དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཁྲིག་སེ་རིན་པོ་ཆེ་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་བཞི་པ་པདྨ་ཤྲིའི་གཟེངས་རྟགས་འབུལ་བཞེས་གནང་བར་འཚམས་འཕྲིན་གནང་འདུག
དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་༸སྐྱབས་རྗེ་ཤར་པ་སྤྲུལ་སྐུ་རྗེ་བཙུན་ངག་དབང་འཇམ་དབྱངས་བྱམས་པ་བསྟན་འཛིན་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་བཞི་པ་པདྨ་ཤྲིའི་གཟེངས་རྟགས་འབུལ་བཞེས་གནང་བར་འཚམས་འདྲི་ཞུས་འདུག དེ་ཡང་སྲིད་སྐྱོང་མཆོག་གིས་བོད་གཞུང་མང་གཉིས་ཀྱི་ཚབ་ཞུས་ཏེ། སྐུ་ཉིད་ལ་པདྨ་ཤྲཱིའི་གཟེངས་རྟགས་འབུལ་བཞེས་གནང་བར་འཚམས་འདྲི་ཞུ་རྒྱུ་དང་། སྐུ་ཉིད་ལ་གཟེངས་རྟགས་འབུལ་བཞེས་གནང་བ་དེས། དམིགས་བསལ་གྱིས་བོད་མི་དང་ལ་དྭགས་ཀྱི་མི་མང་རྣམས་ལ་སྤོབས་པ་དང་དགའ་བ་སྐྱེ་འོས་པ་ཞིག་རེད། རིན་པོ་ཆེ་མཆོག་གིས་ཆོས་ཕྱོགས་ཀྱི་དབུ་ཁྲིད་དང་རྒྱ་གར་གྱི་གྲོས་ཚོགས་འཐུས་མི་ཟུར་པའི་ཐུགས་འགན་བཞེས་ཏེ་སྤྱི་ཚོགས་ལ་ཕན་པའི་ཞབས་འདེགས་རླབས་ཆེན་བསྒྲུབས་གནང་བར་རྗེས་སུ་ཡི་རངས་དང་བཀའ་དྲིན་རྗེས་དྲན་སླད་པདྨ་ཤྲཱིའི་གཟེངས་རྟགས་ཕུལ་བ་ཞིག་རེད། སྐུ་ཉིད་ཀྱི་གཞན་ཕན་གྱི་མཛད་པ་འཕྲིན་ལས་ཀྱིས་འགྲོ་བ་མིའི་རིགས་དང་། ནང་པ་སངས་རྒྱས་པའི་བསྟན་པར་ཞབས་འདེགས་སུ་འགྲོ་བའི་སྨོན་འདུན་ཞུ་ཡི་ཡོད། ཅེས་གསུངས་འདུག
ཕྱི་ཟླ་ ༡ ཚེས་ ༢༥ ཉིན་གྱི་དགོང་མོར་རྒྱ་གར་གཞུང་ནས་ཁྲིག་སེ་རིན་པོ་ཆེ་མཆོག་གི་དབུས་པདྨ་ཤྲི་གཟེངས་རྟགས་ཐོབ་མཁན་ ༡༠༦ གསལ་བསྒྲགས་གནང་ཡོད་པ་དང་། གླེ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱིས་རིན་པོ་ཆེ་མཆོག་ལ་འཚམས་འདྲི་ཞུས་པའི་ནང་། རིན་པོ་ཆེ་མཆོག་ལ་སྙན་གྲགས་ཅན་གྱི་པདྨ་ཤྲཱིའི་གཟེངས་རྟགས་འབུལ་བཞེས་གནང་བར་དགའ་བསུ་དང་བཀྲ་ཤིས་བདེ་ལེགས་ཞུ་རྒྱུ་ཡིན། དུས་ཚིགས་འདིར་ང་ཚོ་སྤོབས་པ་སྐྱེ་དགོས་པ་ཞིག་དང་། པདྨ་ཤྲཱིའི་གཟེངས་རྟགས་འབུལ་བཞེས་གནང་བ་དེ་འོས་ཤིང་འཚམས་པ་ཞིག་ཡིན་སྐོར་སོགས་ཞུས་འདུག་ལ། ལ་དྭགས་གཞུང་མང་གཉིས་གཙོ་བོར་གྱུར་བའི་དད་ལྡན་སེར་སྐྱ་མི་མང་གིས་རིན་པོ་ཆེ་མཆོག་ལ་དགའ་དད་སྤྲོ་གསུམ་གྱི་ཐོག་ནས་འཚམས་འདྲི་ཞུས་ཡོད་པ་རེད།
གཞན་ཡང་། ཕྱི་ལོ་ ༢༠༢༡ ཟླ་ ༡༠ ཚེས་ ༣༡ ཉིན། གླེ་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱིས། ཁྲིག་སེ་རིན་པོ་ཆེ་མཆོག་ལ་ལོ་མང་རིང་ཆོས་སྲིད་གཉིས་ཀྱི་ཐོག་ནས་ལ་དྭགས་ཀྱི་མི་རིགས་དང་སྤྱི་ཚོགས་ལ་བྱམས་བརྩེ་དང་ལྷག་བསམ་རྣམ་པར་དག་པའི་སྒོ་ནས་མཛད་པ་བསྐྱངས་པར་ཆེ་བསྟོད་དུ་ལ་དྭགས་སུ་སྙན་གྲགས་ཡོད་པའི་ཕྱི་ལོ་ ༢༠༢༡ ལོའི་ལ་དྭགས་དཔལ་རྔམ་གཟེངས་རྟགས་ཕུལ་ཡོད་པ་རེད། དེ་བཞིན་ཕྱི་ལོ་ ༢༠༡༦ ལོར་༸གོང་ས་མཆོག་ནས་ལ་དྭགས་ཁྲིག་སེ་དགོན་དུ་དབྱར་ཆོས་ཆེན་མོ་དབུ་འབྱེད་མཛད་པ་དང་སྦྲགས། ལ་དྭགས་མི་མང་ནས་ཁྲིག་སེ་རིན་པོ་ཆེ་མཆོག་ལ་བཀའ་དྲིན་རྗེས་དྲན་ཞུ་སླད་༧གོང་ས་རྒྱལ་བ་རིན་པོ་ཆེ་མཆོག་གི་ཕྱག་ནས་གསེར་གྱི་གཟེངས་རྟགས་ཤིག་བསྩལ་གནང་ཡོད་པ་རེད།
༸སྐྱབས་རྗེ་ཤར་པ་སྤྲུལ་སྐུ་རྗེ་བཙུན་ངག་དབང་འཇམ་དབྱངས་བྱམས་པ་བསྟན་འཛིན་མཆོག་ནི་ཕྱི་ལོ་ ༡༩༤༣ ཟླ་ ༥ ཚེས་ ༢༠ ཉིན་ལ་དྭགས་ཆུ་ཤོད་གྲོང་མིང་འབིས་ལུ་པ་ཞེས་པའི་ཁྱིམ་དུ། ཡབ་ཡེ་ཤེས་དཔལ་འབྱོར་ཕུན་ཚོགས་དང་། ཡུམ་ཚེ་བརྟན་དཔལ་འཛིན་གཉིས་ཀྱི་སྲས་སུ་སྐུ་འཁྲུངས་ཡོད་ཅིང་། ཕྱི་ལོ་ ༡༩༥༣ ལོར་ཐོས་བསམ་སློབ་གཉེར་གནང་ཕྱིར་བོད་དུ་ཕེབས་ཏེ་ཕྱི་ལོ་ ༡༩༥༩ བར་དཔལ་ལྡན་བཀྲ་ཤིས་སྒོ་མང་གྲྭ་ཚང་དུ་གཞུང་ཆེན་ཁག་ལ་སློབ་གཉེར་གནང་། དེ་ནས་ཕྱི་ལོ་ ༡༩༦༨ ནས་ ༢༠༠༦ བར་དུ་ལ་དྭགས་མི་མང་གི་བདེ་སྡུག་སླད་རྒྱ་གར་གྲོས་ཚོགས་གོང་མའི་འཐུས་མི་གནང་མྱོང་བ་སོགས་ཆོས་སྲིད་གཉིས་ཀྱི་མཛད་པ་རླབས་ཆེན་བསྐྱངས་དང་སྐྱོང་བཞིན་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
