབ་རྒྱག་ཐུབ་མེད་པའི་ཚོད་དཔག་བྱེད་ཀྱིན་འདུག
གསར་འགོད་པ། དཔལ་ལྡན།
